10

Akong Atimanon ang Akong Lawas

Pasiuna alang sa Magtutudlo

Aron sa pag-andam sa imong kaugalingon nga espiritwal nga motudlo niini nga leksyon, palihug basaha ug palangdonga ang mosunod:

Usa sa mahinungdanon nga mga panalangin sa plano sa kaluwasan mao ang kahigayunan sa padawat og pisikal nga lawas. Ang Ginoo gusto nga tahuron nato ang atong mga lawas ug atimanon kini. Panalanginan kita niya kon buhaton nato kini (tan-awa sa 1 Mga Taga-Corinto 3:16; D&P 89:18–21).

Mga Kalihokan sa Pagkat-on

Sugdi pinaagi sa kalihokan sa panagpundok. Alang sa mga ideya, tan-awa sa pahina 3.

Pag-ampo

Pagdapit og usa ka bata nga mohatag sa pangbukas nga pag-ampo.

Litrato

Sultihi ang mga bata nga ang Langitnong Amahan mihatag kanato og mga lawas ug pinaagi sa atong mga lawas makabuhat kita og daghang maanindot nga mga butang. Ipakita ang litrato sa pahina 46. Itudlo ang kada miyembro sa pamilya diha sa litrato; kon imong itudlo ang gamayng bata, pangutana og mga pangutana nga gilista sa ubos. Human sa kada pangutana, dapita ang mga bata sa pagtubag uban kanimo pinaagi sa pagingon og “Dili” samtang imong ilingolingo ang imong ulo sa naghinubra nga paagi.

• Makalakaw ba ang gamayng bata?

• Makasulti ba ang gamayng bata?

• Makalabay ba og bola ang gamayng bata?

Sultihi ang mga bata nga sa makausa gagmay pa silang mga bata, apan karon nagkadako na sila.

Kanta

Patinduga ang mga bata. Kantaha o isulti ang mosunod nga mga pulong sa tuno sa “Once There Was a Snowman” [May Usa ka Snowman] Children’s Songbook, 249 [Songbook sa mga Bata] ug buhata ang mga lihok sa ubos. Dapita ang mga bata nga moapil nimo.

May usa ka snowman, snowman, snowman, (pagpakaaron-ingnon nga nagduyan og bata sa mga bukton)

May usa ka snowman nga taas. (hinayhinay nga nagkamang)

Sa adlaw nalanay, lanay, lanay, (inanay nga makabarug)

Sa adlaw nilanay, migamay. (ituy-od ang mga kamot ibabaw sa ulo)

Litrato

Ipakita ang litrato pag-usab ug itudlo ang bata nga nagdula uban sa iyang amahan. Sultihi ang mga bata nga kining bataa parehas nila og gidak-on. Pangutana sa mga bata og mga pangutana nga sama niadtong nalista sa ubos. Human sa kada pangutana, dapita ang mga bata sa pagtubag uban kanimo pinaagi sa pag-ingon og “Oo” samtang imong giyangoyango ang imong ulo sa naghinobra nga paagi.

• Makalakaw ba ikaw? (palakta ang mga bata sa usa ka dapit)

• Makasulti ba ikaw? (pag-ihap hangtud sa lima uban sa mga bata)

• Makalabay ba ikaw og bola? (pagpakaaron-ingnon nga naglabay ang mga bata og bola ug misalo niini)

Sultihi ang mga bata nga nagkadako sila tungod kay nagkaon sila og maayo nga mga pagkaon, nangatulog ug nanghugas sa ilang kaugalingon aron malimpyo.

Role Play

Ipakita ang larawan sa pahina 47. Itudlo ang litrato sa babaye nga natulog ug ipasabut nga ang pagkatulog maoy usa ka paagi sa pag-atiman sa atong mga lawas. Dapita ang mga bata nga magpakaaron-ingnon nga natulog. Balika alang sa ubang mga litrato diha sa larawan.

Atimanon Nako ang Akong Lawas

Panapos

Ipahayag ang imong pasalamat alang sa mga lawas nga gihatag kanato sa Langitnong Amahan. Dapita ang mga bata sa pag-ingon, “Akong atimanon ang akong lawas,” pipila ka mga pulong sa matag higayon.

Pag-ampo

Pagdapit og usa ka bata nga mohatag sa panapos nga pag-ampo.

Mga Tip sa Pagtudlo

Pahinumdom: Sa panahon niini nga leksyon, pagmabination sa mga gibati sa bisan kinsang mga bata sa imong nursery nga adunay pisikal nga kakulangan. Mahimo nimong ilisan ang mga pangutana nga imong gipangutana atol sa mga kalihokan ginamit ang litrato. Itunong sa mga butang nga mahimong buhaton sa mga bata, dili ang dili nila mahimo. Alang sa dugang kasayuran mahitungod sa pagtudlo niadtong may mga kakulangan, tan-awa sa Pagtudlo, Walay Labaw ka Mahinungdanon nga Tawag, 38–39.

Role Play: Ang gagmayng mga bata mahimo nga wala mahibalo kon unsaon sa pagbuhat ang mga lihok nga gisugyot diha sa kalihokan sa role play. Isip usa ka hulip, mahimo nimo silang dapiton sa pagtudlo sa nagkalainlain nilang bahin sa lawas. Sama pananglit, tudlo sa imong baba ug moingon, “Mao kini ang akong ba-ba. Mapakita ba ninyo kanako ang inyong baba?” Pakpaki ug dayga ang mga bata. Balika alang sa ubang mga bahin sa lawas.

Opsyonal nga mga Kalihokan

Pagpangandam

• Alang sa dula nga tag-an tag-an: Pagdala og tulo o upat nga makahimsog nga pagkaon, sama sa mga prutas ug mga utanon diha sa plato. Pagdala og usa ka butang aron itabon sa plato sa pagkaon, sama sa lapad nga panapton.

• Alang sa kalihokan sa pagkolor: Kopyaha ang larawan diha sa pahina 47 nga koloran sa kada bata.

Dula nga Tag-an Tag-an

Pakit-a ang mga bata sa plato. Itudlo ang kada makaon, ug tabangi ang mga bata sa paghingalan niini. Tabuni ang pagkaon og panapton, dayon kuhaa ang usa sa mga makaon ug kuhaa ang panapton. Dapita ang mga bata sa pagtag-an kon unsa ang nawala. Kini nga kalihokan epektibo kaayo alang sa dagkong mga bata.

Balak o Kanta-Kanta nga Kalihokan

I-recite ang mosunod nga balak o kanta-kanta nga kalihokan ug dapita ang mga bata sa pag-apil kanimo:

Kining gamay nga tawo mohigda na. (ipataas ang usa ka tudlo)

Diha sa unlan gihigda niya ang iyang ulo. (ipahimutang ang tudlo sa palad sa pikas kamot)

Gihugot pagputos ang iyang kaugalingon sa habol, (kumoa ang kamot libut sa tudlo)

Ug mao kini ang paagi sa iyang pagkatulog sa tibuok gabii.

Pag-abut sa kabuntagon gibuka niya ang iyang mga mata.

Uban sa pagsikad nga pagbangon milagput ang habol. (ibukhad ang kamot aron pagpakita sa tudlo nga naghigda)

Wala madugay siya mibangon ug nag-ilis ug milakaw, (ipataas ang tudlo)

Andam nga mopahiyom ug motrabaho ug modula.

Pagkolor

Pakolori sa mga bata ang usa ka kopya sa larawan diha sa pahina 47. Samtang sila nagkolor, ipasabut nga ang larawan nagpakita og mga paagi nga makaatiman kita sa atong mga lawas.

Mga Tip sa Pagtudlo

Ang opsyonal nga mga kalihokan nagtugot kanimo sa pagtagbaw sa mga panginahanglan sa mga bata sa imong nursery. Makahimo ikaw sa pagpili o pagbuhat sa bisan unsa o sa tanan niini, ug mahimo nimo nga balikon kini ingon ka sagad sa imong gusto. Pilia ang mga kalihokan nga makalingaw sa mga bata ug makatabang kanila nga makat-on. Ipahiangay kini sa imong gusto sumala sa imong kahimtang ug mga panginahanglan.

Pagkolor: Dili tanan nga mga bata malingaw sa pagkolor. Ang pipila mahimong mohimo lamang og usa ka marka o duha diha sa pahina. Mahimo gihapon sila nga makat-on gikan sa mga larawan, bisan kon wala sila mogahin og daghang panahon sa pagkolor niini.