E Nao le Faaeletonika: Talavou Matutua
O Le Auala na Maua ai e A’u Feagaiga se Uiga Loloto Ina ua Maliu Lo’u Tama
Ina ua maliu lo’u tamā, sa ou le iloa pe faapefea ona ola lo’u aiga. Ae o faamanuiaga o le talalelei a Iesu Keriso na fesoasoani ia te au e maua ai le faamoemoe ma le manino.
A o ou ola ae i Taialani, sa ou lagona i nisi taimi e peiseai [ou te] ese ai lava o se Kerisiano. Ae e ui lava ina ese lo’u talitonuga nai lo le toatele o tagata na siomia au, ae ou te lei lagonaina lava se maasiasi pe manao e lafoai le talalelei a Iesu Keriso. Sa ou fiafia lava i upumoni na aoaoina ai au, ma sa ou faia le mea sili ou te mafaia e mulimuli ai.
Ae na oo mai se mala i lo’u aiga. Ma mo le taimi muamua i lo’u olaga, sa tatau moni lava ona ou filifili, atiina ae, ma pipiimau i le faatuatua i se tasi o maatulimanu o le talalelei—o le fuafuaga o le faaolataga a le Atua.
Manaomia ona Toe Fausia Lo’u Faatuatua
I le 2014, sa faamauina ai i matou ma lo’u aiga i le Malumalu o Hong Kong. Sa ou faatalitali mo lenei aso mo se taimi umi lava ma sa ou matua fiafia lava. Ae e lei leva ona mafai ona matou faia o lenei sauniga matagofie, ae maliu faafuasei lo’u tama.
Sa taia au i se faanoanoaga matautia, ma lofituina. Ou te le’i iloa pe o le a faapefea e au ma lo’u aiga ona taulimaina le maliu o lo’u tama. Sa faapei ua leai se vaega atoa o i matou. E mafai faapefea ona tatou tumau i le olaga e aunoa ma ia?
I lenei taimi pogisa, a o ou liliu atu i le Tama Faalelagi ma Iesu Keriso mo se faamafanafanaga, sa ou aoao ai i le auala e faaloloto ai la’u molimau i le ata o le faaolataga ma aiga e faavavau.
Sa aoaoina pea au ma talitonu e mafai ona faatasia aiga e faavavau. Ae o le feagai ai ma se toesea faigata na matuai luluina ai lava le vaega lenei o la’u molimau. Sa ou manao ma sa manaomia ona ou iloa o le a ou toe vaai i lo’u tama i se aso. Sa amata ona ou fia aoao atili e uiga i le aoaoga faavae o aiga e faavavau.
Na aoao mai talu ai nei Peresitene Henry B. Eyring, Fesoasoani Lua i le Au Peresitene Sili, e faapea:
“E ala i feagaiga o faamauga i totonu o malumalu e mafai ai ona tatou mauaina le faamautinoaga o sootaga alofa faaleaiga lea o le a faaauau pea pe a mavae le oti ma tumau ai mo le faavavau. …
“O tofotofoga, luitau, ma loto mafatia o le a mautinoa lava e oo mai ia i tatou uma. … Ae, pe a tatou auai i le malumalu ma manatua a tatou feagaiga, e mafai ona tatou saunia e maua se taitaiga patino mai le Alii.”
Ma e moni! A o ou tauivi tele ina ia lagona le alofa o le Tama Faalelagi ma Iesu Keriso i lo’u olaga ina ua maliu lo’u tama, o le suesueina o lenei feagaiga ma faamanuiaga faamafanafana na fesoasoani ia te au e toe vaai ai i ni nai manatu laiti o Lo Laua alofa ma le malamalama.
O a Tatou Feagaiga e Fesootai ai i Tatou ia te Ia ma isi.
Ua sili atu ia te au ona anoa le matou faamauga i le malumalu ina ua maliu lo’u tama. Ma sa ou iloaina o feagaiga uma lava e valaaulia i tatou e le Tama Faalelagi e osia ma tausia o ni avanoa matagofie ia mo i tatou.
O feagaiga e le na o ni folafolaga faigofie—o ki ia e fesoasoani ia i tatou e valaaulia ai le mana o le Faaola i o tatou olaga. E mafai ai ona tatou agai pea i luma ma faamoemoe, e ui lava i loto nutimomoia ma luitau o le olaga. Ona o le tele o lo’u mauaina o le mana faamalolo o Iesu Keriso, e mafai ai ona ou tumau e oo i le iuga ma le olioli, ma le iloaina o le a ou toe vaai i lo’u tama.
E pei ona folafola mai e Peresitene Eyring, “‘E tusa lava po o le a le taunuuga, o le a lelei mea uma ona o feagaiga o le malumalu.’”
Ou te matua faafetai lava mo le talalelei a Iesu Keriso ma le faamoemoe faifai pea ma le filemu e aumaia, aemaise lava pe a ou manaomia le filemu i taimi o le le mautonu ma le leiloa. Ou te lagonaina pea le faanoanoa, ae o a’u feagaiga e faamafanafanaina ai lo’u loto ma fesoasoani ia te au e faaauau ai pea ma le faamoemoe.
Ou te uunaia outou e mafaufau loloto i le taua o feagaiga ua outou osia ma le auala latou te fesootai atu ai outou i le Tama Faalelagi ma Iesu Keriso i aso taitasi. Ou te iloa e pei lava ona savavali faatasi le Faaola ma au i le ala o le feagaiga, o le a savavali foi o Ia ma outou pe a outou liliu atu ia te Ia.