12
Makaampo Ako Uban sa Akong Pamilya
Pasiuna alang sa Magtutudlo
Aron sa pag-andam sa imong kaugalingon nga espiritwal nga motudlo niini nga leksyon, palihug basaha ug palandonga ang mosunod:
Ang Manluluwas miingon, “Pag-ampo uban sa inyong mga banay ngadto sa Amahan, sa kanunay diha sa akong ngalan, aron ang inyong mga asawa ug ang inyong mga anak mapanalanginan” (3 Nephi 18:21). Pinaagi sa pag-ampo og dungan, ang mga pamilya mas mahiduol ngadto sa Langitnong Amahan ug sa usag usa ug modapit sa Espiritu Santo diha sa panimalay (tan-awa sa D&P 19:38).
Pagpangandam
-
Markahi ang pahina 106 niini nga manwal aron sayon ra nimo kini mapakli.
-
Pagdala og kopya sa Basahon ni Mormon. Markahi ang 3 Nephi 18:21 aron sayon ra nimo kini mapakli.
Mga Kalihokan sa Pagkat-on
Sugdi pinaagi sa kalihokan sa panagpundok. Alang sa mga ideya, tan-awa sa pahina 3.
Pag-ampo
Pagdapit og usa ka bata nga mohatag sa pangbukas nga pag-ampo.
Kanta
Dapita ang mga bata sa pagsulti sa mga pulong “pag-ampo sa pamilya” sa pipila ka higayon. Sultihi sila nga kamo magkat-on og kanta mahitungod sa pag-ampo sa pamilya. Pagporma og lingin uban sa mga bata, ug magginunitay sa mga kamot. Kantaha o isulti ang mga pulong sa “Family Prayer” [Pag-ampo sa Pamilya] Children’s Songbook, 189 [Songbook sa mga Bata] ug tabangi ang mga bata sa paghimo sa aksyon uban kanimo.
Magliyok ug mangluhod ta (manglakaw libut sa lingin)
Pag-ampos pamilya (hunong sa paglakaw ug luhod; ipasulti og usab sa mga bata ang “pag-ampo sa pamilya” sunod nimo)
Ang Langitnong Amahan (ikyugpos ang mga bukton)
Atong pasalamatan.
Litrato
Ipakita ang litrato sa usa ka pamilya nga nag-ampo sa pahina 54. Tabangi ang mga bata nga makaila sa lain-laing mga sakop sa pamilya, ug itudlo nga sila nangluhod ug nga ang ilang mga bukton gikyugpos, ang ilang mga ulo giduko, ug ang ilang mga mata gipiyong. Sultihi sila nga kini nga pamilya naghimo sa pag-ampo sa pamilya. Dapita ang mga bata sa pagsulti sa mga pulong “pag-ampo sa pamilya.” Dapita sila sa pagluhod, pagkyugpos sa ilang mga bukton, ug pagduko sa ilang mga ulo. Ipasabut nga kon kita adunay pag-ampo sa pamilya, nakigsulti kita ngadto sa Langitnong Amahan. Kita magpasalamat Kaniya alang sa atong mga panalangin, ug mohangyo Kaniya sa pagtabang ug sa pagpanalangin sa atong pamilya.
Mga Balak o Kanta-Kanta nga Kalihokan
I-recite ang mosunod nga mga balak o kanta-kanta nga kalihokan ug dapita ang mga bata sa pag-apil kanimo:
Kini ang akong inahan, kinsa motabang kanako sa pagdula. (i-isa ang kumagko)
Kini ang akong amahan, kinsa nagtrabaho sa tibuok adlaw. (i-isa ang ikaduha nga tudlo)
Kini ang akong igsoong lalaki, kusgan ug taas kaayo. (i-isa ang ikatulo nga tudlo)
Kini ang akong igsoong babaye, kinsa gustong magdula og bola. (i-isa ang ikaupat nga tudlo)
Ug kini mao ako; malipayon akong moingon (i-isa ang ikalima nga tudlo)
Dungan ang among pamilya aron mag-ampo. (kumoa ang kamot)
Kasulatan
Ipakita ang litrato ni Jesukristo sa pahina 106. Ablihi ang Basahon ni Mormon sa 3 Nephi 18:21 ug isulti, “Si Jesus miingon, ‘Pag-ampo sa inyong mga banay.’ “ Dapita ang mga anak sa pagsulti og usab niini nga mga pulong uban kanimo, pipila ka pulong matag higayon.
Panapos
Dapita ang mga bata sa pagsulti, “Ako makaampo uban sa akong pamilya,” pipila ka pulong matag higayon.
Pag-ampo
Pagdapit og usa ka bata nga mohatag sa panapos nga pag-ampo.
Opsyonal nga mga Kalihokan
Pagpangandam
-
Alang sa finger-puppet nga istorya: Kopyaha ug guntinga ang mga finger puppet sa pahina 59. Kolori kini, kon gusto.
Imahecoloring page, family circles and finger puppetsAng Akong Pamilya Mahimong Mag-uban sa Hangtud
Kopyaha kini nga pahina ug guntinga ang mga finger puppet subay sa baga, tul-id nga linya. Pil-a subay sa tuldok-tuldok nga mga linya. Dayon butangi og tape ang mga ngilit, gawas sa ubos nga bahin aron ang mga bata makasul-ob sa mga puppet sa ilang mga tudlo.
-
Alang sa dula sa bag: Sa upat ka gagmay nga mga bag isulat “Kami Mapasalamaton sa Among mga Panalangin.” Sa matag bag isulod ang usa ka litrato sa butang nga kita mapasalamaton (sama sa pagkaon, sinina, usa ka balay, usa ka pamilya, ug uban pa). Kon ikaw gusto, mahimo nimong pakopyahan ang mga larawan sa pahina 55 o bisan asa niini nga manwal.
Imahecoloring page, I Can PrayMakaampo Ako uban sa Akong Pamilya
Mapasalamaton kita sa atong pamilya.
Mapasalamaton kita sa atong panimalay.
Mapasalamaton kita sa pagkaon nga gikaon.
Mapasalamaton kita sa atong mga sinina.
-
Alang sa kalihokan sa pagkolor: Kopyaha ang larawan sa pahina 55 nga koloran sa matag bata. Pagdala og mga gunting ug tape.
Finger-Puppet nga Istorya
Gamita ang mga finger-puppet sa pagsaysay sa mosunod nga istorya mahitungod sa pag-ampo sa pamilya:
Aniay usa ka pamilya. Kini ang amahan, ug kini mao ang inahan. Dinhi nia ang igsoong babaye ug igsoong lalaki. Kini si Peter, ang manghud nga lalaki (itudlo ang puppet sa gamay nga bata). Usa ka adlaw si Peter nagdula ug naigo ang iyang mata (dapita ang mga bata sa pagtabon sa ilang mata sa ilang kamot). Si Papa ug Mama midala kaniya sa doktor (kuhaa ang puppet gikan sa tudlo ug ipahigda sa salog). Ang pamilya ni Peter nangluhod diha sa pag-ampo sa pamilya (dapita ang mga bata sa pagpangluhod). Mihangyo sila sa Langitnong Amahan sa pagpanalangin ni Peter. Ang Langitnong Amahan naminaw sa ilang pag-ampo. Iyang gitabangan si Peter nga mamaayo (ibutang og balik ang puppet sa tudlo). Dayon si Peter ug ang iyang pamilya nag-ampo na usab aron sa pagpasalamat sa Langitnong Amahan tungod sa pagpanalangin ni Peter.
Dula sa Bag
Ibutang ang mga bag sa salog. Pagunita ang tanan sa ilang mga kamot, pagporma og lingin libut sa mga bag, ug lakaw subay sa lingin samtang kamo magkanta “Pag-ampo sa Pamilya.” Dayon hunong sa paglakaw, ug papilia ang usa ka bata og bag ug ipakita ang litrato sa sulod. Sulti, “Kami mapasalamaton sa [pangalan sa butang nga anaa sa litrato].” Dayga ang mga bata sa ilang pag-apil. Padayon hangtud ang matag bata makahimo sa iyang turno.
Pagkolor
Pakolori sa mga bata ang kopya sa pahina 55. Kon mahuman na sila, guntinga ang mga piraso, ug sumpaya kini ginamit ang tape aron makahimo og kadena aron dad-on sa matag bata sa ilaha.