E Na o le Faaeletonika: Talavou Matutua
Tauaveina o Avega a le Tasi ma le Isi: O Faamanuiaga o Lo Tatou Nuu Faale-Ekalesia
E nofo le tusitala i Chile.
Ina ua maliu lo’u tinamatua, sa ou mafaufau pe faapefea ona ou maua le filemu. Sa i ai i la’u uarota le tali.
A o tuputupu ae, sa lagona le faigofie o le ola ai i le talalelei. Sa ou faatuatuaina o’u matua ma taitai, ma sa latou taialaina au ma fesoasoani ia te au e faia ni filifiliga lelei.
Ae ina ua ou oo i le talavou matua, ua ou aoaoina e masani ona tatou feagai ma faigata ma luitau i le olaga o le a tofotofoina ai lo tatou faatuatua.
Ina ua maliu faafuasei lo’u tinamatua, sa matou feagai ma lo’u aiga ma se tasi o nei taimi faigata. Sa faapea ona ou tu ma fesili, “Afai e lelei le Atua, aisea la o le a Ia aveesea ai se tagata lelei mai o tatou olaga?”
O lo’u tinamatua sa avea ma o matou poutu. Sa agalelei, alofa, ma lima foai—o se tina i tagata uma. Sa ia talia fiafia tagata uma i lo matou fale. O tamaiti o le tuaoi e taaalo i le auala i luma o lo matou fale e aai faatasi ma i matou i le taumafataga o le afiafi aua sa i ai sana ipu meaai mo tagata uma.
O lea ina ua maliu o ia, sa ou tauivi ma lo’u faatuatua.
I le lotolotoi o lo’u faanoanoa uma, e ui sa ou lei vaai e saili ni tali i le talalelei po o le Atua, ae sa ou tatalo pea i aso uma. I le taimi muamua, sa tagatasi a’u tatalo. Sa ou talosaga mo mea lava e tasi. Sa ou faafetai mo mea lava e tasi.
Ae a o mavae atu taimi, sa i ai se fesili se tasi i lo’u loto lea na iu lava ina ou fesili atu ai i le Tama Faalelagi:
“E mafai faapefea ona ou maua le filemu?”
Sailia se Vaaiga e Faavavau
O se uo o le tali lea i lena tatalo faamaoni.
Faafetai ia te ia, na amata ai ona ou toe auai i le lotu. Sa ia valaaulia au e o faatasi ma ia, ma sa ou ioe e alu, ona o ia o la’u uo. Ou te le’i fiafia e auai.
Ae na faasolosolo malie lava, ona sa ou i ai iina, na amata ai ona ulufale mai savali o le talalelei i lo’u loto. Sa ou iloa o loo i ai se fuafuaga a le Tama Faalelagi mo i tatou uma. Na aoao mai Peresitene Russell M. Nelson:
“O le vaaiga e faavavau e maua ai le filemu ‘e sili atu i manatu uma.’ (Filipi 4:7.) …
“O le olaga e le amata mai le taimi e fanau mai ai, pe faaiu foi i le taimi e oti ai.”
E ui lava o loo ou faanoanoa pea mo lo’u tinamatua, ae o le talalelei a Iesu Keriso ua aumaia ai ia te au le filemu ma le faamautinoaga o le a i ai se aso matou te toe faatasi ai.
Sa ou aoaoina foi e manaomia taumafaiga faifai pea i aso taitasi e manatua ai la’u feagaiga o le papatisoga ma faalogo i le siufofoga taiala o le Agaga. Sa amata ona ou faatauaina le meaalofa a le Agaga Paia i lo’u olaga. Ou te iloa o loo faatasi pea o Ia ma au, i faigata uma ou te feagai ai.
Faanoanoa Faatasi ma i Latou o e Faanoanoa.
Ou te matua faafetai lava mo se uo na matauina lo’u aluese mai le talalelei ma aapa mai e lagolago au. A o faaauau pea ona ou auai i le lotu, inisitituti, ma isi gaoioiga a talavou matutua, sa ou vavalalata atili ai ma le toatele o talavou matutua i la’u eria o e sa saili uma e alolofa le tasi i le isi ma ola i le talalelei a Iesu Keriso.
Na aoao mai foi Peresitene Nelson:
“O le Au Paia o Aso e Gata Ai, e pei foi o isi soo o Iesu Keriso, o loo tagai i taimi uma mo auala e fesoasoani atu ai, e siitia, ma alolofa i isi. O i latou o loo naunau ina ia ta’ua o le nuu o le Alii ua ‘loto e tauave le avega a le tasi ma le isi, … e faanoanoa faatasi ma e e faanoanoa; … ma [ia] faamafanafana atu ia te i latou o e e manaomia le faamafanafanaga.’ [Mosaea 18:8–9].
“Latou te saili moni lava e ola i poloaiga sili muamua ma le lua. A tatou alolofa i le Atua ma o tatou loto atoa, Na te liliu atu o tatou loto i le tulaga manuia o isi i se taamilosaga matagofie, ma mama.”
O le fesoasoani mai ia te au e tauave au avega o le mea tonu lava lea na faia e o’u uso o ni soo i la’u uarota mo au ma mea o loo faaauau pea ona latou faia mo le tasi ma le isi. Ou te alofa moni lava ia i latou o lo o i la’u uarota! Matou te faatasitasi soo, matou te lagolagoina le tasi ma le isi, ma matou auauna atu o le tasi i le isi. Pe a manaomia e se tasi se galuega, matou te fesoasoani le tasi i le isi e saili mo ni avanoa. Pe a asiasi mai tagata fou i a matou sauniga i Aso Sa, matou te taliaina i latou ma taumafai ia latou lagona lo latou aofia ai.
Ua fesoasoani uo lelei ia te au e faatupulaia ai le malosi i le talalelei, ma faatasi ai, ua matou malolosi e tetee atu i tofotofoga ma faaosoosoga o le olaga.
Avea ma se Uo i Isi
Ma e pei lava ona lagolagoina au e ni uo lelei i taimi e sili ona ou manaomia ai, ua ou maua nei le avanoa e avea ai ma lena uo i isi. I taimi ou te matauina ai tagata ou te alofa i ai o loo tauivi pe ua taumamao ese mai le Ekalesia, ou te faia le mea ou te mafaia e faaauau ai pea ona lagolagoina ma valaaulia i latou—e faamanatu atu ai ia i latou e alofa le Alii ia i latou ma o loo faatalitali mo i latou e toe foi atu i le ala o le feagaiga.
Ou te iloa semanu ou te le i ai i le mea ua ou i ai nei pe a na leai au uo lelei ma tagata o le uarota o e na fesoasoani ia te au ia maua le lototele e tumau ai i le faamaoni a o ou lagonaina le faanoanoa tele.
O le i ai o lenei nuu malosi, ma le alofa o soo e tutusa mafaufau o se tasi lea o faamanuiaga faavavega tatou te mauaina o ni tagata o le Ekalesia. E leai se mea e sili atu ona faamalosia nai lo le tapuai faatasi, alofa, ma siitia i latou o loo taumafai e avea faapei o le Faaola.
Afai o e feagai ma se luitau faigata, ia e manatua e le o tuua na o oe. O loo i ai uo, uso ma tuafafine o auaunaga, ma taitai alolofa i lau uarota, paranesi, ma le siteki e mafai ona lagolagoina ma faamalosia oe. Ma e mafai foi ona avea oe ma se malosiaga ia i latou.