បុព្វកថានៃ ការបង្រៀន និងគោលលទ្ធិនៃព្រះគម្ពីរមរមន សៀវភៅសិក្សាសម្រាប់គ្រូបង្រៀន ( សាសនា ២៧៥ )

បុព្វកថានៃ ការបង្រៀន និងគោលលទ្ធិនៃព្រះគម្ពីរមរមន សៀវភៅសិក្សាសម្រាប់គ្រូបង្រៀន ( សាសនា ២៧៥ )

តើអ្វីដែលត្រូវបានរំពឹងពីគ្រូបង្រៀនសាសនាម្នាក់ ?

នៅពេលអ្នករៀបចំបង្រៀន វាគឺជាការណ៍សំខាន់ដើម្បីយល់ពីកម្មវត្ថុនៃថ្នាក់សិក្ខាសាលា និងថ្នាក់វិទ្យាស្ថាននៃសាសនា ៖

« គោលបំណងរបស់យើង គឺដើម្បីជួយយុវវ័យ និងយុវមជ្ឈិមវ័យឲ្យយល់ និងពឹងផ្អែកលើការបង្រៀន និងដង្វាយធួនរបស់ព្រះយេស៊ូវគ្រីស្ទ ឲ្យមានភាពសក្តិសមសម្រាប់ពរជ័យទាំងឡាយនៃព្រះវិហារបរិសុទ្ធ ហើយរៀបចំខ្លួនពួកគេ ក្រុមគ្រួសារពួកគេ និងអ្នកដទៃទៀត សម្រាប់ជីវិតដ៏នៅអស់កល្បជានិច្ចជាមួយនឹងព្រះវរបិតារបស់ពួកគេដែលគង់នៅឋានសួគ៌ » ( ការបង្រៀន និងការរៀនដំណឹងល្អ ៖ ក្បួនខ្នាតសម្រាប់គ្រូបង្រៀន និងអ្នកដឹកនាំថ្នាក់សិក្ខាសាលា និង ថ្នាក់វិទ្យាស្ថាននៃសាសនា ( ឆ្នាំ ២០១២ ) ទំព័រ x ] ) ។

អ្នកអាចសម្រេចគោលបំណងនេះបាន ដោយការរស់នៅតាមដំណឹងល្អយ៉ាងឧស្សាហ៍ព្យាយាម បង្រៀនដំណឹងល្អដល់សិស្សរបស់អ្នកដោយមានប្រសិទ្ធភាព និងចាត់ចែងថ្នាក់ ឬកម្មវិធីរបស់អ្នកដោយសមរម្យ ។ នៅពេលអ្នករៀបចំ និងបង្រៀនដំណឹងល្អតាមរបៀបនេះ អ្នកនឹងមានភាពសក្ដិសមដើម្បីទទួលព្រះចេស្តានៃព្រះវិញ្ញាណបរិសុទ្ធ ( សូមមើល គ. និង ស. ៤២:១៤ ) ។

វាគឺជាឱកាសរបស់អ្នកដើម្បីជួយដល់សិស្សឲ្យរៀនដោយព្រះវិញ្ញាណ ដើម្បីឲ្យពួកគេអាចពង្រឹងដល់សេចក្ដីជំនឿរបស់ពួកគេ និងអាចឲ្យការប្រែចិត្តជឿរបស់ពួកគេកាន់តែរឹងមាំឡើង ។ អ្នកអាចជួយសិស្សឲ្យសម្រេចបានការណ៍នេះ នៅពេលអ្នកដឹកនាំពួកគេឲ្យរកមើល យល់ មានអារម្មណ៍ពីសេចក្ដីពិត និងពីសារៈសំខាន់ ក៏ដូចជាអនុវត្តតាមគោលលទ្ធិ និងគោលការណ៍ដ៏សំខាន់ទាំងឡាយនៃដំណឹងល្អរបស់ព្រះយេស៊ូវគ្រីស្ទ ។

សៀវភៅក្បួនខ្នាត ការបង្រៀន និង ការរៀនសូត្រដំណឹងល្អ គឺជាធនធានដ៏សំខាន់មួយក្នុងការយល់ពីដំណើរនៃការបង្រៀន និងការរៀនសូត្រ ព្រមទាំងរបៀបដើម្បីទទួលបានជោគជ័យនៅក្នុងថ្នាក់រៀន ។

តើអ្វីខ្លះជាកម្មវត្ថុ និងគោលបំណងនៃវគ្គសិក្សានេះ ?

វាត្រូវបានសន្មតថា សិស្សដែលមានអាយុក្នុងថ្នាក់វិទ្យាស្ថានជាច្រើនបានរៀនព្រះគម្ពីរមរមនតាមលំដាប់លំដោយពីមុនមក—តាំងពីដើមដំបូងដល់ចុងបញ្ចប់—នៅថ្នាក់សិក្ខាសាលា នៅផ្ទះ ឬនៅក្នុងបេសសកម្ម ។ វគ្គសិក្សា ការបង្រៀន និងគោលលទ្ធិនៃព្រះគម្ពីរមរមន ( សាសនា ២៧៥ ) នេះ គឺត្រូវបានរៀបចំឡើងដើម្បីជួយសិស្សឲ្យប្រើប្រាស់យុទ្ធសាស្ត្រផ្សេងគ្នាក្នុងការសិក្សាព្រះគម្ពីរមរមន ។ មេរៀនទាំងឡាយដែលមានក្នុងវគ្គសិក្សានេះ ផ្ដោតទៅលើប្រធានបទ ជាគោលលទ្ធិដែលលេចធ្លោទាំងឡាយ ដែលត្រូវបានសង្កត់ធ្ងន់ដោយអ្នកនិពន្ធនៃព្រះគម្ពីរមរមន ដែលប្រកបដោយការបំផុសគំនិត ។

ប្រធាន អ៊ែសរ៉ា ថាហ្វ ប៊ែនសឹន ( ឆ្នាំ ១៨៩៩-១៩៩៤ ) បានអញ្ជើញអ្នកអានព្រះគម្ពីរមរមន ឲ្យផ្តោតការយកចិត្តទុកដាក់របស់គេលើគោលលទ្ធិដែលមានក្នុងព្រះគម្ពីរនេះ ៖

« ព្រះគម្ពីរមរមនត្រូវបានសរសេរឡើងសម្រាប់ជំនាន់របស់យើង ។ … យើងមិនត្រឹមតែគប្បីដឹងពីរឿងប្រវត្តិសាស្ត្រ និងរឿងដែលលើកតម្កើងសេចក្ដីជំនឿអ្វីខ្លះ ដែលមាននៅក្នុងព្រះគម្ពីរនេះប៉ុណ្ណោះទេ តែយើងក៏គប្បីយល់ពីការបង្រៀនរបស់វាផងដែរ ។ បើយើងពិតជាបានធ្វើលំហាត់របស់យើង ហើយសិក្សាតាមបែបគោលលទ្ធិនៅក្នុងព្រះគម្ពីរមរមន នោះយើងអាចធ្វើឲ្យឃើញនូវកំហុសនានា ហើយស្វែងរកសេចក្ដីពិតដើម្បីតយុទ្ធនឹងទ្រឹស្ដី និងទស្សនៈខុសឆ្គងថ្មីៗទាំងឡាយរបស់មនុស្ស » ( « Jesus Christ—Gifts and Expectations » Ensign ខែ ធ្នូ ឆ្នាំ ១៩៨៨ ទំព័រ ៤ ) ។

ពេញមួយវគ្គសិក្សានេះ សិស្សនឹងសិក្សាពីការសរសេរ និងការបង្រៀនដែលប្រកបដោយការព្យាករ ដែលមាននៅក្នុងព្រះគម្ពីរមរមន ដោយមានការសង្កត់ធ្ងន់លើផែនការរបស់ព្រះវរបិតាសួគ៌ និងតួនាទីដ៏សំខាន់នៃព្រះរាជបុត្រារបស់ទ្រង់គឺព្រះយេស៊ូវគ្រីស្ទ ។ សិស្សនឹងយល់កាន់តែច្បាស់អំពីព្រះគម្ពីរមរមនថា ជាសក្ខីបទមួយទៀតនៃព្រះយេស៊ូវគ្រីស្ទ ហើយនឹងធ្វើឲ្យសេចក្ដីស្រឡាញ់របស់ពួកគេចំពោះទ្រង់ និងទីបន្ទាល់អំពីទ្រង់កាន់តែជ្រាលជ្រៅ ។ ពួកគេនឹងអភិវឌ្ឍសមត្ថភាពរបស់ខ្លួន ក្នុងការសិក្សាគោលលទ្ធិនៃដំណឹងល្អនៅក្នុងបរិបទខាងព្រះគម្ពីររបស់ពួកគេ ដែលនឹងនាំទៅកាន់ការយល់ដឹង និងភាពជាសិស្សផ្ទាល់ខ្លួនកាន់តែទូលំទូលាយខ្លាំងឡើង ។ ពួកគេនឹងត្រូវបានរៀបចំរួចជាស្រេចដើម្បីពន្យល់ និងថ្លែងទីបន្ទាល់អំពីសារៈសំខាន់ និងភាពដើមដ៏ទេវភាពនៃព្រះគម្ពីរមរមន និងគោលលទ្ធិដែលវាមាន ។

តើអ្វីដែលត្រូវបានរំពឹងពីសិស្ស ?

ដើម្បីទទួលបានពិន្ទុ ឆ្ពោះទៅទទួលសញ្ញាបត្រថ្នាក់វិទ្យាស្ថាន នោះសិស្សត្រូវតែអានវគ្គបទគម្ពីរ សុន្ទរកថាសន្និសីទទូទៅ និងឯកសារផ្សេងទៀតដែលមាននៅក្នុងផ្នែកនៃការអានរបស់សិស្សនៃមេរៀននីមួយៗ ។ សិស្សត្រូវតែបំពេញនូវតម្រូវការវត្តមាន ហើយបង្ហាញពីសមត្ថភាពក្នុងការរៀនវគ្គសិក្សានេះ ដោយបញ្ចប់ការវាយតម្លៃមួយ ។

តើមេរៀននៅក្នុងសៀវភៅណែនាំនេះ ត្រូវបានរៀបចំឡើងយ៉ាងដូចម្ដេច ?

វគ្គសិក្សានេះ ត្រូវបានរៀបចំឡើងជាវគ្គសិក្សាដែលមានរយៈពេលមួយឆមាស ដោយមាន ២៨ មេរៀន សម្រាប់ថ្នាក់រៀនដែលមានរយៈពេល ៥០ នាទី ។ ប្រសិនបើសិស្សរបស់អ្នកជួបជុំគ្នាពីរដងក្នុងមួយសប្ដាហ៍ សូមបង្រៀនមេរៀនមួយ ពេលបង្រៀនម្តងៗ ។ ប្រសិនបើសិស្សរបស់អ្នកជួបគ្នាតែម្ដងក្នុងមួយសប្ដាហ៍ រយៈពេលពី ៩០ ទៅ ១០០ នាទី សូមបញ្ចូលគ្នា និងបង្រៀនមេរៀនពីរពេលបង្រៀនម្តងៗ ។ គម្រោងមេរៀននីមួយៗ រួមមានបួនផ្នែក ៖

សេចក្ដីផ្ដើម
ការអានពីសាវតា
យោបល់សម្រាប់ការបង្រៀន
ការអានរបស់សិស្ស

សេចក្ដីផ្ដើម

ផ្នែកនេះផ្ដល់នូវសេចក្តីផ្ដើមដ៏ខ្លីមួយ ចំពោះប្រធានបទ និងកម្មវត្ថុទាំងឡាយនៃមេរៀន ។

ការអានពីសាវតា

ផ្នែកនេះ ផ្ដល់យោបល់អំពីធនធាន ដូចជាសារលិខិតមកពីព្យាការីថ្ងៃចុងក្រោយទាំងឡាយ និងថ្នាក់ដឹកនាំផ្សេងៗទៀតនៃសាសនាចក្រ ដែលអាចជួយដល់អ្នកឲ្យយល់កាន់តែច្បាស់អំពីគោលលទ្ធិ គោលការណ៍ និងសេចក្ដីពិតនៃដំណឹងល្អនានាដែលមាននៅក្នុងគម្រោងមេរៀន ។

យោបល់សម្រាប់ការបង្រៀន

ផ្នែកនៃយោបល់សម្រាប់ការបង្រៀន រួមមាននូវសម្ភារដើម្បីជួយដល់អ្នកឲ្យដឹងពីអ្វីដែលត្រូវបង្រៀនផង និងពីរបៀបដើម្បីបង្រៀនផង ( សូមមើលផងដែរ ចំណុច ៤.៣.៣ និង ៤.៣.៤ នៅក្នុង ក្បួនខ្នាត ការបង្រៀន និងរៀនសូត្រដំណឹងល្អ ) ។ សកម្មភាពរៀនសូត្រដែលបានផ្តល់ឲ្យ ត្រូវបានរៀបចំឡើងដើម្បីជួយសិស្សឲ្យរកមើល យល់ មានអារម្មណ៍ពីសេចក្ដីពិត និងសារៈសំខាន់ ហើយអនុវត្តសេចក្ដីពិតដ៏ពិសិដ្ឋទាំងឡាយ ។ អ្នកអាចជ្រើសរើសប្រើនូវយោបល់ដែលផ្តល់ឲ្យខ្លះ ឬទាំងអស់ នៅពេលអ្នកសម្របវាទៅតាមវិធីសាស្ត្រនៃការបង្រៀនផ្ទាល់ខ្លួនរបស់អ្នក និងដើម្បីបំពេញតាមតម្រូវការ និងតាមស្ថានភាពរបស់សិស្សអ្នក ។ នៅពេលអ្នកពិចារណពីរបៀបដើម្បីសម្របសម្ភារមេរៀនទាំងឡាយ សូមធ្វើតាមការប្រឹក្សានេះដែលមកពីអែលឌើរ ដាល្លិន អេក អូក ក្នុងកូរ៉ុមនៃពួកសាវកដប់ពីរនាក់ ៖

« ខ្ញុំស្ដាប់ឮប្រធាន ផាកកឺ លោកបានបង្រៀនជាញឹកញាប់ថា ដំបូងយើងត្រូវទទួលយក បន្ទាប់មកសម្របតាមវា ។ ប្រសិនបើយើងមានចំណេះយ៉ាងហ្មត់ចត់ចំពោះមេរៀនដែលបានរៀបចំទុកមុនដែលយើងត្រូវបង្រៀន នោះយើងនឹងអាចធ្វើតាមព្រះវិញ្ញាណដើម្បីសម្របតាមវាបាន ។ ប៉ុន្ដែមានការល្បួងមួយ ឲ្យចាប់ផ្ដើមវាដោយការសម្របតាម ជាជាងការទទួលយក នៅពេលដែលយើងនិយាយអំពីការចេះបត់បែននេះ ។ វាគឺជាតុល្យភាពមួយ ។ វាជាឧបសគ្គដ៏ឥតឈប់ឈរមួយ ។ ប៉ុន្ដែវិធានការនៃការទទួលយកជាដំបូង ហើយបន្ទាប់មកសម្របតាម គឺជារបៀបដ៏ល្អមួយដើម្បីមានជំហរឈរនៅលើគោលការណ៍ដ៏រឹងមាំមួយ » ( « ការពិភាក្សាជាក្រុមមួយជាមួយនឹង អែលឌើរ ដាល្លិន អេក អូក » [ ការចាក់ផ្សាយតាមផ្កាយរណបនៃថ្នាក់សិក្ខាសាលា និងថ្នាក់វិទ្យាស្ថាននៃសាសនា ថ្ងៃទី ៧ ខែ សីហា ឆ្នាំ ២០១២ ], si.lds.org ) ។

វគ្គសិក្សានេះរួមមានសេចក្តីថ្លែងការណ៍មកពីថ្នាក់ដឹកនាំសាសនាចក្រដែលទំនងជាមានច្រើនភាសា ។ នៅពេលអ្នករៀបចំបង្រៀន អ្នកអាចសម្របសម្រួលមេរៀនដោយប្រើប្រាស់សេចក្តីថ្លែងការណ៍ផ្សេងទៀតដែលមាន ដែលថ្លែងដោយថ្នាក់ដឹកនាំសាសនាចក្រដែលទាក់ទងនឹងប្រធានបទសំខាន់នេះ ។

ផ្នែកនៃយោបល់សម្រាប់ការបង្រៀន រួមមានយ៉ាងហោចណាស់សេចក្ដីថ្លែងនៃគោលលទ្ធិ ឬគោលការណ៍មួយ ដែលលេចឡើងជាអក្សរដិតខ្មៅ ។ នៅពេលសិស្សរកឃើញគោលលទ្ធិ និងគោលការណ៍ទាំងឡាយនេះ ហើយចែកចាយអ្វីដែលពួកគេបានរៀនសូត្រ នោះសម្ដីរបស់ពួកគេអាចខុសពីអ្វីដែលបានសរសេរនៅក្នុងសៀវភៅណែនាំនេះ ។ បើវាកើតឡើង សូមប្រយ័ត្នកុំនិយាយថា ចម្លើយរបស់ពួកគេខុសឲ្យសោះ ។ ទោះជាយ៉ាងណាក្ដី ប្រសិនបើប្រយោគមួយអាចត្រូវបាននិយាយត្រឹមត្រូវជាងនេះ សូមជួយបញ្ជាក់ឲ្យសិស្សយល់ដោយប្រុងប្រយ័ត្ន ។

កម្មវិធីសិក្សានេះបង្ហាញពីរបៀបដើម្បីរួមបញ្ចូលការបង្រៀន និងការរៀនសូត្រមូលដ្ឋានគ្រឹះនៃដំណឹងល្អ ទៅក្នុងវគ្គសិក្សាដែលទាក់ទងនឹងប្រធានបទ ( សូមមើល ការបង្រៀន និងការរៀនសូត្រដំណឹងល្អ ទំព័រ ១០, ២៣–៣១, ៣៨–៤១ ) ។

អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់ បានពិពណ៌នាពីអត្ថប្រយោជន៍មួយចំនួនដែលទទួលបានពីការសិក្សាដំណឹងល្អតាមប្រធានបទ ៖

« ខណៈដែលការអានព្រះគម្ពីរចាប់តាំងពីដើមរហូតដល់ចប់ ផ្តល់ចំណេះដឹងគ្រឹះមួយ នោះការសិក្សាតាមប្រធានបទធ្វើឲ្យចំណេះដឹងរបស់យើងកាន់តែស៊ីជម្រៅ ។ ការស្រាវជ្រាវនៅក្នុងវិវរណៈដែលជាប់ទាក់ទង គំរូ និងប្រធានបទនានាស្ថាបនា និងបន្ថែមចំណេះដឹងខាងវិញ្ញាណរបស់យើង … វាពង្រីកទស្សនវិស័យ និងការយល់ដឹងរបស់យើងអំពីផែនការនៃសេចក្តីសង្គ្រោះ ។

« តាមការវិនិច្ឆ័យរបស់ខ្ញុំ នោះការស្រាវជ្រាវដោយឧស្សាហ៍ព្យាយាម ដើម្បីស្វែងរកនូវទំនាក់ទំនងទាំងឡាយ គំរូ និងប្រធានបទនានា គឺជាផ្នែកមួយនៃអ្វីដែលមានន័យថា ‹ ទទួលទាន › ព្រះបន្ទូលនៃព្រះគ្រីស្ទ ។ វិធីសាស្ត្រនេះអាចបើកទ្វារឃ្លាំងខាងវិញ្ញាណ បំភ្លឺការយល់ដឹងរបស់យើងតាមរយៈព្រះវិញ្ញាណរបស់ទ្រង់ និងបង្កើតឲ្យមានអំណរគុណកាន់តែជ្រាលជ្រៅចំពោះព្រះគម្ពីរដ៏បរិសុទ្ធទាំងឡាយ និងកម្រិតនៃការតាំងចិត្តខាងវិញ្ញាណមួយដែលមិនអាចត្រូវបានទទួលតាមវិធីណាផ្សេងទៀតឡើយ ។ ការស្រាវជ្រាវបែបនេះ ធ្វើឲ្យយើងអាចសង់គ្រឹះនៅលើថ្មដានៃព្រះប្រោសលោះរបស់យើង និងតទល់នឹងខ្យល់គួចនៃសេចក្តីទុច្ចរិតនៅថ្ងៃចុងក្រោយនេះ » ( « A Reservoir of Living Water » [ ការប្រជុំពិសេសសាកលវិទ្យាល័យ ព្រិកហាំ យ៉ង់ នៅថ្ងៃទី ៤ ខែ កុម្ភៈ ឆ្នាំ ២០០៧ ] ទំព័រ ៣, speeches.byu.edu ) ។

ការអានរបស់សិស្ស

ផ្នែកនេះ រួមមានវគ្គបទគម្ពីរ សុន្ទរកថាមកពីថ្នាក់ដឹកនាំសាសនាចក្រ និងឯកសារដទៃផ្សេងទៀត ដែលនឹងចម្រើនដល់ការយល់ដឹងរបស់សិស្សអំពីប្រធានបទ ដែលមាននៅក្នុងមេរៀនទាំងនោះ ។ សូមចាត់តាំង និងលើកទឹកចិត្តសិស្សឲ្យអានឯកសារសិក្សាទាំងនេះ មុនពេលពួកគេមករៀន ។ នៅពេលពួកគេសិក្សាចំណុចដ៏បំផុសគំនិតទាំងនេះ នោះពួកគេនឹងមិនត្រឹមតែបានរៀបចំយ៉ាងប្រសើរក្នុងការចូលរួមនៅក្នុងការពិភាក្សាក្នុងថ្នាក់ប៉ុណ្ណោះទេ ប៉ុន្ដែពួកគេក៏នឹងទទួលបានការយល់ដឹងកាន់តែច្រើន និងជ្រាលជ្រៅជាងនេះអំពីប្រធានបទក្នុងវគ្គសិក្សានេះផងដែរ ។ សូមផ្ដល់ដល់សិស្សនូវបញ្ជីមួយដែលមាន ការអានរបស់សិស្ស ទាំងអស់ នៅពេលចាប់ផើ្ដមឆមាស ។

តើខ្ញុំអាចរៀបចំបង្រៀនដោយរបៀបណា ?

ព្រះអម្ចាស់នឹងជួយដល់អ្នក នៅពេលអ្នករៀបចំបង្រៀន ។ នៅពេលអ្នករៀបចំ វាអាចជួយដល់អ្នកក្នុងការសួរខ្លួនឯងនូវសំណួរខាងក្រោមនេះ ៖

តើខ្ញុំកំពុងខ្នះខ្នែងរស់នៅតាមដំណឹងល្អ ដើម្បីខ្ញុំអាចទទួលបានព្រះវិញ្ញាណបរិសុទ្ធនៅក្នុងការរៀបចំ និងការបង្រៀនរបស់ខ្ញុំដែរឬទេ ?
តើខ្ញុំបានអធិស្ឋានដើម្បីទទួលបានការដឹកនាំពីព្រះវិញ្ញាណបរិសុទ្ធដែរឬទេ ? ( សូមមើល គ. និង ស. ៤២:១៤ ) ។
តើខ្ញុំបានសិក្សាក្រុមវគ្គបទគម្ពីរដែលបានដាក់មក និងអានពីសាវតាវាដែរឬទេ ?
តើខ្ញុំបានអានកម្មវិធីសិក្សា និងបានសម្រេចចិត្តថា តើមានអ្វីដែលខ្ញុំត្រូវសម្របតាម ឬកែសម្រួលដើម្បីបំពេញនូវតម្រូវការរបស់សិស្សខ្ញុំទេ ?
តើខ្ញុំអាចតាមដានសិស្សដោយរបៀបណា ដើម្បីធានាថា ពួកគេកំពុងតែទទួលបានចំណេះដឹងយ៉ាងច្រើនបំផុតពីអ្វីដែលបានចាត់តាំងឲ្យអាននោះ ?
តើខ្ញុំអាចជួយដល់សិស្សម្នាក់ៗរបស់ខ្ញុំ ឲ្យចូលរួមក្នុងមេរៀននេះបានយ៉ាងពេញលេញដោយរបៀបណា ?

យោបល់ខាងក្រោមនេះ ក៏អាចជួយដល់អ្នកបានដែរ ៖

សូមលើកទឹកចិត្តសិស្សឲ្យអានវគ្គបទគម្ពីរដែលបានចាត់តាំង និងអត្ថបទទាំងឡាយមុនពេលមករៀន ។
សូមរំពឹងឲ្យសិស្សបំពេញតួនាទីរបស់ពួកគេ ក្នុងនាមជាអ្នករៀន ។
សូមផ្ដល់ឱកាសជាញឹកញាប់ដល់សិស្សឲ្យពន្យល់ពីគោលលទ្ធិ និងគោលការណ៍នានាជាពាក្យសម្ដីរបស់គេផ្ទាល់ ចែកចាយបទពិសោធន៍ទាំងឡាយដែលទាក់ទង និងថ្លែងទីបន្ទាល់ពីអ្វីដែលពួកគេដឹង និងមានអារម្មណ៍ ។
សូមផ្លាស់ប្ដូរសកម្មភាពរៀនសូត្រ និងវិធានការនានា ដែលអ្នកប្រើនៅក្នុងថ្នាក់នីមួយៗ និងពីមួយថ្ងៃទៅមួយថ្ងៃ ។
សូមបង្កើតនូវបរិយាកាសរៀនសូត្រមួយដែលអញ្ជើញព្រះវិញ្ញាណ និងផ្តល់ឯកសិទ្ធិដល់សិស្ស និងការទទួលខុសត្រូវក្នុងការបង្រៀន និងរៀនពីគ្នាទៅវិញទៅមក ( សូមមើល គ. និង ស. ៨៨:៧៨, ១២២ ) ។
ពេញទាំងវគ្គសិក្សានេះ មាននូវសេចក្ដីយោងនានា ចំពោះជំនាញសិក្សាព្រះគម្ពីរជាក់លាក់ទាំងឡាយ ។ សូមទាញយកប្រយោជន៍ពីឱកាសទាំងនេះ ដើម្បីជួយសិស្សឲ្យកាន់តែក្លាយជាមនុស្សឯករាជ្យ នៅក្នុងការសិក្សាព្រះគម្ពីររបស់ពួកគេ ព្រមទាំងកាន់តែមានការប្តេជ្ញាចំពោះការរៀនពីព្រះគម្ពីរអស់មួយជីវិត ។

អែលឌើរ រីឆាត ជី ស្កត ក្នុងកូរ៉ុមនៃពួកសាវកដប់ពីរនាក់បានបង្រៀន ៖

« សូមបញ្ជាក់ថា មានការចូលរួមជាច្រើន ដោយសារថា ការប្រើសិទ្ធិជ្រើសរើសដោយសិស្សម្នាក់ នឹងអនុញ្ញាតឲ្យព្រះវិញ្ញាណបរិសុទ្ធណែនាំ ។ … នៅពេលសិស្សនិយាយចេញនូវសេចក្ដីពិតទាំងឡាយ នោះពួកគេត្រូវបានបញ្ជាក់នៅក្នុងព្រលឹងរបស់ពួកគេ និងពង្រឹងដល់ទីបន្ទាល់ផ្ទាល់ខ្លួនរបស់គេ » (« To Understand and Live Truth » [ ល្ងាចមួយជាមួយនឹង អែលឌើរ រីឆាត ជី ស្កត នៅថ្ងៃទី ៤ ខែ កុម្ភៈ ឆ្នាំ ២០០៥ ] ទំព័រ ៣, si.lds.org) ។

តើខ្ញុំអាចសម្របសម្រួលមេរៀនទាំងឡាយ សម្រាប់អ្នកដែលពិការដោយរបៀបណា ?

នៅពេលអ្នករៀបចំបង្រៀន សូមគិតគូរដល់សិស្សដែលមានតម្រូវការជាពិសេសផងដែរ ។ សូមកែសម្រួលសកម្មភាពនានា និងការរំពឹងទុកទាំងឡាយដើម្បីជួយដល់ពួកគេឲ្យទទួលបានជោគជ័យ ។ សូមរកមើលរបៀបនានា ដើម្បីជួយពួកគេឲ្យទទួលអារម្មណ៍ថាត្រូវបានគេស្រឡាញ់ ត្រូវបានគេទទួលយក និងត្រូវបានគេរួមបញ្ចូល ។ សូមចិញ្ចឹមបីបាច់ទំនាក់ទំនងនៃការទុកចិត្ត ។

សម្រាប់គំនិត និងធនធានបន្ថែម សូមរកមើលព័ត៌មានក្នុងទំព័រធនធានជនពិការ( Disability Resources ) នៅគេហទំព័រ disabilities.lds.org និងសៀវភៅសិក្សានយោបាយថ្នាក់សិក្ខាសាលា និងថ្នាក់វិទ្យាស្ថាននៃសាសនា ផ្នែកដែលមានចំណងជើងថា « Adapted Classes and Programs for Students with Disabilities » ។