8

Ang Dominggo Mao ang Adlaw sa Paghinumdom sa Langitnong Amahan ug ni Jesukristo

Pasiuna alang sa Magtutudlo

Aron sa pag-andam sa imong kaugalingon nga espiritwal nga motudlo niini nga leksyon, palihug basaha ug palangdonga ang mosunod:

Sukad pa sa mga panahon sa Daang Tugon, ang katawhan sa Dios migahin og usa ka adlaw sa pito ka adlaw isip Igpapahulay nga adlaw—usa ka adlaw sa pagpahulay gikan sa atong mga kabudlay ug mosimba sa Dios (tan-awa sa Genesis 2:2–3; Exodo 20:8–11). Gibalik sa Ginoo kini nga sugo sa atong panahon, ug misaad Siya nga ang pagbalaan sa adlaw nga Igpapahulay makatabang kanato nga magpabilin nga “walay buling gikan sa kalibutan” (tan-awa sa D&P 59:9–10).

Mga Kalihokan sa Pagkat-on

Sugdi pinaagi sa kalihokan sa panagpundok. Alang sa mga ideya, tan-awa sa pahina 3.

Pag-ampo

Pagdapit og usa ka bata nga mohatag sa pangbukas nga pag-ampo.

Litrato

Pagpakita og litrato sa pamilya nga nagpaingon sa simbahan nga anaa sa pahina 38 ug sultihi ang mga bata nga kini nga pamilya moadto sa simbahan kada Dominggo. Ipasabut nga ang Dominggo usa ka espesyal nga adlaw ug nga moadto kita sa simbahan kada Dominggo aron sa pagsimba sa Langitnong Amahan ug ni Jesukristo ug makat-on kabahin Nila.

Mga Kanta

Sultihi ang mga bata, “Magpakaaron-ingnon ta nga mosimba.” Palibutlibuta sila sa paglakaw ug magkanta o mosulti sa mosunod nga mga pulong sa “Fun To Do” [Makalingaw nga Buhaton] Children’s Songbook, 253 [Songbook sa mga Bata].

Ang pagkanta makalingaw,

Makalingaw’ng, buhaton!

Ang pagkanta makalingaw,

Makalingaw’ng, buhaton!

Palingkura ang mga bata, ug sultihi sila nga kon moadto kita sa simbahan atong mahinumduman (itudlo ang imong ulo) ug maghunahuna mahitungod sa (itudlo pag-usab ang imong ulo) ang Langitnong Amahan ug Jesus. Kantaha o isulti ang unang linya sa “Reverently, Quitely”

[Nagtahud sa Hilom] Children’s Songbook, 26 [Songbook sa mga Bata] Nagtahud sa hilom, naghunahuna kami.

Ipakita ang litrato sa pamilya diha sa panimalay sa pahina 38. Itudlo ang nagkalainlaing mga miyembro sa pamilya ug ipasabut nga human manimba, sa atong mga panimalay, atong mahinumduman ang Langitnong Amahan ug si Jesus uban sa atong mga pamilya. Makahimo kita sa pagbasa og dungan sa mga kasulatan (ipakaaron-ingnon ang mga bata nga nagbasa sa mga kasulatan) ug maghiusa nga mag-ampo (ipakyugpos sa mga bata ang ilang mga bukton) ug magpakita og gugma sa usag usa (ipabutang sa mga bata ang ilang mga kamot diha sa ilang kasingkasing). Kantaha o isulti ang mga pulong sa “A Happy Family” [Malipayon nga Pamilya] Children’s Songbook, 198 [Songbook sa mga Bata]. Dapita ang ang mga bata sa pag-apil kanimo.

Gimahal ko si mama

Gimahal namos’ papa;

Gimahal sab ‘mi niya,

Malipayon ming pamilya.

Panapos

Pahinumdumi ang mga bata nga ang Dominggo mao ang adlaw sa paghinumdom sa Langitnong Amahan ug ni Jesus diha sa simbahan ug sa panimalay uban sa atong mga pamilya. Dapita ang mga bata sa pagingon, “Dominggo.”

Pag-ampo

Pagdapit og usa ka bata nga mohatag og panapos nga pag-ampo.

Mga Tip sa Pagtudlo

Mga Kanta: Samtang nangandam ikaw sa pagtudlo, sulayi sa pagmimorya ang mga pulong sa mga kanta ug balak o kanta-kanta nga mga kalihokan. Makahimo kini nimo sa pagpokus sa mga bata ug sa ilang pagkat-on. (Tan-awa sa Pagtudlo, Walay Labaw ka Mahinungdanon nga Tawag, 159.)

Mga Kanta: Hunahunaa ang paghimo og lista sa mga kanta nga nakat-unan sa mga bata, ilabina ang mga kanta nga gusto nila nga kantahon. Kantaha kini sa tibuok klase sa nursery kada semana, samtang nagdula ang mga bata, sa dili pa o human sa oras sa tingsnack, o samtang ang mga bata naghulat sa ilang mga ginikanan. Mao kini ang maayong paagi sa pagribyu sa nangagi nga mga leksyon. Bisan kon sa pagsugod ang mga bata dili makigkanta kanimo, sila naminaw og nagkat-on.

Opsyonal nga mga Kalihokan

Pagpangandam

• Alang sa dula sa bag: Kopyaha ang pahina 39. Guntinga ang mga larawan ug kolori kini, kon gusto. Ibutang ang mga larawan sa usa ka bag o sa ubang sudlanan.

  

  Sa Dominggo makasimba ako.

  Sa Dominggo makapakita ako og espesyal nga gugma sa akong pamilya.

  Sa Dominggo makabasa ako sa mga kasulatan.

  Ang Dominggo mao ang adlaw sa paghinumdom sa Langitnong Amahan ug ni Jesukristo.

• Alang sa kalihokan ginamit ang kasulatan: Pagdala og kopya sa Biblia. Markahi ang Genesis 2:2 aron sayon ra nimo kini mapakli. Markahi usab ang pahina 34 niini nga manwal.

• Alang sa kalihokan ginamit ang libro: Kopyaha ang larawan diha sa pahina 39 nga koloran sa kada bata.

Dula sa Bag

Pagdapit og usa ka bata sa pagpili og litrato gikan sa bag. Basaha ang ulohan ug dapita ang mga bata sa paghimo og mga lihok nga gisugyot sa litrato (sama sa naglakaw sa usa ka dapit alang sa “Kada Dominggo makasimba ako” o pagtudlo sa ilang mga ulo alang sa “Ang Dominggo mao ang adlaw sa paghinumdom sa Langitnong Amahan ug ni Jesukristo”). Dapita ang mga bata sa pagsulti og mahinungdanon nga mga pulong gikan sa kada ulohan, sama sa “Jesus,” “mga kasulatan,” “pamilya,” ug “simbahan.” Balika uban sa kada litrato o hangtud nga ang kada bata nga gusto makahimo sa ilang turno.

Kasulatan

Ipakita ang litrato diha sa pahina 34 ug ribyuha ang istorya sa Paglalang uban sa mga bata (tan-awa sa Genesis 1 ug leksyon 7 niini nga manwal). Ipasabut nga si Jesus mitrabaho sulod sa unom ka mga adlaw aron sa paghimo sa kalibutan.

Sultihi ang mga bata nga imong basahon ang kasulatan nga nagsulti kanato kon unsay gibuhat ni Jesus sa ikapito ka adlaw. Abliha ang Biblia sa Genesis 2:2 ug basaha, “Mipahulay Siya sa adlaw nga ikapito gikan sa tanan niyang mga buhat nga iyang nahimo.” Ipasabut og maayo ang pulong mipahulay samtang ikaw nagpabasa.

Pangutana: “Unasy gibuhat ni Jesus sa ikapito ka adlaw?”

Tubag: “Siya mipahulay.”

Sultihi ang mga bata nga sa unom ka mga adlaw sa semana kita motrabaho. Dapita sila sa pagbuhat og nagkalainlain nga trabaho sama sa pagsilhig sa salog, pagkalot diha sa tananam, ug uban pa. Ipasabut nga sa Dominggo kita mopahulay. Dapita ang mga bata sa paglingkod, ug sultihi sila kon unsa ikaw ka mapasalamaton nga ang Langitnong Amahan mihatag kanato og usa ka adlaw sa pagpahulay gikan sa atong trabaho.

Libro

Pakolori sa mga bata ang usa ka kopya sa pahina 39. Samtang nagkolor sila, pakigsulti kanila kabahin sa mga larawan ug pahinumdumi sila nga mao kini ang mga butang nga atong himoon aron mahinumdom ug mosimba sa Langitnong Amahan ug ni Jesukristo kada Dominggo. Kon mahuman na sila sa pagkolor, pil-a subay sa gituldokan nga mga linya aron mahimo nga usa ka libro. Dayon basaha ang libro ngadto sa mga bata.

Mga Tip sa Pagtudlo

Dula sa Bag: Kon ikaw walay bag o laing sudlanan, mahimo nimong ikulob pagbutang ang mga larawan ug papilia ang bata og usa aron hayangon.

Ang pagpulipuli mahimong malisud alang sa mga bata. Ang pagpalingkod kanila sa lingkuranan o sa salog samtang naghulat sila sa ilang turno makatabang. Makahimo usab ikaw sa pagsugo sa usa sa mga lider sa nursery nga motabang sa pagbantay kanila nga maghulat samtang ang ubang lider sa nursery nagtudlo.

Libro: Awhaga ang mga bata sa pagpakita sa ilang mga libro ngadto sa ilang mga pamilya. Makahatag kini og kahigayunan sa ilang mga ginikanan sa pagribyu uban sa mga bata sa mga butang nga ilang nakat-unan. (Tanawa sa Pagtudlo, Walay Labaw ka Mahinungdanon nga Tawag, 167.)