30

Si Jesukristo Mao ang Anak sa Langitnong Amahan (Pasko)

Pasiuna alang sa Magtutudlo

Aron sa pag-andam sa imong kaugalingon nga espiritwal nga motudlo niini nga leksyon, palihug basaha ug palandonga ang mosunod:

Si Jesukristo natawo sa usa ka mortal nga inahan, nga si Maria, ug sa usa ka imortal nga amahan, ang Langitnong Amahan. Siya tinuod nga Anak sa Dios. Tungod sa Iyang dakong gugma alang kanato, ang Langitnong Amahan mipadala ni Jesukristo nganhi sa yuta aron mahimo natong Manluluwas ug atong Ehemplo. “Kay gihigugma gayud sa Dios ang kalibutan nga tungod niana gihatag niya ang iyang bugtong Anak, aron ang tanan nga mosalig kaniya dili malaglag kon dili may kinabuhing dayon” (Juan 3:16).

Pagpangandam

Markahi ang pahina 106 niini nga manwal aron sayon ra nimo kini mapakli.

Mga Kalihokan sa Pagkat-on

Sugdi pinaagi sa kalihokan sa panagpundok. Alang sa mga ideya, tan-awa sa pahina 3.

Pag-ampo

Pagdapit og usa ka bata nga mohatag sa pangbukas nga pag-ampo.

Litrato

Ipakita ang mga litrato sa pahina 126. Dapita ang mga bata sa pagpangita sa gamay nga bata diha sa litrato. Sultihi sila sa Iyang pangalan nga si Jesus, ug dapita sila sa pagsulti og “Jesus.” Sultihi ang mga bata nga magpakaaron- ingnon nga moduyanduyan sa gamay nga bata sa ilang mga bukton.

Itudlo si Maria diha sa litrato ug sultihi ang mga bata, “Mao kini ang inahan ni Jesus. Ang iyang pangalan mao si Maria.”

Sultihi ang mga bata nga si Jesus mao ang Anak sa Langitnong Amahan. Dapita ang mga bata sa pagsulti og usab sa “Si Jesus mao ang Anak sa Langitnong Amahan,” pipila ka mga pulong sa matag higayon. Sultihi sila nga ang Langitnong Amahan mipadala sa Iyang Anak, nga si Jesukristo, nganhi sa yuta tungod kay Siya nahigugma kanato.

Kanta

Itudlo pag-usab sa bata nga si Jesus diha sa litrato. Sultihi ang mga bata nga ikaw mokanta. Dapita sila sa pag-ingon “Mipadalas Bugtong Anak” kon ikaw motudlo ngadto sa batang si Jesus. Papraktisa sila og pipila ka mga higayon, ug dayon kantaha o isulti ang mosunod nga mga pulong sa “He Sent His Son” [Mipadalas Bugtong Anak] Children’s Songbook, 34–35 [Songbook sa mga Bata].

Sa unsa nga paagi nga ang Amahan makasulti sa kalibutan sa gugma ug kalumo?

Iyang gipadala ang iyang Anak, (itudo ang litrato sa bata nga si Jesus) bag-ong natawo nga bata, nga may kalinaw ug kabalaan.

Ipakita ang litrato ni Jesukristo nga anaa sa pahina 106. Sultihi ang mga bata nga ang bata nga si Jesus mitubo nga nahimo natong Manluluwas, nga si Jesukristo. Dapita sila sa pag-ingon “Mipadalas’ Bugtong Anak” kon ikaw motudlo ngadto sa Manluluwas. Kantaha o isulti ang mosunod nga mga pulong sa “Mipadalas’ Bugtong Anak”:

Sa unsa nga paagi nga ang Amahan makapakita sa kalibutan sa dalan nga atong agian?

Iyang gipadala ang iyang anak (itudlo ang litrato sa Manluluwas) aron maglakaw uban sa mga tawo sa yuta, aron kita masayud.

Panapos

Ipadayag ang imong pasalamat nga ang Langitnong Amahan mipadala ni Jesukristo. Ipaambit ang imong pagpamatuod nga si Jesukristo mao ang Anak sa Langitnong Amahan.

Pag-ampo

Pagdapit og usa ka bata nga mohatag sa panapos nga pag-ampo.

Mga Tip sa Pagtudlo

Jesukristo: “Ang tanan natong gitudlo kinahanglang mopunting sa mga sakop sa pamilya ug mga miyembro sa klase ngadto ni Kristo…. Hinumdumi kini samtang ikaw mag-andam ug magtudlo sa imong mga leksyon” (Pagtudlo, Walay Labaw ka Mahinungdanon nga Tawag, 80).

Gagmay nga mga bata: Pagbantay sa mga timailhan nga makasulti kanimo kon ang mga bata ba nagpakita og atensyon. Sa pagtabang kanila, sulayi sa pag-usabusab sa imong tingog sa pagtudlo, magtan-aw sa mata kanunay, ug pag-ilis-ilis sa mga paagi sa imong pagtudlo. (Tan-awa sa Pagtudlo, Walay Labaw ka Mahinungdanon nga Tawag, 71–72.)

Opsyonal nga mga Kalihokan

Pagpangandam

• Alang sa mga stick puppet: Kopyaha ug guntinga ang larawan sa pahina 127 alang sa matag bata. Pag-tape o pagpilit og tukog sa likod sa matag larawan aron makahimo og mga stick puppet alang sa mga bata.

  

  Si Jesukristo mao ang Anak sa Langitnong Amahan

• Alang sa kalihokan ginamit ang kasulatan: Pagdala og kopya sa Basahon ni Mormon. Markahi ang 3 Nephi 9:15 aron sayon ra nimo kini nga mapakli.

Mga Stick Puppet

Hatagi ang mga bata sa mga stick puppet nga imong gigunting alang kanila. Sa lakbit i-istorya pag-usab ang pagkahimugso ni Jesukristo sa imong kaugalingong mga pulong (tan-awa sa Lucas 2:4–16). Dapita ang mga bata sa paggunit sa ilang mga stick puppet sa saktong panahon sa istorya. Kini nga kalihokan angay alang sa mas dagko nga mga bata.

Kanta

Kantaha o isulti ang mosunod nga pulong sa “Away in a Manger” [Didto sa Pasungan] Children’s Songbook, 42–43 [Songbook sa mga Bata] ug paghimohimo og mga aksyon nga gisugyot sa mga pulong. Dapita ang mga bata sa pag-apil kanimo.

Didtos’ pasungan, way kunang katulgan,

Sa batang si Jesus nga kahigdaan;

Kabitoonan sa langit nagbantay,

Sa batang Jesus natulog sa kumpay.

Mga Balak o Kanta-Kanta nga Kalihokan

I-recite ang mosunod nga mga balak o kanta-kanta nga kalihokan ug dapita ang mga bata sa pag-apil kanimo:

Bata diha sa pasungan, (i-galing-galing ang mga bukton sama og nagtabyog og batang gamay)

Mahigugmaong inahan naa sa duol,

Bitoon misanag sa kalangitan, (itudlo ang panganud)

Ang Anak sa Dios ania! (ikyugpos ang mga bukton)

Kasulatan

Sultihi ang mga bata nga si Jesus misulti kanato diha sa mga kasulatan nga Siya mao ang Anak sa Dios, atong Langitnong Amahan. Ablihi ang Basahon ni Mormon ngadto sa 3 Nephi 9:15 ug basaha ang, “Tan-awa, ako mao si Jesukristo ang Anak sa Dios.” Dapita ang mga bata sa pagsulti “ang Anak sa Dios” uban kanimo.

Mga Tip sa Pagtudlo

Mga Kapanguhaan: Gamit lamang og mga kapanguhaan nga hinimo sa Simbahan diha sa klase sa nursery. Kon ikaw nagkinahanglan og dugang nga buhaton sa mga bata, pagpili og mga istorya, mga dula, mga puppet, o mga kalihokan sa pagkolor gikan niini nga manwal nga nagamit na nimo kaniadto. Magamit usab nimo ang mga dula ug mga istorya gikan sa mga magasin sa Simbahan.

Pagbalik-balik: Itudlo ang tanan o kabahin niini nga leksyon sa makadaghan panahon sa Pasko. Ang mga bata malingaw nga maminaw sa binalikbalik nga Pasko.