6

Ang Espiritu Santo Nagtabang Kanako

Pasiuna alang sa Magtutudlo

Aron sa pag-andam sa imong kaugalingon nga espiritwal nga motudlo niini nga leksyon, palihug basaha ug palangdonga ang mosunod:

Ang Espiritu Santo usa ka miyembro sa Dios nga Kapangulohan, uban sa Langitnong Amahan ug Jesukristo. Siya usa ka personahe sa espiritu (tan-awa sa D&P 130:22). Ang misyon sa Espiritu Santo mao ang pagpamatuod sa Amahan ug Anak ug sa kamatuoran sa tanang mga butang (tan-awa sa 3 Nephi 11:36; Moroni 10:5). Makagiya usab Siya kanato sa paghimo og matarung nga mga pagpili ug mohupay kanato (tan-awa sa D&P 31:11). Ang paagi sa pagpakigsulti kanato sa Espiritu Santo gihulagway diha sa mga kasulatan isip usa ka “malinawon nga diyutayng tingog” (tan-awa sa 1 Mga Hari 19:11–12).

Mga Kalihokan sa Pagkat-on

Sugdi pinaagi sa kalihokan sa panagpundok. Alang sa mga ideya, tan-awa sa pahina 3.

Pag-ampo

Pagdapit og usa ka bata nga mohatag sa pangbukas nga pag-ampo.

Kanta

Sultihi ang mga bata nga ikaw mokanta og usa ka awit mahitungod sa Langitnong Amahan. Kantaha o isulti ang mga pulong sa una nga bersikulo sa “I Know My Father Lives” [Ako Nasayud Akong Amahan Buhi] Children’s Songbook, 5 [Songbook sa mga Bata] ug himoon ang mga lihok sa ubos. Dapita ang mga bata sa pag-apil uban kanimo.

Ako gyud nasayud ang Amahan buhi. (ibutang ang kamot sa dughan)

Ang Espiritu naghunghong kanako niini, (ikumkom ang kamot sa dunggan)

Tinuod gyud kini.

Pagbalik-balik nga Kalihokan

Dapita ang mga bata sa pag-ingon, “Espiritu.” Sultihi sila nga ang laing pangalan sa Espiritu sa Dios mao ang Espiritu Santo. Dapita ang mga bata sa pag-ingon, “Espiritu Santo.” Ipasabut nga ang Espiritu Santo nagtabang kanato nga masayud nga ang Langitnong Amahan nahigugma kanato.

Role Play

Sultihi ang mga bata nga kon buhaton nato ang matarung, ang Espiritu Santo motabang kanato nga masayud nga nakahimo kita og maayo nga pagpili. Dapita ang mga bata sa pag-apil kanimo samtang ikaw nag-role play nga nagbuhat sa mga butang nga matarung. Sama pananglit:

Kini matarung nga butang ang pag-adto sa simbahan. Magpakaaron ingnon kita nga moadto sa simbahan (ilabyog ang mga bukton samtang naglakaw kamo nga pinalibut).

Ibalik uban sa laing mga ehemplo, sama sa pagpahulam sa dulaan, nagtabang sa Inahan nga manilhig sa salog, ug uban pa.

Istorya

Ipasabut nga ang Espiritu Santo makatabang usab kanato kon mahadlok kita. Isaysay ang mosunod nga istorya:

Usa niana ka adlaw dihay dautan nga unos gawas sa balay ni David. Dihay kusog nga dalugdog (patabuni sa mga bata ang ilang mga dalunggan) ug kusog nga hangin (pahuyopa ang mga bata aron pagsundog sa hangin) ug ulan (ipasundog sa mga bata ang ulan uban sa ilang mga tudlo). Si David nahadlok. Gisultihan siya sa iyang inahan nga kon siya mahadlok mag-ampo siya sa Langitnong Amahan (ipakita ang litrato sa pahina 30). Si David ug ang iyang inahan nag-ampo nga ang Langitnong Amahan mopabilin kanila nga luwas. Dayon si David mibati nga luwas ug malipayon. Ang iyang inahan miingon nga ang Langitnong Amahan mipadala sa Espiritu Santo aron paghatag kaniya niadto nga mga pagbati aron dili siya mahadlok.

mother and boy praying

Dapita ang mga bata sa pag-ingon, “Espiritu Santo.”

Panapos

Ipakigbahin ang imong pagpamatuod mahitungod sa Espiritu Santo. Mahimo kini nga maglakip og simple, mubo nga kasinatian gikan sa imong kaugalingong kinabuhi sa diha nga ikaw gigiyahan sa Espiritu Santo.

Pag-ampo

Pagdapit og usa ka bata nga mohatag sa panapos nga pag-ampo.

Mga Tip sa Pagtudlo

Espiritu Santo: Bisan sa kabatan-on sa edad ang mga bata makat-on sa pag-ila sa impluwensya sa Espiritu Santo. Atol sa bisan unsa nga leksyon, tabangi sila sa pag-ila sa mga pagbati sa gugma ug kainit nga moabut gikan sa Espiritu Santo—ilabi na kon sila nagkat-on mahitungod sa Langitnong Amahan ug ni Jesukristo.

Gagmay nga mga bata: Hinumdumi nga kasagaran sa mga bata maglisud sa pagtunong sa ilang pagtagad og dugay-dugay nga panahon. Pagbantay sa mga timailhan nga sila nagkinahanglan og kausaban. Kon taudtaud na sila nga naglingkod, paghimo og kalihokan nga nagtugot kanila sa paglihok sa ilang mga lawas.

Personal nga mga kasinatian: Ang pagsaysay sa personal nga mga kasinatian makatabang niadtong inyong gitudloan nga makita kon sa unsa nga paagi ang ebanghelyo makaimpluwensya sa atong matag adlaw nga mga kinabuhi (tan-awa sa Pagtudlo, Walay Labaw ka Mahinungdanon nga Tawag, 45, 180). Alang niini nga grupo sa mga edad, ang kasinatian nga imong ipakigbahin nagkinahanglan nga hilabihan ka simple ug mubo—dili molabaw sa usa o duha ka hugpong sa mga pulong.

Opsyonal nga mga Kalihokan

Pagpangandam

• Alang sa kalihokan ginamit ang kasulatan: Pagdala og kopya sa Biblia. Markahi ang Juan 14:26 aron sayon ra nimo kini mapakli.

• Alang sa kalihokan ginamit ang larawan: Kopyaha ang larawan sa pahina 31 alang sa kada bata.

  coloring page, Holy Ghost cube

  Ang Espiritu Santo Nagtabang Kanako

  Magsimba

  Pag-ampo

  Pagmaloloy-on

  Tahura ang mga ginikanan

  Pagbasa sa mga kasulatan

• Alang sa cube nga dula: Kopyaha ang larawan sa pahina 31 ug kolori kini kon gusto. Guntinga buyon sa baga nga mga linya ug pil-a subay sa tuldok-tuldok nga mga linya. I-tape o ipapilit ang mga kawil aron mahimong usa ka cube.

Balak o Kanta-Kanta nga Kalihokan

Pagporma og usa ka lingin uban sa mga bata ug i-recite ang mosunod nga kalihokan ginamit ang bersikulo:

Ang Espiritu Santo mosulti sa malumo nga paagi. (ibutang ang kamot sa mga ngabil)

Dili gayud Siya mosinggit, tinuod kini. (ibutang ang mga kamot palibut sa baba nga ingon og nagsinggit)

Siya mopanalangin ug motabang ug mogiya kaninyo (pagginunitay ug molakaw nga maglibutlibot)

Sa tanang butang nga ninyong gibuhat. (lingkod)

Kasulatan

Sultihi ang mga bata nga si Jesus nagtudlo nga ang Espiritu Santo motudlo kanato. Ablihi ang Biblia sa Juan 14:26 ug basaha, “Ang Espiritu Santo … motudlo kaninyo sa tanang mga butang.” Dapita ang mga bata sa pagsulti og usab sa hugpong sa mga pulong uban kanimo, pipila ka mga pulong sa matag higayon.

Larawan

Ipasundayag ang larawan sa pahina 31 ug hatagi ang kada bata og usa ka kopya sa larawan. Itudlo ang litrato sa bilding sa Simbahan ug ipasabut nga ang Espiritu Santo motabang kanato nga masayud nga ang pag-adto sa simbahan mao ang hustong butang nga buhaton. Dapita ang mga bata nga itudlo ang bilding sa Simbahan diha sa ilang mga kopya. Balika alang sa ubang mga paglarawan.

Dula sa Cube

Ipaligid ang cube nga imong gihimo. Basaha ang ulohan diha sa ibabaw sa cube, ug ipausab og sulti kini sa mga bata uban kanimo. Dayon ipabuhat sa mga bata ang pipila ka simple nga mga lihok nga moangay sa litrato. Kon ang kilid nga may mga pulong “Ang Espiritu Santo Nagtabang Kanako” motunga, sultihi ang mga bata nga ang Espiritu Santo nagtabang kanato nga masayud kon nakahimo ba kita og usa ka butang nga maayo. Ibalik, nga naghatag sa kada bata og turno sa pagpaligid sa cube.

cube diagram

Mga Tip sa Pagtudlo

Mga kasulatan: “Kon kamo magtudlo sa mga bata, kinahanglan nga gamiton ninyo kanunay ang mga kasulatan ug mangita og mga paagi nga makomportable ang mga bata nga naggamit sa mga kasulatan” (Pagtudlo, Walay Labaw ka Mahinungdanon nga Tawag, 59). Makatabang ikaw kanila nga mopalambo og gugma alang sa mga kasulatan bisan gani sa dili pa sila makamao nga mobasa. Bisan kon mobasa lamang ikaw og mubo nga bahin sa bersikulo ngadto sa mga bata, basaha ang tibuok bersikulo atol sa imong pagpangandam sa leksyon.

Ang pagpulipuli malisud alang sa gagmay nga mga bata. Kon ikaw adunay daghang mga bata sa imong klase sa nursery, mahimo nga ikaw sa imong kaugalingon ang mopaligid sa cube sa matag higayon kaysa paghatag og turno sa mga bata.