E Na o le Faaeletonjka
Mauaina o le Mana o le Atua e ala i Feagaiga
O le mana o le Atua o le a faalauteleina ai a tatou meaalofa faaleagaga ma taleni, tuuina mai ia i tatou le malosi e sili atu nai lo o tatou lava malosi e tauave ai avega mamafa o le olaga faaletino, ma tuuina mai ai ia i tatou le filemu ma le mana tatou te manaomia.
Ua saunoa pea lava pea lo tatou perofeta, o Peresitene Russell M. Nelson, e uiga i le mana o le perisitua ua avanoa mo alii ma tamaitai e ala mai i se sootaga faalefeagaiga ma le Atua. Na ia saunoa:
“O tamaitai uma ma alii uma … o e auai … i sauniga o le perisitua [ma osia ma tausia feagaiga ma le Atua], e mafai ona maua le avanoa tuusa’o i le mana o le Atua.
“E matala le lagi i tamaitai o e ua maua faaeega paia i le mana o le Atua e afua mai ia latou feagaiga o le perisitua e faapei foi i alii o loo umia le perisitua.
I le avea ai ma afafine o le Atua, e mafai ona faaeeina ia i tatou le mana o le perisitua—o le mana o le Atua lea e oo mai ia i tatou a o tatou osia ma tausia feagaiga o le perisitua. O lenei tulaga e i ai ni taunuuga taua. I le avea ai ma tamaitai ua maua faaeega paia, ua ia i tatou le saolotoga e utuvai tele ai mai i le mana o le Faaola e fesoasoani ia i tatou lava, o o tatou aiga, ma isi.
Na ou maua o’u lava faaeega paia ina ua 20 o’u tausaga, ae mo le tele o tausaga sa ou le malamalama ai i le mana faalelagi na mafai ona ou faaaogaina e ala i feagaiga sa ou osia ma lo’u Tama Faalelagi ma Iesu Keriso. Ae peitai, a o’u toe tepa nei i tua, ua ou iloa ai le malosi ma le gafatia faaopoopoina sa tuuina mai ia te a’u e onosaia ai le tele o luitau eseese i aafiaga eseese o lo’u olaga. O se faamanuiaga lava lo tatou ola ai i se taimi ua tele ai le malamalama e uiga i le faateleina o le mana, filemu, ma le malosi lea e mafai ona fai mo tatou e ala i se sootaga faalefeagaiga ma le Atua.
E pei ona aoao mai lo tatou perofeta, a tatou ulu atu i se sootaga faalefeagaiga ma le Atua, o le a sili atu ona vavalalata lo tatou sootaga ma Ia nai lo le taimi ae tatou te lei osifeagaiga, ma o le a le mafai lava ona Ia tuulafoaia lena sootaga. O le a lē vaivai lava o Ia i Ana taumafaiga e fesoasoani ia i tatou, ma o le a tatou le faaumaina lava Lona onosai ia i tatou. Ua fusia faatasi i tatou ma le olioli e ala i se feagaiga e faavavau lea ua tatou filifili e ulu i ai faatasi ma Ia.
O lenei malamalama e ao ona aumaia ia i tatou le filemu ma le faamautinoaga tele a o tatou savalia faigata ma tiga o lenei olaga. O le a faateleina e le mana o le Atua a tatou meaalofa ma taleni faaleagaga, o le a aumaia ia i tatou le malosi e sili atu nai lo lo tatou lava malosi e tauave ai avega mamafa o le olaga nei, ma o le a aumaia ia i tatou le filemu ma le mana lea tatou te manaomia e fetaiai ai ma mafuie faaletino, faalelagona, ma faaleagaga o o tatou olaga.