E Na’o le Faatekinolosi
O Mataupu Faavae e 3 mo le Fausiaina o le Lotogatasi i Lau Uarota po o le Paranesi
Na poloaiina i tatou e le Faaola ina ia tasi le tasi ma le isi, ae e faape’ī foliga o lena mea i le faatinoga?
Pe na e tilotilo solo i lau uarota po o le paranesi ma matauina ni taleni eseese, talaaga, ma mea e fiafia i ai? Na faamalamalama mai e Elder D. Todd Christofferson o le Korama a Aposetolo e Toasefululua e faapea, o faapotopotoga i Le Ekalesia a Iesu Keriso o le Au Paia o Aso e Gata Ai e tulaga ese ona o le faavae i le faataatiaga o faafaafanua. Sa ia fai mai: “Matou te le filifilia se faapotopotoga e faavae i le tagata matou te fiafia pe mananao e faatasi ai. Ua filifilia uarota mo i tatou … , ma tatou aoao e nonofo faatasi, auauna atu, ma alolofa i tagata atonu e eseese o latou talaaga, mea e fiafia i ai, ma manatu.” O nei eseesega e fai ma mea tatou te malolosi atili ai.
Na poloaiina i tatou e le Faaola ia “tasi” (Mataupu Faavae ma Feagaiga 38:27), e ui lava i o tatou eseesega uma. E faape’ī la foliga o le “”tasi i a tatou uarota ma paranesi? O mataupu faavae nei e tolu e fesoasoani ia i tatou e galulue ai agai i le lotogatasi sili atu.
Ia Tasi ma Keriso e ala i Feagaiga
Ina ua uma ona faaali atu le Faaola toetu i sa Nifaē, sa latou ola i le filemu ma le lotogatasi mo le 200 tausaga. Sa leai se solitulafono, sa faia e tagata vavega, ma “sa le mafai ona i ai se nuu e sili atu ona fiafia ona tagata” (4 Nifae 1:16). E faapefea ona ausia e se tasi se sosaiete lotogatasi faapena? Ua faapea mai tusitusiga paia e faapea “ma sa oo ina leai se finauga i le laueleele, ona o le alofa o le Atua sa mau i loto o tagata” (4 Nifae 1: 15).
Afai o loo e taumafai mo le lotogatasi sili atu ma i latou o loo siomia oe, o se nofoaga sili e amata ai o le iloiloina lea o lau sootaga ma le Atua. Na fautua mai Elder Quentin L. Cook o le Korama a Aposetolo e Toasefululua: “Ua tatou lotogatasi i lo tatou alofa ma le faatuatua ia Iesu Keriso ma o ni fanau a se Tama Faalelagi alofa. O le ute o le auai moni o le avea lea ia tasi ma Keriso.”
E faapefea ona tatou maua se lotogatasi ma le Atua? Na saunoa mai Elder David A. Bednar o le Korama o Aposetolo e Toasefululua e faapea, “Ua tatou fesootai malosi i le ma le Faaola a o tatou maua ma le agavaa feagaiga ma osia feagaiga, ma le faatuatua ia manatua ma faamamalu na tautinoga paia, ma faia le mea sili tatou te mafaia e ola ai e tusa ma matafaioi ua tatou taliaina. O le osia ma le tausia o feagaiga o se tasi lea o laasaga muamua e avea ai ia tasi ma le Atua ma o tatou tuaoi.
Taulai atu i Faasinomaga e Faavavau
I le Tusi a Mamona, o vaega eseese o tagata e eseese igoa e iloa ai, e aofia ai sa Nifaē, sa Lamanā, sa Soramā, sa Isamaeli, sa Amona, ma isi. Ae peitai, ina ua mavae le galuega a le Faaola toetu i tagata, sa leai ni “ituaiga o tagata; ae sa tasi i latou, o le fanau a Keriso” (4 Nifae 1:17).
E tatau ona tatou faaeteete ia aua nei fatuina ni faailoga po o ni fevaevaeaiga i totonu o i tatou lava. Na fautuaina i tatou e Peresitene Russell M. Nelson ia aua nei galo o tatou faasinomaga aupito taua: “Ou te le o faapea atu o isi faaigoaina ma faasinomaga e le taua. E faigofie lava la’u tala e leai se faailoga e tatau ona aveesea, suitulaga, pe faamuamua foi i lo o nei faaigoaina tumau e tolu: ‘atalii/afafine o le Atua,’ ‘tama o le feagaiga,’ ma le ‘soo o Iesu Keriso.’”
Na faatuina e Iesu le faataitaiga o le vaai ese mai i faailoga faalelalolagi po o fevaevaeaiga ina ua Ia aoaoina le fafine Samaria i le vaieli. Sa molimau atu o Ia ia te ia e uiga i Lona paia, ma sa mafai ona ia aoao atu isi e uiga ia te Ia (tagai i le Ioane 4:9–29). A o tatou taumafai e vaai ia i tatou lava ma o tatou tuaoi o ni fanau a le Atua, o vaega uma o le aiga lava e tasi, e mafai ona suia eseesega i le alofa ma le lotogatasi.
Ia Opogi Lau Matafaioi Tulaga Ese
O le faatusatusa o i tatou lava i isi e mafai ona taofia ai i tatou mai le avea e tasi ma i latou. O le tala fiafia mo i tatou uma e faapea, e faaaoga e le Atua ituaiga uma o taleni ma uiga e fausia ai Lona malo.
Ina ua tusi atu Paulo i le Au Paia i Korinito, sa ia faatusaina le Ekalesia a Keriso i se tino (tagai i le 1 Korinito 12:12–17). Sa ia ta‘u atu ia i latou o vaega taitasi o le tino e faia se matafaioi taua mo le tino ina ia galue lelei, e ui lava e tulaga ese vaega taitasi. Sa ia fesili, “Afai o le tino atoa ua na o le mata, o fea o iai le faalogo?” (1 Korinito 12:17).
E faapei foi, ua tofu i tatou taitasi ma se matafaioi taua e fai—o se matafaioi atonu o le a ese mai o tatou tuaoi’. Na saunoa mai Peresitene Dieter F. Uchtdorf o le Korama a le Toasefululua: “Atonu tou te lagona e faapea e i ai nisi e sili atu lo latou gafatia pe poto masani e mafai ai ona latou faatumuina o outou valaauga ma tofiga sili atu nai lo outou, ae na tuu atu e le Alii ia te outou o outou tiutetauave ona e iai se mafuaaga. Atonu e i ai ni tagata ma ni loto e na o oe lava e mafai ona aapa ma pai atu i ai.” Pe a tatou taliaina ma faataunuuina a tatou matafaioi tulaga ese, e mafai ona lotogatasi a tatou uarota, paranesi, ma aiga ma galulue e pei o se tino maloloina.
O Se Nuu o Siona
Na aoao mai Elder Gerrit W. Gong o le Korama a Aposetolo e Toasefululua: “O le Ekalesia toefuataiina a le Alii e mafai ona avea ma se nofoaga e faatulaga ai se nuu o Siona. A o tatou tapuai, auauna atu, olioli, ma aoao faatasi i Lona alofa, tatou te taula i le tasi ma le isi i Lana talalelei.” O le a faamanuiaina oe e le Alii a o e taumafai e tausi Ana poloaiga ma taumafai ina ia tasi ia te Ia—ma atonu e te iloa ai e tele atu mea e tutusa ai oe ma tagata o lau uarota ma le paranesi nai lo mea e te mafaufau i ai!