E Na o le Faaeletonika
Talitonu e Aunoa ma le Vaai—Malamalamaaga mai Tagata o le Ekalesia i le Lalolagi Atoa
E mafai faapefea ona tatou faatuatua i le Faaola pe afai tatou te lei vaai ia te Ia?
O le asiasiga a le Faaola i tagata o Amerika sa mautinoa lava o se mea na tupu na suia ai olaga o i latou uma o e na molimauina Ana vavega. Ae e faapefea la e i latou e le vaai ia te Ia ona maua se molimau patino ia Iesu Keriso?
O le mea e lelei ai, na poloaiina e le Faaola tagata na Ia asia e tusi o latou aafiaga e faamalosia ai i latou o e le vaai ia te Ia (tagai i le 3 Nifae 16:4). Ma e ui atonu o le toatele o i tatou atonu e le vaai i le Faaola i o tatou mata faaletino, ae na aoao mai Elder David B. Haight (1906–2004) e faapea, pe a oo i le vaai atu i le Faaola, e tele “uiga o le upu vaai, e pei o le iloaina o Ia, iloatino lelei o Ia, iloaina o Ia ma Lana galuega, iloaina Lona taua, po o le malamalama ia te Ia.”
O le a la se mea e fesoasoani ia te oe e maua ai se molimau i le Faaola ma Lana talalelei toefuataiina, e tusa lava pe e te lei vaai faaletino ia te Ia?
O nisi nei o nai tali mai tagata i le salafa o le lalolagi.
Molimauina le Aafiaga o Ana Aoaoga
“O le filemu ma le olioli e oo mai i le mulimuli i Ana aoaoga e avea o ni faamanatu faifai pea o Lona aafiaga i lo’u olaga. O le talitonu ia Iesu Keriso e masani ona lagolagoina e aafiaga patino, faamautinoa faaleagaga, suesueina o tusitusiga paia, tatalo, faaaumea i nuu, ma molimauina le aafiaga lelei o Ana aoaoga ia te ia lava ma isi.”
Nefi Statie, Bonaire, Dutch Caribbean
Ola i le Faatuatua
“O le talitonu e aunoa ma le vaai o lona uiga o le ola ai i le faatuatua. Atonu tatou te lagona le faaosoosoina e fesili atu i le Alii pe o i ai moni lava o Ia iina, ae ou te talitonu mausali e sili atu ona tatou latalata atu i le Alii pe a tatou faatinoina le faatuatua. E ui lava ou te lei vaai ia te ia, ae ou te iloa lava lo’u faasinomaga o se afafine o le Atua ma o se soo o Iesu Keriso. O Ia o lo’u Faaola, ma e le muta Lona alofa. E aunoa ma le vaai, e mafai ona ou ola i le faatuatua.
“Sa ou aoao e uiga i le moni o le talalelei ina ua 19 ou tausaga. O lenei, ona o lo’u faatuatua, ua tumu ai lo’u olaga i faamanuiaga. O tusitusiga paia, aoaoga mai perofeta, ma upu na tautalagia i le konafesi aoao ua faamanuiaina ai lo’u olaga i aso uma ma tuuina mai ai ia te au le lototele e faaauau ai pea ona tumau le i ai o le faatuatua. E ui lava ou te le vaai ia Keriso, ae ua ou vaaia Lona malamalama i lo’u olaga.”
An Vu, Hanoi, Viatename
Faatuatuaina o le Atua i Taimi Faigata
Na aoao mai le Aposetolo o Paulo, ‘A o le faatuatua, o le faalagolago lea i mea ua faamoemoe i ai, o le mautinoa lea o mea e le o vaaia’ (Eperu 11:1). Pe afai tatou te talitonu e aunoa ma se faamaoniga, tatou te tatalaina i tatou lava i avanoa e le gata. Ia te au lava ia, o le faatuatua o se faamaoniga lea o le malosi o lo tatou liua, ma o lena malamalama e faateleina ai lo’u gafatia e mafaufau faaselesitila.
“Ia Iuni 2023, sa ou pau ma gau leaga ai lo’u tulilima a o toesea lo’u toalua i se tiute faalelotu i Uganda. Sa tele le fesoasoani mai lo’u aiga ma uo. Ae ina ua ou iloaina le tele o le fesoasoani e manaomia e fai ai mea faigofie, sa toetoe lava ina a ou lilifa atu i lagona o le faanoanoa tele mo a’u lava. Sa faamanatu mai e la’u tama teine ia te au e silafia i matou e le Atua ma e manaomia ona ou faalagolago i le Alii.
“O le faatuatuaina o le Atua i lena taimi faigata na ou maua ai le faamoemoe, na mafai ai ona ou talitonu o le a Ia le tuuina mai ia te au ni mea e sili atu nai lo le mea e mafai ona ou taulimaina. O le iloaina o loo faatasi pea Lona Agaga ma au, sa ou faaauau ai pea ona i ai lo’u faamoemoe ma le filemu i taimi faigata. O lenei, ina ua mavae le silia ma le fitu masina, ua tau le iloa le manua.”
Josephine Baddoo, Nairobi, Kenya
Iloaina o Lona Aao e ala i Isi
“Ua ou vaaia le aao o le Alii i lo’u olaga e ala mai i isi. E i ai taimi, ou te lagona ai e faapea, ua silafia e le Alii e faigata ona ou le masalomia au lava po o le talitonu ia te au lava ia. Ae ao ou ola ai i lo’u olaga, sa mafai ona ou iloaina Lona aao e ala mai i isi o e na fesoasoani ia te au e aoao ina ia talitonu ia te au lava ia ma vaai ia te au lava ia i le ala e silasila mai ai o Ia ia te au.
“Ou te vaaia e ala mai i o’u matua o e na tausia a’u, o a’u uo o e na lagolagoina au i suiga i le kolisi, o a’u soa i le misiona o e na taialaina au i la’u misiona, ma o’u polofesa i le kolisi o e na popole moni lava i a’u aoaoga ma le soifua manuia.
“O taimi uma lava latou te auauna mai ai ia te au, ou te lagonaina foi le iai o le Faaola iina.”
Michael Avalos, Idaho, ISA
Talitonu i Lana Taimi
“Ua ou vaaia le aao o le Alii i le tele o taimi i lo’u olaga, ae o la’u molimau sili e oo mai i se tofotofoga sa ou onosaia mo le 10 tausaga.
“Sa ou maitaga i la’u tama teine lona lua ae na fafano le pepe i le fitu vaiaso. Ou te manatua lo’u tagi ma aioi atu i le Alii ae sa ou mafaufau, ‘E mautinoa lava e i ai se fuafuaga sili atu a lo tatou Faaola mo lenei pepe nai lo le mea ou te manaomia i le taimi nei.’ O le tausaga na sosoo ai na ou toe maitaga ma sa toe fafanofoi Sa ou fesili, “Lo’u Atua e, se a ea le mea ua e tuulafoai mai ai ia te au?” (Mataio 27:46).
“Mulimuli ane, i se tulaga faavavega na toe maitaga ma maua ai se pepe teine maloloina.
“Ae e le o le mutaaga lea o lenei tofotofoga. Ae paga lea, mulimuli ane na iu ina toe fafano maitaga sosoo e fa.
“Ina ua uma ona siitia atu i se eria fou ma maua se [tausisoifua] fou, sa iloa ai e poloka lo‘u toto Mai lenei faamatalaga, na ma faia ai ma la’u fomai se fuafuaga. Na ou maua foi se fanau e toalua e matuā maloloina atoatoa!
“E atoatoa lelei le taimi a le Alii. O lenei lesona o se lesona sili ona faigata ua ou aoaoina. Na te saunia le ala mo oe ma tuu tagata ma aafiaga i lou olaga e faamalosia ai oe.”
Vicky Majano, Virginia, ISA