‟Ona o Lou Faatuatua ua E Vaai Ai,” Liahona, Oke. 2024.
Sau, Mulimuli Mai ia te A’u
‟Ona o Lou Faatuatua Ua E Vaai Ai”
Pe a tatou faalotomaualaloina i tatou lava i le faatuatua, e mafai e lo tatou Tama ona fesoasoani ia i tatou ia iloa avanoa o loo Ia silafia mo i tatou.
O se tasi o tala e sili ona faagaeetia ma faalotomaualaloina i le Tusi a Mamona mo a’u o le tala i le uso o Iareto (tagai i le Eteru 2–3). Ona o lona faatuatua tele, sa lē mafai ai ona taofia o ia mai le afioaga o le Alii. Sa ia faatinoina ni vavega tetele ma sa faaalia ai ni faaaliga ofoofogia.
E faagaeetia le tala auā o loo aoao mai ai e ala i le faatuatua ma le usiusitai, o loo avanoa ai le poto maoa’e ma upumoni mamalu mo i tatou taitoatasi.
O le tala e faalotomaualaloina auā ua faaali mai ai ia te a’u e le o a’u o se uso o Iareto. E i ai taimi i lenei olaga, semanu ou te maua ai le malamalama sili atu ma le malosi faaleagaga mai lo’u Tama Faalelagi pe ana ou lē toilalo i le faatuatua.
Mo a’u, e lua ni upumoni e tulai mai i lenei tala: (1) o le talitonu o le ki lea i le vaai atu i le Alii o faia galuega ofoofogia i o tatou olaga, ma le (2) e le o tuai lava ona talitonu ona vaai lea i ai.
A tatou masalosalo, ua moeiini o tatou mata faaleagaga. I le Eteru 12:27 e le gata ina ta’u mai ai e le Alii e i ai vaivaiga o tagata soifua ae na faapea mai foi, ‟Afai latou te faamaualaloina i latou lava i o’u luma, ma faatuatua mai ia te a’u, ona ou faia lea o mea vaivai ia avea ma mea malolosi ia te i latou.” Ua ta’u mai i lenei mea afai tatou te faamaualaloina i tatou lava i le faatuatua, e mafai e lo tatou Tama ona fesoasoani ia i tatou ia iloa avanoa o loo Ia silafia mo i tatou—o mea e mafai ona avea ai i tatou ma mea e mafai ona tatou ausia.
Atonu tatou te mafaufau, ‟Aisea o le a Ia faailoa mai ai ia te a’u mea tetele?” O le fesili moni lava lenei na fesili ai uso matutua o Nifae o Lamana ma Lemuelu. Ina ua latou tauivi ia malamalama i aoaoga faafaaaliga a lo latou tamā, sa fesili Nifae, ‟Ua outou ole atu ea i le Alii?” Sa latou tali mai: ‟Matou te lei ole atu; ona e le faailoa maia e le Alii ia te i matou se mea faapena.” I le tali atu i ai, sa toe fai atu ai e Nifae le valaaulia a le Alii: ‟Afai tou te le faamaaa o outou loto, ma ole mai ia te a’u i le faatuatua, ma le talitonu o le a outou maua, faatasi ma le filiga i le tausiga o a’u poloaiga, e moni o le a faailoa mai nei mea ia te outou” (1 Nifae 15:7–9, 11). O lenei folafolaga e mo tatou uma.
O upu a Iesu Keriso o le muai olaga i le uso o Iareto ua ofo mai ai le faamoemoe ia i latou o e faatinoina le faatuatua tele ma le usiusitai i le sailia o le taitaiga faalelagi: “Ona o lou faatuatua ua e vaai ai” (Eteru 3:9). E mafai e lo tatou faatuatua ona taitai atu i tatou e vaai i Ana galuega ofoofogia i o tatou lava olaga.
E le gata o lo tatou manuia ma le avanoa e saili ai le malamalama mai le Alii ae faapea foi i o tatou tiute ma matafaioi. Sa Ia poloa’i mai, “Saili i le aoaoina, e ala lava lea i le suesue ma le faatuatua foi” (Mataupu Faavae ma Feagaiga 88:118).
Ua tatou maua lenei faatonuga musuia mai ia Peresitene Russell M. Nelson:
“O finagalo moni ea le Atua e fetalai atu ia te oe? Ioe! …
‟Ou te uunaia outou ia faalautele atu i talaatu o lou tomai faaleagaga o loo i ai nei e maua ai faaaliga faaletagata lava ia, auā ua folafola mai e le Alii e faapea ‘afai e te [saili], o le a e maua lea faaaliga e faaopoopo i luga o lea faaaliga’ [Mataupu Faavae ma Feagaiga 42:61].”
Ou te iloa e lē itiiti ifo ma le tolu ni auala o le a Ia fesoasoani ai ia i tatou ia iloa Ana galuega i o tatou olaga pe a tatou talitonu.
1. O le a Ia fesoasoani mai ia i tatou ia iloa le misiona o lo tatou olaga ua Ia tuuina mai ia i tatou e faataunuu.
Ina ua 16 o’u tausaga, o se peteriaka e lei vaai muamua lava ia te a’u ma sa leai se mea na te iloa i lo’u talaaga na tuuina mai ia te a’u lo’u faamanuiaga faapeteriaka. O iina na tali mai ai e le Alii ni fesili patino sa ou umia i lo’u loto e faatatau i nisi o luitau patino. O o’u manatu e uiga i na mea sa foliga mai ua patino tele lava mo le faasoaina atu. O se tasi o luitau na faatatau pe o le a ou maua se tamaitai alofa ua lava lona lototele e faaipoipo ai ia te a’u e ui lava i lo’u faaletonu tumau na ou fanau mai ma a’u—o se faaletonu e ono fanau mai ma se tasi o le ma fanau. O le tali o le ioe. Sa ou faaipoipo ia Marie, ma e toalima le ma fanau pele.
O tali a le Alii i lena faamanuiaga na faaaloalogia ai o’u atugaluga ma o’u tulaga lē faalaua’iteleina. Sa faaupuina ina ia na’o a’u e malamalama atoatoa i o latou uiga. Mai lena aso, sa i ai sa’u molimau mautu patino e silafia lelei a’u e lo’u Tama Faalelagi.
O la’u galuega na aumaia le olioli, tuputupu a’e, ma le faamalieina e ala i le taumafai e auauna atu ia te Ia ma Lana fanau. Ina ua ou litaea, sa agai pea i luma le lalolagi ma la’u matata faalegaluega e aunoa ma a’u. I nisi aso, i taimi ‟faaletonu”, sa ou mafaufau ai pe sa ou faia moni lava se mea lelei i na tausaga—pe o agavaa la’u taulaga mo folafolaga sili na tuuina mai ia te a’u.
I se tasi o na taimi, sa ou lagonaina ai le tali lenei: toe faitau lou faamanuiaga faapeteriaka. A o o’u faitauina, sa oo mai ni fesili tusitusia i lo’u mafaufau: ‟Ou te le’i tuuina atu ea lenei faamanuiaga ia te oe e pei ona ou folafola atu? Pe le’i moni ea lenei mea i lou olaga? Ma lea?” Sa manino la’u vaai i le ala na faataunuuina ai e le Alii faamanuiaga na Ia folafola mai ia te a’u. Sa ou lagonaina le faamautinoaga e faapea o mea sa ou ofoina atu ma le lotomaualalo ma le naunautai sa taliaina ma o se apoapoaiga foi e le’i mae’a a’u galuega—o loo i ai pea isi avanoa e auauna atu ai.
Sa faagaeetia foi a’u e le o tuua na o a’u i nei atugaluga. E toatele nisi atonu e taumanatunatu, pe a latou toe tepa i tua i o latou olaga ma lē vaai i ni faailoga maoa’e faaletino, pe na latou faia se mea lelei. Ae tatou te lē vaai atu e pei ona silasila mai le Alii. Atonu afai tatou te filifili e taulai atu i mea ua Ia tuuina mai ia i tatou, nai lo mea tatou te mananao i ai ae tatou te le’i mauaina, o le a tatou vaai manino atili i le ala na pa’i mai ai Lona aao i o tatou olaga.
2. A o o’u faitau ma suesue ma le agaga tatalo i tusitusiga paia, e fesoasoani mai le Alii ia te a’u ia iloa mea e sili atu nai lo le taitaiga aoao i Ana fanau uma. Ua ou vaai i le taitaiga patino mo o’u luitau taitoatasi.
O laina i autafa o a’u tusitusiga paia, aemaise lava le Tusi a Mamona, ua tumu i faamatalaga i mea ua fesoasoani mai le Alii ia te a’u e iloa ai e uiga i le faaaogaina o a latou aoaoga. I ni nai tausaga ua mavae, sa amata ai ona ou faia se isi api talaaga o faamatalaga, o nisi taimi o le fuaiupu i le fuaiupu, e tusifaamaumau ai mea ua aoao mai e le Alii ia te a’u. Ua faatele ona ou faitau i le Tusi a Mamona i le taimi nei i lenei ala, sosoo ai le Mataupu Faavae ma Feagaiga, Penina Tau Tele, ma talu ai nei le Feagaiga Fou. Pe a ou tago atu ma le agaga tatalo i a’u suesuega, ma ole atu i le Alii e tatala mai tusitusiga paia ia te a’u, ou te maofa i le telē o Lana fesoasoani mai ia te a’u ia ou vaai.
O tala ma faataoto e foliga na ofoina mai ai ni faataitaiga faigofie, ma lelei o amioga a le tagata lava ia na faafuasei ona i ai ni faaaoaoga aoga i lo’u olaga. O mau ua ou vaai i ai o ni talaaga faasolopito na faafuasei ona i ai ni faauigaga loloto mo le Toefuataiga faifai pea o le talalelei. Ua ou vaai pe faapefea ona faatatau aafiaga o Iosefa ma Tanielu, Peteru ma Paulo, Nifae, Alema e toalua, ma Kapeteni Moronae i luitau o loo tatou feagai ai i aso uma. O mataupu o taua i le Tusi a Mamona o loo ofoina mai ai e le gata o se tala i fuafuaga mamao a Kapeteni Moronae o le taua ae o se fuafuaga patino foi mo le faafetaia’ia o osofaiga lē alofa a le tiapolo: e mafai ona tatou mua’i faamalosia ‘olo faaleagaga faaletagata lava ia.
O mea ou te vaaia e ala i suesuega faaletagata lava ia atonu e lē fou i isi. Ae o le tusifaamaumauina o mea ua aoaoina ai a’u ua avea ma mea tāua i lo’u alualu i luma faaleagaga faaletagata lava ia.
Ua uunaia i tatou i le tele o taimi e perofeta ma taitai o le Ekalesia e tusifaamaumau mea ua aoao mai e le Alii ia i tatou pe afai tatou te mananao ia te Ia e tuuina mai nisi mea se tele ia i tatou. Ua faamalamalama mai e Elder David A. Bednar o le Korama a Aposetolo e Toasefululua: ‟Ua ou aoaoina foi o le tusifaamaumauina lelei o uunaiga faaleagaga e faaalia atu i le Faaola le telē o lo’u faatāuaina o Lana taitaiga. O le faiga faigofie o le tusia i lalo o mafaufauga ma lagona faaleagaga e matuā faaleleia ai le avanoa e maua ai ma iloa uunaiga faaopoopo mai le Agaga Paia.”
3. Pe a tatou ole atu i le faatuatua ma le naunautai lotomaualalo e usiusitai, o le a fesoasoani mai le Alii ia i tatou ia iloa avanoa ma vaifofo semanu tatou te lē vaaia e i tatou lava. O le a Ia fetuunaia Ana tali i o tatou manaoga.
Ua ia faaali mai ia te a’u le auala e taulima ai faafitauli e amata mai i luitau tiga faaleagaga e oo i le faaleleia atili o le aiga. Ua Ia faaali mai ia te a’u luitau o i luma atu ma le auala e saunia ai. Ua Ia faaalia Lona mana i lo’u olaga ina ua ou fefe ma masalosalo—ina ua ou fai atu, e pei o le tamā o loo aioi atu mo lona atalii ina ia faamaloloina, ‟Le Alii e, ua ou faatuatua; ia e fesoasoani i lo’u lē faatuatua” (Mareko 9:24).
Atonu tatou te le manatu mamafa ia te Ia pe a tatou faitau, ‟Ole atu, ona foaiina mai ai lea ia te outou” (Mataio 7:7) po o le “Afai tou te ole mai ia te a’u o le a outou mauaina” (Mataupu Faavae ma Feagaiga 6:5). O le folafolaga e faapea “o ia o lē ua i ai le faatuatua e vaai ai o le a vaai” (Mataupu Faavae ma Feagaiga 42:49) e foliga mai e faasino i le faamalologa faaletino, ae ou te le talitonu o lona uiga e faatapulaaina. A lava lo tatou faatuatua, e mafai ona Ia tatalaina o tatou mata faaleagaga e vaai ai i Ana vavega i o tatou lava olaga.
E lē mafai ona ou toe foi i tua e sui le taimi ua tuanai. Ae po o le a lava le telē o le taimi atonu o loo i o’u luma atu, ou te faamoemoe e mafai ona ou faatinoina se faatuatua sili atu i Lona finagalo alofa e faaali mai ia te a’u nisi mea e uiga i Ana galuega. Ou te faamoemoe e faalogo, e pei o le uso o Iareto, i Ana upu faamautinoa: “Ona o lou faatuatua ua e vaai ai.”
Sa tusia e le tusitala, o se pule faatonu o mekasini a le Ekalesia, lenei tusiga faatumulia i le faatuatua a o le’i maliu i le kanesa o le atepili ia Setema 2023.