Mosaya 11–17

Abinadai naMambo Noa

Shoko kubva kumuporofita

Mambo Noa anonongedzera apo vapirisita vaviri vakamira kumashure

Mambo Noa aitonga pamusoro pevaNifai vaigara munyika yaNifai. Noa akaita kuti vanhu vake vamupe mari yakawanda uye zvino akaishandisa kuzvitengera zvinhu zvakanaka zvake pachake. Akadaidza vapirisita avo aiva norudado kuti vamubatsire kutonga. Noa haana kuchengeta mirairo yaMwari. Panokudaro, akaita zvinhu zvakaipa zvakawanda.

Mosaya 11:1–13

Mambo Noa

Noa akatungamira vanhu vake kuti vave vakaipawo. Vakanga vasingateveri Ishe.

Mosaya 11:7, 11, 14–15, 19

Abinadai anotarisa vanhu vachiita zvinhu zvakaipa

Muporofita waMwari ainzi Abinadai aigara munyika. Ishe vakatumira Abinadai kunoudza Noa nevanhu vake kuti vatendeuke.

Mosaya 11:20

Abinadai anotaura kuvanhu

Abinadai akaudza vanhu ava kuti Ishe vaida kuti vatendeuke. Kana vakasatendeuka, Ishe vaizorega vavengi vavo vachiuya kunyika yavo uye vagotonga pamusoro pavo. Vavengi vavo vaizoita kuti upenyu hwaNoa nevanhu vake huve hwakaoma zvikuru.

Mosaya 11:20–25

Vanhu vakashatirwa

Vanhu vakashatirirwa Abinadai nokuda kwezvaakataura. Vaida kumuuraya, asi Mwari vakachengetedza Abinadai uye vakamubatsira kupukunyuka.

Mosaya 11:26

Mambo Noa anoisa maoko pamwechete uye otaura kuvapirisita

Noa aidawo kuuraya Abinadai. Noa akanga asina rutendo muna Ishe. Iye nevanhu vake havana kutendeuka.

Mosaya 11:27–29

Abinadai anobata mahwendefa uye anotaura kumhuri

Mushure memakore maviri, Ishe vakatuma Abinadai kuti adzokere kunoyambira vanhu. Abinadai akaudza vanhu kuti vavengi vavo vaizotora nyika nokuda kwokuti ivo vakanga vasina kutendeuka. Vanhu vakatsamwira Abinadai. Vakati hapana chakaipa chavakanga vaita uye vaisazotendeuka. Vakasunga Abinadai uye vakaenda naye kuna Noa.

Mosaya 12:1–16

Abinadai anopfugama akafuratira Mambo Noa

Noa nevapirisita vake vakaronga zano. Vapirisita vakaedza kunyengedza Abinadai kuburikidza nokumubvunza mibvunzo yakawanda. Asi Abinadai akavapindura neushingi. Vapirisita vakashamiswa nemhinduro dzaAbinadai. Vaiva vasingakwanisi kumunyengedza. Abinadai akaudza vapirisita kuti vaida mari kupfuura kuita zvakanaka.

Mosaya 12:17–37

Abinadai anomira uye achipenya

Noa akataurira vapirisita vake kuti vauraye Abinadai. Asi Abinadai akavayambira kuti vasamubata. Chiso chake chaipenya nesimba raMwari. Abinadai akati vapirisita vakanga vasina kudzidzisa shoko raMwari. Abinadai akavadzidzisa kuti Jesu Kristu aizozvarwa, otifira, uye ozomuka kuvakafa. Akati Jesu aizovaregerera kana vakatendeuka.

Mosaya 13; 16:6–15

Abinadai akatarisa kuna Mambo Noa

Abinadai akapedza shoko iro Ishe ravakamutuma kuti ape. Noa akanga achakashatirwa. Akaudza vapirisita vake kuti vatore Abinadai uye vamuuraye.

Mosaya 17:1

Mambo Noa anotarisa kuna Abinadai apo Aruma arikufunga uye vamwe vapirisita vakashatirwa

Mumwe mupirisita, Aruma, akatenda zvaitaurwa naAbinadai. Aruma akaedza kuponesa Abinadai. Asi Noa akatsamwirawo Aruma uye akamumanikidza kuti abve.

Mosaya 17:2–3

Aruma anovanda kubva kune vapirisita vakaipa

Vapirisita vakaudza Abinadai kuti aikwanisa kurarama kana akati izvo zvaakadzidzisa zvaiva zvisiri zvechokwadi. Asi Abinadai akati akanga adzidzisa chokwadi. Noa nevapirisita ake vakatsamwa zvekare. Vakauraya Abinadai nemoto. Varindi vaNoa vakaedzawo kuuraya Aruma. Asi Aruma akavanda uye akanyora pasi mashoko ose aAbinadai.

Mosaya 17:3–13, 20