‟O Musumusuga Matagofie a le Agaga Paia,” Liahona, Oke. 2024.
O Leo o le Au Paia o Aso e Gata Ai
O Musumusuga Matagofie a le Agaga Paia
Seia oo ina ou iloaina fua o le Agaga, sa faatalitonuina a’u e le o i ai le Ekalesia a le Alii i le lalolagi.
Ata na tusia e Michael J. Bingham
Ma te le’i ola a’e ma lo’u toalua o Ruby i Le Ekalesia a Iesu Keriso o le Au Paia o Aso e Gata Ai. Ae i lona talavou, sa masani Ruby i le tele o lotu ma aoaoga eseese. E ala i le tatalo faifai pea ma le filigā, sa ia iloa mai ai aoaoga sa ia lagonaina e moni, ma fatuina mai ai se seti o talitonuga mai aoaoga a lotu Kerisiano eseese. Sa ou ola a’e i se lotu e tasi ma sa itiiti lava lo’u iloa e uiga i isi lotu.
Ina ua uma le ma faaipoipoga, sa ma auai faatasi i le lotu, ae sa amata ona ou fesiligia le faatuatuaga sa ou ola a’e ai ma fesili atu i lo’u toalua ni fesili e uiga i aoaoga faavae. Sa ia tali mai ma le atamai ma le faigofie, ‟Ua e faitau ea i le Tusi Paia?”
Ou te le’i faitauina lava, o lea na ma faitau faatasi ai loa le Tusi Paia atoa. A o ma faitau, sa ou tusia i lalo fesili na tumau le lē taliina. Sa amata ona ma saili mo se lotu e aoaoina mea uma na ma mauaina. I le isi lua tausaga na sosoo ai, sa ma’ua asiasi ai i le tele o lotu, talosagaina lomiga, faitau e uiga i filosofia ma tapuaiga, ma tatalo. Sa oo ina ou talitonu o le Ekalesia a le Alii e lē o i ai i le lalolagi.
Sa leai so ma’ua poto ma sa manaomia le fesoasoani faalelagi (tagai Iosefa Samita—Talafaasolopito 1:11–13). O lea, sa ma tatalo faatasi ai ma le faamaoni, ma ole atu i le Atua e faaali mai ia i ma’ua le ala. E le’i leva ona uma le ma tatalo, ae tutū mai faifeautalai mai le Ekalesia i le sitepu o lo ma’ua faitotoa. Sa vave ona lagona e Ruby le moni o mea sa la aoaoina mai. O a la aoaoga sa logolelei ia te ia ma fetaui i tali sa ia mauaina i le tele o tausaga ua mavae a o ia tatalo o se talavou. Sa taliina foi e faifeautalai a’u fesili uma, ae sa ou manao ia ou mautinoa pea. Sa ou faitauina le Tusi a Mamona, Mataupu Faavae ma Feagaiga, ma isi tusi a le Ekalesia.
Sa ma auai foi i le lotu i vaiaso uma ma ola ai i aoaoga o le talalelei. I se taimi umi, sa ou iloaina fua o le Agaga o le Atua i lo’u olaga (tagai i le Kalatia 5:22) ma maua ai se molimau malosi. Sa papatisoina i ma’ua, maua le meaalofa o le Agaga Paia, ma faamauina mulimuli ane i le malumalu.
Ma te le’i faanoanoa lava i le auai i le Ekalesia. Ua faatumauina ai le malosi o le ma faaipoipoga i taimi faigata, ma o le talatuu o le faalatalata atu i le Agaga o le Atua o loo ola pea i totonu o le ma fanau e toaono.
Mo i latou o loo taumafai ia maua se molimau o le Tusi a Mamona po o le Ekalesia toefuataiina a Iesu Keriso, ou te faapea atu, “Tatalo pea, faitau pea, ma faalogo pea mo musumusuga matagofie a le Agaga Paia.”