ព្រះយេស៊ូវគ្រីស្ទ គឺជាព្រះមែស៊ី

សេចក្ដីផ្ដើម

ព្យាការីសម័យព្រះគម្ពីសញ្ញាចាស់ បានថ្លែងទីបន្ទាល់ អំពីការយាងមកនៃព្រះម៊ែស៊ី—ជាតំណពូជហ្លួងស្ដេចដាវីឌ ដែលបានដោះលែងប្រជាជនរបស់ទ្រង់ ។ ព្រះយេស៊ូវគ្រីស្ទគឺជា « ព្រះយេហូវ៉ានៅក្នុងព្រះគម្ពីរសញ្ញាចាស់ ហើយជាព្រះមែស៊ីនៅក្នុងព្រះគម្ពីរសញ្ញាថ្មី » ( « ព្រះគ្រីស្ទដ៏មានព្រះជន្មរស់ ៖ ទីបន្ទាល់នៃពួកសាវក » Ensign ឬ លីអាហូណា ខែ មេសា ឆ្នាំ ២០០០ ទំព័រ ២ ) ។ នៅក្នុងមេរៀននេះ សិស្សនឹងស្វែងរកការព្យាករណ៍ខ្លះពីព្រះគម្ពីរសញ្ញាចាស់អំពីព្រះយេស៊ូវគ្រីស្ទ និងរកឃើញនូវរបៀបដែលបុគ្គលខ្លះបានឆ្លើយតបនៅពេលបានជួបនឹងការទទួលយក ឬការបដិសេធមិនទទួលយកព្រះយេស៊ូវគ្រីស្ទ ជាព្រះមែស៊ី ។

ការអានពីសាវតា

ជី ហូមើរ ដួរ៉ាម « Jesus the Christ: The Words and Their Meaning » Ensign, ខែ ឧសភា ឆ្នាំ ១៩៨៤ ទំព័រ ១៤–១៦ ។
« The Divine Mission of Jesus Christ: Messiah » Ensign ឬ លីអាហូណា ខែ សីហា ឆ្នាំ ២០១៤ ទំព័រ ៧ ។

យោបល់សម្រាប់ការបង្រៀន

អេសាយ ៦១:១-២; លូកា ៤:១៦-២៤

ព្រះយេស៊ូវគ្រីស្ទ ប្រកាសថា ទ្រង់គឺជាព្រះមែស៊ី

សូមសួរសិស្សថា តើពួកគេធ្លាប់បានជួបប្រទះនឹងបទពិសោធន៍ ក្នុងការស្ដាប់ការប្រកាសដែលបានរង់ចាំដ៏យូរ ឬឃើញពីការមកដល់នៃមិត្តភក្ដិ ឬសមាជិកគ្រួសារម្នាក់ដែលបានទន្ទឹមរង់ចាំជាយូរមកហើយទេ ? សូមប្រាប់សិស្សថា មេរៀននៅថ្ងៃនេះនឹងស្វែងរកនូវបទពិសោធន៍ស្រដៀងគ្នានេះមួយនៅក្នុងចំណោមពួកសាសន៍យូដាពីបុរាណ ។ សូមឲ្យសិស្សម្នាក់អាន អេសាយ ៦១:១-២ ឮៗ បន្ទាប់មក សូមសួរ ៖

តើការព្យាករណ៍នេះនិយាយអំពីនរណា ?

សូមបង្ហាញវីដេអូ « Jesus Declares He Is the Messiah » (៣:២៤) ចេញពី The Life of Jesus Christ Bible Videos ។ ( សូមទាញវាចេញពីអ៊ិនធើណែត ហើយចាក់បង្ហាញវីដេអូនេះ មុនចាប់ផ្ដើមថ្នាក់ ) ។ សូមឲ្យសិស្សអានតាមនៅក្នុង លូកា ៤:១៦-២៤ នៅពេលគេមើលវីដេអូ ។

បន្ទាប់ពីមើលរួច សូមសួរ ៖

តើអ្នកនឹងសង្ខេបសារលិខិតរបស់ព្រះអង្គសង្គ្រោះនៅក្នុងស្រុកណាសារ៉ែតនាថ្ងៃនោះយ៉ាងដូចម្ដេច ? ( នៅពេលសិស្សឆ្លើយ សូមប្រាកដថា ការពិភាក្សានេះផ្ដោតទៅលើ ខទី ១៨ និង ខទី ២១ ) ។
តើអ្នកគិតថា អ្វីសំខាន់ក្នុងឃ្លា « ទ្រង់បានចាក់ប្រេងតាំងខ្ញុំ » និង « បទគម្ពីរនេះបានសម្រេចនៅត្រចៀកអ្នករាល់គ្នាហើយ ?» ( ដើម្បីជួយសិស្សឲ្យយល់ថា ព្រះមែស៊ី និង ព្រះគ្រីស្ទ ទាំងពីរមានន័យថា « ចាក់ប្រេងតាំង » សូមឲ្យពួកគេអានការផ្ដើមអំពី « មែស៊ី » នៅក្នុង សេចក្តីណែនាំដល់បទគម្ពីរទាំងឡាយ ( សូមមើល scriptures.lds.org ) ។
តើព្រះយេស៊ូវបានបំពេញការព្យាករណ៍ពីគម្ពីរអេសាយ ដែលទ្រង់បានដកស្រង់នោះដោយរបៀបណា ( សូមមើល ខទី ១៨–១៩ ) ?

ម៉ាថាយ ២១:១–១១

ព្រះយេស៊ូវគ្រីស្ទ បានយាងមកជាព្រះមែស៊ី

សូមបង្ហាញ ឬ ចម្លងបញ្ជីខាងក្រោមនៃវគ្គព្រះគម្ពីរដាក់លើក្ដារខៀន ហើយសូមឲ្យសិស្សជ្រើសរើសមួយ ឬពីរដើម្បីធ្វើការសិក្សា ។ នៅពេលសិស្សប្រៀបប្រដូច និងរកភាពផ្ទុយគ្នាពីវគ្គទាំងឡាយដែលពួកគេបានរើស សូមឲ្យពួកគេគិតអំពីមូលហេតុដែលវគ្គទាំងនេះត្រូវបានដាក់ក្នុងក្រុមជាមួយគ្នា ហើយតើវាបានបង្រៀនអ្វីខ្លះអំពីព្រះយេស៊ូវគ្រីស្ទ ។

អេសាយ ៧:១៤; ម៉ាថាយ ១:២១–២៣

មីកា ៥:២; លូកា ២:៤–៧

សាការី ៩:៩; ម៉ាថាយ ២១:៦–១១; យ៉ូហាន ១២:១២–១៥

ទំនុកតម្កើង ២២:១៦, ១៨; ម៉ាថាយ ២៧:៣៥

អេសាយ ៥៣:៩; ម៉ាថាយ ២៧:៥៩–៦០; យ៉ូហាន ១៩:១៨, ៣៨–៤២

សូមឲ្យសិស្សចែកចាយអ្វីដែលពួកគេបានរៀន ។ ( ទោះបីជាពួកគេអាចប្រើពាក្យសម្ដីខុសគ្នាក្ដី ក៏សិស្សគួរយល់ថា ព្រះយេស៊ូវគ្រីស្ទ បានមក បានរស់នៅ និងបានសុគតដើម្បីការបំពេញតាមការព្យាករណ៍អំពីព្រះមែស៊ី ) ។ សូមបញ្ជាក់ថា សេចក្ដីពិតនេះគឺជាអ្វីដែលព្រះអង្គសង្គ្រោះ បានប្រកាសនៅក្នុងស្រុកណាសារ៉ែត ។ សូមអាន លូកា ៤:២៨–២៩ ឮៗ ។ បន្ទាប់មក សូមសួរ ៖

តើប្រជាជននៅក្នុងសាលាជំនុំនៅឯស្រុកណាសារ៉ែត បានឆ្លើយតបទៅនឹងការផ្សាយដំណឹងល្អរបស់ព្រះយេស៊ូវយ៉ាងដូចម្តេចដែរ ?

សូមប្រាប់សិស្សថា ពីរបីឆ្នាំក្រោយមក ព្រះយេស៊ូវបានជួបនឹងការឆ្លើយតបដ៏ខុសគ្នាមួយយ៉ាងខ្លាំង ពីប្រជាជនខ្លះនៅក្នុងទីក្រុងយេរូសាឡិម ។ សូមឲ្យសិស្សបីបួននាក់ប្ដូរវេនគ្នាអានឮៗពី ម៉ាថាយ ២១:១–១១ ។ មុនពេលសិស្សអាន សូមលើកទឹកចិត្តសិស្សឲ្យស្រមៃពីហេតុការណ៍ ដែលបានពិពណ៌នានៅក្នុងវគ្គនេះ ។ សូមពន្យល់ដល់សិស្សថា នៅពេលពួកគេរៀនស្រមៃពីអ្វីដែលបានកើតឡើងនៅក្នុងព្រះគម្ពីរ នោះពួកគេនឹងអនុញ្ញាតឲ្យព្រះវិញ្ញាណបរិសុទ្ធមានឱកាសបន្ថែម ដើម្បីបង្រៀនដល់ពួកគេ ។

ហេតុអ្វីបានជាប្រជាជននៅទីក្រុងយេរូសាឡិម បានឆ្លើយតបទៅតាមរបៀបដែលពួកគេធ្វើដូច្នោះ ? ( ពួកគេបានស្គាល់ថា ព្រះយេស៊ូវជាព្រះមែស៊ីដែលបានទន្ទឹងចាំជាយូរមកហើយ ) ។
តើអ្នកគិតថា អ្នកនឹងឆ្លើយតបដោយរបៀបណាដែរ ?

សូមបង្ហាញពាក្យ ហូសាណា នៅក្នុង ខទី ៩បន្ទាប់មក សូមចែកចាយនូវនិយមន័យខាងក្រោមនេះ ៖

« [ ហូសាណា គឺជា ] ពាក្យមួយចេញពីភាសាហេព្រើរ ដែលមានន័យថា ‹ សូមសង្គ្រោះយើង › ហើយត្រូវបានប្រើដើម្បីសរសើរ និងដើម្បីបួងសួង ។

« … នៅពេលការយាងមកដល់ដ៏ជោគជ័យរបស់ព្រះអម្ចាស់ក្នុងទីក្រុងយេរូសាឡិម នោះហ្វូងមនុស្សបានស្រែកយំថា ‹ ហូសាណា › ហើយបានរាយមែកដើមឈើជាច្រើនដើម្បីឲ្យព្រះយេស៊ូវទ្រង់ជិះលើ ហេតុដូច្នេះហើយវាបង្ហាញអំពីការយល់ដឹងថា ព្រះយេស៊ូវគឺដូចគ្នានឹងព្រះអម្ចាស់ ដែលបានដោះលែងពួកសាសន៍អ៊ីស្រាអែលពីបុរាណ (ទំនុកតម្កើង ១១៨:២៥–២៦; ម៉ាថាយ ២១:៩, ១៥; ម៉ាកុស ១១:៩–១០; យ៉ូហាន ១២:១៣ ) ។ ប្រជាជនទាំងនេះបានទទួលស្គាល់ ព្រះយេស៊ូវគ្រីស្ទ ថាជាព្រះមែស៊ីដែលបានទន្ទឹងចាំជាយូរមកហើយ ។ ពាក្យ ហូសាណា បានក្លាយជាការប្រារព្ធមួយអំពីព្រះមែស៊ី នៅក្នុងជំនាន់ទាំងឡាយ ( នីហ្វៃទី ១ ១១:៦; នីហ្វៃទី ៣ ១១:១៤–១៧ ) ។ ការស្រែកហូសាណា ត្រូវបានបញ្ចូលនៅក្នុងការឧទ្ទិសនៅឯព្រះវិហារបរិសុទ្ធនៃទីក្រុងខឺតឡង់ ( គ និង ស ១០៩:៧៩ ) ហើយឥឡូវនេះ វាជាផ្នែកមួយនៃការឧទ្ទិសដល់ព្រះវិហារបរិសុទ្ធសម័យទំនើប » ( សេចក្តីណែនាំដល់បទគម្ពីរទាំងឡាយ « ហូសាណា »; scriptures.lds.org ) ។

សូមគិតពីការបង្ហាញគោលបំណងដូចខាងក្រោមនេះ អំពីការព្យាករណ៍នៃព្រះមែស៊ី ( កែសម្រួលពី ប្រូស៍ អ័រ ម៉ាក់ខន់ឃី The Promised Messiah: The First Coming of Christ [ ឆ្នាំ ១៩៧៨ ] ទំព័រ ២៨–៣២ ) ៖

ការព្យាករណ៍នៃព្រះមែស៊ី ធ្វើឲ្យមានការរស់នៅទាំងនោះ មុនពេលការប្រសូតរបស់ព្រះយេស៊ូវគ្រីស្ទ ដើម្បីឲ្យពួកគេមានសេចក្ដីជំនឿលើទ្រង់ ដូច្នេះវានឹងជួយដល់ពួកគេឲ្យទទួលបានសេចក្ដីសង្គ្រោះ ( សូមមើល នីហ្វៃទី ១ ១០:៤–៦; នីហ្វៃទី ២ ២៥:១៨–២០, ២៦; ម៉ូសាយ ៣:១៣ ) ។

ការព្យាករណ៍នៃព្រះមែស៊ី ធ្វើឲ្យអស់អ្នកដែលរស់នៅទាំងនោះ នៅជំនាន់ព្រះគ្រីស្ទ ទទួលស្គាល់ថា ទ្រង់គឺជាការបំពេញនៃអស់ទាំងការព្យាការណ៍ ហេតុដូច្នេះហើយ វាជួយដល់ពួកគេឲ្យទទួលបានសេចក្ដីសង្គ្រោះ ( សូមមើល យ៉ូហាន ៤:២៥, ២៩ ) ។

ការព្យាករណ៍នៃព្រះមែស៊ីជួយដល់អស់អ្នកដែលរស់នៅក្រោយពីការបម្រើក្នុងជីវិតរមែងស្លាប់របស់ព្រះយេស៊ូវគ្រីស្ទ ឲ្យដឹងថា ទ្រង់គឺជាការបំពេញនៃអស់ទាំងការព្យាការណ៍ ហេតុដូច្នេះហើយ វាជួយដល់ពួកគេឲ្យទទួលបានសេចក្ដីសង្គ្រោះ ( សូមមើល កិច្ចការ ៣:១២–១៨; ២៦:២២–២៣ ) ។

នៅពេលអ្នកពិចារណាពីគោលបំណងទាំងបីនេះ តើវាអាចផ្ដល់ប្រយោជន៍ដល់អ្នក ឲ្យរៀនស្គាល់អំពីការព្យាករណ៍នៃព្រះមែស៊ីទាំងឡាយនៅក្នុងព្រះគម្ពីរ និងដើម្បីឃើញព្រះគ្រីស្ទ ថាជាការបំពេញនៃអស់ទាំងការព្យាការណ៍ទាំងនោះដោយរបៀបណា ?

យ៉ូហាន ៦:៥–៦៩

ការធ្វើតាមព្រះយេស៊ូវគ្រីស្ទ ជាព្រះមែស៊ី

សូមបញ្ជាក់ប្រាប់ម្ដងទៀតថា ពួកសាសន៍យូដានៅជំនាន់អំឡុងពេលព្រះគម្ពីរសញ្ញាថ្មី បានជឿលើព្រះមែស៊ី ថាទ្រង់នឹងមកនៅថ្ងៃមួយចេញពីពូជរបស់ដាវីឌ ដើម្បីសង្គ្រោះប្រជាជនរបស់ទ្រង់ ។ មនុស្សជាច្រើនបានជឿថា ទ្រង់នឹងដោះលែងពួកគេចេញពីទាសភាពរបស់ពួកសាសន៍រ៉ូម៉ាំង គឺដូចជាព្រះយេហូវ៉ាបានដោះលែងពួកសាសន៍អ៊ីស្រាអែលចេញពីប្រទេសអេស៊ីព្ទ ។

សូមឲ្យសិស្សមើលត្រួសៗយ៉ាងលឿននូវដំណើររឿងនៅក្នុង យ៉ូហាន ៦:៥–១៥ ។ សូមសួរ ៖

តើព្រះយេស៊ូវបានសម្ដែងអព្ភូតហេតុអ្វីនៅក្នុងដំណើររឿងនេះ ?
តើអ្នកនឹងរៀបរាប់ពីប្រតិកម្មរបស់ប្រជាជននៅក្នុង ខទី១៤–១៥ដោយរបៀបណា ?
តើអ្នកគិតថា ហេតុអ្វីបានជាពួកគេបានឆ្លើយតបតាមរបៀបនេះទៅវិញ ?

សូមចែកចាយការយល់ឃើញខាងក្រោមពីអែលឌើរ ប្រ៊ូស អរម៉ាក់ខន់ឃី ( ឆ្នាំ ១៩១៥–៨៥ ) នៃកូរ៉ុមនៃពួកសាវកដប់ពីរនាក់ ៖

« មានប្រពៃណីមួយ ដែលត្រូវបានបង្រៀនដោយពួកពួកអាចារ្យ និងត្រូវបានការពារយ៉ាងមុតមាំនៅក្នុងផ្នត់គំនិតទូទៅថានៅពេលព្រះមែស៊ីបានមក ទ្រង់នឹងផ្ដល់នំប៉័ងដល់ពួកគេមកពីស្ថានសួគ៌ » ( The Mortal Messiah, វ៉ុល ៤ [ ឆ្នាំ ១៩៧៩–៨១ ] ២:៣៦៧ ) ។

សូមពន្យល់ថា គឺស្ទើរតែដូចទៅនឹងពេលដែលព្រះយេហូវ៉ាបានឲ្យកូនចៅសាសន៍អ៊ីស្រាអែលបរិភោគនំម៉ាន៉ាដែរ ( សូមមើល និក្ខមនំ ១៦ ) នៅពេលដែលព្រះយេស៊ូវបានប្រទាននំប៉័ងប្រាំដុំ និងត្រីពីរដល់ហ្វូងមនុស្ស នោះមានមនុស្សជាច្រើនបានបកប្រែអព្ភូតហេតុរបស់ទ្រង់ថាជា ទីសម្គាល់មួយថា ទ្រង់គឺជាព្រះមែស៊ី ។

សូមអញ្ចើញឲ្យសិស្សពីរបីនាក់ប្ដូរវេនគ្នាអានឮៗពី យ៉ូហាន ៦:៣១–៣២, ៤៩–៥៣, ៦០, ៦៦។ សូមឲ្យសិស្សក្នុងថ្នាក់ស្ដាប់តាម ដោយរកមើលពីរបៀបដែលប្រជាជនឆ្លើយតបទៅនឹងព្រះយេស៊ូវនៅថ្ងៃបន្ទាប់ និងរបៀបដែលទ្រង់បានឆ្លើយតបទៅនឹងពួកគេ ។

តើអ្នកគិតថា ហេតុអ្វីបានជាពួកគេជាច្រើនបានបដិសេធព្រះយេស៊ូវនៅថ្ងៃនោះ ?
តើពួកគេបានខកខានមិនបានយល់អ្វី ? ( ព្រះយេស៊ូវគឺជាប្រភពនៃជីវិតខាងវិញ្ញាណ ទ្រង់គឺជានំប៉័ងជីវិត ) ។

សូមឲ្យសិស្សម្នាក់អាន យ៉ូហាន ៦:៦៧–៦៩ ឮៗ ។ បន្ទាប់មក សូមសួរសិស្ស ៖

តើទីបន្ទាល់របស់ពេត្រុសនៅក្នុង ខទី ៦៩ បានបញ្ជាក់នូវអ្វីខ្លះ ?
តើទីបន្ទាល់របស់ពេត្រុសអំពីព្រះអង្គសង្គ្រោះ បានជះឥទ្ធិពលដល់ជីវិតរបស់លោកយ៉ាងដូចម្ដេច ?

សូមសរសេរប្រយោគមិនពេញលេញខាងក្រោមនេះនៅលើក្ដារខៀន ហើយសូមឲ្យសិស្សពន្យល់ពីរបៀបដែលពួកគេនឹងបំពេញវា ៖ ប្រសិនបើយើងទទួលយកព្រះយេស៊ូវគ្រីស្ទ ថាជាព្រះមែស៊ី នោះ _________________________ ។

ក្រោយពីមានចម្លើយពីរបីហើយ សូមអញ្ជើញសិស្សម្នាក់ឲ្យអានសេចក្ដីថ្លែងការណ៍ខាងក្រោមដោយប្រធាន ដេវីឌ អូ មិកឃេ ( ឆ្នាំ ១៨៧៣-១៩៧០ ) ឮៗ ៖

« អ្វីដែលអ្នកគិតនៅក្នុងចិត្តដោយស្មោះអំពីព្រះគ្រីស្ទ នឹងសម្រេចថាអ្នកជានរណា វានឹងសម្រេចពីទង្វើដែលអ្នកនឹងធ្វើភាគច្រើន ។ គ្មាននរណាម្នាក់អាចសិក្សាពីលក្ខណៈដ៏ទេវភាពនេះ អាចទទួលយកការបង្រៀនរបស់ទ្រង់ ដោយមិនដឹងពីឥទ្ធិពលដ៏លើកតម្កើង និងបន្សុទ្ធនេះនៅក្នុងខ្លួនគេនោះទេ »(Teachings of Presidents of the Church: David O. McKay [ ២០០៣ ], ទំព័រ ៧ ) ។

សូមផ្ដល់ពេលវេលាដល់សិស្សកត់ត្រានូវអ្វីដែលពួកគេគិតអំពីព្រះគ្រីស្ទ ។ សូមឲ្យសិស្សពីរបីនាក់ចែកចាយអ្វីដែលពួកគេបានសរសេរ ។

សូមលើកទឹកចិត្តសិស្សឲ្យសញ្ជឹងគិតអំពីអ្វីដែលពួកគេអាចធ្វើ នៅសប្ដាហ៍នេះ ដើម្បីបង្ហាញពីជំនឿរបស់ពួកគេលើព្រះយេស៊ូវគ្រីស្ទ ។

ការអានរបស់សិស្ស

ម៉ាថាយ ២១:១–១១; លូកា ៤:១៦–២៤; យ៉ូហាន ៦:៥–១៥, ៣១–៣២, ៤៩–៥៣, ៦៦–៦៩ ។
ជី ហូមើរ ដួរ៉ាម « Jesus the Christ: The Words and Their Meaning » Ensign, ខែ ឧសភា ឆ្នាំ ១៩៨៤ ទំព័រ ១៤–១៦ ។