‟Tatou te Mulimuli i le Auauna Sili,” Liahona, Oke. 2024.
Tatou te Mulimuli i le Auauna Sili
O Iesu Keriso o lo tatou faataitaiga atoatoa o le auauna atu ma le agaalofa i tagata uma.
O Le Keriso Lelei, saunia e Hiram Powers, Smithsonian American Art Museum, faatau e le falemataaga e manatua ai Ralph Cross Johnson
A o o’u auai i konafesi faalesiteki i le salafa o le Ekalesia, sa ou maua le avanoa matagofie e malaga ai ma peresitene o siteki e asiasi ma auauna atu i tagata taitoatasi ma aiga. I nei asiasiga faaleauaunaga, ou te mafaufau ai i nisi taimi po o a ni tala e fai atu ma ni mea e fai, aemaise lava i latou ou te asia a o feagai ai ma ni luitau faigata. Ae nai lo o le taulai atu i ni mea ou te ono fai atu ai pe faia, sa ou iloa o le taulai atu i le Auauna Sili—lo tatou Faaola, o Iesu Keriso—e sili ona fesoasoani mai ia te a’u pe a auauna atu i isi.
E pei ona i ai i mea lelei uma, o Ia o lo tatou faataitaiga atoatoa. Pe a tatou tuua o tatou aiga—ma o ese mai o tatou nofoaga mafanafana—e auauna atu ia i latou o siomia i tatou e pei ona Ia faia, o le a taiala i tatou e le Faaola i a tatou taumafaiga. O le a sili atu ona anoa la tatou auaunaga nai lo soo se mea tatou te fai atu ai pe faia foi e i tatou lava.
Aua E te Laaloa
Ina ua fesiligia, “O ai foi le tagata ma te tuaoi?” (Luka 10:29), sa faaaoga e Iesu le avanoa e faasoa atu ai se faataoto. Sa ia faamatalaina se tagata i lona ala mai Ierusalema i Ieriko o lē sa ‟maua o ia e tagata faomea” ma sa gaoia, fasia, ma tuua o ia ua ‟tāli oti” i luga o le ala (Luka 10:30).
E le’i leva ae sau se faitaulaga. Atonu na iloa atu e le faitaulaga o loo i ai i se tulaga mafatia le tamaloa, ae sa le’i tu o ia e fesoasoani. Na ia ‟ui ane i le tasi itu” o le ala (Luka 10:31). O le isi, o le sa Levī sa ‟matamata ai” i le leaga o manu’a o le tagata. Na ‟ui ane foi lea o ia i le tasi itu ala” (Luka 10:32). Ona alu ane ai lea o le tasi Samaria. Sa faamatala e Iesu le Samaria i le i ai o se mea sa le’i i ai i le faitaulaga ma le sa Levī: o le Samaria sa ‟mutimuti vale lona alofa [i le tagata]” (Luka 10:33) ma ‟ua alu atu, ma nonoa i ona manua, … ma tausi ia te ia” (Luka 10:34).
Le Bon Samaritain (O Le Samaria Agalelei), saunia e François Sicard
O le faataoto i le Samaria agalelei e le na o faitaulaga, sa Levī, po o Samaria e faatatau i ai. E faatatau moni lava ia i tatou. Ua i ai o tatou uso ma tuafafine ua manunu’a i autafa o le ala o le olaga. E mafai ona avea o soo se tasi lava—uo, aiga, tuaoi, tagata o le nuu, ma e oo lava ia i latou o loo tatou saofafai faatasi i totonu o le falesa i le Aso Sa. O tatou vaai atu ea ia i latou ma laaloa? Pe o tatou auauna atu ea ia i latou ma le agaalofa e pei ona faia e le Samaria agalelei? O le toatele tatou te vaai i aio le a leai ai ni manu’a e iloa atu. E toatele e puapuagatia lē leoa ma e lē fesili mai mo se fesoasoani. E na o le pau lava le auala e mautinoa ai lo tatou pa’i atu o le feiloai atu lea i isi ma le alofa ma le agaalofa lea na faaalia e le Samaria. O le auaunaga faa-Keriso o lona uiga o le tuuina atu o le agaalofa i tagata uma.
Tatalo ia Iloa Manaoga o Isi
A o savali atu Iesu i se motu o tagata, sa aapa atu ia te Ia i le faatuatua se fafine na puapuagatia mo le 12 tausaga mai se puna toto. Ina ua ia pa’i atu i le tuupao o le ofu o Iesu, sa Ia lagonaina lena malosiagapo ‟[ua] alu atu le mana na ia te [Ia].” Ona faliu atu lea o Iesu i le fafine ma fetalai atu, ‟Ina faalototele ia oe; ua e ola i lou faatuatua; ina alu ia oe ma le manuia” (tagai i le Luka 8:43–48).
Ina ua aumaia ia Iesu ‟le tagata supa” i se fale na fataina mai e ana uo, sa faamalolo muamua e Iesu le supa faaleagaga. Na ia fetalai atu ‟Lo’u atalii, ua faamagaloina au agasala,” I le tali atu i ai, sa tuuaia ai e le au tusiupu Iesu i le upuleaga. Ina ia fesoasoani ia i latou o loo iina ia malamalama o loo ia te Ia ‟i le lalolagi le pule e faamagalo ai agasala,” ua fai atu Iesu i le tagata, ‟Ina tulai ia, ina ave lou moega, ma alu i lou i lou fale.” O le taimi lava lena, na ‟tulai loa lea o ia … i luma o i latou uma” (tagai i le Mareko 2:3–12). O le mana o Keriso e faamalolo ai ma’i faaletino o le mana lava lea e tasi sa Ia faaaogaina e faamalolo ai ē mama’i faaleagaga.
O nei tulaga e lua—ma le tele o isi—ua faaalia ai e malamalama atoatoa le Faaola i manaoga faaletino ma faaleagaga o isi ma auauna atu ia i latou e tusa ai ma na manaoga. E mafai ona tatou faia faapea. E ui e lē mafai ona tatou vaai atoatoa i manaoga o isi, e pei o le Faaola, e mafai ona tatou tatalo mo le tomai e vaai ai i na manaoga, mo le taitaiga i le auala e taulima ai, ma avea ma tali i le tatalo a se isi tagata.
O le taimi lava tatou te vaai ai, e tatau ai foi ona tatou galulue ma le agaalofa. O le a le uiga o le tatou vaai pe afai tatou te lē faia se mea? Afai tatou te vaai ma leai se mea e faia, e mafai ona aveesea la tatou vaaiga faaleagaga. A o tatou galulue, e oo lava i ni auala laiti, o le a tatou maua le tele o le malamalama o le Faaola e vaai lelei ai ma auauna atu ia i latou o siomiaina i tatou.
Ia Faatasi ma i Latou.
I nisi taimi, atonu tatou te faatuai ai e auauna atu i isi. Atonu tatou te popole pe o le a faapefea ona tali mai isi po o le a foi le tulaga o lo latou taliaina. Ua tupu lenei mea ia te a’u. I na taimi, o le mea aupito sili ona tāua e mafai ona tatou faia o le faatasi lea ma i latou ma alolofa ia i latou. Ma le isi, o le Faaola o lo tatou faataitaiga atoatoa lea.
A o le’i faaali atu le Faaola toetu ia sa Nifaē, sa latou oo i le tele o faalavelave ma le pogisa loloto. Sa latou matuā manaomia lava se toomaga. Sa mafai lava ona fetalai atu le Faaola ia i latou mai le lagi ma ta’u atu ia i latou mea e manaomia ona latou faalogo i ai (tagai i le 3 Nifae 9–10), ae sa Ia faaali atu ia i latou ma afio atu ia i latou. Sa Ia aoaoina i latou ma tatalo faatasi ma mo i latou. (Tagai i le 3 Nifae 11–19.)
Sa fesili atu foi le Faaola: “E i ai ea ni isi o ia te outou ua mamai? Aumai i latou iinei. E i ai ea ni isi o ia te outou ua pipili, pe ua tauaso, pe ua setu, pe manua, pe ua lepela, pe ua supa, pe ua tutuli, pe ua puapuagatia i soo se ala? Ia aumai i latou iinei ma o le a ou faamaloloina i latou, ona ua ou agaalofa tele ia te outou; ua faatumuina o’u lagona i le alofa mutimutivale.
“Ma sa oo ina ua uma ona fetalai mai o ia faapea, sa o atu faatasi uma le motu o tagata, … ; ma sa ia faamaloloina i latou uma taitoatasi ina ua aumaia i latou ia te ia” (3 Nifae 17:7, 9; faaopoopo le faamamafa).
Afai e te le o mautinoa pe popole e uiga i le auauna atu i isi, aua le popole tele i mea e te tautala atu ai pe fai. Amata i le na o le i ai iina. Sa aoao mai Peresitene Russell M. Nelson e faapea, “O musumusuga lelei e faavae i luga o faamatalaga lelei.” E pei ona outou i ai faatasi ma i latou, o le a outou aoao e uiga ia i latou ma iloa le taimi e asiasi atu ai pe a mama’i, le taimi e ofoina atu ai ma tuuina atu faamanuiaga faaleperisitua, le taimi e faalogo ai ma ‟tauave a outou avega, ina ia māmā ai,” ‟faanoanoa faatasi ma e e faanoanoa; … faamafanafana atu ia te i latou o e e manaomia le faamafanafanaga” (Mosaea 18:8–9), ma olioli faatasi ma i latou o e olioli! Aua le faatuai. O le a musuia oe i mea e manaomia oe e le Faaola e te tautala atu ai ma faia a o e auauna atu.
Mulimuli i Lana Mamanu
O le faatinoga muamua na faia e le Faaola ina ua Ia faaali atu ia sa Nifaē o le ta’u atu lea ia i latou e ‟tutulai ia ma o mai ia te [Ia]” ma ia ‟tuu mai [o latou] lima i [Lona] itu, ma … Tagotago foi i tulaga o fao i [Ona] lima ma … vae” (3 Nifae 11:14).
E le’i finagalo le Faaola e tau lava o lo latou vaai atu ia te Ia. Ua uma ona latou molimauina o Ia ‟[afio ifo] mai le lagi … ma [tu] i i le totonugalemu o i latou” (3 Nifae 11:8). Sa finagalo o Ia ia o mai i latou taitoatasi ia te Ia ma ia lagona ma iloa o Ia ma mea sa Ia faia mo le lalolagi uma. “Ma sa latou faia lenei mea, i le o atu i luma taitoatasi seia oo ina latou o atu uma” (3 Nifae 11:15; ua faaopoopo le faamamafa).
Sa Ia valaauina foi soo e toasefululua ma “tuu atu ia te i latou le mana e papatiso atu ai” (3 Nifae 11:22) ma aoao atu le aoaoga faavae o le papatisoga (tagai i le 3 Nifae 11:23–27). Ona ia poloaiina lea o sa Nifaē e taofi finauga uma. “Faauta, e le o la’u aoaoga faavae lea, le faaoso o loto o tagata i le ita, o le tasi e faasaga i le isi; ae o la’u aoaoga faavae lenei, ia aveesea mea faapena” (3 Nifae 11:30).
I le tele o itu, o le galuega a le Faaola i le Tusi a Mamona ua avea o se mamanu mo a tatou lava auaunaga. E mafai ona tatou fesoasoani i o tatou uso ma tuafafine e o mai ia Iesu Keriso, uunaia i latou ina ia papatisoina ma maua isi sauniga o le faaolataga, ma alolofa ia i latou ma ia avea ma e faatupuina le filemu, e pei ona aoao mai e le perofeta ia i tatou.
E i ai taimi o le a lē faigofie ai ona aapa atu i isi. Atonu foi tatou te oo ai i o tatou lava tofotofoga lea e atili ai ona faigata ona lagona le faaosofia e auauna atu i le ala a le Faaola. Na tutupu tofotofoga ma faigata i le Togiola i Lana galuega. A o tatou tauaveina i o tatou luga Lona suafa ma tutulai o ni molimau ia te Ia (tagai i le Mosaea 18:9), o le a talosagaina i tatou e savavali e pei ona sa Ia faia ma aapa atu ma alolofa ia i latou o ē tatou te fesootai i ai.
Afai o le a tatou mulimuli ia Iesu Keriso—le Auauna Sili—ma auauna atu i isi e pei ona Ia faia, o le a Ia faamalosia ma faamamanaina i tatou. E ala i la tatou auaunaga, e mafai ai ona tatou faamanuiaina olaga o isi ma maua ai le filemu ma le olioli mo i tatou lava.