‟O i Tatou o Fanau o le Feagaiga,” Liahona, Oke. 2024.
Sau, Mulimuli Mai ia te A’u
O i Tatou o Fanau o le Feagaiga
O Lona Mamalu Uma, saunia e Yongsung Kim, faaaloaloga a Havenlight
I le 3 Nifae 20–21 tatou te faitau ai e uiga i feagaiga na osia e le Atua ma Ana fanau. Na aoao e Iesu Keriso ona soo i Amerika:
‟O outou o lo le feagaiga lea na faia e le Tama ma o outou tamā, na fetalai atu ai ia Aperaamo: Ma o lau fanau o le a manuia ai aiga uma o le lalolagi.
‟… O outou o fanau o le feagaiga” (3 Nifae 20:25–26).
Ua faamamafa soo mai e Peresitene Russell M. Nelson le tāua o le manatuaina o lenei upumoni maoa’e.
O le a le uiga o le avea ma fanau o le feagaiga?
O fanau o le feagaiga e osia feagaiga lava e tasi, po o folafolaga paia, faatasi ai ma le Tama Faalelagi ma Iesu Keriso lea na La osia ma Aperaamo (tagai i le Aperaamo 2:8–11).
I le 1843 na ta’u atu ai e le Alii ia Iosefa Samita:
‟Na maua e Aperaamo folafolaga e faatatau i ana fanau, ma e faatatau i le fua o ona sulugatiti—o lē o ona sulugatiti ua e sau ai … ; ma e faatatau ia Aperaamo ma ana fanau, … o le a faaauau pea i le lalolagi ma i fafo o le lalolagi ona lē mafaitaulia i latou e pei o fetu. …
“O lenei folafolaga ua a outou foi, aua o outou e tupuga mai ia Aperaamo” (Mataupu Faavae ma Feagaiga 132:30–31).
O faamanuiaga folafolaina e faatatau foi ia i tatou. Na aoao mai Peresitene Nelson e faapea o folafolaga e aofia ai “le aiā tatau e maua ai le atoatoaga o le talalelei, olioli i faamanuiaga o le perisitua, ma agavaa ai mo faamanuiaga silisili a le Atua—o le ola lea e faavavau.”
Ae faapefea pe afai e le o a’u o sē na tupuga mai ia Aperaamo?
Ina ua papatisoina i tatou ma faamauina o se tagata o Le Ekalesia a Iesu Keriso o le Au Paia o Aso e Gata Ai, ua avea i tatou ma se vaega o le aiga o Aperaamo. Ona avea ai lea o i tatou ma ‟faitaulia o ni atalii ma afafine o Iesu Keriso, o Ana fanau e ala i le usiusitai i le talalelei.”
O le a le feagaiga a le Tama Faalelagi ma Ana fanau?
Ua osifeagaiga le Tama Faalelagi e faapea e ala i le togiola ma le toetu o Iesu Keriso, ua mafai ai ona tatou toe foi atu e ola faatasi ma avea e faapei o Ia. O le faamoemoega lenei o le ata o le faaolataga. Na aoao mai Peresitene Nelson: ‟O le fuafuaga a le Tama Faalelagi mo Ana fanau ua faatagaina ai i tatou ia ola i le nofoaga ma le auala o loo Ia soifua ai ma ia avea atili e faapei o Ia. O Lana fuafuaga moni lava ua avanoa ai mo i tatou faamanuiaga silisili o le faavavau atoa, e aofia ai le gafatia mo i tatou e avea ma ‘suli faatasi ma Keriso’ [Roma 8:17].”
Sau, Mulimuli Mai ia te A’u, saunia e Kolby Larsen, e lē mafai ona kopiina
Aisea tatou te osia ai feagaiga ma le Tama Faalelagi?
Tatou te toe foi atu i le Tama Faalelagi e ala i le osia ma le tausia o feagaiga. O le mea lea e faatatau i ai perofeta o le savali i le ala o le feagaiga. Na faamatala mai e Elder D. Todd Christofferson o le Korama a Aposetolo e Toasefululua: ‟Tatou te o atu i luga o le ala i le faitotoa o le papatisoga. … I le gasologa o le ala o feagaiga … , tatou te maua ai sauniga uma ma feagaiga e faatatau i le faaolataga ma le faaeaga.”
O le a le feagaiga fou ma faavavau?
O le isi igoa mo le feagaiga faa-Aperaamo o le feagaiga fou ma faavavau. E fou i le tulaga na toefuatai mai ai e ala ia Iosefa Samita le atoaga o le talalelei a Iesu Keriso. E faavavau ona o le feagaiga lava lea e tasi na osia e le Atua ma Ana fanau i soo se taimi lava e naunau ai tagata e taliaina.
O feagaiga uma tatou te osia o se vaega o le feagaiga fou ma faavavau, e aofia ai le papatisoga, mauaina o le Perisitua Mekisateko mo alii, ma le faaeega paia ma le faamauga i le malumalu (faaipoipoga e faavavau).