Na o Tusiga Faaeletonika

O Aso e 7 o le Sauniuniga o le Konafesi Aoao

Saunia e Brittany Beattie

Mekasini a le Ekalesia

O sauniuniga na faia mo le lauga a le Tupu o Peniamina e mafai ona musuia ai a tatou lava mamanu o le sauniuniga mo le konafesi aoao.

Ata

O le Tupu o Peniamina o loo aoao atu i tagata

O le Auauna Atu i Lou Atua, saunia Walter Rane

Pe le o se tulaga faamalamalama lelei ea le Mosaea 2 ona o le le amata i le agai tonu i le tuuina mai o le saunoaga o le Tupu o Peniamina? Nai lo lena, o fuaiupu muamua e valu o lena mataupu ua faaalia ai se vaega taua o le lauga a le Tupu o Peniamina—ua faaalia ai sauniuniga faamoemoeina na faia e tagata taitoatasi, aiga, ma taitai e saunia ai o latou loto ma mafaufau e faalogo i savali mai le perofeta, le Tupu o Peniamina. O nisi faataitaiga e aofia ai:

Sa tuuina atu se valaaulia i tagata uma e o mai ma faalogologo (fuaiupu 1).
O lenei valaaulia sa faatinoina e tali atu ai i faatonuga mai se perofeta (tagai i le Mosaea 1:10).
Sa saunia ma ofoina atu e tagata taitoatasi ma aiga se taulaga faapitoa (fuaiupu 3).
Sa latou tuuina atu le faafetai mo mea uma na faia e le Atua mo i latou (fuaiupu 4).
Sa latou malaga atu i le malumalu ma maua ni avanoa taitasi mo o latou aiga (fuaiupu 5).
Sa latou faatuina o latou faleie faasaga atu i le malumalu ina ia mafai ona latou nonofo ai iina ma faalogo i le perofeta (fuaiupu 6).
Sa latou auina atu savali tusitusia o aoaoga ina ia mafai e tagata uma ona maua upu o loo tautalagia (fuaiupu 8).

Ou te fiafia i lenei faataitaiga o le sauniuni e faalogo i le perofeta a le Atua! Atonu o nei fuaiupu e uiga i sauniuniga o loo aofia ai i le Tusi a Mamona e musuia ai i tatou e saunia ma le loto i ai mo le konafesi aoao po o soo se savali mai perofeta a le Atua i le tausaga atoa.

I nai tausaga ua mavae atu, sa ou taumafai ai e saunia ma le loto i ai mo le konafesi aoao i le vaiaso o muamua, ma ua atili ai ona anoa lo’u aafiaga i le konafesi i le tele o auala matagofie! Afai e te fia faataitaia aso e fitu o sauniuniga o le konafesi aoao ma le loto i ai, o nisi nei o manatu e faavae i fuaiupu mai le Mosaea 2.

O Aso e 7 o Sauniuniga mo le Konafesi Aoao—O Se Mamanu mai le Mosaea 2:1–8

Mosaea 2	O Aso e 7 o Sauniuniga o le Konafesi Aoao
1. Valaaulia tagata uma e o mai ma faalogologo (fuaiupu 1).	1. Valaaulia isi e matamata i le konafesi aoao.
2. Galue i faatonuga a se perofeta (Mosaea 1:10).	2. Galue i valaaulia o loo i ai nei mai perofeta.
3. Ofo atu se taulaga ma se taulaga mu (fuaiupu 3).	3. Tatalo e uiga i se mea e mafai ona e ositaulagaina ina ia maua lelei ai le afioga a le Atua.
4. Ia faafetai atu mo mea uma ua faia e le Atua (fuaiupu 4).	4. Tuu atu le faafetai mo le auala na faamanuiaina ai lou olaga e ala i aoaoga mai konafesi aoao ua mavae.
5. Malaga i le malumalu ma saili ni avanoa mo o latou aiga (fuaiupu 5).	5. Fatu se avanoa paia mo le faalogologo i le konafesi aoao.
6. Faatu o latou faleie faasaga atu i le perofeta; tumau ma faalogo (fuaiupu 6).	6. Iloilo le lelei o le liliu atu o lou loto i perofeta, ma saunia e “tumau … ma faalogo.”
7. Auina atu savali i ni tusitusiga (fuaiupu 8).	7. Saunia se fuafuaga mo le suesueina o le konafesi i le lumanai.

Aso 1: Valaaulia isi e matamata i le konafesi aoao. E mafai ona e valaaulia isi taitoatasi pe auina atu se valaaulia i au uo uma i ala o faasalalauga faaagafesootai. Fatufatuai nisi o auala e mafai ona e faasoa atu ai se valaaulia i lou nuu! E mafai ona e fatuina se valaaulia mālie mo lou aiga po o ē e potu faatasi i le fale e faailoga ai le mea faapitoa na tupu ma faamanuiaga o le aoao mai perofeta ma taitai o le Ekalesia.

Aso 2: Galue i valaaulia o loo i ai nei mai perofeta. E mafai ona tatou faaali atu i le Tama Faalelagi ua tatou saunia e maua faatonuga ma faatino e ala i le faatinoina o aoaoga ua uma ona tatou maua. Mafaufau e faitau i lauga na muamua atu mai perofeta ma aposetolo ma faatino valaaulia na latou tuuina atu.

Aso 3: Tatalo e uiga i se mea e mafai ona e ositaulagaina ina ia maua lelei ai le afioga a le Atua. Mafaufau po o le a se osigataulaga e mafai ona e faia i lenei vaiaso e faaali atu ai i le Tama Faalelagi ua e saunia e faalogo atili mai ia te Ia. Mo se faataitaiga, i le musuia ai i ni valaaulia se lua na muamua atu mai ia Peresitene Russell M. Nelson e faia se aso o faasalalauga faaagafesootai, ua ou iloa e fesoasoani e ositaulagaina ai ala o faasalalauga faaagafesootai (sei vagana ai le faasoa atu e uiga i konafesi aoao) ma e oo lava i isi ala o faasalalauga e le o le Ekalesia seia oo atu i le konafesi aoao. E fesoasoani e faamama ai lo’u mafaufau e taulai atili atu ai ia Iesu Keriso ma Lana afioga. E mafai ona tatou tatalo taitoatasi mo musumusuga ia iloa ai po o le a le osigataulaga e sili ona fesoasoani ia i tatou taitoatasi e saunia ai.

Aso 4: Tuu atu le faafetai mo le auala na faamanuiaina ai lou olaga e ala i aoaoga mai konafesi aoao ua mavae. Mafaufau pe na faapefea ona faamanuiaina lou olaga a o e galue i aoaoga o le konafesi aoao ua mavae. Faailoa atu le faafetai i le Tama Faalelagi mo na aoaoga ma faamanuiaga. E mafai foi ona e faamaumauina ou manatu i lau api talaaga pe faasoa atu ou aafiaga ma e pele ia te oe.

Aso 5: Fatu se avanoa paia mo le faalogologo i le konafesi aoao. Pe o le a e faalogologo i le konafesi aoao i totonu o se falelotu, lou fale, o se paka filemu, po o lou falefaigaluega, vaai pe i ai se auala e saunia ai lena avanoa e avea o se “fale o le aoaoina” (Mataupu Faavae ma Feagaiga 109:8). Mafaufau i ni auala faigofie e mafai ona e faia, e pei ona aoao mai Peresitene Nelson e faatatau i le Sapati, “toe faatulaga lou fale [po o isi nofoaga] i se nofoaga autu o le aoaoina o le talalelei” mo le konafesi aoao, e pei o le faamamaina po o le aveesea foi mo se taimi le tumau o mea faalavefau e ono tulai mai.

Aso 6: Iloilo le lelei o le liliu atu o lou loto i perofeta, ma saunia e “tumau … ma faalogo.” Pe a ou mafaufau i tagata o loo faatuina o latou faleie e faasaga atu i le perofeta, e faamanatu mai ia te au e iloilo pe o le a le lelei o lo’u fetaiai ma perofeta. E mafai ona tatou mafaufau e toe faamanatu le “Aua Nei I Ai Isi Atua” mai ia Peresitene Nelson ma “O Le Fea Auala e te Faasaga i Ai?” mai ia Elder Lynn G. Robbins, Fitugafulu Malolo o le Pulega Aoao. Latou te faia ni fesili matagofie e uiga i le lelei o lo tatou faasaga atu i le Atua ma Ana perofeta. O le faia o lena mea, e mafai ai ona tatala o tatou loto e salamo ma ia saunia atili e mulimuli i poloaiga a le Atua i le konafesi aoao o loo loma.

Ou te fiafia foi i le auala na saunia ai tagata o le Tupu o Peniamina e “tumau … ma faalogo” e aunoa ma le manaomia ona tuua o latou faleie pe a fetalai mai o ia. A o ou laitiiti, sa ou manatu i nisi taimi o musika o le konafesi aoao o se taimi lelei lea e malolo ai, ae o lea ua ou iloaina o le musika o se vaega taua foi o aoaoga o le konafesi. Ou te taumafai ia saunia lelei e aoao mai lena vaega o le konafesi aoao ina ia mafai ona ou “tumau” i itula uma e lua o sauniga taitasi. Atonu e faigata lena mea i tamaiti po o i latou e iai manaoga faapitoa, ae atonu tatou te mafaufau pe i ai se mea e mafai ona tatou saunia (e pei o meaai mama po o gaoioiga mo tamaiti po o le mautinoa foi o le a tatou vave momoe ina ia tumau ai le mataala) ina ia mafai ona tatou faaitiitia manaoga e tuua ai le konafesi aoao i le taimi o sauniga ae “tumau … ma faalogo mai” (Mosaea 2:6) e pei ona faia e tagata o le nuu o le Tupu o Peniamina.

Aso 7: Saunia se fuafuaga mo le suesueina o le konafesi i le lumanai. E pei o aso o le Tupu o Peniamina, ua maua e a tatou perofeta i aso nei a latou upu mo tagata uma e ala i le polokalama o le Liahona po o le Potutusi o le Talalelei. Fai se fuafuaga i le taimi nei e suesue ai upu a perofeta pe a uma le konafesi ina ia e saunia ai e agai atu i luma! Mo se faataitaiga, aoao pe faapefea ona fatu se fuafuaga mo suesuega i le polokalama o le Potutusi o le Talalelei, pe lesitala i le Liahona i le lolomiina po o le faatulagaga faatekinolosi i le MagazineSubscriptions.ChurchofJesusChrist.org.

E mafai foi ona e toe faamanatu le tusiga “O La Tatou Konafesi Aoao Savali ma Lauga” saunia e Elder David A. Bednar o le Korama a Aposetolo e Toasefululua mo nisi manatu i le auala e mafai ona tatou saunia ai e faatino aoaoga mai perofeta ma isi taitai o le Ekalesia.