‟O E Misia Le Vavega o le Talalelei?,” Liahona, Oke. 2024.
Autalavou Matutua
O E Misia Le Vavega o le Talalelei?
Sa ou tuua le Ekalesia ma ou te le’i iloaina le mea sa ou misia.
Pe na i ai se taimi na e manatu faatauvaa ai i se mea na e mauaina, ma le lē iloaina o lona aoga ia te oe seia oo ina mou atu?
E faatasi ona ou oo i ai—i le talalelei a Iesu Keriso.
I le tuputupu a’e i Monokolia, o a’u ma lo’u aiga o ni tagata o le Ekalesia. Ae i le āluga o taimi, sa amata ona faaitiitia le auai soo o o’u mātua. Sa amata lemu foi ona ou lagonaina le lē toe popole i le talalelei.
Ou te lei manatu mamafa lava i mea sa ou aoaoina ma i’u ai ina matou lē toe o uma. Ou te le’i manatu o le a ou misia le talalelei, auā sa foliga mai e le’i i ai lava sona aoga i lo’u olaga.
Ata na tusia e David Green
Vaaia o le Malamalama
A o avea a’u ma se talavou matua, sa te’i ua feiloai lo’u uso matua i nisi o faifeautalai. Sa latou taofia o ia e fesili atu pe mafai ona ia faaliliuina se mea mo i laua i le faa-Monokolia. Sa latou faia se talanoaga faavavevave, ma ina ua ia toe foi mai i le fale, sa ia iloa ai po o ai i la’ua.
Sa manao o ia e alu i le lotu i lena lava vaiaso ma ia valaaulia a’u ou te auai faatasi ma ia.
Sa ou matua’i tetee lava i le manatu i le taimi muamua. Sa ou manatu o loo lelei lava lo’u olaga e aunoa ma le Ekalesia! Ae sa ia faatauanauina a’u ou te auai atu faatasi ma ia mo na’o se taimi e tasi.
Ina ua ou savali atu i le sauniga faamanatuga mo le taimi muamua i le tele o tausaga, sa ou lē fiafia tele i lo’u i ai iina. Ae peitai, a o o’u tilotilo solo, sa ou vaaia nisi o uo sa matou tuputupu a’e faatasi. O le malamalama sa latou aumaia sa toetoe lava a faitino. A o o’u vaavaai atu ia i latou, sa ou toe manatuaina ni nai lagona iti o aafiaga faaleagaga na ou lagonaina i le lotu a o tuputupu a’e.
O le tele o upumoni sa ou lē toe amana’iaina na toe tafe uma mai, ma na faafuasei lava ona ou lagonaina le gaogao ma le faanoanoa. ‟Ou te lē pei o i latou,” sa ou mafaufau ai. ‟Aisea na ou tuua ai nei mea uma?”
Sa ou iloaina ua avea a’u ma se tagata ese i ni nai tausaga ua mavae. Sa i ai se lagona o le pogisa i lo’u olaga sa ou lē toe amana’iaina. Ae a o o’u saofai ai iina, sa ou faalogoina se leo to’afilemu i lo’u mafaufau e foliga o loo faapea mai, ‟E mafai foi ona e susulu atu. E lē i tuai tele.”
Sa ou mafaufau i le faataoto i le mamoe na leiloa. O le mamoe e tasi na toe aumai e le Faaola i le lafu (tagai i le Luka 15:4–7).
O a’u o lena mamoe. Ma sa afio mai ma le alofa le Faaola ia te a’u auā sa alofa o Ia ia te a’u e pei foi o isi Ana mamoe.
Sa Ia manao ia ou toe foi mai.
O lenei mea sa aumaia ia te a’u le lotofaafetai tele mo lo’u Faaola. O le lagonaina o le Agaga mo le taimi muamua i le tele o tausaga, sa ou faia ai le faaiuga e toe foi mai i le Ekalesia ma, o le taimi lea, ia manatu mamafa i ai.
Na molimau mai talu ai nei Elder Dieter F. Uchtdorf o le Korama a Aposetolo e Toasefululua, ‟O le taimi lava e te filifili ai e toe foi atu ma savali i le ala o lo tatou Faaola ma le Togiola, o le a ulu atu Lona mana i lou olaga ma suia [tagai i le Alema 34:31].”
Sa ou lagonaina lena upumoni ma iloa afai ou te tuuina lo’u loto i le talalelei, o le a suia lo’u olaga.
Aua le Vaai i tala atu o Iesu Keriso
A o amata ona ou ola i le talalelei, sa ou toe maua le faamoemoe i lo’u olaga. Sa i’u ina ou talitonu e alofa le Tama Faalelagi i Ana fanau taitoatasi ma o le talalelei a Iesu Keriso o le ki lea i le toe foi atu i lo tatou aiga faalelagi.
O lenei mea e taua tele ia ia te a’u i le taimi nei.
Na aoao mai Elder Dale G. Renlund o le Korama a Aposetolo e Toasefululua:
‟E mafai foi ona tatou lilifa i le vaai i tala atu o le faailoga. E manaomia ona tatou puipui e faasaga i lea lilifaga ne’i o tatou misia Iesu Keriso i o tatou olaga ma lē mafai ai ona tatou iloa le tele o faamanuiaga ua Ia ofoina mai ia i tatou. Tatou te manaomia o Ia. …
‟O Ia o lo tatou faailoga. Afai tatou te manatunatu sesē faapea o loo i ai se manaoga mo se mea i tala atu o mea ua Ia ofoina mai, ua tatou faafitia pe faaitiitia le avanoa ma le mana e mafai ona Ia aumaia i o tatou olaga.”
Sa ou vaavaai i tala atu o mea e ofo mai e Iesu Keriso ia te a’u, ma o lenei ua lē mafai ona ou vaai faalemafaufau e lafoa’ia o le olioli ua ou lagonaina ona o Ia.
Afai e te lagona e te lē agavaa, afai o loo e tauivi ma ni fesili e le’i taliina, pe e te manatu foi o le avea ma se soo o Keriso e tele nauā ni mea e ao ona e faia, vaai faalatalata atili i vavega ua ofoina mai e lo tatou Faaola ia i tatou. Ou te iloa e silafia oe e le Tama Faalelagi. O le a Ia fesoasoani ia te oe e taofimau i lou faatuatua a o e liliu atu ia te Ia.
Aua e te lafoa’ia le meaalofa sili ma le vavega a le Faaola i lou lagolagoina o se mea e itiiti lona tāua. O lou tāua, o mea uma ia ia te Ia.
Ua ou molimauina patino le telē o le faatamaoaigaina e le talalelei a Iesu Keriso o olaga o i latou o ē mulimuli ia te Ia.
O loo faaauau pea ona faatamaoaigaina ai a’u.
E alala le tusitala i Ulaanbaatar, Monokolia.