មេរៀនទី ២៨ ៖ ការពន្លឿនកិច្ចការនៃសេចក្ដីសង្គ្រោះ

មេរៀនទី ២៨

ការពន្លឿនកិច្ចការនៃសេចក្ដីសង្គ្រោះ

សេចក្តីផ្តើម

ប៉ុន្មានឆ្នាំកន្លងទៅ អ្នក ដឹកនាំសាសនាចក្របានសង្ក ត់ធ្ងន់អំពីការព្យាករណ៍របស់ព្រះអម្ចាស់ថា ទ្រង់នឹង « ពន្លឿនកិច្ចការ [ របស់ទ្រង់ ] » ( គ និង ស ៨៨:៧៣ ) ។ កិច្ចការនៃសេចក្ដីសង្គ្រោះរួមមានកិច្ចការផ្សព្វផ្សាយសាសនារបស់សមាជិក ការថែរក្សាអ្នកផ្លាស់ប្រែចិត្តជឿ ការធ្វើឲ្យសមាជិកមិនសូវសកម្មឲ្យសកម្មឡើងវិញ កិច្ចការព្រះវិហារបរិសុទ្ធ និងពង្សប្រវត្តិ និងការបង្រៀនដំណឹងល្អ ។ មេរៀននេះ នឹងជួយសិស្សឲ្យយល់កាន់តែច្បាស់ពីទំនួល ខុសត្រូវរបស់គេក្នុងនាមជាសមាជិកនៃសាសនាចក្រនៃព្រះយេស៊ូវគ្រីស្ទនៃពួក បរិសុទ្ធថ្ងៃ ចុង ក្រោយ ដើម្បីចូលរួមនៅក្នុងកិច្ចការនេះ ។

ការអានពីសាវតា

ឌៀថើរ អេស្វ អុជដូហ្វ « តើអ្នកកំពុងតែគេងលង់លក់ ក្នុងអំឡុងពេលនៃការស្តារឡើងវិញដែរ ឬ ទេ? » Ensignឬ លីអាហូណា ខែ ឧសភា ឆ្នាំ ២០១៤ ទំព័រ ៥៨–៦២ ។
« Hastening the Work of Salvation » Ensign ខែ តុលា ឆ្នាំ ២០១៣ ទំព័រ ៣៦–៣៩ ។

យោបល់សម្រាប់ការបង្រៀន

គោលលទ្ធិ និងសេចក្ដីសញ្ញា ១៣៨:៥៣–៥៦

ព្រះអម្ចាស់ កំពុងពន្លឿនកិច្ចការរបស់ទ្រង់

សូមប្រាប់សិស្សថា មិនយូរប៉ុន្មានបន្ទាប់ពីមុនមរណភាពរបស់លោក ប្រធាន យ៉ូសែប អេហ្វ ស៊្មីធ បានមានការនិមិត្តមួយអំពីពិភពវិញ្ញាណ ដែលឥឡូវត្រូវបានកត់ត្រានៅក្នុង គោលលទ្ធិ និង សេចក្ដីសញ្ញា ១៣៨ ។ លោកបានរៀនថា អ្នកដឹកនាំនៃគ្រាកាន់កាប់ត្រួតត្រាចុងក្រោយ និង « អ្នកដទៃជាច្រើន » ត្រូវបានរៀបចំនៅក្នុងពិភពមុនផែនដីនេះសម្រាប់ការទទួលខុសត្រូវរបស់គេនៅលើផែនដី ។ សូមឲ្យសិស្សម្នាក់អាន គោលលទ្ធិ និង សេចក្ដីសញ្ញា ១៣៨:៥៣–៥៦ ឲ្យឮៗ នៅពេលសិស្សក្នុងថ្នាក់ផ្ទៀងតាម ដោយរកមើលទំនួលខុសត្រូវនានាដែលអ្នកដឹកនាំទាំងនេះបានទទួលនៅក្នុងពិភពមុនផែនដីនេះ ។

តើមានទំនួលខុសត្រូវអ្វីខ្លះ ដែលអ្នកដឹកនាំទាំងនេះបានទទួលនៅក្នុងពិភពមុនផែនដីនេះ ? តើពួកលោកបានទទួលការរៀបចំអ្វីខ្លះនៅទីនោះ ?
តើមានទំនួលខុសត្រូវនានាអ្វីខ្លះ ដែលអ្នកអាចទទួលបាននៅក្នុងពិភពមុនផែនដីនេះ ? តើអ្នកអាចទទួលបានការរៀបចំអ្វីខ្លះ ? ( នៅពេលសិស្សចែកចាយគំនិតរបស់ពួកគេ សូមជួយពួកគេឲ្យរកឃើញនូវគោលការណ៍នេះ ៖ យើងត្រូវបានរៀបចំនៅក្នុងជីវិតមុនផែនដីនេះដើម្បីមកកាន់ផែនដី នៅក្នុងពេលពេញលេញដើម្បីធ្វើការសម្រាប់សេចក្ដីសង្គ្រោះដល់ព្រលឹងនៃមនុស្ស ) ។

សូមបង្ហាញសេចក្ដីថ្លែងការណ៍ខាងក្រោមនេះពីប្រធាន ថូម៉ាស អេស ម៉នសុន ហើយសូមឲ្យសិស្សម្នាក់អានវាឮៗ ៖

« តើអ្នកដឹងទេថា សាសនាចក្រដែលត្រូវបានសា្ដរឡើងវិញមានអាយុ ៩៨ ឆ្នាំ មុនពេលវាមានស្ដេកចំនួន ១០០ នោះ ? ប៉ុន្ដែជាង ៣០ ឆ្នាំក្រោយមក សាសនាចក្របានរៀបចំស្ដេកចំនួន ១០០ លើកទីពីរ ។ ហើយតែប្រាំបីឆ្នាំក្រោយមកទៀត សាសនាចក្របានមានជាង ៣០០ ស្ដេក ។ សព្វថ្ងៃនេះ [ ឆ្នាំ ២០១៤ ] យើងមានជាង ៣០០០ ស្ដេកដែលរឹងមាំ ។

« ហេតុអ្វីបានជាការលូតលាស់នេះកើតឡើងលឿនម្ល៉េះ ? តើវាដោយសារយើងត្រូវបានគេស្គាល់ច្រើនមែនទេ ? តើវាដោយសារយើងមានសាលជំនុំដ៏គួរឲ្យស្រឡាញ់មែនទេ ?

« រឿងទាំងនេះគឺសំខាន់ ប៉ុន្ដែមូលហេតុដែលសាសនាចក្រនេះលូតលាស់នាសព្វថ្ងៃនេះគឺថា ព្រះអម្ចាស់បានបង្ហាញថាវានឹងដូច្នោះ ។ នៅក្នុងគោលលទ្ធិ និងសេចក្ដីសញ្ញា ទ្រង់បានមានបន្ទូលថា ‹ មើលចុះ យើងនឹងពន្លឿនកិច្ចការរបស់យើង ឲ្យឆាប់កើតនៅពេលកំណត់ › [ គ. និង ស. ៨៨:៧៣ ] ។

« ក្នុងនាមជាកូនចៅរបស់ព្រះវរបិតាសួគ៌របស់យើង យើងត្រូវបានបញ្ជូនមកកាន់ផែនដីនៅពេលនេះ ជាពេលដែលយើងអាចចូលរួមនៅក្នុងការពន្លឿនកិច្ចការដ៏អស្ចារ្យនេះ » ( « Hastening the Work » Ensign ខែ មិថុនា ឆ្នាំ ២០១៤ ទំព័រ ៤ ) ។

យោងតាមប្រធាន ម៉នសុន ហេតុអ្វី បានជាយើងត្រូវបានបញ្ជូនមកកាន់ផែនដីនាពេលនេះ ? ( នៅពេលសិស្សចែកចាយចម្លើយរបស់ពួកគេ សូមជួយពួកគេឲ្យយល់ពីគោលការណ៍តទៅនេះ ៖ យើងមានទំនួលខុសត្រូវមួយដើម្បីចូលរួមនៅក្នុងការពន្លឿនកិច្ចការរបស់ព្រះវរបិតាសួគ៌ ។ )
តើមានរបៀបណាខ្លះដែលអ្នកបានធ្វើជាសាក្សីអំពី « ការពន្លឿន » កិច្ចការរបស់ព្រះ ? ( វាមានចម្លើយជាច្រើនចំពោះសំណួរនេះ រួមមានការផ្លាស់ប្ដូរអាយុសម្រាប់ការបម្រើបេសកកម្ម ការបង្កើនចំនួនអ្នកផ្សព្វផ្សាយសាសនា ការបង្កើនចំនួនព្រះវិហារបរិសុទ្ធ និងការកើនឡើងនៃឧបករណ៍ដែលជួយឲ្យកិច្ចការពង្សប្រវត្តិកាន់តែងាយស្រួល ) ។

សូមបង្ហាញថា ចម្លើយទាំងនេះផ្ដល់នូវភស្ដុតាងដែលព្រះអម្ចាស់កំពុងពន្លឿនកិច្ចការរបស់ទ្រង់ទាំងសងខាងវាំងនន ។ សូមពន្យល់ថា អ្នកដឹកនាំសាសនាចក្រសព្វថ្ងៃនេះបានសង្កត់ធ្ងន់ទៅលើផ្នែកប្រាំនៅក្នុងកិច្ចការសេចក្ដីសង្គ្រោះ ហើយបានស្នើសុំថា យើងម្នាក់ៗគួរតែចូលរួមនៅក្នុងផ្នែកទាំងនេះដើម្បីជួយពន្លឿនកិច្ចការរបស់ព្រះនៅក្នុងថ្ងៃចុងក្រោយនេះ ។ សូមបង្ហាញសេចក្ដីថ្លែងការណ៍ខាងក្រោមពីអែលឌើរ អេល វីតនី ក្លេតុន នៃគណៈប្រធានពួកចិតសិបនាក់ ហើយសូមឲ្យសិស្សម្នាក់អានវាឮៗ ។ សូមឲ្យសិស្សក្នុងថ្នាក់រកមើលផ្នែកប្រាំដែលជាផ្នែកនៃកិច្ចការនៃសេចក្ដីសង្គ្រោះ ៖

« ព្យាការី និងពួកសាវកដែលនៅរស់ទាំងឡាយបង្រៀនយើងថា ‹ សមាជិកនៃសាសនាចក្រនៃព្រះយេស៊ូវគ្រីស្ទត្រូវបានបញ្ជូនចេញទៅ « ដើម្បីធ្វើការងារនៅក្នុងចំការទំពាំងបាយជូរ របស់ទ្រង់ សម្រាប់សេចក្តីសង្គ្រោះដល់ព្រលឹងនៃមនុស្សលោក » ( គ. និង ស. ១៣៨:៥៦ ) ។ កិច្ចការនៃសេចក្ដីសង្គ្រោះរួមមានកិច្ចការផ្សព្វផ្សាយសាសនារបស់សមាជិក ការថែរក្សាអ្នកផ្លាស់ប្រែចិត្តជឿ ការធ្វើឲ្យសមាជិកមិនសូវសកម្មឲ្យសកម្មឡើងវិញ កិច្ចការព្រះវិហារបរិសុទ្ធ និងពង្សប្រវត្តិ និងការបង្រៀនដំណឹងល្អ ។ › [ សៀវភៅក្បួនខ្នាតភាគ ២ ( ឆ្នាំ ២០១០ ), ៥.0 ] » ( « The Work of Salvation: Then and Now » Ensign ខែ កញ្ញា ឆ្នាំ ២០១៤ ទំព័រ ៦៣ ) ។

នៅពេលសិស្សរកមើលផ្នែកទាំងប្រាំនេះ សូមសរសេរចំណុចខាងក្រោមនេះនៅលើក្ដារខៀន ៖

កិច្ចការផ្សព្វផ្សាយសាសនារបស់សមាជិក

ការថែរក្សាអ្នកផ្លាស់ប្រែចិត្តជឿ

ការធ្វើឲ្យសមាជិកមិនសូវសកម្មឲ្យសកម្មឡើងវិញ

កិច្ចការព្រះវិហារបរិសុទ្ធ និងពង្សប្រវត្តិ

ការបង្រៀនដំណឹងល្អ

គោលលទ្ធិ និងសេចក្ដីសញ្ញា ៨៨:៧៣

យើងម្នាក់ៗអាចរួមចំណែកចំពោះការពន្លឿនដល់កិច្ចការរបស់ព្រះអម្ចាស់

សូមឲ្យសិស្សម្នាក់អាន គោលលទ្ធិ និងសេចក្ដីសញ្ញា ៨៨:៧៣ ខណៈសិស្សក្នុងថ្នាក់ផ្ទៀងតាម ។ បន្ទាប់មក សូមពន្យល់ដល់សិស្សថា យើងម្នាក់ៗគួរតែខិតខំដើម្បីបង្កើនការរួមចំណែករបស់យើងចំពោះការពន្លឿនដល់កិច្ចការរបស់ព្រះអម្ចាស់ ។ សូមចែក ក្រដាសចែក នៅចុងបញ្ចប់នៃមេរៀននេះដល់សិស្ស ហើយពន្យល់ថា ក្រដាសចែកនេះនឹងជួយដល់ពួកគេឲ្យគិតអំពី របៀបដែលពួកគេអាចបង្កើនការរួមចំណែករបស់ពួកគេ ។ សូមឲ្យសិស្សជ្រើសរើសប្រយោគមួយ ឬច្រើនជាងនេះពីក្រដាសនេះហើយអានដោយស្ងាត់ស្ងៀម និងរៀបចំឆ្លើយនឹងសំណួរដែលមាននៅលើក្រដាសនោះ ។

ក្រដាសចែក ការពន្លឿនដល់កិច្ចការនៃសេចក្ដីសង្គ្រោះ

ក្រោយពីសិស្សមានពេលគ្រប់គ្រាន់អាន និងរៀបចំហើយ សូមគិតពីការសុំឲ្យសិស្សម្នាក់អានសម្ដីដកស្រង់ទីមួយឮៗ ។ បន្ទាប់មក សូមឲ្យសិស្សបីបួននាក់ចែកចាយចម្លើយរបស់ពួកគេចំពោះសំណួរទាំងបីនៅលើក្រដាស ដោយផ្ដោតលើកិច្ចការផ្សព្វផ្សាយសាសនារបស់សមាជិក ។ សូមធ្វើដំណើរការនេះម្ដងទៀតសម្រាប់សម្ដីដកស្រង់ទាំងប្រាំ ។

សូមជួយសិស្សឲ្យមានអារម្មណ៍ពីសេចក្ដីពិត និងសារៈសំខាន់នៃការចូលរួមនៅក្នុងកិច្ចការនៃសេចក្ដីសង្គ្រោះដោយការសួរសំណួរខាងក្រោម ៖

តើពរជ័យអ្វីខ្លះដែលអ្នកបានទទួល នៅពេលអ្នកបានចូលរួមនៅក្នុងផ្នែកមួយ ឬច្រើនជាងនេះនៃកិច្ចការនៃសេចក្ដីសង្គ្រោះ ? តើអ្នកបានមានបទពិសោធន៍អ្វីខ្លះ ខណៈចូលរួមក្នុងផ្នែកមួយនៃផ្នែកទាំងនេះ ដែលមានន័យយ៉ាងចាំបាច់ជាពិសេសដល់អ្នក ?

សូមបង្ហាញសេចក្ដីថ្លែងការណ៍ខាងក្រោមដោយប្រធាន ឌៀថើរ អេស្វ អុជដូហ្វ នៃគណៈប្រធានទីមួយ ហើយសូមឲ្យសិស្សម្នាក់អានវាឮៗ ៖

« នៅពេលពេលវេលារបស់យើងនៅក្នុងជីវិតខាងសាច់ឈាមបញ្ចប់ តើបទពិសោធន៍អ្វីខ្លះ ដែលយើងនឹងអាចចែកចាយអំពីការរួមចំណែករបស់យើងផ្ទាល់ចំពោះរយៈពេលដ៏សំខាន់នៃជីវិតរបស់យើងនេះ និងចំពោះការស៊ីជម្រៅលើកិច្ចការរបស់ព្រះអម្ចាស់ ? តើយើងនឹងអាចនិយាយបានទេថា យើងបានមូរដៃអាវរបស់យើងឡើង ហើយចាប់ធ្វើការដោយអស់ពីចិត្ត ពលំ គំនិត និងកម្លាំងរបស់យើង ? ឬ តើយើងនឹងត្រូវសារភាពថា តួនាទីរបស់យើងភាគច្រើនជាអ្នកឃ្លាំមើលឬ ? » ( « តើអ្នកកំពុងតែគេងលង់លក់ ក្នុងអំឡុងពេលនៃការស្តារឡើងវិញដែរឬទេ ? » Ensignឬ លីអាហូណា ខែ ឧសភា ឆ្នាំ ២០១៤ ទំព័រ ៥៩ ) ។

សូមឲ្យសិស្សគ្រោងនូវអ្វីដែលពួកគេនឹងធ្វើដើម្បីចូលរួមកាន់តែពេញលេញនៅក្នុងកិច្ចការនៃសេចក្ដីសង្គ្រោះដោយការសួរ ៖

តើមានវិធីមួយចំនួនណាខ្លះ ដែលអ្នកបានឃើញអ្នកដទៃជួយពន្លឿនដល់កិច្ចការរបស់ព្រះអម្ចាស់ ?
តើមានវិធីមួយចំនួនណាខ្លះ ដែលអ្នកគ្រោងដើម្បីចូលរួមចំណែកក្នុងការពន្លឿនដល់កិច្ចការរបស់ព្រះអម្ចាស់ ?
តើចំណេះដឹង និងទីបន្ទាល់របស់យើងអំពីការស្ដារឡើងវិញជួយជំរុញយើងឲ្យចូលរួមកាន់តែពេញលេញនៅក្នុងកិច្ចការនៃសេចក្តីសង្គ្រោះដោយរបៀបណា ?

សូមឲ្យសិស្សពីរបីនាក់ចែកចាយ និងថ្លែងទីបន្ទាល់អំពីអ្វីមួយ ដែលពួកគេបានរៀនអំពីការស្ដារឡើងវិញនៃដំណឹងល្អ តាមរយៈការសិក្សារបស់គេនៅក្នុងវគ្គសិក្សានេះ ។ សូមបញ្ចប់ដោយការថ្លែងទីបន្ទាល់អំពីសេចក្ដីពិតពេញលេញនៃការស្ដារដំណឹងល្អនៃដំណឹងល្អតាមរយៈព្យាការី យ៉ូសែប ស៊្មីធ ។

ការអានរបស់សិស្ស

ឌៀថើរ អេស្វ អុជដូហ្វ « តើអ្នកកំពុងតែគេងលង់លក់ ក្នុងអំឡុងពេលនៃការស្តារឡើងវិញដែរ ឬ ទេ? » Ensignឬ លីអាហូណា ខែ ឧសភា ឆ្នាំ ២០១៤ ទំព័រ ៥៨–៦២ ។

ការពន្លឿនកិច្ចការនៃសេចក្ដីសង្គ្រោះ

មូលដ្ឋានគ្រឹះនៃការស្ដារឡើងវិញ— មេរៀនទី ២៨

សូមសញ្ជឹងគិតពីសំណួរខាងក្រោមដែលទាក់ទងទៅនឹងផ្នែកទាំងប្រាំនេះ ដែលជាផ្នែកនីមួយៗនៃកិច្ចការនៃសេចក្ដីសង្គ្រោះ ៖

តើការខិតខំរបស់អ្នកនៅក្នុងផ្នែកនៃកិច្ចការរបស់ព្រះនេះ អាចនាំឲ្យអ្នកដទៃខិតកាន់តែជិតទៅនឹងពរជ័យនៃសេចក្ដីសង្គ្រោះដោយរបៀបណា ?
តើបទពិសោធន៍អ្វីខ្លះដែលអ្នកបានទទួល និងតើពរជ័យអ្វីខ្លះដែលអ្នកបានទទួល នៅពេលអ្នកបានចូលរួមនៅក្នុងផ្នែកនេះនៃកិច្ចការនៃសេចក្ដីសង្គ្រោះរបស់ព្រះអម្ចាស់ ?
តើ អ្នកអាចធ្វើអ្វីខ្លះដើម្បីចូលរួមនៅក្នុងផ្នែកនៃកិច្ចការនៃសេចក្ដីសង្គ្រោះនេះ មិនថាការហៅបម្រើរបស់អ្នកនៅក្នុងសាសនាចក្រនាពេលថ្មីៗ ជាអ្វីក៏ដោយនោះ ?

កិច្ចការផ្សព្វផ្សាយសាសនារបស់សមាជិក

អែលឌើរ នែល អិល អាន់ឌើរសិន នៃកូរ៉ុមនៃពួកសាវកដប់ពីរនាក់បានបង្រៀន ៖

« បងប្អូនប្រុសស្រី វាពិតដូចជាព្រះអម្ចាស់បានបំផុសគំនិតដល់អ្នកផ្សព្វផ្សាយសាសនាកាន់តែច្រើនដើម្បីទៅបម្រើ នោះទ្រង់ក៏កំពុងដាស់គំនិតយើង និងបើកដួងចិត្តដល់មនុស្សដ៏ល្អ និងស្មោះត្រង់ជាច្រើនឲ្យទទួលអ្នកផ្សព្វផ្សាយសាសនារបស់ទ្រង់ ។ អ្នកបានស្គាល់គេរួចហើយ ឬអ្នកនឹងស្គាល់ពួកគេ ។ ពួកគេនៅក្នុងគ្រួសាររបស់អ្នក និងរស់នៅក្នុងសហគមន៍របស់អ្នក ។ ពួកគេដើរតាមផ្លូវកាត់មុខអ្នក អង្គុយក្បែរអ្នកនៅឯសាលារៀន ហើយមានទំនាក់ទំនងនឹងអ្នកតាមអ៊ិនធើរណែត ។ អ្នកផងដែរគឺជាផ្នែកមួយដ៏សំខាន់នៃអព្ភូតហេតុដ៏លាតត្រដាងនេះ ។

« ប្រសិនបើអ្នកមិនមែនជាអ្នកផ្សព្វផ្សាយសាសនាពេញលេញម៉ោងដោយមានស្លាកផ្សព្វផ្សាយសាសនាដាក់លើអាវរបស់អ្នកទេ ឥឡូវនេះគឺជាពេលដើម្បីគូសស្លាកមួយនៅលើដួងចិត្តរបស់អ្នក — បានគូស ដូចដែល ប៉ុល បានមានប្រសាសន៍ថា ‹ មិនមែនសរសេរនឹងទឹកខ្មៅទេ គឺនឹងព្រះវិញ្ញាណនៃព្រះដ៏មានព្រះជន្មរស់ › [កូរិនថូសទី ២ ៣:៣ ] ។ … យើងទាំងអស់គ្នាមានការរួមចំណែកមួយដើម្បីឲ្យធ្វើអព្ភូតហេតុនេះ » ( « វាជាអព្ភូតហេតុមួយ » Ensign ឬ Liahona ខែ ឧសភា ឆ្នាំ ២០១៣ ទំព័រ ៧៨ ) ។

ការថែរក្សាអ្នកផ្លាស់ប្រែចិត្តជឿ

អែលឌើរ អិម រ័សុល បាឡឺដ នៃកូរ៉ុមនៃពួកសាវកដប់ពីរនាក់បានប្រកាស ៖

« អ្នក និងខ្ញុំត្រូវតែធ្វើអ្វីៗ ដែលយើងអាចដើម្បីឃើញថា រាល់សមាជិកនៃសាសនាចក្របានចងមិត្តភាពយ៉ាងមាំ និងរីករាយនឹងពរជ័យទាំងអស់ដែលដំណឹងល្អត្រូវផ្ដល់ឲ្យ ។

« ប្រធាន ហ្គរដុន ប៊ី ហ៊ិងគ្លី បានរំឭកអ្នក និងខ្ញុំអំពីទំនួលខុសត្រូវរបស់យើងដើម្បីក្លាយជាសហការីជាមួយនឹងព្រះអម្ចាស់ នៅក្នុងការនាំឲ្យផែនការរបស់ទ្រង់សម្រាប់សាសនាចក្រនេះបានសម្រេច ។ នៅក្នុងការផ្សាយតាមផ្កាយរណបមួយ ប្រធាន ហ៊ិងគ្លី បានមានប្រសាសន៍ ៖

« ‹ ព្រះអម្ចាស់បានដាក់មកលើយើងនូវកិច្ចតម្រូវមួយដើម្បីបង្រៀនដំណឹងល្អដល់មនុស្សគ្រប់រូប ។ ការណ៍នេះនឹងត្រូវការកិច្ចខំប្រឹងដ៏ខ្លាំងបំផុតពីអ្នកផ្សព្វផ្សាយសាសនាគ្រប់រូប — ទាំងពេញម៉ោង និងតាមស្ដេក ។ វានឹងត្រូវការកិច្ចខំប្រឹងដ៏ខ្លាំងបំផុតពីប៊ីស្សពគ្រប់រូប ទីប្រឹក្សារបស់ប៊ីស្សពទាំងឡាយ ពីសមាជិកគ្រប់គ្នានៃក្រុមប្រឹក្សាវួដ … › ( ‹ Find the Lambs, Feed the Sheep › Ensign, ខែ ឧសភា ឆ្នាំ ១៩៩៩ ទំព័រ ១០៧ ) ។ វានឹងត្រូវការកិច្ចខំប្រឹងដ៏ខ្លាំងបំផុតពីសមាជិកគ្រប់គ្នា » ( « Members Are the Key » Ensign, ខែ កញ្ញា ឆ្នាំ ២០០០ ទំព័រ ១០ ) ។

ការជួយឲ្យសមាជិកមិនសូវសកម្មមកជាសកម្មវិញ

« តួនាទីរបស់យើង [ ក្នុងនាមជាសមាជិក ] គឺត្រូវថ្វាយខ្លួនយើងទាំងស្រុងក្នុងការស្រឡាញ់ និងបម្រើដល់អស់អ្នកដែលនៅជុំវិញយើង – ដោយលួងលោមដល់សហការីម្នាក់ដែលត្រូវការ ការអញ្ជើញមិត្តរបស់យើងមកពិធីបុណ្យជ្រមុជទឺក ការជួយអ្នកជិតខាងចំណាស់ម្នាក់ធ្វើកិច្ចការនៅសួនច្បារ អញ្ជើញសមាជិកមិនសូវសកម្មឲ្យមកហូបអាហារមួយពេល ឬជួយអ្នកជិតខាងម្នាក់ធ្វើពង្សប្រវត្តិរបស់គេ ។ អ្វីៗទាំងនេះគឺជាវិធីធម្មជាតិ និងរីករាយ ដើម្បីអញ្ជើញសមាជិកដែលមិនសូវសកម្ម និងអស់អ្នកដែលពុំមែនជាសមាជិកនៃជំនឿរបស់យើង ចូលមកក្នុងជីវិតរបស់យើង និង ចូលមកក្នុងពន្លឺនៃដំណឹងល្អជាលំដាប់លំដោយ ។ ការចែករំលែកពេលសប្បាយរីករាយ និងពេលដ៏ពិសិដ្ឋនៃជីវិតរបស់យើងជាមួយនឹងពួកគេ ពិតជាអាចក្លាយជារបៀបដ៏មានប្រសិទ្ធភាពបំផុតមួយដែលយើងម្នាក់ៗអាច ‹ ធ្វើការងារនៅក្នុងចំការទំពាំងបាយជូរ [ របស់ព្រះយេស៊ូវគ្រីស្ទ ] សម្រាប់សេចក្ដីសង្គ្រោះនៃព្រលឹងនៃមនុស្សលោក › ( គ. និង ស. ១៣៨:៥៦ ) » (« Hastening the Work of Salvation » Ensign, ខែ តុលា ឆ្នាំ ២០១៣ ទំព័រ ៣៦ ) ។

កិច្ចការព្រះវិហារបរិសុទ្ធ និងពង្សប្រវត្តិ

អែលឌើរ ឃ្វីនថិន អិល ឃុក នៃកូរ៉ុមនៃពួកសាវកដប់ពីរនាក់បានបង្រៀន ៖

« ថ្នាក់ដឹកនាំសាសនាចក្រ បានចេញការអំពាវនាវដ៏ច្បាស់មួយដល់ជំនាន់កំពុងពេញវ័យ ឲ្យដឹកនាំផ្លូវនៅក្នុងការប្រើបច្ចេកវិទ្យាដើម្បីទទួលបទពិសោធន៍នៃវិញ្ញាណរបស់អេលីយ៉ា ដើម្បីស្វែងរកដូនតាពួកគេ និងដើម្បីធ្វើពិធីបរិសុទ្ធនៅក្នុងព្រះវិហារបរិសុទ្ធឲ្យពួកគាត់ ។ ផ្នែកដ៏សំខាន់ក្នុងការពន្លឿនកិច្ចការនៃសេចក្តីសង្គ្រោះសម្រាប់ទាំងអ្នកនៅរស់ និងអ្នកស្លាប់នឹងសម្រេចទៅបាន ដោយសារអ្នកទាំងអស់គ្នាដែលជាយុវវ័យនេះឯង » (« ឫស និង មែក » Ensign ឬ លីអាហូណា ខែ ឧសភា ឆ្នាំ ២០១៤ ទំព័រ ៤៦ ) ។

ការបង្រៀនដំណឹងល្អ

« ទំនួលខុសត្រូវដើម្បីបង្រៀនដំណឹងល្អ មិនត្រូវបានកំណត់ដល់អស់អ្នកដែលមានការហៅបម្រើផ្លូវការជាគ្រូបង្រៀននោះទេ ។ ក្នុងនាមជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ អ្នកមានទំនួលខុសត្រូវដើម្បីបង្រៀនដំណឹងល្អ ។ ក្នុងនាមជាឪពុកម្ដាយ កូនបុ្រសស្រី ស្វាមី ភរិយា បងប្រុស បងស្រី អ្នកដឹកនាំសាសនាចក្រ គ្រូបង្រៀនសួរសុខទុក្ខ សហការី អ្នកជិតខាង ឬមិត្តភក្ដិ អ្នកមានឱកាសដើម្បីបង្រៀន ។ ពេលខ្លះអ្នកអាចបង្រៀនដោយឥតលាក់បាំង និងដោយផ្ទាល់ដោយអ្វីៗដែលអ្នកនិយាយ និងទីបន្ទាល់ដែលអ្នកថ្លែង ។ ហើយអ្នកតែងតែបង្រៀនដោយគំរូ » ( គ្មានការហៅណាប្រសើរជាងការបង្រៀនទេ ៖ ធនធានណែនាំសម្រាប់ការបង្រៀនដំណឹងល្អ [ ឆ្នាំ ១៩៩៩ ], ទំព័រ ៣–៤ ) ។