18

Akong Higugmaon ang Uban

Pasiuna alang sa Magtutudlo

Aron sa pag-andam sa imong kaugalingon nga espiritwal nga motudlo niini nga leksyon, palihug basaha ug palandonga ang mosunod:

Ang paghigugma sa uban, bisan kadtong lahi kay kanato, mao ang usa sa labing importante nga mga paagi nga kita makasunod sa Manluluwas nga si Jesukristo (tan-awa sa Juan 13:34–35). Atong mapakita ang atong paghigugma alang sa uban pinaagi sa pagbinuotan ngadto kanila, pagpaminaw kanila, paghupay kanila, ug pagserbisyo kanila. (Tan-awa sa Mateo 25:34–40; Mosiah 18:8–9.)

Pagpangandam

• Basaha ang Lucas 10:25–37, ug pag-andam sa pag-istorya sa maayo nga Samarianhon sa simple kaayo.

• Pagdala og kopya sa Biblia.

• Markahi ang pahina 74 niini nga manwal aron sayon ra nimo kini mapakli.

Mga Kalihokan sa Pagkat-on

Sugdi pinaagi sa kalihokan sa panagpundok. Alang sa mga ideya, tan-awa sa pahina 3.

Pag-ampo

Pagdapit og usa ka bata nga mohatag sa pangbukas nga pag-ampo.

Mga Litrato

Ipakita ang mga litrato sa pahina 74. Ipasabut nga ang mga bata niini nga mga litrato nagbinuotan sa pagdula sa usag usa. Kon kita nagbinuotan sa usag usa, atong gipakita kanila ang gugma.

Kanta

Kantaha o isulti ang mga pulong sa “Jesus Said Love Everyone” [Si Jesus Miingon Higugmaa ang Tanan] Children’s Songbook, 61 [Songbook sa mga Bata] ug buhata ang mga aksyon sa ubos. Dapita ang mga bata sa pag-apil kanimo.

Higugmaa ang tanan; (ilugway ang mga bukton)

Jesus miingon.

Puno sa gugma, (ibutang ang kamot ibabaw sa kasingkasing)

Mao ‘sab sila. (gaksa ang kaugalingon)

Istorya sa Kasulatan

Ipakita ang litrato sa maayo nga Samarianhon sa pahina 78. Ablihi ang Biblia ug sultihi ang mga bata nga ikaw mopaambit og istorya nga giistorya ni Jesus mahitungod sa paghigugma sa uban. Ginamit ang simple nga pinulongan, i-istorya ang maayo nga Samarianhon. Sa ubos ang usa ka ehemplo:

Usa ka adlaw niana dihay usa ka tawo nga naghigda sa yuta (itudlo ang naangol nga tawo diha sa litrato). Samdan siya. Duha ka tawo ang miagi. Nakakita sila kaniya, apan wala sila motabang. Ang ikatulong tawo miabut (itudlo ang maayo nga Samaritano diha sa litrato). Iyang nakita ang tawo nga naghigda sa yuta, ug siya mitabang kaniya. Nagpakita siya og paghigugma.

Role Play

Sultihi ang mga bata nga si Jesus miingon nga kita kinahanglan usab nga mopakita og paghigugma. Dapita sila nga magpakaaron-ingnon nga manglakaw, ug hatagi sila og mga kahigayunan nga magpakaaron-ingnon nga mopakita og paghigugma sa uban. Pananglitan:

Manglakaw kita (lakaw lang sa gitindogan). Tan-awa, anaay amigo nga nadagma. Atong tabangan ang atong amigo nga makabarug (pagpakaaron-ingnon nga motabang sa amigo nga makabarug). Padayon kita sa paglakaw. Atong nakita ang usa ka higala nga giuhaw. Atong hatagan ang atong amigo og mainom nga tubig (pagpakaaron-ingnon nga mohatag og mainom). Mopadayon kita sa paglakaw. Atong nakita ang atong mama ug papa. Atong gakson sila ug moingon, “Gimahal ko kamo” (gaksa ang kaugalingon ug sulti, “gihigugma ko ikaw”).

Panapos

Sultihi sa sinsero ang mga bata nga gihigugma nimo sila. Sultihi sila nga ikaw mobati og dakong kalipay kon ikaw makapakita og paghigugma sa uban.

Pag-ampo

Pagdapit og usa ka bata nga mohatag sa panapos nga pag-ampo.

Mga Tip sa Pagtudlo

Pagpangandam: “Samtang kita motudlo sa ebanghelyo, kinahanglang moila kita nga ang Espiritu Santo mao ang tinuod nga magtutudlo. Ang atong pribilihiyo mao nga mahimong instrumento aron ang Espiritu Santo makatudlo, makapamatuod, makahupay, ug makadasig. Busa kinahanglang mahimo kitang takus nga modawat sa Espiritu…. Samtang ikaw mag-andam sa imong kaugalingon sa espiritwal nga paagi ug moila sa Ginoo sa imong pagtudlo, ikaw mahimong instrumento sa Iyang mga kamot. Ang Espiritu Santo mopalambo sa inyong mga pulong uban sa gahum” (Pagtudlo, Walay Labaw ka Mahinungdanon nga Tawag, 41).

Kasulatan: Gamita ang mga kasulatan samtang magtudlo ikaw sa mga bata. Kon ikaw mosaysay og istorya gikan sa mga kasulatan, itudlo ang dapit diha sa mga kasulatan diin makita ang istorya. Tudloi ang mga bata nga mopasalamat ug motahud sa mga kasulatan.

Panapos: Pahiyom samtang imong sultihan ang mga bata nga gihigugma nimo sila. Tanawa ang ilang mga mata. Ang ekspresyon sa imong nawong ug ang imong mga aksyon maoy mosulti sa mga bata labaw pa kay sa imong mga pulong.

Opsyonal nga mga Kalihokan

Pagpangandam

• Alang sa kalihokan ginamit ang kasulatan: Pagdala og kopya sa Biblia. Markahi ang Juan 15:12 aron sayon ra nimo kini nga mapakli.

• Alang kalihokan sa pagkolor ug sa kalihokan sa kasingkasing: Kopyaha ang mga larawan sa pahina 79 nga koloran sa matag bata.

  

  Akong Higugmaon ang Uban

Kasulatan

Sultihi ang mga bata nga atong nakat-unan sa mga kasulatan nga si Jesus mitudlo kanato sa paghigugma sa usag usa. Basaha ang Juan 15:12 ug buhata ang mga aksyon sa ubos. Dapita ang mga bata sa pag-apil kanimo.

Kini ang akong kasugoan,

Nga maghigugmaay sa usag usa, (ibutang ang duha ka mga kamot diha sa kasingkasing) sama sa akong paghigugma kaninyo. (ilugway ang mga bukton)

Pagkolor

Pakolori sa mga bata ang kopya sa larawan sa pahina 79. Samtang nagkolor, tabangi sila nga makasabut nga kitang tanan mga anak sa Dios ug espesyal ang matag usa kanato. Pahinumdumi sila nga ang Langitnong Amahan ug si Jesus gusto nga atong higugmaon ang tanan.

Kalihokan sa Kasingkasing

Basaha ang mosunod nga mga ehemplo (o paghimo og imoha), ug pangutana, “Nagpakita ba kini og gugma?” Human sa matag ehemplo, sultihi ang mga bata sa pagpataas sa ilang papel nga kasingkasing ug moingon, “Gugma.”

Kon ikaw motabang sa paglimpyo.

Kon ikaw moingon og “palihug” ug “salamat.”

Kon ikaw mopaambit sa imong dulaan.

Kon ikaw motabang sa uban nga naangol.

Dayga ang mga bata tungod sa pag-apil. Kini nga kalihokan angay alang sa mas dagko nga mga bata.

Mga Tip sa Pagtudlo

Pagkolor: Ang gagmay nga mga bata tingali dili makahimo sa pagkolor sa sulod sa mga linya. Interesado lamang tingali sila sa paghimo og usa ka marka o duha sa pahina. Komentaryohi ang ilang mga paningkamot sa maayong paagi nga dili mosugo kanila sa pagkolor nianang paagiha. Ang katuyoan sa mga larawan niini nga manwal mao ang paghatag sa mga bata og biswal nga representasyon sa mga baruganan sa leksyon.