3

Makaampo Ako ngadto sa Langitnong Amahan

Pasiuna alang sa Magtutudlo

Aron sa pag-andam sa imong kaugalingon nga espiritwal nga motudlo niini nga leksyon, palihug basaha ug palandonga ang mosunod:

Pinaagi sa pag-ampo makahimo kita sa pagpakigsulti uban sa atong Langitnong Amahan. Sultihan nato Siya nga kita nahigugma Kaniya, pasalamatan nato Siya alang sa mga panalangin, ug mangayo kita og tabang alang sa atong mga kaugalingon ug sa ubang nanginahanglan. Tapuson nato ang atong mga pag-ampo pinaagi sa pangalan ni Jesukristo. Ang pag-ampo mao ang usa sa pinakaimportante nga mga panalangin nga atong naangkon samtang ania pa kita dinhi sa yuta. (Tan-awa sa Mateo 6:9–13; Alma 34:18-27; 3 Nephi 18:19–21.)

Pagpangandam

• Pagdala og pipila ka gagmay nga mga butang o mga litrato nga nagpakita sa mga butang nga kita mapasalamaton (mga sinina, pagkaon, mga kasulatan, ug uban pa) diha sa dako nga bag. Isulat “Kami Nagpasalamat” diha sa bag. Pagdala og laing bag uban sa mga butang o litrato nga nagpaila sa mga butang nga tingali atong pangayoon pinaagi sa pag-ampo (sama sa usa ka malipayon nga pamilya, lig-on nga mga lawas, gugma ug uban pa). Isulat diha sa bag “Palihug Panalangini Kami”.

• Markahi ang pahina 106 niini nga manwal aron sayon ra nimo kini mapakli.

Mga Kalihokan sa Pagkat-on

Sugdi pinaagi sa kalihokan sa panagpundok. Alang sa mga ideya, tan-awa sa pahina 3.

Pag-ampo

Pagdapit og usa ka bata nga mohatag sa pangbukas nga pag-ampo.

Mga Litrato

Ipakita ang litrato sa batang Jesus nga nag-ampo (pahina 18). Sultihi ang mga bata nga litrato kini ni Jesus nga nag-ampo sa bata pa Siya. Ipakita ang litrato sa usa ka bata nga nag-ampo (sa pahina 18). Ipasabut nga kon kita mag-ampo nakigsulti kita sa Langitnong Amahan, mosugod kita pinaagi sa pag-ingon, “Among Langitnong Amahan.” Dapita ang mga bata sa pag-ingon, “Among Langitnong Amahan.”

Sultihi ang mga bata nga sunod pasalamatan nato Siya sa atong mga panalangin. Papilia ang usa ka bata og usa ka butang gikan sa bag nga gimarkahan og “Nagpasalamat Kami Kanimo.” Ingna, “Nagpasalamat kami Kanimo sa among [ngalan sa butang nga napili sa bata].” Dapita ang mga bata sa pag-ingon, “Nagpasalamat kami Kanimo.” Balika kini nga kalihokan hangtud ang tanang mga butang napili. Dayon sultihi ang mga bata nga sunod atong hangyoon ang Langitnong Amahan alang sa mga panalangin, ug balika kini nga kalihokan uban sa bag nga gimarkahan og “Palihug Panalangini Kami.” Dapita ang mga bata sa pag-ingon, “Palihug panalangini kami.”

Ipakita ang litrato ni Jesus sa pahina 106. Sultihi ang mga bata nga atong tapuson ang atong mga pag-ampo pinaagi sa pag-ingon, “Sa pangalan ni Jesukristo, amen.” Dapita ang mga bata sa pagsulti niini uban kanimo.

Balak o Kanta-Kanta nga Kalihokan

I-recite ang mosunod nga balak o kanta-kanta nga kalihokan ug dapita ang mga bata sa pag-apil kanimo:

Mosugod ako sa pag-ingon “Minahal nga Langitnong Amahan”; (iisa ang usa ka tudlo-ipadayon sa pag-isa sa tibuok balak o kanta-kanta nga kalihokan)

Magpasalamat ako kaniya tungod sa mga panalanging nga iyang gipadala; (iisa ang ikaduha nga tudlo)

Dayon mapainubsanon nga mangayo ako kaniya alang sa mga butang nga akong gikinahanglan, (iisa ang ikatulo nga tudlo)

Sa pangalan ni Jesukristo, Amen. (iisa ang ikaupat nga tudlo)

“I Pray in Faith,” [Ako Nag-ampo sa Hugot nga Pagtuo] Children’s Songbook, 14 [Songbook sa mga Bata].

Panapos

Pahinumdumi ang mga bata nga kon sila mag-ampo sila nakigsulti sa Langitnong Amahan. Ipakigbahin ang imong pagpamatuod nga ang Langitnong Amahan maminaw sa atong mga pag-ampo.

Pag-ampo

Pagdapit og usa ka bata nga mohatag sa panapos nga pag-ampo.

Mga Tip sa Pagtudlo

Pag-ampo: Ikaw dako og ikatabang sa mga bata nga magbinuotan samtang nangandam sila alang sa pag-ampo. Sama pananglit, pahinumdumi sila nga paglingkod sa hilom ug sa pagkyugpos sa ilang mga bukton. Makatudlo usab ikaw sa pinulongan sa pag-ampo, magtabang kanila sa paggamit og matinahuron nga mga pulong sama sa Ikaw [Thee], Imo [Thou], Nimo [Thy], and Imong [Thine] puli sa ka [you] ug imoha [your]. Hangtud nga makat-on sila sa paggamit sa ilang kaugalingong mga pulong, ikaw mahimong modasig kanila samtang sila nag-ampo.

Pangayo og tubag: Gidak-on sa tingog, tinan-awan, ug mga pamatasan importante kon magtudlo. Kon mangayo og tubag, tan-awa ang mga bata, ug sa madasigon nga tingog sulti og usa ka butang sama sa, “Makasulti ba ikaw og, ‘Magpasalamat kami Kanimo’?” Dayga ang mga bata tungod sa pag-apil.

Pagpamatuod: Ipahayag ang imong pagpamatuod sa simple, mubo nga paagi; sama pananglit: “Ang Langitnong Amahan maminaw sa atong mga pagampo.”

Opsyonal nga mga Kalihokan

Pagpangandam

• Alang sa kalihokan ginamit ang flip-book: Kopyaha ang larawan sa pahina 19. Kolori kon gusto. Paghimo og usa ka flip book pinaagi sa paggunting subay sa baga nga mga linya ug pil-a subay sa tuldok-tuldok nga mga linya.

  

  Mosugod ako sa pag-ingon, “Among Langitnong Amahan.”

  Mopasalamat ako Kaniya tungod sa mga Panalangin.

  Mohangyo ako Kaniya alang sa mga panalangin.

  Sa pangalan ni Jesukristo, amen.

  Makaampo Ako Ngadto sa Langitnong Amahan

• Alang sa istorya sa kasulatan: Basaha ang Enos 1:1–8 ug pangandam sa pag-summarize niini nga istorya alang sa mga bata. Pagdala og kopya sa Basahon ni Mormon. Markahi ang Enos 1 aron sayon ra nimo kini mapakli.

• Alang sa kalihokan sa pagkolor: Kopyaha ang larawan sa pahina 19 aron koloran sa kada bata. Guntinga subay sa baga nga mga linya sa dili pa magsugod ang nursery.

Flip Book

Balika ang mga panudlo sa pahina 16 mahitungod sa unsay atong gisulti kon kita magampo, niining higayona ginamit ang flip book nga imong giandam. Samtang nagpasabut ikaw sa kada bahin sa pag-ampo, iisa ang katugbang nga palid o dapita ang usa ka bata sa pag-isa sa mga palid. Mahimo usab nimo nga gamiton ang flip book samtang ikaw nag-recite sa balak o kanta-kanta nga kalihokan diha sa pahina 16. Mahimo nga hipuson nimo ang flip book aron gamiton panahon sa klase sa nursery sa umaabut nga mga semana.

Istorya sa Kasulatan

Ablihi ang Basahon ni Mormon sa Enos 1 ug isaysay sa mga bata ang istorya ni Enos nga nag-ampo. Sa ubos usa ka ehemplo:

Usa niana ka adlaw si Enos miadto sa kakahoyan (ipataas sa mga bata ang ilang mga bukton ug magpakaaron-ingnon nga mga kahoy) aron mangayam og mga mananap (ipakaaron ingnon nga sila mopana). Samtang didto siya sa kakahoyan, siya nag-ampo sa Langitnong Amahan (paludha ang mga bata nga ingon og nag-ampo; tapusa ang istorya samtang sila nagluhod). Ang Langitnong Amahan mitubag sa iyang pag-ampo, ug si Enos nalipay. Nasayud siya nga ang Langitnong Amahan mopanalangin kaniya.

Ingna, “Makahimo ako pag-ampo sa Langitnong Amahan.” Dapita ang mga bata sa pagsulti niini pagusab uban kanimo, pipila ka mga pulong matag higayon.

Pagkolor:

Pakolori sa mga bata ang kopya sa larawan diha sa pahina 19. Kon mahuman na sila, ipapilo subay sa tuldok-tuldok nga mga linya.

Mga Tip sa Pagtudlo

Dagko nga mga bata: Hunahunaa ang pagdapit sa dagko nga mga bata sa pagtabang kanimo sa pagtudlo sa gagmay nga mga bata sa pagampo. Importante kini nga paagi sa paglig-on sa unsay imong gitudlo.

Mga Istorya: Kon ang mga bata modrama sa mga panghitabo sa usa ka istorya, masabtan nila kini ug labaw pa nila kini nga mahinumduman. Hinumdumi nga ang Dios nga Amahan dili ilarawan kon modrama sa istorya. Ayaw ilarawan si Jesukristo gawas sa usa ka pagkatawo nga talan-awon. (Tan-awa sa Pagtudlo, Walay Labaw ka Mahinungdanon nga Tawag, 166.)

Pagkolor: Samtang ang mga bata nagkolor, ribyuha ang mga baruganan nga gitudlo sa leksyon. Itudlo ang mga detalye sa mga litrato ug ipasabut ngadto sa mga bata kon unsa ang ilang gikoloran. Basaha ang mga pulong sa larawan ngadto kanila.