11
Gihigugma Nako ang Akong Pamilya
Pasiuna alang sa Magtutudlo
Aron sa pag-andam sa imong kaugalingon nga espiritwal nga motudlo niini nga leksyon, palihug basaha ug palandonga ang mosunod:
Ang pamilya mao ang pinakaimportante sa plano sa kaluwasan. Gibuhat sa Langitnong Amahan ang mga pamilya aron sa paghatag kanato og kalipay ug pag-andam kanato alang sa kinabuhing dayon. Diha sa pamilya atong makat-unan ang sakto nga mga baruganan sa mahigugmaong kahimtang. Importante nga ang mga sakop sa pamilya mahigugma ug moamping sa usag usa. Atong mapakita ang atong gugma pinaagi sa pagtabang ug pagtahud (tan-awa sa Mga Taga-Efeso 6:1–3). Ang mga kasulatan nagtudlo kanato nga “magmabination [ug] magmanggiloy-on” (Mga Taga-Efeso 4:32; tan-awa usab sa “Ang Banay: Usa ka Pamahayag ngadto sa Kalibutan,” Ensign, Nob. 1995, 102).
Pagpangandam
Palut-i o paghimo og kopya sa mga litrato sa pamilya sa pahina 51. Kolori kini, kon gusto. Guntinga kini ug isulod sa usa ka sudlanan.
Akong Gimahal ang Akong Pamilya
Mga Kalihokan sa Pagkat-on
Sugdi pinaagi sa kalihokan sa panagpundok. Alang sa mga ideya, tan-awa sa pahina 3.
Pag-ampo
Pagdapit og usa ka bata nga mohatag sa pangbukas nga pag-ampo.
Litrato
Ipakita ang litrato sa usa ka malipayon nga pamilya nga anaa sa pahina 50. Sultihi ang mga bata nga ang Langitnong Amahan mihatag kanato og pamilya. Ipasabut nga ang atong mga pamilya nahigugma kanato ug kita makapakita sa atong gugma alang sa atong pamilya pinaagi sa pagbinuotan ug pagkamatinabangon.
Role Play
Guniti ang sudlanan ug hangyoa ang usa ka bata nga mopili og litrato sa pamilya. Sultihi ang mga bata kon unsa nga sakop sa pamilya kini (inahan, amahan, igsoong lalaki, igsoong babaye, o gamay nga bata), ug ipasulti kini og usab sa mga bata uban kanimo. Pagsugyot og paagi nga makapakita sila og gugma alang niana nga sakop sa pamilya (pinaagi sa pagpunit sa mga dulaan, paghatag, pagpahiyom, ug uban pa). Dapita sila nga magpakaaron-ingnon nga mobuhat sa aksyon. Balika kini nga kalihokan sa matag litrato sa pamilya.
Kanta
Kantaha o isulti ang mga pulong sa “A Happy Family” [Malipayon ang Pamilya] Children’s Songbook, 140 [Songbook sa mga Bata] ug buhata ang aksyon sa ubos. Dapita ang mga bata sa pag-apil kanimo.
Gimahal ko si mama, (ibutang ang kamot sa dughan)
Gimahal namo si papa, (iyangoyango ang ulo)
Gimahal sab mi niya, (ilugway ang mga bukton)
Malipayon ming pamilya. (gaksa ang kaugalingon)
Gimahal ko si ate. ((ibutang ang kamot sa dughan)
Gimahal namo si kuya; (iyangoyango ang ulo)
Gimahal sab mi niya, (ilugway ang mga bukton)
Malipayon ming pamilya. (gaksa ang kaugalingon)
Panapos
Awhaga ang mga bata nga magmahigugmaon ug magmabination ngadto sa mga sakop sa ilang pamilya. Dapita sila sa pagsulti, “Gimahal nako ang akong pamilya.”
Pag-ampo
Pagdapit og usa ka bata nga mohatag sa panapos nga pag-ampo.
Opsyonal nga mga Kalihokan
Pagpangandam
-
Alang sa istorya: Markahi ang pahina 18 niini nga manwal aron sayon ra nimo kini mapakli.
-
Alang sa poster: Pangayo sa mga ginikanan sa matag bata sa nursery og gamay nga litrato nga anaa ang bata uban sa iyang pamilya (tingali nakahatag na sila niini nga litrato sa unang pag-apil sa bata sa klase sa nursery; tan-awa sa pahina 7). Ipapilit ang mga litrato diha sa poster. Sa ibabaw, isulat ang “Gimahal Nako ang Akong Pamilya.”
Istorya
Ipakita sa mga bata ang litrato ni Jesus ug sa Iyang inahan (pahina 18). Itudlo si Jesus ug sultihi ang mga bata nga kini usa ka litrato ni Jesus sa dihang bata pa Siya. Itudlo si Maria ug isulti nga kini ang inahan ni Jesus. Ipasabut nga si Jesus adunay mahigugmaong pamilya kinsa miatiman Kaniya sa gamay pa Siya, ug Iyang gimahal pag-ayo ang Iyang pamilya. Pagsugyot og mga paagi nga makapakita og gugma ang mga bata alang sa ilang mga inahan (pinaagi sa pagpahiyom, pagtabang sa paglimpyo, paggakus, ug uban pa). Dapita sila nga magpakaaron-ingnon nga mobuhat niadtong mga butanga.
Kanta
Dugangi og bag-ong mga pulong ang kanta nga “Fun To Do” [Makalingaw nga Buhaton] Children’s Songbook, 253 [Songbook sa mga Bata] aron sa pagtudlo sa mga bata og ubang mga paagi nga sila makapakita og gugma alang sa ilang mga pamilya. Pananglit, isulti ngadto sa mga bata, “Atong ipakita unsaon nato sa pagmahal si Ate.” Kantaha ang “Pagpahulam og dulaan makalingaw nga buhaton” ug himoa ang sayon nga mga aksyon. Laing mga pulong nga imong magamit mao ang, “Pagpunit sa mga dulaan makalingaw nga buhaton,” “Paglimpyo sa kwarto makalingaw nga buhaton,” “Pagpahiyom makalingaw nga buhaton,” “Pagtabang sa akong papa makalingaw nga buhaton,” ug uban pa.
Poster
Ipakita ang poster nga imong giandam. Itudlo ang litrato ug sulti, “Kini ang pamilya ni [pangalan sa bata]. Ania si [pangalan sa bata].” Balika alang sa matag bata. Ipasabut nga kitang tanan adunay mga pamilya kinsa nahigugma kanato ug kita nahigugma kanila. Ipakita ang poster kada semana ug tuguti ang mga bata nga motubag sa mga pangutana mahitungod sa ilang pamilya (“Hain ang pamilya ni [pangalan sa bata]?” “Asa si [pangalan sa bata]?” “Asa si Papa?” ug uban pa). Idugang ang mga litrato diha sa poster inig apil sa ubang mga bata sa nursery.