‟‘E Mafai Ona Tatou Faamaloloina La Tatou Sootaga?’ Taulimaina o Sauaga Faalegagana ma Faalelagona,” Liahona, Oke. 2024.
‟E Mafai Ona Tatou Faamaloloina La Tatou Sootaga?” Taulimaina o Sauaga Faalegagana ma Faalelagona
Afai o loo e aafia i sauaga faalegagana pe faalelagona, saili se fesoasoani. E mafai e uo, aiga, taitai o le Ekalesia, ma isi ona faafesoota’ia oe i punaoa ia o le a fesoasoani ia te oe e lagona ai le saogalemu ina ia mafai ona faamaloloina oe ma manatua lou tāua.
I le 71 o ona tausaga, na toe faaipoipo ai Ianeta (ua suia igoa). Sa i ai o ia ma lona toalua fou i le la ulua’i tafaoga faale-ulugalii ae lē fiafia loa lana tane ia te ia. Na manatua e Ianeta, ‟E le’i i ai lava se tasi ua talanoa faapea mai ia te a’u.” Sa popole ma fefe o ia.
I le āluga o le taimi sa faateteleina le ita o lona toalua. O le ee na liua i le palauvale, faipona, ma osofaiga patino i uiga o Ianeta. Sa ia fai mai o loo ia faamuamua ana uo ma lona aiga ia sili atu ona tāua nai lo ia.
“E lē sa’o,” o lana tala lea. ‟Ae ina ia tausia le filemu, sa ou taumamao ese ai mai ia i latou. Sa amata ona ou le auai atu i au uo. Ou te fai atu i ai ou te le o maua se lagona lelei.”
‟Po o a lava mea sa ou faia, sa lē lava mo ia,” o lana tala lea. ‟Sa amata ona ou tuuaia a’u lava i lona ita ma mafaufau, ‘Pe ana ou lē faia le mea lea po o lena.’ Sa amata ona ou mafaufau pe o a’u o se tagata leaga e pei ona ia fai mai ai.”
Sa ia fesili ifo ia te ia lava ni fesili faapea, ‟Afai e i ai so’u tāua, aisea na ou filifilia ai lenei tagata? Ma aisea ou te faatagaina ai o ia e tautala mai ia te a’u faapea? Pe sa tatau ea ona ou vaai i faailoga?” Sa agalelei tele o ia, gaua’i mai, ma agaalofa a o ma tafafao faamasani.
‟Sa ou matuā faanoanoa lava,” na ia manatuaina. Sa amata ona mafaufau o ia o le a sili atu pe afai e ma’i o ia ma oti ai ina ia lē toe tatalaina lana faaipoipoga. Sa faaipoipo muamua o ia ma sa lē mafai ona toe feagai ma se isi faaipoipoga lē manuia.
‟Semanu e lelei pe ana ou talanoa atu i se tasi,” o lana tala lea, ‟ae sa ou maasiasi tele. Ma sa ou iloa o le a latou fai mai ia te a’u e tuua o ia. Ou te le’i manao e faamuta le faaipoipoga ma ou te le’i manao foi e toe tuuatoatasi. O lea sa ou faamoemoe ai pea o le a suia mea uma, ma sa ou ta’uamiotonuina pea lana amio.”
O le Sauā o se Agasala Matuiā.
O nisi taimi e talia ai e tagata ua afaina le amio sese ona latou te lē o vaai i ai o se sauaga. E tupu sauaga faalelagona pe a taumafai se tagata e faatiga i upu, pulea, pe faasese se isi tagata. E mafai ona tino mai i ituaiga o faitioga matuiā, tuua’ia, faa’esea, faaseseina, taufaamata’u, faipona, po o le taofia o le alofa. E mafai ona tupu i soo se ituaiga o mafutaga: i faigauo, i mafutaga faamasani, i le va o taitoalua po o mātua ma fanau, e oo lava i le va o tagata faigaluega.
‟O le sauāina e aofia ai le faatosinaga a le fili,” na aoao mai ai Peresitene Russell M. Nelson. ‟O se agasala matuiā. I le avea ai ma Peresitene o le Ekalesia, ou te toe faamautu atu aoaoga a le Alii o Iesu Keriso i lenei faafitauli. Se’i o’u faamanino atoatoa atu: soo se ituaiga o sauaga i tamaitai, tamaiti, po o soo se tasi lava o se mea inosia lea i le Alii. E loto faavauvau o Ia ma ou loto faavauvau i soo se taimi lava e faamanu’alia ai soo se tasi lava. E faanoanoa o Ia ma tatou te faanoanoa uma mo tagata taitasi e aafia fua ona o sauaga o soo se ituaiga. O i latou e faia nei amioga matagā tele e lē gata e tali atu i tulafono a tagata ae o le a faafesaga’i foi ma le to’asa o le Atua Silisiliese. …
“… O le a lē taliaina lava e le Faaola ni sauaga, ma i le avea ai ma Ona soo, e lē mafai foi ona tatou taliaina.”
O i tatou uma o atalii ma afafine o le Atua ma ua i ai se natura paia ma se taunuuga. Ua aoao mai i tatou e le talalelei a Iesu Keriso ia fealofani (tagai i le Ioane 13:34) ma ia taulimaina isi e pei ona tatou mananao e taulimaina i tatou (tagai i le Mataio 7:12).
E Masani Ona Lagona e Tagata Ua Afaina le Tausalaina
E mafai e tagata ua afaina ona lagona le fefe, maasiasi, faanoanoa, leai o se faamoemoe, ma le faaitiitia o le tāua o le tagata lava ia.
O le lua tausaga o le faaipoipoga a Diego i se fafine saua na tuua ai o ia i le nutimomoia ma le latalata atu i le pule i le ola. I le toe mafaufau i ai, sa ia moomoo maimau pe ana ia gaua’i atu i faailoga lapata’i. Sa i ai lona toalua i le tele o faaipoipoga ma mafutaga lē manuia. Ae ui i lea, sa sologa lelei mo le ono masina le la faamasaniga, ma sa ia pa’ū atu ai i le alofa ia te ia.
Ina ua uma ona la faaipoipo, sa faate’ia o ia ma le lē mautinoa i ana amioga. E na te faia ni faamatalaga faitio e uiga i ona foliga vaaia, ma ina ua ia fesili atu pe aisea na te faia ai ia faamatalaga faapea, ae faapea mai ia te ia o loo ia tausua ma e le o ia te ia se uiga mālie. ‟Sa tele sauaga i upu ma le finauvale sese,” o lana tala lea.
Sa i ai foi vaega o sauaga faaletino ina ua ia feanu i ona foliga ma kiki ma fela’u o ia. E pei o le toatele o tagata na aafia ai, sa taumafai Diego e tuusaunoa amioga a lona toalua. Sa ia fai ifo ia te ia lava ua pau lava ua lē lelei foi lona aso. Sa ia taumafai ma le naunautai e fai mea ma le faamoemoe o le a faafiafiaina ai o ia.
‟Ou te faamamaina le faletaele ma kuka le taumafataga o le afiafi,” na ia manatuaina, ‟ae sa lē mafai lava ona ou faafiafiaina ai o ia. O le sauāina faaletino atonu o le mea aupito sili lea ona leaga mo a’u o se alii. Sa ou lagona le vaivai ma le leai o se malosi. O nisi taimi ou te saili ai se nofoaga ou te lafi ai i le galuega ma ou faanoanoa ma tagi ai. O a’u o le tagata na afaina, ae sa ia faia ia ou lagonaina e pei o mea leaga uma na tutupu, e mafua ona o a’u. Sa ou lagona le tausalaina. Pe faamata e sa’o ia? Sa maoa’e le faanoanoa.”
Na ia manatuaina: ‟Sa ou manao ia lelei le ma faaipoipoga. Sa ou tatalo malosi, alu i le malumalu, anapogi, faitau tusitusiga paia, ma taumafai e latalata atili atu i le Tama Faalelagi i soo se auala. Sa ou faaopeopea i le faamoemoe. Sa ou talitonu pea afai ou te usiusitai, o le a lelei mea uma.”
Sailia o le Fesoasoani
Saili le malosi faaleagaga: E mafai e tagata e afaina ona sailia musumusuga ma le malosi faaleagaga e ala i le tatalo, anapogi, suesueina o tusitusiga paia, faamanuiaga faaleperisitua, ma le auai i le lotu ma le malumalu. E mafai ona latou maua le fesoasoani ma le lagolago mai uo faatuatuaina, taitai o le Ekalesia, po o faufautua faapolofesa. O le mea e sili ona tāua, e mafai ona latou maua le faatuatua i le Alii, saili ma le agaga tatalo Lana taitaiga, ma faalagolago o le a Ia ‟faapaiaina ou puapuaga mo lou manuia” (2 Nifae 2:2).
Seti ni tuaoi: Fai mai tagata tomai faapitoa o le faatulagaina ma le tausia o tuaoi e tāua. E mafai ona faapea atu se tagata ua afaina, “Ua ou lagona lou lē faaaloalo mai ia te a’u i le taimi nei. Ou te fia talanoa ia te oe, ae e lē mafai se’i vagana ua e faaaloalo ma agalelei mai.”
Ae peitai, o nisi tagata latou te lē faaaloalogia na tuaoi. Sa taumafai Diego e faatulaga ni tuaoi, ae sa faaauau pea ona finau lona toalua. ‟E lē mafai ona e faataututū i taimi uma ma se tagata sauā,” na ia faamatala mai. ‟Ma e faigata tele ona e nofo filemu pe a osofa’ia oe e se tasi i ni upu. Semanu e savali ese Keriso pe tautala lemu foi. Sa ou lē atoatoa i lena ala. Semanū ou te faia ia sili atu ona lelei. Ou te manatu e te manaomia se puluvaga—o se taitai o le Ekalesia po o se foma’i o le mafaufau—ia faia ai se talanoaga lelei.”
E mafai ona fesoasoani le sailia o fesoasoani faapolofesa i tulaga faapenei. O faufautua e malamalama lelei e uiga i sauaga faalelagona e mafai ona fautuaina mai ni auala e taulima ai lagona maaleale.
Talanoaina atugaluga: O nisi taimi o i latou e faia ni mea faatiga e lē iloa le telē o lo latou faaleagaina o le sootaga. E mafai ona latou aoao e suia pe afai latou te naunau e saili le fesoasoani. Pe a le o se taimi faalelagona, o le tagata sa i ai i le faaiuga o faamatalaga leaga e mafai ona fai mai se tala faapea, ‟Ou te lagona le tiga [po o le lē alofagia po o le lē faaaloalogia] pe a e faia mai ni tala faapena. Ou te talisapaia pe afai e te …” O le aumaia o na amioga i le malamalama e mafai ona fesoasoani i le tagata faatiga ia iloa le mea o loo ia faia, ma tuuina atu ai se avanoa mo le faaleleia atili.
Afai e naunau le tagata e faalogo, e mafai e tagata uma e toalua ona maua le fesoasoani. E mafai ona la sailia le fefautuaa’i faatasi ma talanoa po o a amioga e faaleagaina ai le sootaga ae po o a foi amioga e faamaloloina ai le sootaga. E mafai ona la galulue faatasi e fausia le sootaga la te mananao ai.
Ae peitai, afai e lē manao le tagata e faalogo ma faaauau pea le amioga faatiga, e lē manaomia e le tagata ua sauāina ona tumau i se mafutaga faasauā. Mo ulugalii faaipoipo, atonu e lē faapea o le a tatala ai le faaipoipoga i taimi uma, ae e mafai ona faauigaina o le taimi e valavala ai seia matauina e le toalua ni tuaoi mautu mo se sootaga maloloina.
Taumafai e aua le faaauauina ia mamanu le lelei: Na aoao mai Sister Kristin M. Yee, Fesoasoani Lua i le Au Peresitene Aoao o le Aualofa:
‟I luga o le ala o le faamagaloga ma le faamalologa o loo i ai se filifiliga ia lē tosotosoa ni mamanu po o ni sootaga lē manuia i o tatou aiga po o isi mea. Ia i latou uma i totonu o la tatou tosinaga, e mafai ona tatou ofo atu le agalelei mo le agaleaga, alofa mo le inoino, agamalu mo le lē migao, saogalemu mo le mafatia, ma le filemu mo finauga.
‟O le avatu o le mea sa faafitia mai ia te oe, o se vaega mamana o le faamalologa paia e mafai ona maua e ala i le faatuatua ia Iesu Keriso.”
Faamaloloina i le Fesoasoani a le Atua
Sa talanoa Diego i se faufautua o faaipoipoga ma feiloa’i soo ma lona epikopo. ‟Ou te lē mautinoa pe ou te sao mai i lenei aafiaga e aunoa ma le fesoasoani a lo’u epikopo, o le alii aupito sili ona alofa. Ma o le malumalu sa fai ma o’u mapusaga.
Sa tauivi Diego ia faamaloloina ina ua mavae le tatalaina o lana faaipoipoga ae fai mai, ‟Sa ou aoaoina le tele o mea mai le mafutaga ma ua tuputupu a’e i vaega uma, lea ua avea ai a’u ma se alii, tamā, tagata, tagata o loo umia le perisitua, atalii, uo, ma se paaga sili atu. Sa ou faia mea uma i lo’u malosi ina ia faaleleia le faaipoipoga, ae sa lē tatau lava ona tupu. Sa ia te ia lona faitalia ma faia lana filifiliga.”
I le mavae ai o le tolu tausaga o taumafai pea e faaleleia lana faaipoipoga, sa faila ai loa e Ianeta le tatalaga o le la faaipoipoga ma siitia atu ai e nonofo ma se tasi o lana fanau mo se taimi lē tumau. ‟O na uluai aso ma vaiaso sa sili ona faigata,” na ia manatuaina. Sa ia sasaa atu lona loto i le tatalo ma sa tuuto atu i le faitauina o le Tusi a Mamona i aso taitasi, faatasi ai ma lauga faamafanafana o le konafesi.
Sa ia faaauau pea ona auai i le lotu e pei ona masani ai, vaaia se foma’i o le mafaufau faapolofesa, ma maua fautuaga aoga faaleagaga mai lona epikopo. ‟Sa matua’i fesoasoani lava le foma’i faalemafaufau, ma sa sili atu ona lelei o’u lagona ina ua uma ona ou talanoa i lo’u epikopo,” o lana tala lea.
Sa fautuaina e se uo na te taulotoina leotele ana mau e fiafia i ai ma folafola atu mea lelei uma sa ia manao ia maua i lona olaga. Sa faia e Ianeta lena mea ma le faamaoni, i le taulotoina o tusitusiga paia na musuia ai o ia. O ana mau e lua e fiafia i ai o le:
“Ia e faamalosi ma loto tele; aua e te fefe, aua e te mata’u: aua o Ieova lou Atua o loo ia te oe i mea uma e te alu i ai” (Iosua 1:9).
“Aua e te fefe: auā ou te ia te oe: aua le fetepatepai, auā o a’u o lou Atua, ou te faamalosia oe; e moni ou te fesoasoani ia te oe; e moni ou te taofia oe i lo’u lima taumatau e i ai le amiotonu” (Isaia 41:10).
Sa ia maua le malosi i le iloaina o le misiona lenei a le Faaola ‟e faamalolo i e loto momomo, e talai le saolotoga i le tafeaga, … e tuu saoloto i e ua faasauaina” (Luka 4:18; ua faaopoopo le faamamafa).
O le molimau atu i lena misiona faamalolo a le Faaola, na faamautinoa mai ai e Elder Patrick Kearon o le Korama a Aposetolo e Toasefululua i latou na aafia i sauaga faatautala:
‟Mai le loloto o Ona puapuaga togiola, na Ia tuuina mai ai le faamoemoe sa e manatu ua leiloa e faavavau, malosi sa e talitonu e le mafai ona e mauaina, ma le faamalologa sa le mafai ona e mafaufauina e mafai. …
“…Faatasi ai ma aao na faamafola mai, ua ofo mai ai e le Faaola le meaalofa o le faamalologa ia te oe. Faatasi ai ma le lototoa, onosai, ma le faatuatua ia taulai atu ia te Ia, o le a le pine ona mafai lea ona e taliaina atoa lenei meaalofa.”