Si Jesukristo Nabanhaw (Pasko sa Pagkabanhaw)

Pasiuna alang sa Magtutudlo

Aron sa pag-andam sa imong kaugalingon nga espiritwal nga motudlo niini nga leksyon, palihug basaha ug palandonga ang mosunod:

Tungod sa Pagkapukan ni Adan ug Eva, ang tanan makasinati og pisikal nga kamatayon. Sa higayon nga kita mamatay, ang atong mga espiritu ug ang atong lawas magkabulag. Sa dihang si Jesukristo nabanhaw, ang Iyang lawas ug ang Iyang espiritu nahiusa, dili na gayud magkabulag pag-usab. Tungod sa Pag-ula ni Jesukristo, ang tanan mabanhaw (tan-awa sa 1 Mga Taga Corinto 15:22; Alma 11:42–45). Pagsabut ug pagpamatuod sa Pagkabanhaw makahatag kanato og kalipay ug paglaum (tan-awa sa Isaias 25:8; Alma 22:14).

Mga Kalihokan sa Pagkat-on

Sugdi pinaagi sa kalihokan sa panagpundok. Alang sa mga ideya, tan-awa sa pahina 3.

Pag-ampo

Pagdapit og usa ka bata nga mohatag sa pangbukas nga pag-ampo.

Istorya

Ipakita ang mga litrato sa pahina 122. Itudlo ang mga detalye sa litrato samtang imong isaysay ang istorya sa Pagkabanhaw ni Jesukristo sa simple nga paagi (tan-awa sa Juan 19:41–42; 20:1, 11–16). Ang mosunod mao ang usa ka ehemplo:

Sa dihang namatay si Jesus, ang Iyang mga higala naguol pag-ayo (pahimoa ang mga bata og magul-anon nga mga nawong). Ilang gibutang ang lawas ni Jesus sa usa ka lubnganan, nga mao ang usa ka langob (itudlo ang lubnganan diha sa litrato). Usa ka dako nga bato gipaligid sa atubangan sa pultahan (sultihi ang mga bata nga magpakaaron- ingnon nga moligid og dako, bug-at nga bato). Human sa tulo ka mga adlaw (sultihi ang mga bata sa pagpataas sa tulo ka mga tudlo), duha ka mga anghel mipaligid sa bato. Si Jesus nabuhi pag-usab! (Itudlo si Jesus sa litrato.) Siya nabanhaw (tabangi ang mga bata nga mosulti og “nabanhaw”). Ang mga higala ni Jesus nalipay kaayo! Buhi Siya, ug dili na gayud Siya mamatay pa pag-usab!

Si Maria usa sa mga higala ni Jesus (itudlo si Maria diha sa litrato). Naguol siya sa dihang namatay si Jesus. Sa dihang nabanhaw si Jesus, si Maria mao ang unang tawo nga nakakita Kaniya. Nalipay kaayo siya tungod kay si Jesus buhi (pahimoa ang mga bata og malipayon nga mga nawong).

Sultihi ang mga bata nga tungod ni Jesus, ang tanan mabanhaw ug magpuyo sa kahangturan. Pahimoa pag-usab ang mga bata og malipayon nga mga nawong.

Kanta

Kantaha o isulti ang unang bersikulo sa “Did Jesus Really Live Again” [Nabuhi ba Gayud Pag-usab si Jesus?] Children’s Songbook, 64 [Songbook sa mga Bata] ug buhata ang mga aksyon sa ubos. Dapita ang mga bata sa pag-apil kanimo.

Nabuhi ba gayud sa pag-usab si Jesus?
O, nabuhi Siya, (ipataas ang tulo ka mga tudlo)
Mibangon ug ang lubnganan
Iyang gibiyaan. (ikyugpos ang mga bukton)

Panapos

Dapita ang mga bata sa pagsulti, “si Jesukristo nabanhaw,” usa o duha ka mga pulong matag higayon. Sa lakbit ipaambit uban sa mga bata ang imong pagpamatuod nga si Jesukristo nabanhaw.

Pag-ampo

Pagdapit og usa ka bata nga mohatag sa panapos nga pag-ampo.

Mga Tip sa Pagtudlo

Jesukristo: Daghang mga kultura adunay mga tradisyon sa Pasko nga makalingaw alang sa mga bata apan gamay ra og kalambigitan sa Pagkabanhaw ni Jesukristo. Itumong kining leksyon sa Pasko sa Pagkabanhaw mahitungod sa Manluluwas, ug tabangi ang mga bata nga motubo ang ilang gugma alang Kaniya. Tudoi sila sa paglipay sa talagsaong mga gasa nga Iyang gihatag kanato, sama sa Pagkabanhaw ug sa Iyang mga pagtulun-an ug hingpit nga ehemplo.

Mga kanta: Ang ubang mga bata tingali mosunod sa mga pulong uban kanimo. Bisan kon sila mobuhat lamang sa mga aksyon o motan-aw lang ug maminaw kanimo, malingaw gihapon sila sa mga kanta ug makat-on gikan niini.

Pagpamatuod: Ipadayag ang imong pagpamatuod sa simple, mubo nga paagi, pananglit: “Ako nasayud nga si Jesukristo nabanhaw.”

Opsyonal nga mga Kalihokan

Pagpangandam

Alang sa istorya: Kopyaha ang hulagway sa pahina 123. Kolori kini ug ibutang sa mas baga nga papel, kon gusto. Guntinga ang matag larawan ug guntinga ang abierto nga bahin sa may pultahan sa lubnganan subay sa tuldok-tuldok nga linya.
Alang sa kalihokan sa pagkolor: Paghimo og kopya sa pahina 123 alang sa matag bata. Guntinga ang matag larawan ug guntinga ang abli nga dapit sa pultahan sa lubnganan.

Kanta

Dapita ang mga bata nga magsirkol ug magginunitay sa mga kamot. Kantaha o isulti ang mga pulong sa “Jesus Has Risen” [Nabanhaw si Jesus] Children’s Songbook, 70 [Songbook sa mga Bata] ug buhata ang mga aksyon sa ubos.

Nabanhaws’ Jesus, (maglakaw sa sirkol)
Nga higala.
Nalipay kami,
Nabanhaw S’ya.

Balika hangtud gusto sa mga bata.

Istorya

Isaysay ang istorya sa Pagkabanhaw ni Jesukristo pag-usab, niining higayona ginamit ang larawan nga imong gigunting. Sa ubos mao ang usa ka ehemplo:

(Sugdi ginamit ang hulagway ni Jesus nga nagbarug ug ang bato gipaligid palayo sa abli nga bahin sa lubnganan.) Sa dihang si Jesus namatay, ang iyang lawas gibutang sa lubnganan (ibutang ang hulagway ni Jesus sa [luyo] sa lubnganan). Usa ka dakong bato gipaligid atubangan sa pultahan (paligira ang bato sa atubangan sa abli nga bahin sa lubnganan). Sa ikatulo nga adlaw duha ka mga anghel ang miabut ug gipaligid ang bato palayo (ipaligid ang bato gikan sa abli nga bahin). Si Jesus nabanhaw (ipabarug ang hulagway ni Jesus). Ang iyang espiritu ug ang Iyang lawas nahiusa pag-usab! [Tan-awa sa Susan Payson, “Easter Story,” Friend, Abr. 1995, 32–33.]

Pagkolor

Hatagi ang mga bata sa mga larawan nga imong gigunting alang kanila. Ipakita kanila unsaon nga ilang magamit ang mga larawan sa pagribyu sa istorya sa Pagkabanhaw ni Jesus. Kini nga kalihokan angay alang sa mas dagko nga mga bata.

Mga Tip sa Pagtudlo

Opsyonal nga mga kalihokan giandam alang kanimo nga idugang sa leksyon kon gusto. Kon ikaw walay makuha nga mga suplay nga gikinahanglan, mahimong pulihan og lain nga susama niini.

Mga Istorya: “Ang gagmay nga mga bata malingaw nga balikbalikon ang mga istorya. Kon imong balikon ang istorya, sugdi kini ug dayon pangutana, ‘Unsay sunod nga nahitabo?’ “(Tan-awa sa Pagtudlo, Walay Labaw ka mahinungdanon nga Tawag, 180–81.) Dapita ang mas dagko nga mga bata sa paggamit sa mga ginunting o sa litrato nga anaa sa pahina “00” [122] sa pagsaysay sa istorya sa pagkabanhaw ngadto sa gagmay nga mga bata sa klase sa nursery. Tanyag og tabang kon gikinahanglan.

Kalihokan ginamit ang Kahon: Hunahunaa ang paghimo sa kalihokan ginamit ang kahon nga ibutang diha sa nursery. Mahimong maglakip kini sa kalihokan sa pagkolor ug sa ubang mga butang nga imong gihimo o gigamit alang sa mga kalihokan. Dayon imong mabalik kadtong mga kalihokan panahon sa umaabut nga mga klase sa nursery aron sa pagribyu sa nangaging mga leksyon. Kini nga ribyu mahitabo sa bisan unsang panahon sa klase sa nursery.