E Na o le Faaeletonika: Aoaoga a Taitai o le Ekalesia mai Ala o Faasalalauga Faaagafesootai
Lotogatasi—“Ia Tasi i le Loto ma le Mafaufau”
Tagai po o a vaega na aoaoina mai e perofeta soifua ma isi taitai o le Ekalesia i luga o ala o faasalalauga faaagafesootai e uiga i le lotogatasi.
I le avea ai ma se Ekalesia, ua faamanuiaina i tatou i le i ai o tagata auai mai talaaga ma tulaga eseese. Ua faamanuiaina i tatou taitoatasi e le Tama Faalelagi i uiga tulaga ese, meaalofa, ma taleni, ma o se vaega lea ua matagofie ai le Ekalesia a Iesu Keriso. E ui i o tatou eseesega uma, ua poloa’iina i tatou e le Alii ina “ia tasi outou; ma afai e lē tasi outou e lē a aʼu outou” (Mataupu Faavae ma Feagaiga 38:27). E ui ina le mafai ma e le tatau ona tutusa i tatou, ae e mafai ona tasi i tatou pe afai tatou te taumafai e auai faatasi ma ola ai i le talalelei a Iesu Keriso.
Na aoao mai Peresitene Russell M. Nelson: “I se tatalo mulimuli ane, na faaaofia ai e Iesu se aioiga mo le lotogatasi. Tama e, na Ia fetalai ai, ‘Ou te tatalo atu ia te oe mo i latou, ina ia latou talitonu mai ia te au, ina ia mafai ona ou i ai i totonu ia i latou e pei ona i ai oe le Tama, i totonu ia te au, ina ia tasi i tatou’ [3 Nifae 19:23]. E mafai foi ona tatou tatalo mo le lotogatasi. E mafai ona tatou tatalo ina ia tasi le loto ma le mafaufau faatasi ma le au faauuina a le Alii ma e pele ia i tatou. E mafai ona tatou tatalo mo le malamalama fefaasoaai ma le faaaloalo i le va o i tatou lava ma o tatou tuaoi. Afai tatou te alolofa moni lava mo isi, e ao ona tatou tatalo mo i latou [tagai i le Mataio 5:44]. ‘Ia tatalo le tasi mo le isi … ,’ na aoao mai ai Iakopo, aua ‘o le tatalo faatauanau a le tagata amiotonu e aoga tele’ [Iakopo 5:16].”
Na saunoa taitai o le Ekalesia i le konafesi aoao e uiga i le lotogatasi. Ua latou faasoa mai foi ni savali e uiga i nei autu i luga o ala o faasalalauga faaleagafesootai, e aofia ai vaega nei:
O Le Lotogatasi O Se Molimau Mamana o le Faatosinaga a le Faaola
“Pe a ou faitauina tusitusiga paia, ou te faagaeetia i le tele o le galuega a le Faaola e faatatau i le aumaia faatasi o tagata. O tagata Iutaia ma Nuuese, o faipule ma faifaiva, o alii ma tamaitai.
“O le lotogatasi o se molimau mamana lea o le faatosinaga a le Faaola. Na folafola mai e Iesu Keriso o le a talitonu le lalolagi ia te Ia pe a latou vaai i le lotogatasi o Ana auauna. Atonu o le a toatele atu tagata i le lalolagi o le a maua se molimau ia Iesu Keriso ma Lana Ekalesia pe afai latou te vaaia le lotogatasi sili atu i totonu o i tatou, o Ona soo.
“O le lotogatasi tatou te sailia e le o le vaai atu o tagata uma i mea i le ala lava e tasi; o le vaai atu lea o tagata uma i le itu e tasi—ia Iesu Keriso. E le o o tatou aafiaga masani po o talaaga e tuufaatasia ai i tatou. O lo tatou faamoemoega tutusa lea. Ua tasi i tatou, e le ona o le mea sa tatou i ai ae o le mea o loo tatou taumafai e o i ai, e le ona o le tagata ua tatou i ai ae o le tagata tatou te saili e avea ai.
“Ioe, o la tatou faataitaiga sili i le sailia o le lotogatasi o lo tatou Faaola, o Iesu Keriso. Faafetai i Lana taulaga togiola, e mafai ai ona faamanuiaina fanau uma a le Atua e faavavau.
“O luitau o le faatuina o le Ekalesia a le Faaola e manaomia ai ni vaaiga se tele, ae o na mea uma e tasi le vaai atu i le mamalu o le Tama Faalelagi ma Iesu Keriso.”
Elder Dieter F. Uchtdorf o le Korama a Aposetolo e Toasefululua, Facebook, 23 Iuni, 2023, facebook.com/dieterf.uchtdorf.
Ia Tatou Talisapaia le Tulaga Ese ua Ofoina mai e Tagata Taitoatasi, Tuaoi, ma Uo
“Sa ou tafiese le pefu o lo’u pulou e faafeiloai atu i amepasa ma sooupu mai atunuu i le salafa o le lalolagi i se faatasiga talu ai nei e faaautu i Sisifo. O lenei faatasiga matagofie na ou lagona ai le faafetai mo faauooga uma na matou atiinaeina i le taualumaga o tausaga faapea foi ma sootaga fou o loo faaauau pea ona matou fausia.
“Tatou te o mai faatasi ma ni talaaga eseese faaleaganuu, gagana, ma faalelotu. Se’i o tatou talisapaia le tulaga ese o loo ofoina mai e tagata taitoatasi, tuaoi, ma uō e pei ona ofoina mai e uso ma tuafāfine o i ai moni i tatou.
“O lenei, e le toe tagata ese outou, po o e ua aumau, a ua nuu faatasi ma le au paia, o le aiga foi o le Atua’ (Efeso 2:19).”
Elder Dieter F. Uchtdorf o le Korama a Aposetolo e Toasefululua, Facebook, 13 Nov., 2023, facebook.com/quentin.lcook.
E Tatau Ona Tatou Tasi i le Tino o Keriso
“O se tasi o mafuaaga na faatuina ai e Iesu Keriso se ekalesia, o Lana Ekalesia, o le tuuina mai lea ia i tatou o le poto masani i le alofa i isi, ia aoao po o le a le uiga o le uunaia e le alofa mama i lona faatinoina.
“O loo i ai le atamai i le faatulagaina o iunite o le Ekalesia i le lotoifale e faavae i le faataatiaga faafaafanua. Tatou te le filifilia se faapotopotoga e faavae i le tagata tatou te fiafia pe mananao e faatasi iai. E filifilia uarota mo i tatou e faavae i se faatulagaga talafeagai faafaafanua, ma tatou aoao e nonofo faatasi ai, auauna atu, ma alolofa i tagata atonu e eseese o latou talaaga, mea e fiafia i ai, ma manatu.
“O nisi atonu tatou te maua ai sina maini laitiiti, ae e tatau ona tasi i tatou i le tino o Keriso. O la’u aioiga ia tatou vaavaai atu ia Iesu Keriso i o tatou mafaufauga ma amioga ina ia mafai ona faatumulia i tatou i le alofa mama o Keriso lea e tuuina mai e le Atua ’i luga o i latou uma o e o soo moni o lona Alo o Iesu Keriso’ (Moronae 7:48).”
Elder D. Todd Christofferson o le Korama a Aposetolo e Toasefululua, Facebook, 30 Nov., 2023, facebook.com/dtodd.christofferson.
E Mafai e le Malumalu Ona Aumaia le Lotogatasi o le Loto ma le Mafaufau
“Afai tatou te faamoemoe e lagona le Agaga o le Alii, e tatau ona tatou faaaluina le taimi i nofoaga e faigofie ona afio ai Lona Agaga.
“O nisi o nofoaga e sili ona paia e mafai ona tatou tutu ai o malumalu o le Alii. O le faaiuga o lenei vaiaso, sa ou maua ai le fiafia iloga o le auai faatasi ma tagata o Le Ekalesia a Iesu Keriso o le Au Paia o Aso e Gata Ai i Iapani a o ou faapaiaina le Malumalu o Okinawa Iapani.
“Atonu tou te iloa o loo i ai se nofoaga faapitoa o le atunuu o Iapani i lo’u loto. O le asiasi atu i ai e pei lava o le alu i le aiga. E le gata i le auauna atu o se faifeautalai mo le Ekalesia a Iesu Keriso a o avea ma se alii talavou i Iapani i le tele o tausaga ua mavae, sa ma auauna atu ma Lesa o ni taitai misiona, ma auauna atu talu ai nei lava i le Au Peresitene o Asia i Matu. E fitu le aofai o tausaga o nonofo ai lo matou aiga i Iapani.
“O se tasi o vaega ofoofogia o lenei malumalu o le tulaga moni lea o le auauna atu i le Siteki a Okinawa Iapani e tautatala faa-Iapani faapea foi ma le Itu o le Militeli a Okinawa Iapani e tautatala faa-Peretania.
“O le mafaufau i le talafaasolopito o se vaega o nei vaega uma e lua ma vaai atu ia i latou o o mai faatasi e auauna atu i le Alii i le malumalu e matuai ofoofogia lava.
“O lenei malumalu o le a mafai ai e tagata Okinawa o le Ekalesia a Iesu Keriso ona faamamaluina o latou tuaa—e aofia ai le toatele o e na feagai ma le maliu faafuasei ona o tulaga fesootai ma taua.
“Mo i latou i Okinawa—ma mo i tatou uma—e mafai e le malumalu ona aumaia le filemu ma le mafanafana ma le lotogatasi o le loto ma le mafaufau ma le faaaloalo ma le tuuto i o tatou tuaa ua maliliu.”
Elder Dieter F. Uchtdorf o le Korama a Aposetolo e Toasefululua, Facebook, 12 Nov, 2023, facebook.com/stevenson.gary.e.
Tatou te Agai i Luma o Ni Fanau a le Atua
“O le Vaitafe o le Iguazu e tafe atu i Pasila i saute ma māūi atu ai i se maupuepue lea e fatua’i ai se paea’iga o āfu lea ua lauiloa i le lalolagi atoa o Iguazu Falls—o se tasi o foafoaga sili ona matagofie ma mataina a le Atua i le lalolagi. E tafe atu se voluma tele na’ua o le vai i se vaitafe e tasi ona ta’ape ai lea, ma fatua’i ai le faitau selau o āfu e le mafaatusalia.
I se tulaga faafaatusa, o lea paea’iga ofoofogia o āfu o se ata lafoia o le aiga o le Atua i le lalolagi, aua e tutusa lo tatou faapogai ma elemene faaleagaga, e afua mai i lo tatou tupuaga paia ma le sootaga faalelagi.
“Peitai, ua taitasi i tatou ma soifua a’e i aganuu eseese, o ituaiga, ma tagatanuu, e eseese foi manatu, aafiaga, ma lagona. Ae ui i lea, tatou te agai i luma o ni fanau a le Atua ma o ni uso ma tuafafine ia Keriso, e aunoa ma le aveesea o lo tatou sootaga faalelagi, lea e avea ai i tatou ma tagata tulaga ese ma se nuu faapelepele.
“Talosia ia tatou faaogatusa o tatou loto ma mafaufau ma le malamalama ma molimau e faapea, e tutusa i tatou uma i luma o le Atua, ua faaeeina atoatoa i tatou uma i le gafatia e tasi ma le tofi e faavavau.
“Ia tatou olioli atili i le sootaga faaleagaga lea o loo iai i lo tatou va ma faatauaina uiga eseese ma meaalofa eseese ua ia i tatou uma. Afai tatou te faia lena mea, ou te folafola atu o le a tatou ola i o tatou lava ala, e faapei o vai o le Afu o Iguazu, e aunoa ma le aveesea o lo tatou sootaga faalelagi lea e iloga ai i tatou o se nuu tulagaese, “o fanau a Keriso, ma suli i le malo o le Atua.”
Elder Dieter F. Uchtdorf o le Korama a Aposetolo e Toasefululua, Facebook, 19 Nov., 2023, facebook.com/soares.u.
E alofa le Tama Faalelagi i Tagata Uma.
“O se tasi o mataupu faavae taiala a le Aualofa o le galue lea i le lotogatasi e fesoasoani ia i latou o loo manaomia le fesoasoani. I le 2022, sa fesoasoani ai sui o le Aualofa i le lalolagi atoa i lenei galuega e ala i le anoanoai o itula volenitia ma saofaga i le galuega fesoasoani alofa a le Ekalesia.
“I le tausaga ua tea, sa valiina ai e tamaitai o le Ekalesia ni meafale ina ia manuia ai tagata ua faaaunuua, auai i galuega faatino e 483 mo le tali atu i faalavelave faafuasei i le salafa o le lalolagi, ma sa oo lava ina savavali atu i le palapala e tilivaina patino atu sapalai sa matuai manaomia lava ia i latou sa manaomia.
“O Sylwia, o se tagata o le Ekalesia i Polani, na aoteleina le manao o tuafafine e auauna atoatoa atu: ‘O se mea masani lenei. “Pe a e vaai i tagata o loo manaomia le fesoasoani, fesoasoani atu i ai. … E le afaina pe o oe o se tagata o le Ekalesia pe leai. E alofa le [Tama Faalelagi] i tagata uma.’
‘Ina ia aoao atili, siaki le Lipoti Faaletausaga 2022 a le Ekalesia e uiga i le Tausiga o i Latou o Loo Manaomia le Fesoasoani.”
Manatua: E mafai foi ona e aoao atili i le Aotelega o le 2023: Tausiga o i Latou e Manaomia le Fesoasoani.
Sister J. Anette Dennis, Fesoasoani Muamua i le Au Peresitene Aoao o le Aualofa, Facebook, 4 Ape., 2023, https://www.facebook.com/RS1stCounselor.
O Le Lotogatasi na Matou Lagonaina na Tatalaina ai le Ala mo Faaaliga
“Ina ua matou savavali atu i totonu o falesa i San Diego ma Navu, sa matou lagonaina se mea. Sa matou iloaina sa matou i ai i totonu o se potu ua tumu i tuafafine o e sa fiaaai ma fiafeinu mo le alofa, faamalologa, ma le toomaga o le Faaola. Sa latou tuu ese isi mea semanu latou te faia i le po o se Aso Faraile ma o mai faatasi e maua faaaliga patino.
“Sa matou lagonaina le lotogatasi o ni afafine o le Atua ma tagata o le Aualofa a o matou tutu faatasi i le pulelaa ma o matou lima o fusi le tasi i le isi. O le fiaaai ma le ositaulaga a na tuafafine ma le lotogatasi sa matou lagonaina o ni tamaitai o le Atua, na tatalaina ai le ala mo po ofoofogia o le mana ma faaaliga. Sa matou tuu ese a matou faamatalaga ma tautala atu mea na tuuina mai e le Alii i o matou loto. Sa matou faatuatuaina e ala i a ma upu ma savali e lē lelei atoatoa, o le a fetalai atu ai le Alii i loto o tuafafine taitasi. E le misia lava e Ia se avanoa e alofa ma faamanuia ai Ona afafine pe a latou faapotopoto i Lona suafa.
“Na faapefea e le faapotopoto faatasi o ni tamaitai o le Atua ma tagata o le Aualofa ona e latalata atili atu ai i le Faaola?”
Peresitene Susan H. Porter, Peresitene Aoao o le Peraimeri, Facebook, 1 Nov., 2023, https://www.facebook.com/PrimaryPresident.
O Le Lotogatasi ma le Laugatasia o se Vaega o Mataupu Faavae o le Perisitua
“A o faitauina ‘Mataupu Faavae o le Perisitua’ i le Tusitaulima Aoao, sa faatumulia lo’u loto ma lo’u mafaufau i ni upu patino se lua: o le lotogatasi ma le laugatasia. E ese mai le meaalofa e le mafaatusalia a Lona Alo e Toatasi na Fanaua, e le mafai ona ou mafaufau i se faaaliga sili atu o le alofa o le Atua mo Ana fanau nai lo faamanuiaga e le mafuatiaina ia e tutusa lava le avanoa mo Ona atalii ma afafine e ala i Lana perisitua paia.
“‘O le mana o le perisitua a le Atua e tafe mai i tagata uma o le Ekalesia—tamaitai ma alii—a o latou tausia feagaiga na latou osia ma Ia’ (Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 3.5, Potutusi o le Talalelei).
“Ua faapefea ona faamanuiaina lou olaga e le perisitua paia?”
Sister Amy A. Wright, Fesoasoani Muamua i le Au Peresitene Aoao o le Peraimeri, Facebook, 1 Ian., 2024, https://www.facebook.com/Primary1stCounselor.
E Mafai Ona Tatou “Vaai” ma le Loto i ai i Tagata Uma i le Lotu
“O lenei … tala mai la’u uo pele o Kathryn Godderidge, sui o le Aufono Faufautua Aoao o le Peraimeri, na loloto le pa’i mai i lo’u loto:
“‘Sa ma auai ma lo’u toalua i se sauniga faamanatuga ma lo ma atalii ma lona aiga i Simpsonville, Karolaina i Saute. Sa vave alu lona toalua i le lotu e taina le okeni, ma sa matou tuai teisi atu ma le ma atalii ma fanau a fanau, ma maua ai ni nofoa i tua. Sa vave ona matou nonofo i totonu ma amata ona faalogologo i musika o le okeni mo le viiga amata, ae matou iloaina loa sa aumai e le atalii o le ma tama tama e lua tausaga le matua lana meavaai e sili ona fiafia i ai. Sa amata ona ia faaaogaina e suesue ai ma le faaeteete le faapotopotoga, ma ina ua matou taumafai e fesoasoani ia te ia e tuuese, sa ia tetee, “Ou te manao e vaai ia tina i le okeni!”
“‘Oka se faailoaga matagofie o le alofa ma le manao mai se tamaitiiti laitiiti mo lona tina!
“‘Oi, pe ana tatou teuina uma a tatou lava “meavaai” e le gata ina maua ai mea e aumaia ai ia i tatou le olioli ae ia vaai moni ai foi le tasi i le isi a o tatou faapotopoto faatasi ma tapuai faatasi i le Aso Sa.’
“‘A o tatou sauniuni mo le sauniga faamanatuga, pe o tatou “vaai” ea ma le loto i ai i tagata taitoatasi uma i le faapotopotoga? Pe tatou te “vaai” i a tatou fanau pele, talavou, ma talavou nofofua matutua o ni tagata auai taua i lenei galuega maoae? Pe tatou te “vaai” ia i latou o ni tagata o le feagaiga ma se matafaioi tulaga ese e faia i le fausiaina o le malo o le Atua?
“‘Ou te molimau atu a amata ona tatou “vaai” ma faaauai tagata uma o le faapotopotoga, o le a sili atu ona olioli, paia, mamalu, ma taulai atu la tatou tapuaiga i le aso Sapati ia Iesu Keriso.’”
Sister Amy A. Wright, Fesoasoani Muamua i le Au Peresitene Aoao o le Peraimeri, Facebook, 19 Fep., 2024, https://www.facebook.com/Primary1stCounselor.