‟O Se Mamanu mo le Lotogatasi ia Iesu Keriso,” Liahona, Oke. 2024.

O Se Mamanu mo le Lotogatasi ia Iesu Keriso

Saunia e Peresitene Russell M. Nelson

Peresitene o Le Ekalesia a Iesu Keriso o le Au Paia o Aso e Gata Ai

Ata

Peresitene Russell M. Nelson

A o tatou lotogatasi ia Iesu Keriso e pei o tagata i le 4 Nifae, o lo tatou manao ia tasi e sili atu i o tatou eseesega ma taitai atu ai i le fiafia.

Ata

faatagata o Keriso

Ua tatou ola i se vaitau ua tatafe atu ai galu o feeseeseaiga ma finauga i le salafa o le lalolagi. Ua fesoasoani i ai tekinolosi ma le faaopoopo mai i ai o tagata ua faasolo ina malūlūina o latou loto, o nei malosiaga fevaevaea’i ua faamata’u mai i le faatumulia ai ō tatou loto i le ita ma faaleagaina a tatou fesootaiga i finauga. Ua faaleagaina sootaga lautele. Ua matamataita taua.

E faasaga i lenei tulaga lē manuia, o soo moni o Iesu Keriso e naunau mo le filemu ma saili ma le naunautai e fausia se ituaiga o sosaiete e ese mai—se ituaiga e faavae i aoaoga a Iesu Keriso. I lea tulaga ua poloa’iina ai i tatou e le Alii, “Ia tasi outou; ma afai tou te lē tasi e lē a aʼu outou” (Mataupu Faavae ma Feagaiga 38:27). E moni lava, o le lotogatasi o se faailoga lenei o le Ekalesia moni a Iesu Keriso.

E faapefea ona tatou galulue e faasagatau atu i malosiaga o fevaevaeaiga ma finauga? E faapefea ona tatou ausia le lotogatasi?

O le mea e lelei ai, o loo aumaia e le 4 Nifae i le Tusi a Mamona se faataitaiga ia i tatou. O lenei mataupu o loo faamauina puupuu ai le ala na soifua ai tagata ina ua uma ona asiasi atu le Faaola ia i latou, aoao i latou, ma faatuina Lana Ekalesia ia i latou. O lenei tala o loo faaalia ai le ala na ausia ai e nei tagata se lotogatasi fiafia ma le to’afilemu, ma ua tuuina mai ai ia i tatou se mamanu e mafai ona tatou mulimuli ai ina ia maua lenei lava lotogatasi e tasi.

Liua

I le 4 Nifae 1:1, tatou te faitau ai: ‟Sa faatuina e soo o Iesu se ekalesia a Keriso i laueleele atoa o faataamilo ai. Ma sa o mai [tagata] ia te i latou, ma le salamo moni ia latou agasala.”

Tatou te lotogatasi i le Alii ma le Faaola o Iesu Keriso. A o aoao tagata taitoatasi e uiga ia Iesu Keriso, Lana talalelei, ma Lana Ekalesia, e molimau mai le Agaga Paia i le upumoni i loto o tagata taitoatasi. Ona mafai lea e i tatou taitoatasi ona talia le valaaulia a le Faaola ia faatuatua ia te Ia ma mulimuli ia te Ia e ala i le salamo.

O lea e amata ai se faigamalaga o le liua o se tagata—e alu ese ai mai le tuinanauga manatu faapito ma le agasala ma agai atu i le Faaola. O Ia o le faavae o lo tatou faatuatua. Ma a o tatou taitoasi ma vaai atu ia te Ia i mafaufauga uma (tagai i le Mataupu Faavae ma Feagaiga 6:36), e avea o Ia ma se malosiaga autasi i o tatou olaga.

Feagaiga

O le talafaamaumau i le 4 Nifae o loo faaauau pea ona ta’u mai ai e faapea o i latou o ē na o mai i le Ekalesia ma salamo ia latou agasala ‟sa papatisoina i le suafa o Iesu; ma sa latou maua foi le Agaga Paia” (4 Nifae 1:1). Sa latou ulu atu i se feagaiga—o se sootaga faapitoa, fusia—ma le Atua.

Pe a tatou osia ma tausia feagaiga, ua tatou tauave le suafa o le Alii i o tatou luga o ni tagata taitoatasi. E le gata i lea, tatou te tauaveina foi Lona suafa i o tatou luga o se nuu. O i latou uma o ē osia feagaiga ma taumafai e tausia, e avea ma nuu o le Alii, o Ana oa tāua (tagai i le Esoto 19:5). O le mea lea, tatou te malaga ai i le ala o feagaiga e le gata i le taitoatasi ae faapena foi ona tatou malaga faatasi. O la tatou sootaga o le feagaiga ma le Atua tatou te maua ai se mafuaaga e tasi ma se faasinomaga e tasi. A o tatou fusia i tatou lava i le Alii, e fesoasoani o Ia ia i tatou ia ‟fili faatasi o [tatou] loto i le lotogatasi ma le alofa o le tasi i le isi” (Mosaea18:21).

Faamaoni, Tutusa, ma le Fesoasoani i ē Matitiva

O loo faaauau pea le tala i le 4 Nifae: ‟Sa leai ni finauga ma ni feteena’iga i totonu ia te i latou, ma sa faamaoni tagata taitasi uma i le tasi ma le isi.

‟Ma sa tutusa pau i latou i mea uma o i totonu ia te i latou; o lea sa leai se mauoa ma se mativa, pologa ma se saoloto, ae sa tuusaoloto i latou uma, ma faatofutofusia i le meaalofa faalelagi” (4 Nifae 1:2–3).

I a tatou feutagaiga faaletino, e finagalo le Alii ia tatou lē faaitū’au ma faamaoni le tasi i le isi ae aua le taufaavalea pe faaaoga e le tasi le isi (tagai i le 1 Tesalonia 4:6). A o tatou tuputupu a’e latalata atu i le Alii, ‟o le a lē i ai ia i [tatou] se manatu e faamanuʼa i le tasi, ae ia [tatou] nonofo i le filemu, ma faia i tagata taitoatasi e tusa ma le mea e tatau ai mo ia” (Mosaea 4:13).

Ua poloa’iina foi i tatou e le Alii e tausia i latou o ē matitiva ma lē tagolima. E tatau ona tatou ‟fefaasoaa’i o a [tatou] mea” e fesoasoani ai ia i latou, e tusa ai ma lo tatou tomai e faia ai, e aunoa ma le faamasinoina o i latou (tagai i le Mosaea 4:21–27).

E ao ia i tatou taitoatasi ona ‟manatu taua i lona uso e pei o ia lava ia te ia” (Mataupu Faavae ma Feagaiga 38:24). Afai e tatau ona avea i tatou ma nuu o le Alii ma ia lotogatasi, e lē gata e tatau ona tatou taulimaina tutusa le tasi ma le isi, ae e tatau foi ona tatou vaai moni atu i le tasi ma le isi e tutusa ma lagona i o tatou loto e tutusa i tatou—tutusa i luma o le Atua, e tutusa o tatou taua ma tutusa o tatou gafatia.

Usiusitai

O le lesona e sosoo ai mai le 4 Nifae e oo mai i lenei faaupuga faigofie: ‟Sa latou savavali e tusa ma poloaiga na latou maua mai lo latou Alii ma lo latou Atua” (4 Nifae 1:12).

Na aoaoina e le Alii nei tagata i Lana aoaoga faavae, tuu atu ia i latou poloaiga, ma valaauina ni auauna e auauna atu ia i latou. O se tasi o Ona faamoemoega i le faia o lenei mea o le faamautinoa lea o le a leai ni finauga ia i latou (tagai i le 3 Nifae 11:28–29; 18:34).

O lo tatou usiusitai i aoaoga a le Alii ma Ana auauna e tāua i lo tatou ala i le lotogatasi. E aofia ai i lenei mea la tatou tautinoga e usitai i le poloaiga ia salamo i soo se taimi tatou te lē atoatoa ai ma fesoasoani le tasi i le isi a o tatou taumafai e faia ia lelei atu ma avea ia sili atu i aso uma.

Ata

tagata o loo tagai i tusitusiga paia i se fonotaga

Feiloai Faatasi

O le isi, ua tatou aoao e faapea o tagata i le 4 Nifae sa ‟ola ai pea i le “anapogi ma le tatalo, ma i le potopoto soo faatasi e tatalo ma faalogologo i le afioga a le Alii” (4 Nifae 1:12).

E manaomia ona tatou feiloai faatasi. O a tatou sauniga tapua’i faalevaiaso o se avanoa tāua lea mo i tatou e maua ai le malosi, taitoatasi ma le aufaatasi. Tatou te aai ma feinu i le faamanatuga, aoao, tatalo, pepese faatasi, ma lagolago e le tasi le isi. O isi faatasiga e fesoasoani foi e atiina a’e ai se lagona o le auai, faauo, ma le faamoemoe tuufaatasi.

Alofa

Ona tuuina mai lea ia i tatou e le talafaamaumau i le 4 Nifae atonu o le ki tele lea i nei mea uma—o le mea a aunoa e lē mafai foi ona maua le lotogatasi moni: ‟Sa oo ina leai se finauga i le laueleele, ona o le alofa o le Atua sa mau i loto o tagata” (4 Nifae1:15).

E ausia le filemu faaletagata lava ia pe a tatou, alolofa moni i le Atua, i le naunau atu ma le lotomaualalo. O le poloaiga muamua lena ma le sili. O le alofa i le Atua e sili atu nai lo soo se tasi po o se isi lava mea o le tulaga lea e aumaia ai le filemu moni, mafanafana, mautinoa, ma le olioli. A o tatou atiina a’e le alofa i le Atua ma Iesu Keriso, o le a mautinoa le mulimuli mai lava o le alofa i le aiga ma le tuaoi.

O le olioli aupito sili o le a tatou oo i ai e tupu pe a faatumulia i tatou i le alofa mo le Atua ma mo Ana fanau uma.

O le agaalofa, o le alofa mama o Keriso, o le vaifofo lea i finauga. O le uiga ‘autu lea o se soo moni o Iesu Keriso. Pe a tatou faalotomaualaloina i tatou lava i luma o le Atua ma tatalo atu ma le malosi atoa o ō tatou loto, o le a Ia faaee mai i o tatou luga le alofa mama (tagai i le Moronae 7:48).

A o tatou saili uma ia maua le alofa o le Atua e nofo i o tatou loto, o le vavega o le lotogatasi o le a foliga mai o se mea ua tatou masani atoa ai.

Faasinomaga Paia

Mulimuli ane, sa faaalia e tagata i le 4 Nifae se faailoga o le lotogatasi lea e tatau ona tatou ua’i atu i ai: ‟Sa leai ni faomea, po o ni fasioti tagata, sa leai ni sa Lamanā, po o soo se ituaiga o tagata; ae sa tasi i latou, o le fanau a Keriso, ma o suli i le malo o le Atua” (4 Nifae 1:17).

O faailoga na vaevaeina ai tagata mo le faitau selau o tausaga na aveesea a o le’i oo mai i se faasinomaga e sili ona tumau ma faamamaluina. Sa latou vaai ia i latou lava—ma isi tagata uma—e tusa ai ma lo latou sootaga ma le Tama Faalelagi ma Iesu Keriso.

O ituaiga eseese ma eseesega e mafai ona lelei ma tāua ia i tatou. Ae o ō tatou faasinomaga sili ona tāua o mea ia e faatatau i lo tatou tupuaga ma le faamoemoega pa’ia.

Muamua i mea uma, o i tatou taitoatasi o se atalii po o se afafine o le Atua. Lona lua, i le avea ai ma se tagata auai o le Ekalesia, o i tatou taitoatasi o se atalii po o se afafine o le feagaiga. Ma le lona tolu, o i tatou taitoatasi o ni soo o Iesu Keriso. Ou te uunaia i tatou uma ia aua ne’i faatagaina se isi lava faailoaga e ‟suitulaga, sui, pe faamuamua i nei tofiga tumau e tolu.”

Ata

aiga o loo nonofo faatasi i luga o le fola

Ia Tasi

Ua valaaulia e Ie Atua tagata uma e o mai ia te Ia. O loo i ai se avanoa mo tagata uma. Atonu tatou te eseese i a tatou aganuu, faiga faaupufai, ituaiga, tofo, ma le tele o isi auala. Ae a o tatou lotogatasi ia Iesu Keriso, o na eseesega e matafi atu i lo latou taua ma suia i lo tatou manao sili ia tasi—ina ia avea i tatou ma ni O.

Ia teu i le loto lesona o loo aoaoina i le 4 Nifae. A o tatou taumafai taitoatasi e faaaofia nei elemene tāua o le lotogatasi i o tatou olaga, atonu e mafai ona faapea mai e uiga ia i tatou, e pei ona sa i ai i latou, ‟E moni e le mafai ona i ai o ni tagata e sili atu ona fiafia i totonu o tagata uma na foafoa e le aao o le Atua” (4 Nifae 1:16).