Na o Tusiga Faaeletonika: Talavou Matutua
Afai Sa E Ola i fafo atu o le Talalelei, E Le o Tuai Tele ona Toe Foi Mai
O le manatuaina o feagaiga sa ou osia ma le Tama Faalelagi ma Iesu Keriso na fesoasoani ia te au e maua ai le lototele e toe foi ai i le lotu.
Sa ou ola a’e i Krasnodar, Lusia. A o ou talavou, sa ou papatiso i se lotu Kerisiano lea sa avea ma se vaega o la’u aganuu. Sa ou iloaina e moni Iesu Keriso, ae ou te lei malosi tele i la’u tapuaiga.
I ni nai tausaga mulimuli ane, sa ou feiloai ai i faifeautalai mai Le Ekalesia a Iesu Keriso o le Au Paia o Aso e Gata Ai. Sa ou maua se molimau i le moni o le talalelei ma osia ai se feagaiga ma le Atua e ala i le papatisoga—o se feagaiga e auauna atu i le Atua, tausi Ana poloaiga, ma naunau e tauave le suafa o Iesu Keriso i o’u luga ma manatua pea o Ia.
O Se Oge Faaleagaga
O le taimi muamua na ou papatiso ai, sa sologa lelei lo’u olaga! Sa ou alofa i le Atua, Iesu Keriso, ma le Ekalesia. Sa ou matua fiafia lava i le talalelei ma sa ou manao ai e faasoa atu ou lagona i tamaiti o la’u vasega. Ae ina ua ou faia, sa ou fetaiai ma teteega. Ona o le auala na taulimaina ai au e isi ona o lo’u faatuatuaga, sa tatau ai ona sui la’u aoga. Ma sa tele lava ina ou malaga na o au i le ala o se soo o Keriso.
Sa mafai ona ou puleaina lenei mea mo sina taimi. Sa ou faaaluina le taimi ma ni nai a’u uo ma faifeautalai. Sa malosi la’u molimau, ae ina ua uma ona ou faauu ma siitia atu i se aai fou, sa fai si o’ufaaeteete i le faasoaina atu o lo’u faatuatua ona o o’u aafiaga le lelei ua tuanai.
Sa amata ona faaitiitia lo’u taulai atu i le talalelei. I le taimi lea, e ui lava ou te lei faamuamuaina tele le talalelei, ae sa ou faamoemoe lava e tuuina mai e le Atua ia te au se aao fesoasoani i o’u tauiviga. Ae ina ua le oo mai na faamanuiaga sa ou faamoemoeina, sa ou filifili ou te le toe manao e faatali mo Lana taitaiga.
O le sauniga lotu e tasi na misi na oo i le tolu, na oo atu ai lava i ni masina o le le toe alu i le lotu. O lenei mea na taitai atu ai au i le faia o ni faaiuga laiti e tetee atu i tulaga faatonuina o le talalelei, lea na iu lava ina liua i se faasologa o filifiliga tetele. Ae ou te lei iloaina, sa ou nofo i fafo atu o le Ekalesia mo le lima tausaga ma ou te lei lagonaina lava se mamao ese mai le Atua.
I le pito i tua o lo’u mafaufau, sa ou iloa lava sa ou osia feagaiga, ma sa i ai lava se vaega itiiti o la’u molimau. Ae sa ou tuleia ese na mafaufauga aua sa le toafilemu ona faailoa atu ou te le o ola e tusa ai ma le talalelei.
Mulimuli ane, na ou oo i se tulaga aupito faigata, lea na ou lagonaina ai se oge faaleagaga. Sa ou iloaina e tatau ona ou toe foi atu i le Atua—e leai se mea na aumaia ia te au le fiafia moni po o le faamalieina. Ae peitai, o le malaga e toe foi atu ai ia te Ia sa foliga mai ua lofituina tele e le mafai ona amata. Sa ou manao ia avea ma tagata sa ou i ai i le lima tausaga ua mavae, o le tagata sa i ai se faatuatua malosi tele, ae sa ou lagonaina le leiloa.
Sa ou mafaufau pe i ai se auala e toe foi ai.
O Le Auala E Toe Foi Mai Ai
Mulimuli ane, sa ou faaaogaina le lototele e faatino ai. O le ala e toe foi ai sa foliga mai e faigata tele ona uia na o au, ae sa ou manatuaina e le o tuua na o au. E pei ona faimai mai le Teuteronome 31:6 “Ia outou faamalolosi ma outou lototetele, aua tou te fefefe; ma aua foi le matatau …; aua o Ieova lou Atua, lua te o faatasi ma ia; na te le tuua oe, na te le lafoai ia te oe.”
O le taimi lava na ou filifili ai e toe liliu atu ia Iesu Keriso, sa faaauau pea ona taialaina au e vavega i le ala o le feagaiga. Ona o feagaiga tatou te osia ma le Atua, afai tatou te filifili e toe foi atu ia te Ia ma salamo ma se loto faamaoni, o le a Ia faamamaluina ma faafouina na feagaiga ma i tatou.
O a’u faatinoga laiti ae faamoemoeina o le salamo na fesoasoani ia te au e maua ai le faafouina e ala ia Iesu Keriso. Ma o le suesueina o upu o lo’u faamanuiaga faapeteriaka, tatalo i lo’u Tama oi le Lagi, ma faia na mea faigofie e aumaia ai i tatou ia latalata atili atu ia Keriso, na ou maua ai le talitonuga o loo suia au e le Faaola mo le lelei sili atu.
E pei ona faasoa mai talu ai nei e Elder Dale G. Renlund o le Korama a Aposetolo e Toasefululua, “A o outou savavali i le ala o feagaiga, mai le papatisoga e tau atu i le malumalu ma i o outou olaga atoa, ou te folafola atu ia te outou le mana e faasagatau atu ai i tafega masani faalelalolagi—le mana e aoao mai ai, le mana e salamo ai ma ia faapaiaina, ma le mana e maua ai le faamoemoe, mafanafana, e oo lava i le olioli a o outou feagai ma luitau o le olaga.”
I le avea ai ma se tasi na pau ese mai le ala o le feagaiga ma mulimuli ane toe foi mai, e mafai ona ou molimau atu e moni lenei mea.
Afai e te lagona ua e mamao ese mai le talalelei e te le toe foi mai ai, e leai! Sa ou lagona foi le leiloa, ae a o e taulai atu pea ia Iesu Keriso, o le a Ia taialaina oe.
Pau lava le mea e tatau ona tatou faia o le faatuatua ia te Ia.