‟O Le Filemu o le Vavega Lea,” Liahona, Oke. 2024.
O Leo o le Au Paia o Aso e Gata Ai
O Le Filemu o le Vavega Lea
Ina ua mae’a le ta’uina mai o lo’u ma’i, sa ma taulai atu i le Alii ina ia mafai ona ma vaai i o ma faamanuiaga.
Ata na tusia e Michael J. Bingham
Ina ua ma iloa ma lo’u toalua, o Tavita, e lē mafai ona maua se ma fanau, sa ou tagi. Ona oo lea i le 2016, sa toe valaau mai lo’u foma’i ia te a’u i lona ofisa i le mae’a ai o se siaki masani faafoma’i ma le faata o le susu. Ina ua mavae nisi suesuega, o le mea sa ia manatu muamua o se faafitauli laitiiti ua avea ma se faafitauli telē: kanesa.
O se mea na faate’ia ai, ma sa i ai ni o ma aso leaga. Ae ma te lei iloaina pe o le a se taunuuga o lenei mea, sa ou fai atu i le Tama Faalelagi, ‟Afai o le iuga lenei mo a’u, faamolemole ia tausia Tavita.”
Sa mafai ona ou taofiofi faalelagona i le ao, ae ina ua oo mai le po ua filemu mea uma, e oo mai loimata. Ae o le taimi foi lena na ou lagonaina ai e ala i le Agaga Paia o le a lelei mea uma—e lē faapea ona o le a ou ola, ae ona sa i ai le Tama Faalelagi iina. O lea, i le taimi o o’u togafitiga, sa ma agai atu ai i luma i le laa e tasi i le taimi.
Sa oo ina anoa atili nisi o viiga ma nisi o mau faapitoa. Na matuā taia a’u i le Mataupu Faavae ma Feagaiga 122:8: ‟Na afio ifo le Atalii o le Tagata i lalo o i latou uma. Ua sili atu ea oe ia te ia?”
E leai, sa ou iloaina, e lē sili atu a’u nai lo Ia. Afai o le feagai ai ma le lē fanau ma le kanesa na mafai ai ona ou talisapaia atili le Faaola ma Lana taulaga togiola, ua ou naunau la.
Sa ma taulai atu i le Alii ina ia mafai ona ma vaaia o ma faamanuiaga, e aofia ai se vaega lagolago ofoofogia. Sa matagofie lo’u peresitene o le Aualofa. O tagata mai le aoga sa ou faiaoga ai na faia se savali o le kanesa mo a’u. O se paaga faale-galuega o lē sa manao ou te iloa lona manatu mai na ia tuuina mai ia te a’u se peni piniki. I taimi faapena, e te faapea atu, ‟O oe o la’u agelu i le asō. O oe o lo’u faamaoniga e silafia e le Atua ou te manaomia se opo po o se peni piniki.”
O loo vaai mai tagata ia i tatou o ni tagata o le Ekalesia. Latou te fia iloa pe aisea e mafai ai ona tatou feagai ma mea faigata ae o loo tatou matafiafia pea.
‟E faapefea ona oulua lē faanoanoa?” sa masani ona fesili mai ai tagata ia i ma’ua. Sa ma faamalamalama atu o le filemu sa ma lagonaina na sau mai lo ma faatuatua ma talitonuga, lo ma alolofa mo le Tama Faalelagi, ma lo ma faatuatuaina o Lona finagalo mo i ma’ua. O le faasoaina atu o lo ma faatuatua na faamalosia ai lo ma faatuatua.
E le’i oo mai le filemu i le taimi na ou iloa ai lo’u ma’i, ae na oo mai lava. O le filemu o le vavega lea.