‟O Lo’u Manaomia o le Faamalologa,” Liahona, Oke. 2024.
O Leo o le Au Paia o Aso e Gata Ai
O Lo’u Manaomia o le Faamalologa
E ala i se viiga o le faamanatuga, na aoaoina ai au e le Agaga e uiga i le tuuina atu ma le taliaina o le faamagaloga.
Ata na tusia e Michael J. Bingham
Sa ou nofo i le lotu i se tasi Aso Sa, i le ita ma le lē fiafia. Sa i ai so ma’ua feeseeseaiga i le po na muamua atu ma lo’u toalua o Aaron, ma ou sau ai i le lotu a’o lagona pea le lē mautonu ma le lē fiafia. Sa ou ita pea ia Aaron i le amataga o le sauniga seia oo i le viiga o le faamanatuga, ma ou mafaufau, ‟E tatau ona ia fai mai ua lagona lona sese.”
A o ma sauni e aai ma fetagofi i le faamanatuga, sa usuina e le matou faapotopotoga le viiga ‟Ao Tatou Fetagofi Nei i le Faamanatuga.” Sa ou ita pea i le fuaiupu muamua. Ona amata lea o le fuaiupu lona lua: ‟A o toe iloilo nei e o tatou mafaufau le taimi ua tuanai, ua tatou iloa e tatau ona tatou salamo.”
Sa ou lē toe pese. Sa ou faalogo i lo’u toalua, le ma fanau, ma tagata o le uarota o faaāuāu pea ona usuina le: ‟O le ala ia te oe o le amiotonu—o le ala na faaalu ai lou olaga.”
Sa faamalūlūina loʻu loto. Atonu o o’u lagona lē mautonu sa lē faatatau i lo’u toalua. Masalo sa faatatau lava ia te a’u.
Na faaauau pea le viiga:
O le faamagalo atu o se meaalofa mai le Atua.
Tatou te saili i ai ma le manatu mamā.
Ma lima ua folafola atu nei e fai lau galuega,
Tatou te aai ma feinu i le faamanatuga.
Sa ou iai iina ma le lē fiafia, ae sa ou manaomia moni lava ona lotomaualalo ma saili le faamagaloga mai le Tama Faalelagi—o se meaalofa ua mafai ona o Lona Alo, o Iesu Keriso.
Sa ou tagi a o o’u tilotilo atu i lalo i le laina o le ma fanau laiti. O le ita uma ma le vevesi na ou lagonaina, o tuuaiga uma ma le lē fiafia sa fai o se faapona i lo’u fatafata, na mou ese atu. O lenei taimi sa faatatau i le mea sa manaomia ona ou faia e sui ai ina ia mafai ona ou sailia ma maua le faamagaloga mai lo’u Tama Faalelagi ma Iesu Keriso. E ala i se viiga, na aoao manino mai ai a’u e le Agaga e uiga i le faamagaloga ma le manaomia ona ou mauaina ma tuuina atu.
Na saunoa mai Peresitene Russell M. Nelson: “Ou te aioi atu ia outou o mai ia te Ia ina ia mafai ona Ia faamaloloina outou! O le a Ia faamaloloina oe mai le agasala pe a e salamo. O le a Ia faamaloloina oe mai le faanoanoa ma le fefe. O le a Ia faamaloloina oe mai manu’aga o lenei lalolagi.”
A o nofonofo ai iina, ma faalogologo i upu o le viiga ma ai ma inu i le faamanatuga, sa ou lagonaina lo’u manaomia o le faamalologa, ma sa ou iloa le mea e tatau ona ou liliu atu i ai. O upumoni sa ou aoaoina e uiga i le faamagaloga i le taimi o lena sauniga na ou latalata atili atu ai i le Alii ma lo’u toalua.