« យ៉ាកុប និង អេសាវ » ដំណើររឿងព្រះគម្ពីរសញ្ញាចាស់ ( ឆ្នាំ ២០២២ )
« យ៉ាកុប និង អេសាវ » ដំណើររឿងព្រះគម្ពីរសញ្ញាចាស់
លោកុប្បត្តិ ២៥–២៧
យ៉ាកុប និងអេសាវ
បងប្អូនប្រុសពីរនាក់ និងអំណាចមរតកកូនច្បង
អ៊ីសាក និង រេបិកា មានកូនប្រុសភ្លោះពីរនាក់ គឺមានឈ្មោះថា យ៉ាកុប និង អេសាវ ។ អេសាវ មានជំនាញជាអ្នកប្រមាញ់ ។ យ៉ាកុប បានរស់នៅជីវិតសាមញ្ញៗ ហើយធ្វើតាមព្រះអម្ចាស់ ។
អេសាវ ជាកូនច្បង ។ ជាធម្មតា កូនច្បងបានទទួលពរជ័យអំណាចមរតកកូនច្បងមកពីឪពុករបស់ខ្លួន ។ អំណាចមរតកកូនច្បងមានន័យថា គាត់នឹងដឹកនាំក្រុមគ្រួសារ ហើយមានដី សត្វពាហៈនៈដើម្បីជួយថែរក្សាក្រុមគ្រួសារ ។ ប៉ុន្តែ អេសាវ បានខ្វល់ខ្វាយតែពីខ្លួនគាត់ មិនខ្វល់ពីក្រុមគ្រួសារ និងមិនគោរពឪពុកម្តាយ ហើយនិងព្រះអម្ចាស់ឡើយ ។
លោកុប្បត្តិ ២៥:២៥, ៣២; ២៦:៣៤–៣៥
នៅថ្ងៃមួយ អេសាវ ត្រឡប់មកពីបាញ់សត្វវិញ ។ គាត់ឃ្លានខ្លាំងណាស់ ហើយបានសុំយ៉ាកុប ឲ្យគាត់ហូបផង ។ ព្រះអម្ចាស់សព្វព្រះទ័យឲ្យយ៉ាកុប មានពរជ័យអំណាចមរតកកូនច្បងនេះ ពីព្រោះអេសាវ មិនមានភាពស័ក្តិសមទទួលវាឡើយ ។ យ៉ាកុប បានសុំ អេសាវ ឲ្យលក់អំណាចមរតកកូនច្បងឲ្យគាត់ដើម្បីដូរយកអាហារ ។ អេសាវ យល់ព្រម ហើយក៏បានលក់អំណាចមរតកកូនច្បងរបស់គាត់ទៅឲ្យយ៉ាកុប ។
លោកុប្បត្តិ ២៥:២៣, ២៩–៣៤; ហេព្រើរ ១១:២០
រេបិកា និង អ៊ីសាក ចង់បានអ្វីដែលល្អបំផុតសម្រាប់កូនៗរបស់ពួកគាត់ ។ ពួកគាត់សោកស្តាយដែលអេសាវ បានបន្តធ្វើអ្វីដែលគាត់ចង់ធ្វើ ហើយមិនស្តាប់តាមអ្វីដែលព្រះអម្ចាស់សព្វព្រះទ័យឲ្យគាត់ធ្វើ ។
អ៊ីសាក ចាស់ឡើង ហើយក៏ពិការភ្នែក ។ ពីមុនលោកទទួលមរណភាព លោកបានសុំឲ្យអេសាវ ទៅបរបាញ់សត្វ និងចម្អិនសត្វឲ្យលោកបរិភោគ ហើយបានរីករាយ ។
រេបិកា បានដឹងថា ដល់ពេលដែលអ៊ីសាក ត្រូវឲ្យពរជ័យនៃអំណាចមរតកកូនច្បងហើយ ។
រេបិកា បានប្រាប់ឲ្យយ៉ាកុប ទៅរកសត្វពីរក្បាលមក ដើម្បីគាត់អាចចម្អិនអាហារពីមុន អេសាវ ត្រឡប់មកវិញ ។ បន្ទាប់មក យ៉ាកុប នឹងទទួលពរជ័យនេះ ។
យ៉ាកុប ស្លៀកពាក់ដូចជា អេសាវ ហើយយកអាហារទៅជូនឪពុករបស់គាត់ ។ អ៊ីសាក ផ្តល់ពរជ័យអំណាចមរតកកូនច្បងដល់យ៉ាកុប ។ នៅពេល អេសាវ ត្រឡប់មកវិញ គាត់បានខឹងនឹង យ៉ាកុប យ៉ាងខ្លាំង ។ ប៉ុន្តែអំណាចមរតកកូនច្បង បានទៅដល់ យ៉ាកុប ពីព្រោះ គាត់បានកាន់តាមព្រះបញ្ញត្តិរបស់ព្រះអម្ចាស់ ហើយអេសាវ មិនបានរក្សាឡើយ ។