O i Tatou o soo o Iesu Keriso

Ata

o se tinā ma se tama teine o loo savavali faatasi

Matua Pelē,

E alofa le Alii i lau fanau ma e finagalo ia mafai ona latou faalogo mai ia te Ia. O tusitusiga i lenei lomiga e mafai ona ta’ialaina ai oe a o e aoaoina lau fanau i le auala e maua ai ma iloa faaaliga faaletagata lava ia. E mafai ona e faaaogaina nei auala e fesoasoani ai i lau fanau e fausia se sootaga vāvālalata ma lo latou Tama Faalelagi ma le Faaola.

Talanoaga o le Talalelei

E Faapefea Ona Tatou Ausia Le Lotogatasi?

O le tusiga a Peresitene Nelson o loo i le itulau e 2 o loo otooto mai ai mataupu faavae e fitu o le a fesoasoani ia i tatou e faataunuu ai le poloaiga a le Alii “ia tasi” (Mataupu Faavae ma Feagaiga 38:27). O lē fea o nei mataupu faavae e mafai ona outou talanoaina ma lau fanau? Mo se faataitaiga, e faapefea e le osia ma le tausia o feagaiga ona fatuina le lotogatasi ma isi?

Ave Lona suafa i Ou luga e ala i le Auaunaga

O le tusiga o loo i le itulau e 8 saunia e Elder Villar o loo aoao mai ai le ala na auauna atu ai le Faaola i Lona taimi i le lalolagi. I le avea ai o se aiga, e mafai ona outou tatalo ia iloa po o ai e manaomia le fesoasoani ma pe faapefea ona outou auauna atu i ai. Talanoa ma lau fanau i o latou lagona pe a uma le tatalo. Fesoasoani ia latou iloa tali na latou mauaina.

E finagalo le Atua e Saunoa mai ia te oe.

Faaaoga le tusiga “Ona o Lou Faatuatua ua E Vaai Ai” (itulau 20) e aoao ai lau fanau e uiga i le mauaina o faaaliga. O loo ta’ua e le tusitala le ala e mafai ai e le Alii ona tuuina mai ia i tatou le taitaiga mo le misiona a ō tatou olaga e ala i se faamanuiaga faapeteriaka. E mafai ona e faasoa atu pe na faapefea ona ta’ialaina oe e lou faamanuiaga faapeteriaka.

Mea Mālie Faaleaiga i le Sau, Mulimuli Mai ia te A’u

3 Nifae 12:6; 21:2; 28:11

Na aoao mai Iesu Keriso tatou te manaomia le taitaiga a le Agaga Paia i o tatou olaga. O lenei ata lafoia o le papeti lima e fesoasoani i tamaiti e vaai faalemafaufau ai i lenei mataupu faavae.

Tusi i lalo i luga o fasipepa ni ata eseese e mafai ona faia o ni ata papeti lima (mo se faataitaiga, o se manulele, o se luko, o se gata).
Tuu atu i tamaiti taitasi e ave se fasipepa. Tapē moli i totonu o le potu, ma tuu atu i se tagata e toatasi e ki se moliuila i luga o le puipui, e faatusa i le Malamalama o Keriso.
Fai atu i lau fanau e auaua’i i le tuuina o ō latou lima i luma o le malamalama ina ia foliga mai i le ata lafoia o ō latou lima le ata o loo tusia i luga o le pepa. Tuu i latou e tauivi e aunoa ma se fesoasoaniga mai ia te oe.
I le faatusaina o le siufofoga taiala o le Agaga, ofo atu e fesoasoani e aoao lau fanau, mai lea laasaga i lea laasaga, i le auala e tuu ai o latou lima e fai ai le ata papeti.
A uma loa ona faasolosolo tamaiti taitasi, faitau se mau e uiga i le Agaga Paia e pei o le 3 Nifae 12:6. Fesili atu i lau fanau pe na faigofie atu le fatuina o le ata i le iai po o le aunoa ma lau fesoasoani. Fesoasoani ia latou iloa mea e tutusa ai lenei gaoioiga ma le taitaiga a le Agaga Paia.

Talanoaga: E mafai faapefea ona tatou faaleleia lo tatou tomai e iloa ai le taimi e fetalai mai ai le Agaga ia i tatou?