មេរៀនទី ៤ ៖ ព្រះគម្ពីរមរមន—ជាមូលដា្ឋននៃសាសនារបស់យើង

មេរៀនទី ៤

ព្រះគម្ពីរមរមន—ជាមូលដា្ឋននៃសាសនារបស់យើង

សេចក្តីផ្តើម

ព្រះគម្ពីរមរមនគឺជាមូលដា្ឋននៃសាសនារបស់យើង ហើយជាភស្តុតាងថាព្រះបានស្តារដំណឹងល្អរបស់ព្រះយេស៊ូវគ្រីស្ទមកកាន់ផែនដីនៅជំនាន់របស់យើងនេះ ។ ប្រធាន អ៊ែសរ៉ា ថាហ្វ ប៊ែនសឹន ( ឆ្នាំ ១៨៩៩–១៩៩៤ ) បានបង្រៀន ៖ ព្រះគម្ពីរមរមន « គឺជាមូលដ្ឋាននៃទីបន្ទាល់របស់យើងអំពីព្រះគ្រីស្ទ ។ វាគឺជាមូលដ្ឋាននៃគោលលទ្ធិរបស់យើង ។ វាជាមូលដ្ឋាននៃទីបន្ទាល់របស់យើង » (« The Book of Mormon—Keystone of Our Religion » Ensign, ខែ វិច្ឆិកា ឆ្នាំ ១៩៨៦ ទំព័រ ៥ ) ។ នៅពេលសិស្សមានទីបន្ទាល់កាន់តែជ្រៅជ្រះអំពីព្រះគម្ពីរមរមន នោះពួកគេអាចក្លាយជារឹងមាំទប់ទល់នឹងអស់អ្នកដែលព្យាយាមបង្ហាញថា ភាពពិតរបស់វានោះ គឺខុស ។

ការអានពីសាវតា

អ៊ែសរ៉ា ថាហ្វ ប៊ែនសឹន « The Book of Mormon—Keystone of Our Religion » Ensign, ខែ វិច្ឆិកា ឆ្នាំ ១៩៨៦ ទំព័រ ៤–៧ ។
ជែហ្វ្រី អ័រ ហូឡិន « សុវត្ថិភាពសម្រាប់ព្រលឹង » Ensign ឬ Liahona, ខែ វិច្ឆិកា ឆ្នាំ ២០០៩ ទំព័រ ៨៨–៩០ ។
« ព្រះគម្ពីរមរមន និង ការសិក្សា ឌី អិន អេ » ប្រធានបទដំណឹងល្អ lds.org/topics ។

យោបល់សម្រាប់ការបង្រៀន

គោលលទ្ធិ និង សេចក្តីសញ្ញា ១៧:៦; ១៩:២៦; ២០:៥–១២

ព្រះគម្ពីរមរមនគឺជាភស្តុតាងថាព្រះបានស្តារសេចក្តីពិតឡើងវិញនៅជំនាន់របស់យើងនេះ

មុនចាប់ផ្ដើមថ្នាក់ សូមសរសេរកាលបរិច្ឆេទ និង ព្រឹត្តិការណ៍នានានៅលើ ក្តារខៀន ។

ឆ្នាំ ១៨២០ បានទទួលទស្សនៈនិមិត្តដំបូង

ឆ្នាំ ១៨២៣ ទស្សនកិច្ចរបស់មរ៉ូណៃបានចាប់ផ្តើម

ឆ្នាំ ១៨២៩ បព្វជិតភាពបានស្តារឡើងវិញ

ខែ មិថុនា ឆ្នាំ១៨២៩ ព្រះគម្ពីរមរមនបានបកប្រែចប់សព្វគ្រប់

ថ្ងៃទី ៦ ខែ មេសា ឆ្នាំ ១៨៣០ សាសនាចក្របានរៀបចំឡើង

តើយើងអាចរៀនអ្វីខ្លះពីលំដាប់លំដោយនៃព្រឹត្តិការណ៍ទាំងនេះអំពីតួនាទីនៃព្រះគម្ពីរមរមននៅក្នុងការស្តារដំណឹងល្អឡើងវិញ ? ( ព្រះគម្ពីរមរមនត្រូវបានបកប្រែចប់សព្វគ្រប់ពីមុនសាសនាចក្រត្រូវបានស្តារឡើងវិញ ។ វានឹងដើរតួយ៉ាងសំខាន់នៅក្នុងការផ្សព្វផ្សាយដំណឹងល្អ ) ។

សូមពន្យល់ថា នៅពេលសាសនាចក្រត្រូវបានរៀបចំឡើងនៅខែមេសា ឆ្នាំ ១៨៣០ នោះព្រះគម្ពីរមរមនទើបតែបានបោះពុម្ពរួច ហើយព្រះគម្ពីរត្រូវបានផ្សព្វផ្សាយសម្រាប់លក់ពីមុននោះពីរសប្តាហ៍ ។ សូមឲ្យសិស្សអាន គោលលទ្ធិ និង សេចក្ដីសញ្ញា ២០:៨-១២ ដោយស្ងាត់ស្ងៀម រកមើលថាព្រះគម្ពីរមរមនមានអ្វីខ្លះ ហើយព្រះគម្ពីរមរមនបង្ហាញភស្តុតាងអ្វីខ្លះ ។ អ្នកអាចផ្ដល់យោបល់ថា សិស្សគួរគូសចំណាំនូវអ្វីដែលពួកគេរកឃើញ ។ (កំណត់ចំណាំ ៖ តាមរយៈវគ្គសិក្សានេះ អ្នកអាចលើកទឹកចិត្តសិស្សឲ្យគូសចំណាំសេចក្តីពិតសំខាន់ៗនៅក្នុងព្រះគម្ពីររបស់ពួកគេ ) ។ នៅពេលសិស្សកំពុងអាន សូមសរសេរប្រយោគមិនពេញលេញនេះនៅលើ ក្តារខៀន ៖

ព្រះគម្ពីរមរមនបង្ហាញភស្ដុតាងទៅកាន់ពិភពលោកថា …

បន្ទាប់ពីទុកពេលគ្រប់គ្រាន់ហើយនោះ សូមសួរសិស្សនូវសំណួរខាងក្រោមនេះ ៖

ផ្អែកលើអ្វីដែលអ្នកបានអាន តើអ្នកនឹងបញ្ចប់សេចក្ដីថ្លែងការណ៍នៅលើក្ដារខៀនយ៉ាងដូចម្តេច ? ( សិស្សអាចនឹងប្រើ ពាក្យផ្សេងៗគ្នា ប៉ុន្តែត្រូវប្រាកដថា ពួកគេរកឃើញសេចក្តីពិតដូចខាងក្រោមនេះ ៖ ព្រះគម្ពីរមរមនបង្ហាញភស្តុតាងដល់ពិភពលោកថា ព្រះគម្ពីរនេះពិត ថាព្រះបំផុសគំនិត និង ហៅមនុស្សដើម្បីធ្វើកិច្ចការរបស់ទ្រង់នៅជំនាន់របស់យើងនេះ ហើយថាព្រះមិនប្រែប្រួលឡើយ) ។
តើព្រះគម្ពីរមរមនបង្ហាញភស្តុតាងថា ព្រះបំផុសគំនិត និង ហៅមនុស្សដើម្បីធ្វើកិច្ចការរបស់ទ្រង់នៅជំនាន់របស់យើងនេះដោយរបៀបណា ?
នៅពេលមនុស្សម្នាក់បានដឹងថាព្រះគម្ពីរមរមនពិត តើចំណេះដឹងអ្វីដែលគាត់បានទទួលអំពីព្យាការីយ៉ូសែប ស្ម៊ីធ ?

សូមឲ្យសិស្សអាន គោលលទ្ធិ និង សេចក្តីសញ្ញា ១៧:៦ និង ១៩:២៦ ដោយស្ងាត់ស្ងៀម រកមើលអ្វីដែលខគម្ពីរទាំងពីរនេះមានចំណុចរួមមួយ ។

តើខគម្ពីរទាំងពីរនេះមានចំណុចរួមអ្វី ? ( ការប្រកាសរបស់ព្រះអម្ចាស់ពីសេចក្តីពិតដ៏ពេញលេញនៃព្រះគម្ពីរមរមន ) ។
តើវាមានតម្លៃអ្វីចំពោះអ្នកដើម្បីដឹងថា ព្រះអម្ចាស់ប្រកាសពីទីបន្ទាល់របស់ទ្រង់អំពីសេចក្តីពិតដ៏ពេញលេញនៃព្រះគម្ពីរមរមន ?

ព្រះគម្ពីរមរមន គឺជាមូលដ្ឋាននៃសាសនារបស់យើង ។

សូមសរសេរសេចក្តីពិតដូចខាងក្រោមនេះនៅលើក្តារខៀន ៖ ព្រះគម្ពីរមរមនគឺជាមូលដ្ឋាននៃសាសនារបស់យើង ។

តើអ្នកគិតថា សេចក្ដីថ្លែងការណ៍នេះមានន័យយ៉ាងណា ?

សូមបង្ហាញនូវសេចក្ដីថ្លែងការណ៍ខាងក្រោមដោយប្រធាន អ៊ែសរ៉ា ថាហ្វ ប៊ែនសឹន ( ឆ្នាំ ១៨៩៩–១៩៩៤ ) ហើយសូមឲ្យសិស្សម្នាក់អានវាឮៗ ៖

« មានរបៀបបីយ៉ាងដែលព្រះគម្ពីរមរមន គឺជាមូលដ្ឋាននៃសាសនាចក្ររបស់យើង ។ វាគឺជាមូលដ្ឋាននៃទីបន្ទាល់របស់យើងអំពីព្រះគ្រីស្ទ ។ វាគឺជាមូលដ្ឋាននៃគោលលទ្ធិរបស់យើង ។ វាជាមូលដ្ឋាននៃទីបន្ទាល់របស់យើង » (« The Book of Mormon—Keystone of Our Religion » Ensign, ខែ វិច្ឆិកា ឆ្នាំ ១៩៨៦ ទំព័រ ៥ ) ។

សូមបែងចែកសិស្សទាំងឡាយជាក្រុមតូចៗ ។ សូមចាត់តាំងក្រុមនិមួយៗពិភាក្សាពីប្រធានបទមួយដូចខាងក្រោមនេះ ៖របៀបដែលព្រះគម្ពីរមរមនគឺជា « មូលដ្ឋាននៅក្នុងទីបន្ទាល់របស់យើងអំពីព្រះគ្រីស្ទ » របៀបដែលវាជា « មូលដ្ឋាននៃគោលលទ្ធិរបស់យើង » ឬ របៀបដែលវាគឺជា « មូលដ្ឋាននៃទីបន្ទាល់ » ។ ( អ្នកអាចចង់ចាត់តាំងប្រធានបទនិមួយៗទៅឲ្យច្រើនជាងមួយក្រុម ) ។ សូមផ្តល់ ក្រដាសចែក ខាងក្រោមឲ្យក្រុមនិមួយៗ ហើយសុំពួកគេឲ្យប្រើប្រាស់សេចក្តីថ្លែងការណ៍ដែលត្រូវគ្នានឹងប្រធានបទនៅក្នុងការពិភាក្សារបស់ពួកគេ ។

ព្រះគម្ពីរមរមន—ជាមូលដា្ឋននៃសាសនារបស់យើង

មូលដ្ឋានគ្រឹះនៃការស្តារឡើងវិញ—មេរៀនទី ៤

« មូលដ្ឋាននៅក្នុងទីបន្ទាល់របស់យើងអំពីព្រះគ្រីស្ទ »

« ព្រះគម្ពីរមរមន គឺជាមូលដ្ឋាននៅក្នុងទីបន្ទាល់របស់យើងអំពីព្រះយេស៊ូវគ្រីស្ទ ដែលទ្រង់ផ្ទាល់ជាថ្មជ្រុងយ៉ាងឯកចំពោះអ្វីទាំងអស់ដែលយើងធ្វើ វាមាននូវសាក្សីអំពីភាពពិតរបស់ទ្រង់ ។ …ទីបន្ទាល់របស់ព្រះគម្ពីរនេះអំពីព្រះអម្ចាស់មានភាពច្បាស់លាស់ បរិសុទ្ធ និង ពេញដោយអំណាច ។ …ពួកគ្រិស្តសាសនិកជាច្រើននៅក្នុងពិភពលោកសព្វថ្ងៃនេះ បដិសេធទេវភាពនៃព្រះអង្គសង្គ្រោះ ។ ពួកគេសង្ស័យពីកំណើតដ៏អព្ភូតហេតុរបស់ទ្រង់ ជីវិតរស់នៅដ៏ល្អឥតខ្ចោះ និង ភាពពិតប្រាកដនៃការមានព្រះជន្មរស់ឡើងវិញដ៏រុងរឿងរបស់ទ្រង់ ។ ព្រះគម្ពីរមរមនបង្រៀនក្នុងលក្ខខណ្ទច្បាស់លាស់ និង គ្មានកំហុសអំពីសេចក្តីពិតនៃគ្រប់ការណ៍នោះទាំងអស់ ។ វាក៏ផ្តល់ការពន្យល់ដ៏ពេញលេញបំផុតអំពីគោលលទ្ធិនៃដង្វាយធួន » ( អ៊ែសរ៉ា ថាហ្វ ប៊ែនសឹន « The Book of Mormon—Keystone of Our Religion » Ensign, ខែ វិច្ឆិកា ឆ្នាំ ១៩៨៦ ទំព័រ ៥ ) ។

« មូលដ្ឋាននៃគោលលទ្ធិរបស់យើង »

« ក្នុងព្រះគម្ពីរមរមន យើងនឹងរកឃើញភាពពេញលេញនៃគោលលទ្ធិទាំងនោះ ដែលបានតម្រូវសម្រាប់សេចក្តីសង្រ្គោះរបស់យើង ។ ហើយវាត្រូវបានបង្រៀនយ៉ាងច្បាស់ និង សាមញ្ញម្ល៉ោះហើយសូម្បីតែកូនក្មេងក៏អាចរៀនពីរបៀបទាំងឡាយនៃសេចក្តីសង្គ្រោះ និង ភាពលើកតម្កើងបានដែរ ។ ព្រះគម្ពីរមរមន ពង្រីកនូវការចេះដឹងរបស់យើងយ៉ាងច្រើនពីគោលលទ្ធិនៃសេចក្តីសង្គ្រោះ ។ បើគ្មានព្រះគម្ពីរមរមនទេ ភាគច្រើនអ្វីដែលបានបង្រៀននៅក្នុងព្រះគម្ពីរផ្សេងទៀតគឺពុំជាក់ច្បាស់ និង គ្មានតម្លៃឡើយ » ( អ៊ែសរ៉ា ថាហ្វ ប៊ែនសឹន « The Book of Mormon—Keystone of Our Religion » Ensign, ខែ វិច្ឆិកា ឆ្នាំ ១៩៨៦ ទំព័រ ៦ ) ។

« មូលដ្ឋាននៃទីបន្ទាល់ »

« ព្រះគម្ពីរមរមនគឺជាមូលដ្ឋាននៃទីបន្ទាល់ ។ ក៏ដូចជាកំណោងទ្វារបាក់ស្រុតនៅពេលសិលាគន្លឹះត្រូវបានដកចេញ ក៏ដូចគ្នានឹងការឈរឡើង ឬ ការធ្លាក់ចុះរបស់សាសនាចក្រដែរ គឺវាអាស្រ័យលើភាពពេញលេញនៃព្រះគម្ពីរមរមនយ៉ាងនោះដែរ ។ … បើសិនព្រះគម្ពីរមរមនពិត…នោះបុគ្គលម្នាក់ត្រូវតែទទួលការប្រកាសអំពីការស្តារឡើងវិញ និង អ្វីៗទាំងអស់ដែលមានមកជាមួយវាផងដែរ » ( អ៊ែសរ៉ា ថាហ្វ ប៊ែនសឹន « The Book of Mormon—Keystone of Our Religion » Ensign, ខែវិច្ឆិកា ឆ្នាំ ១៩៨៦ ទំព័រ ៦ ) ។

បន្ទាប់ពីទុកពេលគ្រប់គ្រាន់ហើយនោះ សូមឲ្យក្រុមចែកចាយដល់សិស្សក្នុងថ្នាក់នូវអ្វីដែលពួកគេបានពិភាក្សា ។

សូមបញ្ចប់ផ្នែកនៃមេរៀននេះដោយសូមឲ្យសិស្សចែកចាយអារម្មណ៍ដែលពួកគេមានអំពីព្រះគម្ពីរមរមន និង ចែកចាយពីរបៀបដែលព្រះគម្ពីរនេះគឺជាមូលដ្ឋាននៃទីបន្ទាល់របស់ពួកគេ ។

សត្រូវព្យាយាមបង្ខូចព្រះគម្ពីរមរមន

សូមឲ្យសិស្សម្នាក់អានសេចក្ដីថ្លែងការណ៍ខាងក្រោមនេះឮៗដោយអែលឌើរ ជែហ្វ្រី អ័រ ហូឡិន នៃកូរ៉ុមនៃពួកសាវកដប់ពីរនាក់ ៖

« អស់ពេលជាច្រើនឆ្នាំ [ ជាង ១៨០ ឆ្នាំ ] ព្រះគម្ពីរនេះត្រូវបានពិនិត្យមើល ហើយវាយប្រហារ បដិសេធ និង បំផ្លាញ ជាផ្ទាំងស៊ីប និង ហែកកំទេចដែលពុំដូចជាព្រះគម្ពីរដទៃទៀតឡើយនៅក្នុងប្រវត្តិសាស្ត្រសាសនាសម័យទំនើបនេះ—ប្រហែលជាពុំដូចជាព្រះគម្ពីរដទៃទៀតនៅប្រវត្តិសាស្ត្រសាសនា ណាមួយ ឡើយ ។ ហើយវានៅតែឈរយ៉ាងរឹងមាំ ។ ទ្រឹស្តីខុសឆ្គងអំពីប្រភពរបស់វាបានកើតឡើង ហើយត្រាប់តាម ហើយក៏រលុតបាត់ទៅ—ចាប់តាំងពី អ៊ីថាន ស្ម៊ីធ រហូតដល់ សូឡូម៉ូន ស្ប៉ៅដ្លីង ដែលជាអ្នកនិពន្ធដែលឆ្កួតលីលា និង មានទេពកោសល្យដែលពោរពេញដោយល្បិចកលដ៏ប៉ិនប្រសប់ ។ គ្មានចម្លើយណាមួយនៃចម្លើយដ៏គួរឲ្យរំភើបទាំងនេះ សម្រាប់គម្ពីរនេះ ដែលឆ្លងកាត់ផុតការត្រួតពិនិត្យនោះទេ ព្រោះ គ្មានចម្លើយណាផ្សេងទៀត ជាជាងចម្លើយដែលយ៉ូសែប បានផ្ដល់ឲ្យក្នុងនាមជាអ្នកបកប្រែក្មេងខ្ចីដែលគ្មានការអប់រំនោះទេ ។ ក្នុងការណ៍នេះខ្ញុំសូមឈរជាមួយជីតាទួតរបស់ខ្ញុំដែលបានមានប្រសាសន៍តែប៉ុណ្ណេះថា ‹ គ្មានមនុស្សទុច្ចរិតណាអាចសរសេរសៀវភៅដូចនេះបានឡើយ ហើយក៏ពុំមានមនុស្សសុចរិតនឹងសរសេរវាដែរ លុះត្រាណាតែវាជាការពិត ហើយគាត់ត្រូវបានបញ្ជាដោយព្រះឲ្យធ្វើដូច្នោះ › » (“Safety for the Soul,” Ensign ឬ Liahona, ខែ វិច្ឆិកា ឆ្នាំ ២០០៩ ទំព័រ ៨៩ ) ។

ហេតុអ្វីបានជាវាសំខាន់ដើម្បីចាំថាពួកមារសត្រូវសម័យទំនើបនៃសាសនាចក្រតែងតែព្យាយាមមិនឲ្យតម្លៃលើព្រះគម្ពីរមរមន ?
តើសេចក្តីថ្លែងការណ៍ដោយជីតាទួតរបស់អែលឌើរ ហូឡិនគាំទ្រសេចក្តីពិតដ៏ពេញលេញនៃព្រះគម្ពីរមរមនយ៉ាងដូចម្តេចដែរ ?

ជាឧទាហរណ៍អ្នកអាចចង់ពន្យល់ថារបៀបមួយដែលមារសត្រូវបច្ចុប្បន្ននៃសាសនាចក្រព្យាយាមមិនផ្តល់តម្លៃដល់ព្រះគម្ពីរមរមននោះគឺតាមរយៈការប្រើប្រាស់ភស្តុតាងឌី.អិន.អេ ដើម្បីព្យាយាមមិនផ្តល់តម្លៃដល់តំណរវាងមនុស្សក្នុងព្រះគម្ពីរមរមន និង ប្រជាជនអាមេរិកកាំងដើម ។ បើសិនសិស្សមានសំណួរអំពីបញ្ហានេះ សូមលើកទឹកចិត្តពួកគេឲ្យអានអត្ថបទប្រធានបទដំណឹងល្អ « ព្រះគម្ពីរមរមន និង ការសិក្សាឌី.អិន.អេ. » ដែលអាចរកបាននៅគេហទំព័រ lds.org/topics ។

សូមតោងជាប់នូវអ្វីដែលអ្នកដឹងថាវាពិត

សូមឲ្យសិស្សនឹកគិតថា មិត្តម្នាក់បាននិយាយថាគាត់បានឮអ្វីមួយដែលហាក់ដូចជាផ្ទុយនឹងភាពពិតពេញលេញនៃព្រះគម្ពីរមរមន ។

តើអ្នកនឹងផ្តល់យោបល់អ្វីខ្លះទៅកាន់មិត្តភក្តិរបស់អ្នកនោះ ?
តើទីបន្ទាល់របស់អ្នកដែលថាព្រះគម្ពីរមរមនពិតអាចជួយអ្នក នៅពេលអ្នកត្រូវបានប្រឈមមុខដោយការរិះគន់អំពីព្រះគម្ពីរមរមនដោយរបៀបណា ?

« ក្នុងវេលា…នៃការភ័យខ្លាច ឬការសង្ស័យ ឬពេលដែលមានបញ្ហា សូមកាន់ខ្ជាប់ទៅនឹងទីតាំងដែលអ្នកបានឈ្នះរួចហើយ បើទោះបីជាទីតាំងនោះមានកំណត់ក្ដី ។ …ពេលគ្រាទាំងនោះមកដល់ ហើយបញ្ហាបញ្ចេញនៅផ្ទៃខាងលើ ដំណោះស្រាយមិនកើតភ្លាមទេ សូមកាន់ខ្ជាប់ទៅនឹងអ្វីដែលអ្នកបានដឹងរួចហើយ ហើយឈរយ៉ាងរឹងមាំ រហូតដល់ចំណេះដឹងបន្ថែមទៀតមកដល់» (« ខ្ញុំជឿហើយ លោកម្ចាស់អើយ » Ensign ឬ Liahona, ខែ ឧសភា ឆ្នាំ ២០១៣ ទំព័រ៩៣–៩៤ ) ។

តើអ្នកអាចអនុវត្តសេចក្តីថ្លែងការណ៍របស់ អែលឌើរ ហូឡិនយ៉ាងដូចម្តេចនៅពេលអ្នកប្រឈមមុខនឹងសំណួរអំពីការទទួលស្គាល់ព្រះគម្ពីរមរមននោះ ? ( សិស្សអាចផ្តល់ចម្លើយផ្សេងៗគ្នា ប៉ុន្តែអ្នកអាចចង់គូសបញ្ជាក់គោលការណ៍ដូចខាងក្រោមនេះ ៖ នៅពេលយើងប្រឈមមុខនឹងសំណួរ ឬ ការសង្ស័យអំពីដំណឹងល្អ នោះយើងគួរតែតោងជាប់ទៅនឹងអ្វីដែលយើងដឹងថាវាពិត ហើយទុកចិត្តថាយើងអាចស្វែងរកចម្លើយតាមរយៈការសិក្សាបន្ថែមទៀតនៅពេលខាងមុខ) ។
តើសេចក្តីពិតអ្វីខ្លះដែលអ្នកបានដឹងអំពីព្រះគម្ពីរមរមន និង គោលការណ៍ដែលវាមាននោះ ? តើអ្នកអាចទទួលបានចំណេះដឹងនោះយ៉ាងដូចម្តេច ?

សូមបញ្ចប់មេរៀនដោយបង្ហាញសេចក្ដីថ្លែងការណ៍ខាងក្រោមដោយប្រធាន អ៊ែសរ៉ា ថាហ្វ ប៊ែនសឹន ហើយសូមឲ្យសិស្សម្នាក់អានវាឮៗ ៖

« ពួកបរិសុទ្ធថ្ងៃចុងក្រោយគ្រប់រូបគួរតែធ្វើការសិក្សាព្រះគម្ពីរមរមនពេញមួយជីវិតខ្លួន ។ បើមិនដូច្នោះទេ គេកំពុងតែដាក់ព្រលឹងខ្លួនក្នុងគ្រោះថ្នាក់ និង ការធ្វេសប្រហែសដែលអាចផ្តល់ភាពរួមគ្នាខាងវិញ្ញាណ និង បញ្ញាពេញមួយជីវិតរបស់ខ្លួនទាំងមូល ។ មានភាពខុសគ្នារវាងអ្នកប្រែចិត្តជឿដែលសាងសង់លើថ្មនៃព្រះគ្រីស្ទ តាមរយៈព្រះគម្ពីរមរមន ហើយកាន់ខ្ជាប់ដំបងដែកនោះ និង អ្នកដែលមិនបានធ្វើដូចនោះ » (« The Book of Mormon Is the Word of God » Ensign, ខែ មករា ឆ្នាំ ១៩៨៨ ទំព័រ ៥ ) ។

តើការសិក្សាព្រះគម្ពីរមរមនជាទៀងទាត់ បានការពារអ្នកទាស់នឹងអស់អ្នកដែលចង់បំផ្លាញសេចក្តីជំនឿរបស់អ្នកដោយរបៀបណា ?

សូមថ្លែងទីបន្ទាល់ពីសេចក្តីពិតដ៏ពេញលេញនៃព្រះគម្ពីរមរមន ។ សូមឲ្យសិស្សពិចារណាពីរបៀបដែលព្រះគម្ពីរមរមន បានមានឥទ្ធិពលនៅក្នុងជីវិតរបស់ពួកគេ ។ សូមឲ្យពួកគេគិតអំពីអ្វីដែលពួកគេអាចធ្វើ ដើម្បីផ្តល់អាទិភាពកាន់តែច្រើនឡើងដើម្បីសិក្សាព្រះគម្ពីរមរមន ។ សូមរំឭកសិស្សអំពីការសន្យារបស់មរ៉ូណៃដែលមាននៅក្នុង មរ៉ូណៃ ១០:៣–៥ថាអស់អ្នកដែលមានបំណងពង្រឹងទីបន្ទាល់របស់ពួកគេអំពីព្រះគម្ពីរមរមនអាចធ្វើដូច្នោះបានតាមរយៈការសិក្សាព្រះគម្ពីរ និង អធិស្ឋានអំពីភាពពិតដ៏ពេញលេញរបស់វា ។

ការអានរបស់សិស្ស

គោលលទ្ធិ និង សេចក្តីសញ្ញា ១៧:៦; ១៩:២៦; ២០:៥–១២ ។
ជែហ្វ្រី អ័រ ហូឡិន « សុវត្ថិភាពសម្រាប់ព្រលឹង » Ensign ឬ Liahona, ខែ វិច្ឆិកា ឆ្នាំ ២០០៩ ទំព័រ ៨៨–៩០ ។