‟Malaga faatasi ma le Atua,” Liahona, Oke. 2024.
O Leo o le Au Paia o Aso e Gata Ai
Malaga faatasi ma le Atua
”Taofi!” o le alaga lea a le fitafita, ma faaū sa’o mai se fana telē i lo’u tamā.
Ata na tusia e Michael J. Bingham
Ina ua mavae le Taua Lona II a le Lalolagi, sa mananao ou mātua e auai atu faatasi ma le Au Paia i Amerika. Ae muamua e tatau ona latou sosola ese ma le la fanau e toalima mai Siamani Sasae e agai i Siamani i Sisifo.
O lo’u tamā, o Walter, na alu atu na o ia e fuafua po o fea e sili ona saogalemu e sopoia ai le tuaoi. Sa ia malaga e aunoa ma se mea ae sa uunaia o ia e ave lana vaiolini. O se ta vaiolini atamai, sa ia maua se uunaiga faaleagaga e faapea o le a fesoasoani lana vaiolini ia te ia i lana malaga.
Ia Fepuari 1949, sa alu ai Tamā i se nofoaafi i se taulaga e tele lava maila mai le tuaoi. Ina ua taunuu, sa ia alu ese mai le taulaga, ma ui atu i se ala na taitai atu ai o ia i se togavao matagiā. Soo se tasi e maua o agai atu i le tuaoi o Siamani Sisifo e masalomia o se solaaga ma o le a pu’e taofia faapagotā.
I le āluga o le ala, na vaai ai Tamā i se isi alii o taumafai e sola i Siamani i Sisifo. Sa tonu ia i la’ua e malaga o se paga. O mata mataala e fa o le a sili atu nai lo o le lua.
Sa la faaauau ma le faaeteete a o la pāsia se olo matamata. Na faafuasei lava, mai tua o se pupuvao, na oso mai ai se fitafita talavou Lusia ma alaga mai, “Taofi!”
Sa faamalō lo’u tama ma lana uo fou i le fefefe a o faaū mai e le fitafita se fana lapoa ia i la’ua. Sa fai mai le fitafita o le a pu’e faapagota i la’ua.
Na talatala lemu lava e le uo fou a lo’u tamā lana atopau, ma faaali mai ai ni meaai mananaia se tele. Na ia talo atu i le fitafita e mafai ona ia aveina uma pe afai na te faatagaina i la’ua e o, ae sa le’i minoi le fitafita.
I le gagana pagupagu faa-Lusia, sa fai atu ai lo’u tama i le fitafita o ia e fiafia tele i musika a tagata Lusia. Sa ia faasino atu i le ato o lana vaiolini ma fai atu e fia tāina mo ia.
Sa aumai i fafo e tamā lana vaiolini ma amata ona tāina se fati faamomoi loto faa-Lusia. Ina ua mavae sina taimi puupuu, sa ia vaaia loimata o fotua’i mai i mata o le alii talavou. Ina ua uma le fati a Tamā, sa fesili atu le fitafita ia te ia pe na te iloaina isi fati Lusia.
Ona ta lea e tamā se isi fati. Ina ua uma, sa tagi le fitafita. Sa toe toso i luga lana fana i lona tau’au, sa fai atu le fitafita i le faa-Lusia, “Malaga faatasi ma le Atua.” Ona ia tuu atu lea o alii uma e toalua e faaauau le la solaaga i Sisifo.
Sa le’i pine ae toe foi saogalemu atu lo’u tamā i Siamani Sasae, ma le lotofaafetai mo musumusuga na taitai atu ai o ia i lona puipuiga. I le tolu tausaga mulimuli ane, sa sosola ese ai ma lona aiga e ala i le malaga atu i Perelini i Sasae ma sopoia le tuaoi iina e oo atu i Perelini i Sisifo.