ការស្តារបព្វជិតភាពឡើងវិញ

សេចក្តីផ្តើម

នៅថ្ងៃទី ១៥ ខែ ឧសភា ឆ្នាំ ១៨២៩ យ៉ូហាន បាទីស្ទ បានបង្ហាញខ្លួនដល់ព្យាការី យ៉ូសែប ស៊្មីធ និង អូលីវើរ ខៅឌើរី ហើយបានស្តារបព្វជិតភាពអើរ៉ុនឡើងវិញ ។ មិនយូរប៉ុន្មានក្រោយមក សាវកពីបុរាណ ពេត្រុស យ៉ាកុប និង យ៉ូហាន បានបង្ហាញខ្លួនដល់ យ៉ូសែប ស្ម៊ីធ និង អូលីវើ ខៅឌើរី ហើយបានស្តារបព្វជិតភាពមិលគីស្សាដែកឡើងវិញ ។ បព្វជិតភាពមិលគីស្សាដែកកាន់សិទ្ធិអំណាចលើតំណែងនានានៅក្នុងសាសនាចក្រ ហើយបម្រើនៅក្នុងគ្រប់អស់ទាំងកិច្ចការខាងវិញ្ញាណ ។ មេរៀននេះ នឹងជួយសិស្សឲ្យយល់ពីរបៀបដែលសាសនាចក្រដំណើរការនៅក្រោមការដឹកនាំរបស់បព្វជិតភាពមិលគីស្សាដែក ។

ការអានពីសាវតា

( ថូម៉ាស អេ. ម៉នសន « Obedience Brings Blessings » Ensign ឬ លីអាហូណា ខែ ឧសភា ឆ្នាំ ២០០៧ ទំព័រ ៥៧-៦០ ) ។
ដាល្លិន អេក អូក « The Keys and Authority of the Priesthood » Ensign ឬ Liahona, ខែ ឧសភា ឆ្នាំ ២០១៤ ទំព័រ ៤៩–៥២ ។
ឡារី ស៊ី ផតទើរ « The Restoration of the Aaronic and Melchizedek Priesthoods » Ensign, ខែ ធ្នូ ឆ្នាំ ១៩៩៦ ទំព័រ ៣០–៤៧ ។

យោបល់សម្រាប់ការបង្រៀន

យ៉ូសែប ស្ម៊ីធ—ប្រវត្តិ ១:៦៨-៧១; គោលលទ្ធិ និង សេចក្ដីសញ្ញា ១៣:១ ។

យ៉ូហាន បាទីស្ទ បានស្តារបព្វជិតភាពអើរ៉ុនឡើងវិញ

សូមបង្ហាញ រូបភាព នៃបុណ្យជ្រមុជទឹក ( សូមមើល យុវជនកំពុងត្រូវបានជ្រមុជទឹក [សៀវភៅសិល្បៈដំណឹងល្អ ( ឆ្នាំ ២០០៩ ) លេខ ១០៣ សូមមើលផងដែរគេហទំព័រ LDS.org] ) និង រូបភាពបង្ហាញពីការបម្រើសាក្រម៉ង់ ( សូមមើល កាប្រិសិទ្ធពរសាក្រាម៉ង់ [សៀវភៅសិល្បៈដំណឹងល្អ លេខ ១០៧ សូមមើលផងដែរគេហទំព័រ LDS.org] ) ។ សូមឲ្យសិស្សពិពណ៌នាពីរបៀបដែលជីវិតរបស់ពួកគេនឹងផ្លាស់ប្តូរទៅជាយ៉ាងណា បើសិនពួកគេមិនអាចទទួលបានពិធីបរិសុទ្ធដ៏ពិសិដ្ឋទាំងនេះ ។ សូមរំឭកសិស្សថា ពិធីបរិសុទ្ធទាំងនេះតំណាងឲ្យពរជ័យមួយចំនួនដែលយើងទទួលមកពីការស្តារបព្វជិតភាពអើរ៉ុនឡើងវិញ ។

សូមឲ្យសិស្សម្នាក់អាន យ៉ូសែប ស្ម៊ីធ —ប្រវត្តិ ១:៦៨ ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាម រកមើលអ្វីដែលយ៉ូសែប និងអូលីវើរ ខៅឌើរី កំពុងធ្វើ ដែលដឹកនាំពួកលោកឲ្យទូលសួរដល់ព្រះអម្ចាស់អំពីពិធីបុណ្យជ្រមុជទឹក ។ សូមឲ្យពួកគេរាយការណ៍ពីអ្វីដែលពួកគេរកឃើញ ។

សូមឲ្យសិស្សម្នាក់អាន យ៉ូសែប ស្ម៊ីធ —ប្រវត្តិ ១:៦៩ ឲ្យឮៗ ។ សូមចង្អុលបង្ហាញថា ពាក្យរបស់សារទូត ដែលជា យ៉ូហាន បាទីស្ទ ក៏បានកត់ត្រានៅក្នុង គោលលទ្ធិ និង សេចក្តីសញ្ញា ១៣ផងដែរ ។ សូមសួរសិស្ស ៖

ហេតុអ្វីបានជាវាសំខាន់សម្រាប់យ៉ូសែបស្ម៊ីធ និង អូលីវើរ ខៅឌើរី ទទួលបព្វជិតភាពមកពីសារទូតឋានសួគ៌ ? ( គ្មាននរណាម្នាក់នៅលើផែនដីនេះនៅកាលនោះ ដែលបានកាន់កូនសោនៃបព្វជិតភាពឡើយ [ សូមមើល មាត្រានៃសេចក្ដីជំនឿ ១:៥] ) ។

សូមឲ្យសិស្សអាន យ៉ូសែប ស្ម៊ីធ—ប្រវត្តិ ១:៧០–៧១ ។ សូមពន្យល់ថា ខគម្ពីរទាំងនេះបញ្ជាក់យ៉ាងច្បាស់ថា ព្យាការីយ៉ូសែបគឺជាបុគ្គលដំបូងគេដែលអនុវត្តបព្វជិតភាពនៅក្នុងសម័យកាន់កាប់ត្រួតត្រានេះ ។ មនុស្សមួយចំនួនបានឆ្ងល់ពីមូលហេតុដែលយ៉ូហាន បាទីស្ទពុំបានជ្រមុជទឹកយ៉ូសែប ស្ម៊ីធ និង អូលីវើរ ខៅឌើរី និងពីមូលហេតុដែលអ្នកទាំងពីរនេះត្រូវបានបញ្ជាឲ្យប្រគល់បព្វជិតភាពដល់គ្នាទៅវិញទៅមក ។ អ្នកអាចចង់ពន្យល់ថា ខណៈដែលវាចាំបាច់សម្រាប់ឲ្យសារទូតស្ថានសួគ៌កាន់សិទ្ធិអំណាចត្រឹមត្រូវដើម្បីស្តារសិទ្ធិអំណាចបព្វជិតភាពដល់ផែនដីឡើងវិញសម្រាប់សម័យកាន់កាប់ត្រួតត្រាថ្មីមួយ នោះនៅពេលដែលសិទ្ធិអំណាចនោះត្រូវបានស្តារឡើងវិញ ពិធីបរិសុទ្ធខាងផែនដីនានាដូចជាពិធីបុណ្យជ្រមុជទឹក និង ពិធីបញ្ជាក់ត្រូវបានធ្វើឡើងដោយរូបកាយនៃជីវិតរមែងស្លាប់ ។ លើសពីនោះទៀត ការណែនាំរបស់យ៉ូហាន បាទីស្ទថា យ៉ូសែប និង អូលីវើរ ខៅឌើរីប្រគល់បព្វជិតភាពសារជាថ្មីម្តងទៀតដល់គ្នាទៅវិញទៅមក ដាក់ « ការតែងតាំង និង ពិធីបុណ្យជ្រមុជទឹកនៅក្នុងទំនាក់ទំនងត្រឹមត្រូវ [ ឬ របៀបត្រឹមត្រូវ ] » ( យ៉ូសែប ហ៉្វីលឌីង ស៊្មីធ Doctrines of Salvation, និពន្ធដោយ.ប្រូស អ័រ ម៉ាក់ខន់ឃី វ៉ុល ៣ [ ឆ្នាំ ១៩៥៤–៥៦ ] ៣:៩១ ) ។

សូមសរសេរសំណួរខាងក្រោមនេះនៅលើ ក្តារខៀន ៖

តើបព្វជិតភាពអើរ៉ុន ជួយយើងឲ្យទទួលពរជ័យនៃដង្វាយធួនរបស់ព្រះយេស៊ូវគ្រីស្ទដោយរបៀបណា ?

សូមលើកទឹកចិត្តសិស្សឲ្យពិចារណាអំពីសំណួរនេះនៅពេលអ្នកអានសេចក្ដីថ្លែងការណ៍ខាងក្រោមដោយអែលឌើរ ដាល្លិន អេក អូក នៃកូរ៉ូមនៃពួកសាវកដប់ពីរនាក់ឮៗ ៖

« តើបព្វជិតភាពអើរ៉ុនកាន់ ‹ កូនសោការបម្រើនៃពួកទេវតា › និង នៃ ‹ ដំណឹងល្អនៃការប្រែចិត្ត និងពិធីបុណ្យជ្រមុជទឹក និងការផ្ដាច់បាប › មានន័យយ៉ាងណា ? អត្ថន័យ អាចត្រូវរកបាននៅក្នុងពិធីបរិសុទ្ធនៃពិធីបុណ្យជ្រមុជទឹក និងនៅក្នុងពិធីសាក្រាម៉ង់។ ពិធីបុណ្យជ្រមុជទឹក គឺសម្រាប់ការផ្ដាច់បាប ហើយពិធីសាក្រាម៉ង់ គឺរំឭកសេចក្ដីសញ្ញា និងពរជ័យទាំងឡាយនៃពិធីបុណ្យជ្រមុជទឹក។ ទាំងពីរ គួរតែដើរឈានមុខដោយការប្រែចិត្ត។ …

« គ្មាន [យើង] ណាម្នាក់ បានរស់នៅដោយគ្មានអំពើបាបសោះ ចាប់តាំងពីពិធីបុណ្យជ្រមុជទឹក [ របស់យើង ] ទៅនោះទេ ។ បើគ្មានការផ្ដល់នូវការលាងសម្អាតបន្ថែមខ្លះៗ ក្រោយពីពិធីបុណ្យជ្រមុជទឹកយើងទេ នោះយើងម្នាក់ៗនឹងត្រូវវង្វេងនូវរឿងខាងវិញ្ញាណមិនខាន ។ …

« យើងត្រូវបានបញ្ជាឲ្យប្រែចិត្តពីអំពើបាបរបស់យើង ហើយមករកព្រះអម្ចាស់ដោយដួងចិត្តសង្រេង និងវិញ្ញាណទន់ទាប ហើយទទួលទានសាក្រាម៉ង់ដោយការគោរពតាមសេចក្ដីសញ្ញានានានៃពិធីសាក្រាម៉ង់ ។ នៅពេលយើងរំឭកពីសេចក្ដីសញ្ញានៃពិធីបុណ្យជ្រមុជទឹករបស់យើងតាមវិធីនេះ នោះព្រះអម្ចាស់នឹងរំឭកឥទ្ធិពលនៃការលាងសម្អាតនៃពិធីបុណ្យជ្រមុជទឹករបស់យើង ។ …

« យើងពុំអាចថ្លែងបំផ្លើសពីសារៈសំខាន់នៃបព្វជិតភាពអើរ៉ុនក្នុងនេះនោះទេ ។ ជំហានសំខាន់ៗទាំងអស់នេះ មាននូវការផ្ដាច់បាប ដែលត្រូវធ្វើឡើងតាមរយៈពិធីបរិសុទ្ធនៃការសង្គ្រោះនៃពិធីបុណ្យជ្រមុជទឹក និងការរំឭកពិធីបរិសុទ្ធនៃពិធីសាក្រាម៉ង់ » (« The Aaronic Priesthood and the Sacrament » Ensign, ខែ វិច្ឆិកា ឆ្នាំ ១៩៩៨ ទំព័រ ៣៧–៣៨ ) ។

សូមឲ្យសិស្សពីរបីនាក់ចែកចាយចម្លើយរបស់ខ្លួនចំពោះសំណួរដែលបានសរសេរនៅលើក្ដារខៀន ។ សូមថ្លែងទីបន្ទាល់ថា ពិធីបរិសុទ្ធនៃបព្វជិតភាពអើរ៉ុនអាចធ្វើឲ្យមានពរជ័យជាច្រើនពីដង្វាយធួនរបស់ព្រះយេស៊ូវគ្រីស្ទ រួមមាន ពិធីបុណជ្រមុជទឹកសម្រាប់ផ្តាច់អំពើបាប ។

យ៉ូសែប ស្ម៊ីធ—ប្រវត្តិ ១:៧២; គោលលទ្ធិ និង សេចក្តីសញ្ញា ៨៤:១៩–២២; ១០៧:៨, ១៨–១៩

ពេត្រុស យ៉ាកុប និង យ៉ូហាន បានស្តារបព្វជិតភាពមិលគីស្សាដែកឡើងវិញ

សូមឲ្យសិស្សក្នុងថ្នាក់ផ្ទៀងតាមនៅពេលសិស្សម្នាក់អាន យ៉ូសែប ស្ម៊ីធ —ប្រវត្តិ ១:៧២ ឲ្យឮៗ ។ ដើម្បីជួយសិស្សឲ្យកាន់តែយល់ជ្រៅជ្រះទៀត អំពីបរិបទនៃវគ្គគម្ពីរនេះ សូមពន្យល់ថា មិនយូរប៉ុន្មានបន្ទាប់ពីការយាងមករបស់ យ៉ូហាន បាទីស្ទ នោះ យ៉ូសែប ស្ម៊ីធ និង អូលីវើរ ខៅឌើរី បានទទួលបព្វជិតភាពមិលគីស្សាដែកមកពីពេត្រុស យ៉ាកុប និង យ៉ូហាន ។ ការណ៍នេះកើតឡើងនៅក្នុង ខែ ឧសភា ឆ្នាំ១៨២៩ នៅកន្លែងមួយក្បែរទន្លេសុសគ្វីហាណា ( សូមមើល ឡារី ស៊ី ផតទើរ « The Restoration of the Aaronic and Melchizedek Priesthoods » Ensign, ខែ ធ្នូ ឆ្នាំ ១៩៩៦ ទំព័រ៣០–៤៧ ) ។ បន្ទាប់ពីការរៀបចំសាសនាចក្រ ព្យាការីបានទទួលវិវរណៈផ្សេងទៀតស្តីអំពី គោលលទ្ធិ និង គោលបំណងនៃបព្វជិតភាព ។ បព្វជិតភាពគឺជាប្រធានបទដែលមានពេញក្នុងគោលលទ្ធិ និងសេចក្ដីសញ្ញាទាំងមូល ។

សូមឲ្យសិស្សសិក្សា គោលលទ្ធិ និង សេចក្តីសញ្ញា ៨៤:១៩ និង ១០៧:៨, ១៨–១៩ ដោយស្ងាត់ស្ងៀម ដោយរកមើលពីរបៀបដែលខគម្ពីរទាំងនេះពិពណ៌នាអំពីសិទ្ធិអំណាចទូទៅនៃបព្វជិតភាពមិលគីស្សាដែក ។ អ្នកអាចចង់ផ្តល់យោបល់ឲ្យសិស្សថាពួកគេអាចធ្វើសេចក្តីយោងព្រះគម្ពីរនៃវគ្គខគម្ពីរទាំងនេះ ។ (កំណត់ចំណាំ ៖ សេចក្តីយោងបទគម្ពីរមួយ គឺជាឧបករណ៍សិក្សាព្រះគម្ពីរមួយ ដែលអាចផ្តល់ព័ត៌មានបន្ថែម និង គំនិតទៅលើវគ្គព្រះគម្ពីរដែលបានសិក្សានោះ ) ។ បន្ទាប់ពីទុកពេលគ្រប់គ្រាន់ហើយនោះ សូមឲ្យសិស្សចែកចាយពីអ្វីដែលពួកគេបានរៀនអំពីបព្វជិតភាពមិលគីស្សាដែក ។ នៅពេលពួកគេឆ្លើយ សូមសរសេរឃ្លាខាងក្រោមនៅលើ ក្តារខៀន ៖

ចាត់ចែងដំណឹងល្អ

កាន់កូនសោនៃសេចក្តីអាថ៌កំបាំងទាំងឡាយនៃនរគ

កាន់កូនសោនៃចំណេះវិជ្ជាពីព្រះ

កាន់កូនសោទាំងឡាយនៃអស់ទាំងព្រះពរខាងវិញ្ញាណនៅក្នុងសាសនាចក្រ

កាន់កូនសោដើម្បីទទួលវិវរណៈ

កាន់កូនសោដើម្បីទាក់ទងជាមួយពលបរិវារសួគ៌ា ហើយនៅជាមួយព្រះវរបិតា និង ព្រះរាជបុត្រា

អ្នកអាចសង្ខេបចម្លើយនៅលើក្តារខៀនដោយគូសបញ្ជាក់ពីសេចក្តីពិតដូចខាងក្រោមនេះ ៖ បព្វជិតភាពមិលគីស្សាដែកកាន់កូនសោនៃអស់ទាំងព្រះពរនៃពិធីបរិសុទ្ធ និង ខាងវិញ្ញាណនៅក្នុងសាសនាចក្រ ។ ដើម្បីជួយសិស្សឲ្យយល់ឃ្លានៅលើក្តារខៀនកាន់តែប្រសើរ សូមសួរសំណួរខាងក្រោមខ្លះ ឬ ទាំងអស់ ៖

តើបព្វជិតភាពមិលគីស្សាដែក « ចាត់ចែងដំណឹងល្អ » តាមរបៀបណាខ្លះ ? (គ. និង ស. ៨៤:១៩) ។ ( ចម្លើយអាចរួមមានការចាត់ចែងពិធីបរិសុទ្ធជាក់លាក់ និង ការធ្វើជាអធិបតី និង ការដឹកនាំសាសានាចក្រ ) ។
តើអ្នកគិតថាវាមានន័យយ៉ាងដូចម្តេចដែលថាបព្វជិតភាពមិលគីស្សាដែក « កាន់កូនសោនៃសេចក្តីអាថ៌កំបាំងទាំងឡាយនៃនរគ ? » ( គ. និង ស. ៨៤:១៩) ។ ( អ្នកអាចចង់ពន្យល់ថា « អាថ៌កំបាំងនៃព្រះ គឺជាសេចក្ដីពិតទាំងឡាយខាងវិញ្ញាណ ដែលស្គាល់បានតែតាមរយៈវិវរណៈប៉ុណ្ណោះ » [ សេចក្តីណែនាំទៅដល់បទគម្ពីរទាំងឡាយ « សេចក្តីអាថ៌កំបាំងទាំងឡាយនៃព្រះ » scriptures.lds.org] ។ នៅក្នុងចំណោមអាថ៌កំបាំងផ្សេងទៀត ខគម្ពីរនេះនិយាយអំពីពិធិបរិសុទ្ធនៃព្រះវិហារបរិសុទ្ធ ដែលនឹងត្រូវបានបើកសម្តែងឆាប់ៗដល់យ៉ូសែប ស្ម៊ីធ ហើយសេចក្តីពិតដែលពួកគេត្រូវតែចាត់ចែងដោយសិទ្ធិអំណាចនៃបព្វជិតភាពមិលគីស្សាដែក ។ នៅក្នុងព្រះវិហារបរិសុទ្ធ សមាជិកសក្តិសមនៃសាសនាចក្រអាចរៀនពី « អាថ៌កំបាំងនៃព្រះ » មួយចំនួននៅពេលពួកគេចូលរួមនៅក្នុងការបម្រើពិធីបរិសុទ្ធនានានៅទីនោះ ហើយរក្សាសេចក្តីសញ្ញាទាំងឡាយដែលទាក់ទងនឹងពិធីនោះ ) ។
តើបព្វជិតភាពមិលគីស្សាដែកជួយយើងឲ្យទទួលបាន « ចំណេះវិជ្ជាពីព្រះ » យ៉ាងដូចម្តេច ? ( គ. និង ស. ៨៤:១៩) ។ ( យើងទទួលចំណេះវិជ្ជាពីព្រះនៅពេលយើងចូលរួមនៅក្នុងពិធីបរិសុទ្ធដែលត្រូវធ្វើឡើងដោយបព្វជិតភាពមិលគីស្សាដែក ) ។

ដើម្បីជួយសិស្សយល់ឃ្លា « ចំណេះវិជ្ជាពីព្រះ » នោះអ្នកអាចចង់អានសេចក្តីថ្លែងការណ៍ខាងក្រោមដោយប្រធាន ជែមស៍ អ៊ី ហ្វោស្ត ( ឆ្នាំ ១៩២០–២០០៧ ) នៃគណៈប្រធានទីមួយ ៖

« តើអ្វីទៅជាកូនសោនៃចំណេះវិជ្ជាពីព្រះ ហើយមនុស្សម្នាក់អាចទទួលវាបានដែរឬទេ ? បើគ្មានបព្វជិតភាពទេ នោះគ្មានភាពពោរពេញនៃចំណេះវិជ្ជាពីព្រះឡើយ ។ ព្យាការី យ៉ូសែប ស៊្មីធ បានមានប្រសាសន៍ថា ‹ បព្វជិតភាពមិលគីស្សាដែក…គឺជាខ្សែដែលគ្រប់ទាំងចំណេះវិជ្ជា គោលលទ្ធិ ផែនការនៃសេចក្តីសង្គ្រោះ និង កិច្ចការសំខាន់ៗផ្សេងទៀតត្រូវបានបើកសម្តែងពីឋានសួគ៌ › [ការបង្រៀនរបស់ប្រធានសាសនាចក្រ ៖ យ៉ូសែប ស្ម៊ីធ ( ឆ្នាំ ២០០៧ ) ទំព័រ ១០៨]” (« The Key of the Knowledge of God » Ensign, ខែ វិច្ឆិកា ឆ្នាំ ២០០៤ ទំព័រ ៥២ ) ។

សូមឲ្យសិស្សម្នាក់អាន គោលលទ្ធិ និង សេចក្ដីសញ្ញា ៨៤:២០-២២ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាម រកមើលរបៀបដែលពរជ័យខាងវិញ្ញាណមានតាមរយៈបព្វជិតភាពមិលគីស្សាដែក អាចត្រូវបានរីករាយដោយសមាជិកគ្រប់រូបនៃសាសនាចក្រ ។ បន្ទាប់មក សួរនូវសំណួរដូចខាងក្រោមនេះ ៖

តើពិធីបរិសុទ្ធអ្វីខ្លះ អាចត្រូវបានចាត់ចែងតាមរយៈ សិទ្ធិអំណាចនៃបព្វជិតភាពមិលគីស្សាដែកតែប៉ុណ្ណោះ ? ( ពិធីបញ្ជាក់ ប្រគល់បព្វជិតភាពមិលគីស្សាដែក ពិធីបរិសុទ្ធនៃព្រះវិហារបរិសុទ្ធ ប្រសិទ្ធិពរទារក ប្រសិទ្ធិពរអ្នកឈឺ ពរនៃលោកអយ្យកោ ការញែកបុគ្គលណាម្នាក់នូវការហៅបម្រើមួយ )
តើពិធីបរិសុទ្ធនៃបព្វជិតភាពអាចជួយបុគ្គលម្នាក់អនុវត្ត « អំណាចនៃភាពជាព្រះ » មានន័យថាអំណាចដើម្បីប្រែក្លាយដូចជាព្រះដោយរបៀបណា ?
តើពិធិបរិសុទ្ធនៃបព្វជិតភាពមិលគីស្សាដែក អាចជួយរៀបចំខ្លួនយើងឲ្យឃើញព្រះភ័ក្ររបស់ព្រះយ៉ាងដូចម្តេច ?
តើពិធីបរិសុទ្ធនៃបព្វជិតភាពបានជួយអ្នកឲ្យប្រែក្លាយដូចជាព្រះយ៉ាងដូចម្តេច ?
តើមានបទពិសោធន៍អ្វីផ្សេងទៀតដែលបានរួមចំណែកឲ្យអ្នកមានអំណរគុណ និង ទីបន្ទាល់អំពីបព្វជិតភាព ?

សូមពិចារណាចែកចាយពីទីបន្ទាល់ផ្ទាល់ខ្លួនអំពីពរជ័យនៃបព្វជិតភាព ។ សូមលើកទឹកចិត្តសិស្សឲ្យពិចារណាអំពីអ្វីដែលពួកគេអាចធ្វើបានកាន់តែប្រសើរដើម្បីសម្របខ្លួនរបស់ពួកគេជាមួយការដឹកនាំមកពីថ្នាក់ដឹកនាំបព្វជិតភាពរបស់ពួកគេ ។

ការអានរបស់សិស្ស

យ៉ូសែប ស្ម៊ីធ—ប្រវត្តិ ១:៦៨–៧២; គោលលទ្ធិ និង សេចក្តីសញ្ញា ១៣:១; ៨៤:១៨–២២; ១០៧:១–១៩ ។
ថូម៉ាស អេ. ម៉នសន « Obedience Brings Blessings » Ensign ឬ Liahona, ខែ ឧសភា ឆ្នាំ ២០០៧ ទំព័រ ៥៧-៦០ ។