Lesona 9
O Le Faatosinaga Maoae a le Faaola
Folasaga
I le “O Le Keriso Soifua: O Le Molimau a le Au Aposetolo,” Na folafola mai e taitai o le Ekalesia: “Matou te tuuina atu la matou molimau i le moni o Lona [le Faaola] soifua le mafaatusalia ma le aoga e le gata mai o Lana taulaga togiola sili. E leai lava se isi ua i ai se aafiaga matua loloto na’uā o i latou uma na soifua ma o le a soifua ai i luga o le fogaeleele” (Ensign po o le Liahona, Ape. 2000, 2) O lenei lesona o le a faaalia ai o le Faaola e le mafaatusalia aua, faatasi ai ma isi mafuaaga, o Ia e leai se agasala ma e atoatoa le usiusitai i le Tama Faalelagi. E ala i le suesueina o Lana talanoaga ma le fafine i le vaieli, o le a iloa ai foi e tamaiti aoga le faatosinaga maoae e mafai ona Ia tuuina atu i soo se tasi e tatalaina atu o latou loto ia te Ia.
Fautuaga mo le Aoaoina Atu
Mataio 4:1–11; 2 Korinito 5:21; Eperu 2:17–18; 4:15–16; Mataupu Faavae ma Feagaiga 20:22
Sa soifua Iesu Keriso i se olaga e leai se agasala
Amata le vasega i le tusiina i le laupapa le lo’u loto ma le finagalo o le Atua. Valaaulia se tamaitiiti aoga e faitau leotele le Ioane 6:38, ma fai atu i tamaiti aoga e mulimuli i ai, ma vaai pe fia ni faaiuga o “lo’u loto” na faia e Iesu. Valaaulia tamaiti aoga e mafaufau filemu pe fia ni faaiuga na latou faia talu ai nei e mafai ona faatulagaina o “lo’u loto” ma e fia e mafai ona faatulagaina o “finagalo o le Atua.”
Tau atu i tamaiti aoga ina ua maea Lona papatisoga, na faaosoosoina Iesu e Satani e faia ni mea e mafai ona faatulagaina o “lo’u loto.” Fai atu i nai tamaiti aoga e feauauai i le faitauina leotele o le Mataio 4:1–11. Valaaulia le vasega e mulimuli i ai, ma vaavaai pe na faapefea ona manumalo Iesu Keriso i faaosoosoga. (Mafaufau e faasino i tamaiti aoga o le Faaliliuga a Iosefa Samita o le Mataio 4:1–11 ua faamanino mai ai o le Agaga, e le o Satani, lea na aveina Iesu i le tumutumu o le malumalu [tagai i le fuaiupu 5] ona sosoo ai lea ma le mauga maualuga [tagai i le fuaiupu 8]. Ina ua uma ona ave e le Agaga Iesu i nei nofoaga, na sau le tiapolo e faaosooso o ia.)
-
O le a se mea na e matauina e uiga i le ala na tali atu ai le Faaola i faaosoosoga a Satani?
-
O le a se mea ua e aoaoina mai le faataitaiga a le Faaola i nei fuaiupu?
-
E faapefea ona tutusa faaosoosoga na feagai ma le Faaola ma [faaosoosoga] o loo feagai mai tatou i o tatou olaga?
Faaali atu ma faitau le faamatalaga lenei mai ia Peresitene Tavita O. Makei (1873–1970), lea na saunoa i faaosoosoga na feagai ma Iesu i le vao:
“E toeitiiti lava o faaosoosoga uma e oo mai ia te oe ma au e oo mai i se tasi o na tulaga. Faavasega faaosoosoga, ma o le a e iloa ai o lalo o se tasi o na vaega e tolu e toeitiiti lava o faaosoosoga uma e faia e oe ma au ina ia pona ai, po o le a lava le laitiiti e i ai, e oo mai ia i tatou o (1) se faaosoosoga o meaai; (2) se fiafiaga i le faamaualuga ma tifiga ma le lotomaualuga o i latou ua taumamao mai mea a le Atua; po o (3) se manaoga o le tuinanau, po o se manao mo oa a le lalolagi, po o le mana i tagata” (“Unspotted from the World,” Ensign, Aug. 2009, 27).
Valaaulia se tamaitiiti aoga e faitau leotele le Eperu 2:17–18; 4:15–16. Fai atu i se isi tamaitiiti aoga e faitau leotele le Mataupu Faavae ma Feagaiga 20:22. Fai i le vasega e mulimuli i ai ma tusi ni mea e tutusa ai fuaitau e lua. Ona fesili atu lea o fesili nei:
-
Aisea na manaomia ai le oo o Iesu i faaosoosoga?
-
Aisea e taua ai mo i tatou le malamalama na aafia foi Iesu Keriso i faaosoosoga lava ia o loo feagai mai tatou i aso nei?
Tau atu i tamaiti aoga o se tasi o faamoemoega o le lesona i le aso lenei o le faailoaina lea o le soifuaga le mafaatusalia o le Faaola. Fesili atu i le vasega pe faapefea ona faaalia se tasi o vaega o le soifuaga le mafaatusalia o le Faaola i fuaitau o mau ua uma ona suesueina i le lesona. (E tatau i tamaiti aoga ona faailoa mai le mataupu faavae lenei: Sa soifua Iesu Keriso i se soifuaga le mafaatusalia aua Na te lei toilalo i faaosoosoga ma agasala ai.)
Faaali atu le faamatalaga lenei mai ia Peresitene Howard W. Hunter (1907–95), ma fai atu i se tamaitiiti aoga e faitau leotele:
“E taua le manatua sa mafai lava ona agasala Iesu, sa mafai lava ona ia gauai atu i le agasala, ma semanu o le fuafuaga o le olaga ma le faaolataga o le a le taulau, ae na ia tumau i le faamaoni. Pe ana leai se avanoa na te taliaina ai faaosoosoga a Satani, semanu e leai se tofotofoga moni, leai se manumalo moni. … Sa atoatoa o Ia ma leai se agasala, e le ona sa tatau ona ia faapea, ae nai lo o lena, na manino lava ma naunau e manao ia avea ai”(“The Temptations of Christ,” Ensign, Nov. 1976, 19).
Valaaulia tamaiti aoga e faitau lemu le Luka 22:42, 44 ma le 3 Nifae 11:11, ma vaavaai mo se uiga o Iesu Keriso o se isi faataitaiga o Lona soifuaga le mafaatusalia. (E tatau i tamaiti aoga ona faailoa mai le usiusitai o le Faaola i le finagalo o le Tama.)
Faaali atu le fuaitau lenei mai ia Peresitene Ezra Taft Benson (1899–1994), ma valaaulia se tamaitiiti aoga e faitau leotele:
“Na Ia puapuagatia i tiga o tagata uma i Ketesemane ina ia latou le puapuagatia pe afai latou te salamo.
“Na Ia tuuina atu o Ia lava ia faalumaina ma upuleagaina mai i Ona fili e aunoa ma se faitio po o se taui ma sui.
“Ma mulimuli lava, na Ia onosaia le agiagia ma le matautia o le maasiasi o le satauro. Ua na o le taimi lea na Ia tuuina atu ai o Ia lava i le oti. …
“Sa Ia usiusitai atoatoa i lo tatou Tama Faalelagi” (“Jesus Christ: Our Savior and Redeemer,” Ensign, Nov. 1983, 7, 8).
Toe tulitatao e ala i le fai atu o fesili nei:
-
I le ata o le faaolataga a le Tama Faalelagi, aisea na manaomia ai mo Iesu ina ia atoatoa i le leai o se agasala ma usiusitai atoatoa i le finagalo o le Tama Faalelagi? (Atonu e tuuina mai e tamaiti aoga ni tali eseese, ae e tatau ona latou faailoa mai le upumoni lenei: Na manaomia e le ata o le faaolataga Iesu ina ia usiusitai atoatoa ina ia mafai ai ona faatino le Togiola.)
-
E faapefea ona uunaia ai lou faatuatua ia Iesu Keriso i le iloa o Ia na le agasala ma usiusitai atoatoa i le finagalo o le Tama Faalelagi? (A o tali mai tamaiti aoga, faamamafa atu faapea e mafai ona tatou maua le malosi e manumalo ai i faaosoosoga ma ia usiusitai a o tatou mulimuli i le faataitaiga a Iesu Keriso e saili e faia le finagalo o le Tama nai lo le faia o o tatou loto.
Ioane 4:1–29
O le faatosinaga loloto a le Faaola
Tusi i le laupapa pe faaali atu le fuaiupu lenei mai le “O Le Keriso Soifua: O Le Molimau a le Au Aposetolo (Ensign po o le Liahona, Ape. 2000, 2):
“E leai lava se isi ua i ai se faatosinaga matua loloto na’uā o i latou uma na soifua ma o le a soifua ai i luga o le fogaeleele.”
Valaaulia tamaiti aoga e mafafau loloto i lenei fuaitau i le fai atu o fesili nei:
-
O fea o uiga faaalia o Iesu Keriso na mafai ai e Ia ona maua lea ituaiga faatosinaga i e uma na soifua ma o le a soifua mai?
Tau atu i tamaiti aoga o se tasi o tagata sa maoae le faatosinaina e Iesu i Lana galuega i le olaga nei o le fafine Samaria. Fesoasoani i tamaiti aoga e faaaoga fesoasoani i suesuega i a latou tusitusiga paia e sue ai faamatalaga e uiga i tagata Samaria (tagai i le Taiala i Tusitusiga Paia, “Samaria”; scriptures.lds.org). Aotele le Ioane 4:1–8, ona fai atu lea i se tamaitiiti aoga e faitau leotele le Ioane 4:9. Faasino atu le ala na faaalia ai e le tali a le fafine ia Iesu feteenaiga na i ai i le va o tagata Iutaia ma Samaria i lena taimi. Ona fai atu lea i tamaiti aoga e faitau le leoa le Ioane 4:10–15. A uma se taimi talafeagai, fai atu fesili nei:
-
O le a faapefea ona e faatulagaina le talanoaga i le va o Iesu ma le fafine?
-
O le a le mea na ofoina atu e Iesu ia te ia?
Fai atu i se tamaitiiti aoga e faitau leotele le Ioane 4:16–19 a o mulimuli i ai le vasega ma vaai faalemafaufau pe mata e faapei le avea ma fafine i lenei talanoaga. (Manatua: O le vaai faalemafaufau e mafai ona fesoasoani e faia le tala i tusitusiga paia ia sili atu le anoa ma moni.) Ona fesili atu lea o fesili nei:
-
O a ni manatu semanu e te maua pe ana faapea o oe o le fafine Samaria? Aisea?
-
O le a se faamaoniga o loo i ai iina sa i ai se faatosinaga a Iesu ia te ia? (Faasino atu le alualu i luma o suafa na tau atu e le fafine ia te Ia: “Iutaia” [fuaiupu 9]; “Alii” [fuaiupu 11, 15]; ma le “perofeta” [fuaiupu 19].)
Valaaulia ni nai tamaiti aoga e feauaua’i i le faitauina leotele mai o le Ioane 4:20–29. Fai atu i le vasega e faailoa mai suafa mo le Faaola i fuaiupu 25 ma le fuaiupu 29. Ona fai atu lea i tamaiti aoga e mafaufau puupuu a o lei taliina le fesili lenei:
-
O a mea na faia e le Faaola i le taimi puupuu lea na suia ai le vaaiga a le fafine ia te Ia i le avea ma “le Iutaia” (fuaiupu 9) i le avea ma “le Keriso” (fuaiupu 29)? (Valaaulia tamaiti aoga e faasoa mai mea na latou matauina i nei fuaitau. O tali e ono aofia ai mea nei: Na Ia faaalia le faaaloalo ia te ia, na Ia aoaoina o ia i aoaoga faavae, na Ia aoaoina o ia i se auala na mafai ai e le Agaga Paia ona molimau atu ia te ia, na Ia faaali atu ia te ia mea lilo e uiga ia te ia, ma na Ia taulai atu lona manatu ia te ia.)
-
O a mea ua aoao mai e le tala i le Faaola ma le fafine Samaria e uiga i lagona o le Faaola ia te oe ma le faatosinaga e mafai ona Ia faia ia te oe?
-
Na faapefea ona e vaaia le faatosinaga a le Faaola i lou olaga, po o le olaga o se tasi e te iloaina? O a ni aafiaga na i ai i le faatosinaga a le Faaola?
-
O le a se mea o le a e tautino atu e fai ina ia faigofie ai ona iloa le faatosinaga a le Faaola i lou olaga ma faatagaina Lana faatosinaga e suia oe?
Molimau atu faapea a o tatou liliu atu o tatou olaga i le Faaola, o le a i ai Lana faatosinaga maoae ia i tatou. O le faatosinaga silisili o le Faaola e tupu a o tatou valaaulia le mana o Lana taulaga togiola e faamamaina i tatou, siitia i tatou, ma liua i tatou. Uunaia tamaiti aoga e mafaufau loloto po o le a le mea e mafai ona latou faia e faaalia ai le agaga faafetai i le Faaola ma Lana faatosinaga i o latou olaga. Valaaulia i latou e fai le mea ua latou lagonaina.