27

Ang Sakramento Nagtabang Kanako nga Maghunahuna mahitungod ni Jesukristo

Pasiuna alang sa Magtutudlo

Aron sa pag-andam sa imong kaugalingon nga espiritwal nga motudlo niini nga leksyon, palihug basaha ug palandonga ang mosunod:

Sa gabii sa wala pa ang Iyang kamatayon sa krus, si Jesukristo mihatag sa sakramento ngadto sa Iyang mga Apostoles ug miingon, “Buhata ninyo kini sa paghandom kanako” (tan-awa sa Lucas 22:19–20). Human sa Iyang pagkabanhaw, mao usab ang Iyang gibuhat sa mga Nephite (tan-awa sa 3 Nephi 18:1–11). Karon moambit usab kita sa sakramento agig handumanan sa sakripisyo sa Manluluwas alang kanato. Nagsaksi kita ngadto sa Dios nga atong hinumduman kanunay si Jesukristo ug magsunod sa Iyang mga sugo. (Tan-awa sa D&P 20:77, 79.)

Pagpangandam

• Uban sa pagtugot sa bishop o branch president, pagdala og basiyo sa sacrament trays ngadto sa nursery.

• Pagdala og kopya sa Biblia. Markahi ang Lucas 22:19 aron sayon ra nimo kini nga mapakli. Markahi usab ang pahina 106 niini nga manwal.

Mga Kalihokan sa Pagkat-on

Sugdi pinaagi sa kalihokan sa panagpundok. Alang sa mga ideya, tan-awa sa pahina 3.

Pag-ampo

Pagdapit og usa ka bata nga mohatag sa pangbukas nga pag-ampo.

Kanta

Ipakita ang litrato ni Jesus sa pahina 106 samtang inyong kantahon ang unang linya sa “Reverently, Quitely” [Nagtahud sa Hilom] Children’s Songbook, 26 [Songbook sa mga Bata].

Nagtahud sa hilom, naghunahuna kami. (itudlo ang litrato ni Jesus)

Balika sa pipila ka mga higayon aron mapahimutang ang matinahuron nga kahimtang. Dapita ang mga bata sa pagkanta kanimo.

Kasulatan

Sultihi ang mga bata nga kada Dominggo nagbuhat kita og butang nga espesyal sa paghinumdom ni Jesus—panahon sa miting sa sakramento kita mokaon og gamay nga piraso sa pan ug moinom og gamay nga kopa sa tubig. Sultihi sila nga kini gitawag og sakramento. Hangyoa ang mga bata sa pagsulti og “sakramento.” Sultihi ang mga bata nga atong nakat-unan sa mga kasulatan nga si Jesus gusto nga kita moambit sa sakramento aron sa paghinumdom Kaniya. Ablihi ang Biblia ngadto sa Lucas 22:19 ug sulti, ‘Buhata ninyo kini sa paghandom kanako.’ “

Litrato

Ipakita ang mga litrato sa usa ka deacon nga mipaambit sa sakramento (pahina 114). Itudlo ang mga detalye diha sa litrato, sama sa deacon ug sa mga tawo nga hilom nga naglingkod. Ipahikap sa mga bata ang mga sacrament tray nga imong gidala samtang ikaw mopasabut sa simple nga mga termino unsay mahitabo panahon sa pagpangalagad sa sakramento— maminaw kita pag-ayo samtang ang sakramento gipanalanginan; mokuha kita og usa ka piraso sa pan; moinom kita sa tubig ug ibalik ang kopa sa tray, ug maghunahuna kita ni Jesus.

Mga Balak o Kanta-Kanta nga Kalihokan

I-recite ang mosunod nga mga balak o kanta-kanta nga kalihokan ug dapita ang mga bata sa pag-apil kanimo:

Hilom ako mokaon sa pan (magpakaaron-ingnon nga nagkaon og pan)

Ug moinom usab sa tubig. (magpakaaron-ingnon nga moinom og tubig)

Akong kyugpuson ang akong mga bukton ug maghunahuna ni Jesus— (ikyugpos ang mga bukton)

Mao kana ang angay nakong buhaton. (iyango-yango ang ulo)

[M. W. Verbica, “The Sacrament,” Friend, Peb. 1995, 17]

Panapos

Ipakita ang litrato ni Jesus nga anaa sa pahina 106. Pangutan-a ang mga bata, “Kinsa ang atong angay nga hunahunaon kon kita moambit sa sakramento?” Hangyoa ang mga bata sa pagsulti og “Jesus.”

Pag-ampo

Pagdapit og usa ka bata nga mohatag sa panapos nga pag-ampo.

Mga Tip sa Pagtudlo

Pagbinuotan: Gamit og hinay nga tingog ug matinahuron nga paagi sa pagtabang sa mga bata nga makasabut nga ang sakramento sagrado.

Paggunit og mga butang: Ang gagmay nga mga bata simple ug literal nga maghunahuna. Sila dili makasabut og abstract nga mga ideya. Ang paghatag kanila og mga butang nga gunitan nga may kalabutan sa leksyon makatabang kanila nga makat-on. Siguroha nga sila magbinuotan ug motahud sa paggunit sa mga sacrament tray. Kinahanglang walay pan o tubig diha sa mga tray alang niini nga kalihokan.

Opsyonal nga mga Kalihokan

Pagpangandam

• Alang sa kalihokan sa bisita: Pakigsabut sa usa ka naghupot sa Aaronic Priesthood sa pag-anha sa klase sa nursery ug mohisgot kon giunsa niya pagtabang sa pagpangalagad sa sakramento.

• Alang sa role play ug sa dula: Kopyaha ang kard sa pahina 115. Kolori ang mga kard, kon gusto, ug guntinga kini.

  

  Ako makapaminaw samtang ang mga pag-ampo sa sakramento gipamulong.

  Makahunahuna ako ni Jesus samtang ako mokaon sa pan.

  Makahunahuna ako ni Jesus samtang ako moinom sa tubig.

  Ang sakramento makatabang kanako sa paghunahuna mahitungod ni Jesus.

• Alang sa libro: Kopyaha ug guntinga ang mga kard nga anaa sa pahina 115 alang sa matag bata. Pagdala og yarn o lambo.

Bisita

Ipaila ang imong bisita ngadto sa mga bata. Ipasabut nga siya adunay priesthood. Hangyoa siya sa paghisgot sa lakbit kon giunsa niya sa pagandam, pagpanalangin, o pagpaambit ang sakramento. Dapita siya sa pagpakigbahin sa iyang mga pagbati mahitungod sa sakramento.

Role Play

Ipakita ang mga kard nga imong giandam, tagsa-tagsa. Basaha ang kapsyon ug sultihi ang mga bata nga magpakaaron-ingnon nga nagbuhat sa unsay gipakita sa drowing (alang sa unang tulo ka mga kard lamang). Sama pananglit, ipakyugpos nila ang ilang mga bukton ug ipaduko ang ilang mga ulo ug magpakaaron-ingnong magbinuotan sa pagkuha sa pan ug sa tubig. Dayga sila sa ilang mga paningkamot sa kada higayon. Kon ikaw maggunit sa drowing ni Jesus, pangutan-a ang mga bata, “Kinsa ang atong angay nga hunahunaon kon kita moambit sa sakramento?”

Dula

Ikulob pagbutang ang mga kard nga imong giandam diha sa salog o sa lamesa. Dapita ang usa sa mga bata sa pag-ukab sa usa sa mga kard. Ipabasa ang kapsyon sa kard. Balika hangtud ang matag bata nga gusto makaapil nakahimo na.

Libro

Hatagi ang matag bata og upat ka mga kard nga imong giandam alang kanila. Lungagi ang daplin sa matag kard. Higti og yarn o lambo agi sa lungag, ug ihigot ang lambo aron makahimo og gamay nga libro alang sa matag bata. Dayon basaha ang libro ngadto sa mga bata.

Mga Tip sa Pagtudlo

Pag-ampo: Ikaw mahimong mohatag sa pangbukas o panapos nga pag-ampo sa imong kaugalingon usahay aron sa pagpakita sa mga bata unsaon sa pag-ampo. Makakat-on sila og daghan gikan sa inyong ehemplo kon sila mobuhat unsay imong gisulti ngadto kanila.

Pagbinuotan: Kon imong pangutan-on ang mga bata kinsa ang atong hunahunaon panahon sa sakramento, ang uban kanila tingali mosinggit sa tubag. Kon sila mobuhat niini, sa malumo tudloi sila nga magbinuotan sa paggamit sa pangalan ni Jesukristo.

Ipahaum nga mga kalihokan aron imong makab-ot ang mga panginahanglan ug mga kapanguhaan. Sama pananglit, kon ikaw walay yarn o lambo nga magamit niini nga kalihokan, imong mabugkos ang mga kard sa laing paagi. O imong pakoloran sa mga bata ang mga larawan nga dili dili mahimo kini nga libro.