‟O Upu e Pa’i Atu i le Loto,” Liahona, Oke. 2024.
Ata o le Faatuatua
O Upu e Pa’i Atu i le Loto
Mai i lo’u faatomuaga i le Ekalesia e oo atu i le galuega o loo o’u faia e fesoasoani ai i le Au Paia ia faalogo ma usuina viiga i la latou lava gagana, na oo mai ai le musika o se li’o atoa i lo’u olaga ma avea o se faamanuiaga sili i lo’u aiga.
O musika o se vaega tāua i taimi uma o la’u molimau. O lo’u faatomuaga i Le Ekalesia a Iesu Keriso o le Au Paia o Aso e Gata Ai o ni aiga na potopoto ma usuina le viiga “O le Atua lo’u Tama” (Viiga, nu. 184). Sa ou mafaufau, ‟E faapei lenei mea o le lagi auā ua matuā fiafia lava i latou. O foliga ia o aiga fiafia.”
Ia te a’u, o le vaega aupito sili ona matagofie o le talalelei o aiga. Pe a ou mafaufau i mea uma sa tatau ona tupu mo lo’u lava aiga e maua ai le talalelei, ua faamanatu mai ai ia te a’u e i ai lava se fuafuaga a le Atua mo aiga uma.
Mai Burma i Initia
O lo’u tinā e sau mai Burma, ae ona o faigata faaupufai, sa ia sola atu ai i Initia faatasi ma ona mātua ma ona uso e toatolu. Sa latou tuua mea uma. Ae paga lea, ina ua latou taunuu i Initia, sa maliliu ai loa mātua o Tinā. I le avea ai ma ulumatua, sa tatau ai ia Tinā ona tausia ona tei e toatolu.
Sa i’u ina oo tamaiti i se nofoaga o tamaiti ua leai ni mātua. Ina ua atoa le 18 o lo’u tinā, sa tonu ia te ia e alu i New Delhi e saili ni avanoa sili atu mo ia lava ma ona uso. O iina, sa faailoa atu ai o ia ia Ashima Chaudhuri, o le puleaoga o se kolisi e fesoasoani i tamaitai talavou. Sa ave e Ashima lo’u tinā i lalo o lona apaau ma avea ma faufautua i lo’u tinā. Ina ua faauu lo’u tinā mai le kolisi, sa avea o ia ma fesoasoani ia Ashima. Sa oo ina la vāvālalata tele.
E toasefulu tei o Ashima, o le uii o i latou o Reza, e leai se tasi e talanoa i ai. Sa manatu ia te ia o se mamoe uliuli. Na auai Reza i le Ekalesia toefuataiina ina ua uma ona feiloai i faifeautalai faamisiona a o auai i le kolisi i Egelani. I lena taimi, o ia o se sikola Musalemi, o lea ina ua ia tuua Isalama ae auai i le Ekalesia, sa o se mea telē.
A o nofo Reza i Toronto, Kanata, sa ia miti e tatau ona ia toe foi atu i Initia ma faafesootai lona tuafafine o Ashima. A o le’i malaga o ia, sa ia miti foi e uiga i se tamaitai na te le’i feiloai lava i ai. Ona sa ia vaai pea i ona foliga i ana miti, sa ia lagonaina se naunautaiga faaopoopo e toe foi atu i Initia.
Ae peitai, sa popole Reza ona sa teena o ia e lona aiga. Ae ina ua ia aapa atu ia Ashima i New Delhi, sa ia fai mai, ‟Ua ou misia lava oe. E tatau ona e sau.”
E lei i ai lo’u tinā i New Delhi i lena taimi, o lea sa valaau ai e Ashima se tasi o uso o lo’u tinā, o Assiya. “E mafai ona e sau?” na ia fesili atu ai. E sili atu pe i ai nisi tagata iinei ina ia aua nei ta misa.”
O lea, na alu ai le uso o lo’u tinā o Assiya. Ina ua ia taunuu atu, sa vave ona iloa o ia e Reza o le fafine lea sa i ana miti. Sa vave ona alofa le tasi i le isi ma faaipoipo ai loa. Ina ua la siitia atu i Toronto, sa amata ona fesili atu le uso o lo’u tina o Assiya ia Reza e uiga i le Ekalesia, pe aisea na ia tuua ai Initia, ma pe aisea na ia naunau ai ia teena e lona aiga.
Sa tali e Reza ana fesili ma faasoa atu lana molimau i le talalelei toefuataiina. E le’i umi ae auai le uso o lo’u tinā i le Ekalesia.
Agavale i le taumatau: O le tinā o Tahira, San San Nu; toalua o le uso o lona tinā, o Reza Shah; o le uso o lona tinā, o Assiya Shah; o se Tahira laiitiiti; ma Ashima Chaudhuri.
“Ou Te Fia Iloa Atili.”
I lena taimi, sa ma nonofo ai ma lo’u tinā i New Delhi. Sa ou latalata i le uso o lo’u tinā, o lea ina ua 11 o’u tausaga, sa ou alu ai e asiasi ia te ia ma Uncle Reza i Toronto mo le taumafanafana. A o o’u i ai iina, sa valaaulia a’u e le uso o lo’u tinā i le lotu. I la’u sauniga muamua, sa ou fiafia e vaai i aiga o usuina faatasi ia viiga. Ou te lei oo lava i se mea faapena.
‟O le a lenei nofoaga?” Sa ou fesili atu i le uso o lo’u tinā ina ua uma le sauniga. ‟E fiafia ma faauo tagata uma. Ou te fia iloa atili”
Sa o mai ni faifeautalai tamaitai se toalua ma aoaoina a’u i lesona. Sa ou iloaina sa ou manao e avea ma se vaega o le mea ua ou aoaoina. Sa faafiafiaina a’u e le talalelei, ma sa ou manao e auai i le Ekalesia, o lea na ou faia ai.
O Tahira i lona papatisoga ma le uso o lona tina o Aunt Assiya, Uncle Reza, ma Sister Jane Rogers, o e na aoaoina Tahira i le talalelei.
Sa ou auai i le aoga nofotumau a o o’u tuputupu a’e, o lea sa i ai ni a’u tafaoga uumi o le taumafanafana. Sa faigaluega lo’u tinā ma ua tetea o’u mātua, o lea na amata ai ona ou alu i Kanata i le taimi o le taumafanafana. Sa avea le uso o lo’u tinā ma le uso o lo’u tamā o ni o’u mātua lona lua.
O Uncle Reza, na tupuga mai i Pakisitana, sa fiafia e faaliliu ia viiga a le Ekalesia i le Hindi ma ma le Urdu. I le sauniga faamanatuga, e masani ona ma usuina ana lomiga o viiga ua faaliliuina.
O Uncle Reza, o loo i le ata i luga ma le tusitala, sa fiafia e faaliliu ia viiga a le Ekalesia i le Hindi ma le Urdu. ‟I le sauniga faamanatuga,” o le tala lea a Tahira, ‟e masani ona matou usuina ana faaliliuga o viiga.”
Na i’u lava ina manao lo’u tinā e fia iloa atili e uiga i le ekalesia na auai ai lana tama teine ma lona uso. Sa feiloai o ia ma faifeautalai ma e le’i umi ae papatisoina. Sa faamautinoa e lo’u tinā ma lona uso ou te alu i Toronto i taumafanafana uma ina ia mafai ona ou auai i le lotu ma auai i gaoioiga a le Ekalesia.
Ina ua oo i le taimi ou te filifilia ai se kolisi, sa fesoasoani le uso o lo’u tinā ma lona toalua ia te a’u ia ou alu i le Iunivesite o Polika Iaga, lea sa ou feiloai ai i lo’u toalua, e sau mai Atenitina. E masani ona ou mafaufau i mea e aumaia faatasi ai o tatou aiga. Ona o le Ekalesia, sa feiloai ai se alii talavou mai Atenitina ma faaipoipo atu i se tamaitai talavou mai Initia.
I le avea ai ma supavaisa o musika i le au faaliliu-viiga a le Ekalesia, fai mai Tahira, ‟O loo o’u faasoaina atu le talalelei e ala i viiga.”
Ata na pu’eina e Christina Smith
O Se Talatuu o le Malosi ma le Molimau
O le asō, o a’u o le supavaisa o musika i le vaega faaliliu-viiga a le Ekalesia. Ou te galue i galuega faatino i gagana eseese e ono. O loo o’u galue i le faaliliuina o viiga i le faaNepali ma le faaBurmese, o le gagana moni lea a lo’u tinā. E mālie ma faamalieina. Ou te galue foi i le Amiharic mai Ethiopia, Twi ma Fante mai Kana, ma Sinhala mai Sri Lanka.
Ou te fiafia i la’u galuega auā ua oo mai le musika o se li’o atoa i lo’u olaga. O musika o lo’u faatomuaga lea i le Ekalesia. I lenei taimi, ou te mafaufau pe toafia ni tagata o le a faalogo i viiga i la latou lava gagana ma ootia ai. O loo o’u faasoaina atu le talalelei e ala i viiga, ma e mafai ona ou iloa le ala e faataunuu ai e la’u galuega folafolaga na faia i lou faamanuiaga faapeteriaka.
Ua maliliu le uso o lo’u timā ma lona toalua, ae e ala i viiga, ou te lagonaina ai le talatuu o lo la’ua malosi ma le molimau. Sa fiafia le toalua o le uso o lo’u timā e faasoa atu lana molimau i le pese.
‟E i ai se aso o le a faalogo ma usuina ai e tagata o le Ekalesia nei viiga i la latou lava gagana,” na ia saunoa ai. ‟O le a malamalama tagata i sāvali o loo aumai i viiga, ma o le a pa’i atu upu i o latou loto.”
Ua mafai ona avea a’u ma se vaega o lena galuega faatino. Ua avea o se faamanuiaga maoa’e i lo’u aiga.
O le tusitala ma lona aiga i lo latou fale i Payson, Iutā, ISA.
Ata na pu’eina e Christina Smith