17

Ako Mopaambit

Pasiuna alang sa Magtutudlo

Aron sa pag-andam sa imong kaugalingon nga espiritwal nga motudlo niini nga leksyon, palihug basaha ug palandonga ang mosunod:

Tinuod nga mga sumusunod ni Jesukristo nailhan kanunay sa ilang pagkaandam sa pagpaambit unsay anaa kanila ngadto sa uban (tan-awa, pananglit sa, Mga Buhat 2:44–45; Mosiah 18:28; 4 Nephi 1:3). Pinaagi sa pagpaambit sa atong mga panalangin niadtong nagkinahanglan, kita miila nga kini nga mga panalangin gikan sa Dios, ug kita nagpakita sa atong gugma alang sa Iyang tanang mga anak.

Pagpangandam

Pagdala og simple nga butang nga imong magamit sa pagpakita og pagpaambit (makagamit usab ikaw og butang nga anaa sa klasrom sa nursery, sama sa dulaan o libro).

Mga Kalihokan sa Pagkat-on

Sugdi pinaagi sa kalihokan sa panagpundok. Alang sa mga ideya, tan-awa sa pahina 3.

Pag-ampo

Pagdapit og usa ka bata nga mohatag sa pangbukas nga pag-ampo.

Kanta

Kantaha o isulti ang mga pulong sa koro sa “I’m Trying to Be like Jesus [Maninguha Ko Pagsunod ni Jesus] Children’s Songbook, 78–79 [Songbook sa mga Bata] ug buhata ang mga aksyon sa ubos. Dapita ang mga bata sa pag-apil kanimo.

Higugmaon ta ang usag usa. (gaksa ang kaugalingon ug liso-liso)

Ug kaayo ipakita. (iyango-yango ang ulo)

Pagbinuotan sa buhat ug sulti, (gaksa ang kaugalingon ug liso-liso)

Kay sugo man Niya kini. (iyango-yango ang ulo)

Sultihi ang mga bata nga ang Langitnong Amahan gusto nga kita magbinuotan sa usag usa. Ipasabut nga kon kita mopaambit, kita nagbinuotan.

Pagpakita

Sultihi ang mga bata nga ikaw magpraktis og pagpaambit. Ipakita kanila kon unsaon sa pagpaambit pinaagi sa pag-ingon, “Ako mopaambit” samtang ikaw mohatag sa laing mga lider sa nursery sa butang nga imong gidala. Ipasabut ang kalipay nga moabut tungod sa pagpaambit. Dapita ang mga bata sa pagsulti, “Ako mopaambit.”

Mga Litrato

Ipakita ang unang litrato sa pahina 74. Itudlo ang babaye sa wala ug sultihi ang mga bata nga kini nga babaye adunay monyeka nga ganahan nga duwaan; inig anha sa iyang amiga aron makigdula, moingon ang batang babaye, “Ako mopaambit sa akong monyeka kanimo.” Ipasabut nga silang duha malipayon. Dapita ang mga bata sa pagsulti, “Ako mopaambit.”

Ipakita ang ikaduhang litrato sa pahina 74. Itudlo ang batang lalaki sa tuo ug sultihi ang mga bata nga kini nga batang lalaki gustong magdula sa iyang mga dulaan; inig anha sa iyang amigo aron makigdula, moingon ang batang lalaki, “Ako mopaambit sa akong mga dulaan kanimo.” Ipasabut nga silang duha malipayon. Dapita ang mga bata sa pagsulti, “Ako mopaambit.”

Kanta

Kantaha o isulti ang mosunod nga mga pulong sa “Fun to Do” [Makalingaw nga Buhaton] Children’s Songbook, 253 [Songbook sa mga Bata] samtang ikaw magpakaaron-ingnon nga mopaambit sa mga bata. Dapita ang mga bata sa pag-apil kanimo.

Pagpaambit makalingaw,

Makalingaw nga buhaton!

Pagpaambit makalingaw,

Makalingaw nga buhaton!

Panapos

Sultihi ang mga bata sa kalipay nga imong gibati kon ikaw mopaambit. Ipasabut nga ang Langitnong Amahan mobati usab og kalipay kon kita mopaambit.

Pag-ampo

Pagdapit og usa ka bata nga mohatag sa panapos nga pag-ampo.

Mga Tip sa Pagtudlo

Ang pagpaambit sa kasagaran lisud alang sa gagmay nga mga bata. Makat-on sila gikan sa imong ehemplo. Sa panahon sa leksyon ug sa tibuok klase sa nursery, ipakita kanila giunsa nimo sa pagpaambit ug ipabuhat kini kanila. (Tan-awa sa Pagtudlo, Walay Labaw ka Mahinungdanon nga Tawag, 168.) Kon sila magduha-duha, ipakita lamang pag-usab kanila, nga dili mamugos kanila nga mopaambit.

Opsyonal nga mga Kalihokan

Pagpangandam

• Alang sa kalihokan ginamit ang larawan: Kopyaha ang mga larawan sa pahina 75 alang sa matag bata.

  

  Ako Mopaambit.

  Ako mopaambit og mga pahiyom.

  Ako mopaambit og pagkaon.

  Ako mopaambit og mga libro.

  Ako mopaambit og mga dulaan.

  Ako mopaambit og mga krayola.

• Alang sa dula sa cube: Kopyaha ug guntinga ang mga larawan sa pahina 75. Kolori kini kon gusto. Pil-a subay sa tuldok-tuldok nga mga linya, ug i-tape o ipapilit ang mga tabs aron makahimo og usa ka cube.

Larawan

Ipakita ang larawan sa pahina 75 ug hatagi ang matag bata og kopya sa larawan. Itudlo ang litrato sa nagpahiyom nga batang lalaki ug ipasabut nga kita makapaambit sa atong mga pahiyom. Dapita ang mga bata sa pagtudlo sa nagpahiyom nga batang lalaki sa ilang mga kopya. Balika alang sa laing mga larawan.

Dula sa Cube

Ipaligid ang cube nga imong gihimo. Pabuhata ang mga bata og simple nga mga aksyon nga motakdo sa litrato sa ibabaw sa cube. Dayon dapita ang mga bata sa pagsulti uban kanimo, “Akong ipaambit ang akong [mga pahiyom, mga dulaan, pagkaon, ug uban pa].” Kon ang kilid nga adunay mga pulong nga “Ako Mopaambit” mogawas, papakpaka ang mga bata ug moingon, “Ako mopaambit.” Balikbalika hangtud ang matag bata nakaturno sa pagpaligid sa cube.

Mga Balak o Kanta-Kanta nga Kalihokan

I-recite ang mosunod nga kalihokan ug dapita ang mga bata sa pag-apil kanimo.

Gusto kong mosunod ni Jesus,

Pagbinuotan ug pagmahigugmaon usab. (gaksa ang kaugalingon)

Akong ipaambit ang akong mga pahiyom; (itudlo ang ba-ba ug pahiyom)

Akong ipaambit ang akong mga dulaan. (Pagpakaaron-ingnon nga mohatag og dulaan)

Mao kana ang Iyang gusto nga akong buhaton.

Mga Tip sa Pagtudlo

Paghimo og mga kopya: Kon ikaw walay magamit nga copy machine, mahimo nimong butangan og piraso sa papel ang ibabaw sa larawan ug palut-an kini ginamit ang lapis o ballpen. Ayaw kabalaka nga dili malut-an ang tanang detalye, palut-i lamang ang nalatid ug igong detalye aron sa pag-ila sa mga larawan.

Dula sa cube: Kon ikaw adunay daghang mga bata sa imong klase sa nursery, ikaw na lang ang mopaligid sa cube matag higayon kay sa papulipulihon ang mga bata.

Mga balak o kanta-kanta nga kalihokan: Malingaw ang mga bata sa mga balak ug mga kanta uban sa simple nga mga aksyon. Ikaw makagamit sa gitugutan sa Simbahan nga mga balak o kanta-kanta nga kalihokan aron sa pagtabang sa mga bata nga mobati nga giabiabi, andam nga moampo, mokat-on sa mga baruganan sa ebanghelyo, o moapil sa usa ka leksyon.