Mosaya 19–22

Mambo Noa naMambo Rimuhai

Kupukunyuka kubva kuvaRamani

Mambo Noa aitonga boka revaNifai. Akaita zvinhu zvakaipa zvakawanda, uye vamwe vanhu vakanga vakamutsamwira. Murume ainzi Gideoni akarwa naNoa nemunondo. Noa akatiza uye akakwira mushongwe. Ari mushongwe, akaona mauto evaRamani achiuya. Noa akanyepedzera kuti aitya vanhu vake, saka Gideoni akamusiya ari mupenyu.

Mosaya 11:1–2; 19:2–8

Noa navanhu vake vanotiza. Asi vaRamani vakavatandanisa uye vakatanga kuvarwisa. Noa akataurira varume kuti vasiye mhuri dzavo uye vaende naye.

Mosaya 19:9–11

Vamwe varume vakaenda naNoa. Asi vazhinji vevarume ava vakasarudza kusara nemhuri dzavo. Mwanakomana waNoa, Rimuhai akasarudzawo kusara.

Mosaya 19:12, 16–17

Vanasikana vazhinji vakamira pamberi pemauto uye vakakumbira vaRamani kuti vasakuvadze mhuri dzavo. VaRamani vakateerera vanasikana ava uye vakasiya vaNifai vari vapenyu. Panzvimbo pazvo, vaRamani vakatapa vaNifai.

Mosaya 19:13–15

Varume avo vakanga vatiza vaida kudzokera kumhuri dzavo. Noa akaedza kuvamisa, saka varume ava vakamuuraya. Zvino vakazodzokera kumhuri dzavo.

Mosaya 19:18–22

Varume vakafara zvikuru kuti mhuri dzavo dzaiva dzakachengetedzeka. Vakataurira Gideoni zvakanga zvaitika kuna Noa.

Mosaya 19:22–24

Vanhu vakasarudza Rimuhai kuti ave mambo wavo mutsva. Rimuhai akavimbisa mambo wevaRamani kuti vaizobhadhara vaRamani hafu yezvose zvavaiva nazvo. Mukudzorera, mambo wevaRamani akavimbisa kuti aisazokuvadza vanhu vaRimuhai.

Mosaya 19:25–27

Vakagara murunyararo kwemakore akati wandei. Zvino vaRamani vakatanga kubata vanhu vaRimuhai zvakaipa. Vanhu vaida kuti vasununguke zvakare. Vakaedza kurwisa vaRamani, asi vakakundwa. Vanhu vakanamatira rubatsiro kuna Mwari.

Mosaya 19:29; 21:1–15

Rimwe zuva, muNifai ainzi Amoni akashanyira Rimuhai navanhu vake. Amoni aibva kunyika yainzi Zarahemura. Rimuhai akafara kuona Amoni.

Mosaya 21:22–24

Amoni aikwanisa kutungamira vanhu vaRimuhai kuZarahemura, asi vaifanira kutanga vapukunyuka kubva kuvaRamani. Gideoni akanga anezano.

Mosaya 21:36; 22:1–9, 11

Munguva yeusiku, Gideoni akapa varindi vechiRamani waini yakawanda kuti vakotsire. Apo varindi pavainge vakarara, Rimuhai navanhu vake vose vakatiza kubva muguta.

Mosaya 22:7, 10–12

Vakaenda kuZarahemura uye vakabatana nevaNifai ikoko. Rimuhai navanhu vake vakadzidza zvimwe zvizhinji pamusoro paMwari. Vakaita chibvumirano, kana kuti chivimbiso chakakosha, kushandira Mwari uye nokuchengetedza mirairo Yavo. Vakabhabhatidzwa uye vakava nhengo dzeChechi yaMwari. Vakarangarira kuti Mwari vakavabatsira kuti vatize kubva kuvaRamani.

Mosaya 21:32–35; 22:13–14; 25:16–18