26

Ako Bunyagan ug Kumpirmahan

Pasiuna alang sa Magtutudlo

Aron sa pag-andam sa imong kaugalingon nga espiritwal nga motudlo niini nga leksyon, palihug basaha ug palandonga ang mosunod:

Si Jesukristo gibunyagan aron sa pagpakita “ngadto sa Amahan nga siya magmasulundon sa paghupot sa iyang mga sugo” ug sa pagpakita og panig-ingnan alang kanato (tan-awa sa 2 Nephi 31:7, 9; tanawa usab sa Mateo 3:13–17). Kon kita bunyagan, gipakita usab nato nga kita andam sa pagsunod sa Manluluwas ug pagsunod sa Iyang mga kasugoan. Human mabunyagi si Jesus, “ang Espiritu Santo mikunsad diha kaniya” (2 Nephi 31:8). Human sa atong pagbunyag, kita hatagan sa gasa sa Espiritu Santo pinaagi sa ordinansa sa kumpirmasyon. Kini nagpasabut nga kita adunay panag-uban kanunay sa Espiritu Santo kon kita mosunod sa mga kasugoan.

Mga Kalihokan sa Pagkat-on

Sugdi pinaagi sa kalihokan sa panagpundok. Alang sa mga ideya, tan-awa sa pahina 3.

Pag-ampo

Pagdapit og usa ka bata nga mohatag sa pangbukas nga pag-ampo.

Litrato

Ipakita ang litrato ni Jesukristo nga gibunyagan 110. Itudlo ang mga detalye diha sa litrato (si Jesus, ang tubig, si Juan Bautista, ug uban pa). Ipasabut nga si Jesus nagpabunyag tungod kay Siya nahigugma sa Langitnong Amahan ug buot nga mosunod Kaniya. Dapita ang mga bata sa pagsulti og “Jesus” ug “gibunyagan” uban kanimo.

Balak

Itudlo ang lain-laing mga bahin sa litrato samtang imong i-recite ang mga pulong sa unang bersikulo sa “Baptism” [Bunyag] Children’s Songbook, 100–101 [Songbook sa mga Bata]. Dapita ang mga bata sa pagtudlo niini uban kanimo.

Si Jesus miduol ngadto ni Juan Bautista, (itudlo si Jesus, dayon si Juan)

Didto sa sapas Judea,

Si Jesus gibunyagan

Pinaagi sa pagtuslob. (itudlo ang tubig)

Mahimo nimo nga ipasabut nga ang “pagpaunlod” nagpasabut nga si Jesus gipaunlod ilawom sa tubig sa dihang gibunyagan Siya.

Litrato

Ipakita ang litrato sa batang babaye nga gibunyagan (pahina 110) ug ipasabut ang mga kapareha sa duha ka mga litrato. Sultihi ang mga bata nga sila mahimong mabunyagan, sama ni Jesus, kon mag-otso anyos na sila. Ipataas ang walo ka mga tudlo, upat sa kada kamot, ug ipha kini. Balika, ug dapita ang mga bata sa pagbuhat niini uban kanimo. Ipasabut nga ang pagpabunyag mao ang usa ka paagi nga kita makasunod ni Jesus, kon kita bunyagan atong gipakita nga kita nahigugma sa Langitnong Amahan ug gusto nga mosunod Kaniya.

Mga Larawan

Ipakita ang mga larawan sa pahina 111. Pakigsulti ngadto sa mga bata mahitungod kon unsay nahitabo sa mga larawan. Ipasabut nga human kita mabunyagan, kita kumpirmahan. Hangyoa ang mga bata sa pagsulti og “kumpirmahan.” Sultihi sila nga kini nagpasabut nga ang mga tawo nga naghupot sa priesthood mopandong sa ilang mga kamot sa atong ulo aron hatagan kita sa gasa sa Espiritu Santo.

Ako Magpabunyag

Ako Magpakumpirma

Panapos

Dapita ang mga bata sa pagsulti, “Ako bunyagan ug kumpirmahan,” pipila ka mga pulong matag higayon. Sa lakbit sultihi ang mga bata unsay imong gibati sa dihang ikaw gibunyagan ug gikumpirmahan.

Pag-ampo

Pagdapit og usa ka bata nga mohatag sa panapos nga pag-ampo.

Mga Tip sa Pagtudlo

Mga Litrato: Kon adunay duha ka litrato sa samang pahina, ikaw makatabang sa mga bata nga makapokus sa usa ka litrato pinaagi sa pagtabon sa lain.

Gagmay nga mga bata: Ang ubang mga bata, ilabi na ang mga gagmay, dili makasabut sa tanang mga konsepto nga gitudlo niini nga mga leksyon. Hinoon, sila nakakat-on og butang matag semana, ug ikaw nagtabang kanila nga mobati sa Espiritu ug makapamilyar sa mga pulong ug hugpong sa mga pulong kabahin sa ebanghelyo.

Opsyonal nga mga Kalihokan

Pagpangandam

• Alang sa kalihokan ginamit ang kasulatan: Pagdala og kopya sa Basahon ni Mormon. Markahi ang 3 Nephi 12:1 aron sayon ra nimo kini nga mapakli.

• Alang sa dula nga tag-an tag-an: Kopyaha ang mga larawan 111 ug kolori kon gusto. Tung-a sa pagpilo ang pahina aron ang larawan sa bunyag makita sa usa ka kilid ug ang larawan sa kumpirmasyon makita sa pikas.

• Alang sa kalihokan sa pagkolor: Kopyaha ang mga larawan sa pahina 111 nga koloran sa matag bata.

Kasulatan

Sultihi ang mga bata nga si Jesukristo nagsulti kanato diha sa mga kasulatan nga Siya gusto nga bunyagan. Ablihi ang Basahon ni Mormon ngadto sa 3 Nephi 12:1 ug isulti, “miingon si Jesus, ‘Tuo kanako ug magpabunyag.’ “Dapita ang mga bata sa pagsulti og usab sa mga pulong uban kanimo pipila ka pulong matag higayon. Pahinumdumi sila nga bunyagan na sila kon moabut na og otso anyos ang edad.

Dula nga Tag-an Tag-an

Ipakita sa mga bata ang imong kopya sa larawan sa bunyag, basaha ang kapsyon, ug dapita ang mga bata sa pagsulti “pagbunyag.” Paklia ang pahina, ug balika og sulti alang sa larawan sa pagkumpirma.

Tagoi ang mga larawan sa imong luyo. Dayon ipakita sa mga bata ang usa ka bahin sa pahina, ug pangutana, “Gibunyagan ba o gikumpirmahan ba kining bataa?” Dapita ang mga bata sa pagsulti sa tubag uban kanimo. Tagoi ang mga larawan sa imong luyo pag-usab ug balika ang kalihokan kon ganahan pa ang mga bata. Kini nga kalihokan angay alang sa mas dagko nga mga bata.

Pagkolor

Pakolori sa mga bata ang kopya sa larawan sa pahina 111. Samtang ang mga bata nagkolor, ribyuha ang mga baruganan nga gitudlo sa leksyon. Itudlo ang mga detalye diha sa mga litrato, basaha ang mga kapsyon ngadto sa mga bata, ug ipasabut ngadto kanila unsay ilang gikoloran.

Mga Tip sa Pagtudlo

Paghimo og mga kopya: Kon ikaw walay magamit nga copy machine, mahimo nimong butangan og palid sa papel ibabaw sa larawan ug palut-an kini ginamit ang lapis o ball pen. Ayaw kabalaka nga dili malut-an ang tanang detalye, palut-i lamang ang nalatid ug igong detalye aron sa pag-ila sa mga larawan.

Pagkolor: “Awhaga [ang mga bata] sa pagpakita sa ilang mga litrato ngadto sa ilang mga pamilya. Makatabang kini kanila nga mahinumdom unsay ilang nakat-unan. Makahatag usab kini og kahigayunan sa paghisgot sa mga baruganan sa ebanghelyo uban sa ilang mga anak” (Pagtudlo, Walay Labaw ka Mahinungdanon nga Tawag, 167).