មេរៀនទី ២២
« ដូចជាយើង »
សេចក្ដីផ្ដើម
ព្រះយេស៊ូវគ្រីស្ទដែលបានមានព្រះជន្មរស់ឡើងវិញ បានអញ្ជើញពួកសិស្សទ្រង់ឲ្យធ្វើតាមគំរូទ្រង់ ។ ដោយការសិក្សាគោលការណ៍ទាំងឡាយ ដែលទ្រង់បានបង្រៀនដល់ពួកសាសន៍នីហ្វៃ នៅឯព្រះវិហារបរិសុទ្ធនៅដែនដីបរិបូរ នោះយើងអាចរៀនពីរបៀបដើម្បីក្លាយដូចជាទ្រង់ ។ ព្រះអង្គសង្គ្រោះបានអធិស្ឋានថា អ្នកទាំងអស់ដែលជឿលើទ្រង់ អាចដកពិសោធន៍នូវការរួបរួមនឹងទ្រង់ និងព្រះវរបិតាសួគ៌យើង ។ មេរៀននេះ គឺត្រូវបានរៀបចំឡើងដើម្បីជួយសិស្សឲ្យយល់ពីអ្វី ដែលពួកគេអាចធ្វើ ដើម្បីក្លាយកាន់តែដូចជាព្រះយេស៊ូវគ្រីស្ទ ។
ការអានពីសាវតា
-
ហិនរី ប៊ី អាវរិង «Our Perfect Example» Ensign ឬ Liahona ខែ វិច្ឆិកា ឆ្នាំ ២០០៩ ទំព័រ ៧០–៧៣ ។
-
លីន ជី រ៉ូប៊ីនស៍ «What Manner of Men and Women Ought Ye to Be?» Ensign ឬ Liahona ខែ ឧសភា ឆ្នាំ ២០១១ ទំព័រ ១០៣–៥ ។
យោបល់សម្រាប់ការបង្រៀន
នីហ្វៃទី៣ ២៧:២១-២២, ២៧
ការក្លាយដូចជាព្រះយេស៊ូវគ្រីស្ទ
សូមចាប់ផ្ដើមថ្នាក់ ដោយបង្ហាញសេចក្ដីថ្លែងការណ៍ខាងក្រោមពីអែលឌើរ លីន ជី រ៉ូប៊ីនស៍ នៃគណៈប្រធានពួកចិតសិបនាក់ ហើយសូមឲ្យសិស្សម្នាក់អានវាឮៗ ៖
« ពួកយើងជាច្រើនបង្កើតបញ្ជីត្រូវធ្វើ ដើម្បីរំឭកយើងពីការណ៍ទាំងឡាយដែលយើងចង់សម្រេចបាន ។ តែមនុស្សកម្រនឹងមានបញ្ជីត្រូវប្រែក្លាយជា ណាស់ ។ ហេតុអ្វី ? ត្រូវធ្វើ គឺជាសកម្មភាព ឬព្រឹត្តិការណ៍នានាដែលអាចគូសចេញពីបញ្ជី ពេលធ្វើរួចហើយ ។ ទោះជាយ៉ាងណា ត្រូវប្រែក្លាយជា គឺមិនដែលធ្វើហើយនោះទេ ។ អ្នកមិនអាចទទួលបានគំនូសគូសចេញ ជាមួយបញ្ជីត្រូវប្រែក្លាយជា ឡើយ ។ ខ្ញុំអាចនាំភរិយាខ្ញុំទៅក្រៅនារាត្រីថ្ងៃសុក្រដ៏ស្រស់ស្អាតមួយ ដែលជាបញ្ជីត្រូវធ្វើ ។ តែត្រូវប្រែក្លាយជាស្វាមីដ៏ល្អម្នាក់ មិនមែនជាព្រឹត្តិការណ៍មួយទេ វាត្រូវការផ្នែកត្រូវប្រែក្លាយជានៃធម្មជាតិរបស់ខ្ញុំ—ចរិតលក្ខណៈរបស់ខ្ញុំ ឬមនុស្សដែលខ្ញុំប្រែក្លាយជានោះឯង » ( «What Manner of Men and Women Ought Ye to Be?» Ensign ឬ Liahona ខែ ឧសភា ឆ្នាំ ២០១១ ទំព័រ ១០៤ ) ។
-
តើអ្នកគិតថា ព្រះអម្ចាស់មានព្រះទ័យចង់ឲ្យយើងក្លាយជាអ្វី ក្នុងនាមជាសមាជិកនៃសាសនាចក្ររបស់ទ្រង់ ?
សូមអញ្ជើញសិស្សឲ្យអាន នីហ្វៃទី៣ ២៧:២១-២២, ២៧ ដោយស្ងៀមស្ងាត់ ហើយរកមើលការណែនាំ ដែលព្រះយេស៊ូវគ្រីស្ទបានប្រទានដល់ពួកសិស្សសាសន៍នីហ្វៃរបស់ទ្រង់ ។
-
តើព្រះអង្គសង្គ្រោះបានបញ្ជាពួកសិស្សរបស់ទ្រង់ឲ្យធ្វើ និងប្រែក្លាយជាអ្វី ? ( សូមសរសេរសេចក្តីពិតតទៅនេះនៅលើ ក្ដារខៀន ៖ ព្រះអម្ចាស់សុំពួកសិស្សទ្រង់ឲ្យធ្វើកិច្ចការទ្រង់ ហើយក្លាយដូចជាទ្រង់ ) ។
-
តើអ្នកគិតថា យើងកាន់តែប្រែក្លាយដូចជាព្រះអង្គសង្គ្រោះដោយរបៀបណា ?
-
តើកិច្ចការទ្រង់អ្វីខ្លះ ដែលអ្នកបានមានលទ្ធភាពធ្វើបាន ?
សូមអញ្ជើញសិស្សឲ្យពិភាក្សាអំពីរបៀបដែលការបង្រៀននៃ ព្រះគម្ពីរមរមន អាចជួយយើងឲ្យក្លាយដូចជាព្រះយេស៊ូវគ្រីស្ទ ។ សូមគិតពីការសរសេរចម្លើយរបស់សិស្សដាក់លើក្ដារខៀន ។ សូមចែកចាយទីបន្ទាល់របស់អ្នកថា ការសិក្សាព្រះគម្ពីរមរមន និងការអនុវត្តការបង្រៀនរបស់វា នឹងជួយយើងឲ្យក្លាយកាន់តែដូចជាព្រះអង្គសង្គ្រោះ ។
នីហ្វៃទី៣ ១២:១–១៦, ៤៣–៤៥, ១៣:១, ៥–៧, ១៦–១៨, ២២–២៤, ៣៣, ១៤:១–៥, ២១–២៧
ទេសនកថារបស់ព្រះគ្រីស្ទ នៅឯព្រះវិហារបរិសុទ្ធនៅដែនដីបរិបូរ បង្រៀនយើងពីរបៀបដើម្បីក្លាយដូចជាទ្រង់
សូមបង្ហាញសេចក្ដីថ្លែងការណ៍ខាងក្រោមដោយប្រធាន អ៊ែសរ៉ា ថាហ្វ ប៊ែនសឹន ( ឆ្នាំ ១៨៩៩–១៩៩៤ ) ហើយសូមឲ្យសិស្សម្នាក់អានវាឮៗ ៖
« បុគ្គលនោះគឺជាបុគ្គលឆ្នើមជាងគេ ហើយមានពរ និងអំណរបំផុត ពេលជីវិតរស់នៅស្ទើរតែជិតដូចនឹងគំរូរបស់ព្រះគ្រីស្ទ ។ នេះគឺមិនទាក់ទងអ្វីទៅនឹងទ្រព្យសម្បត្តិ អំណាច ឬកិត្តិនាមខាងលោកិយនោះទេ ។ ការសាកល្បងដ៏ពិតតែមួយគត់នៃភាពអស្ចារ្យ ភាពមានពរ និងភាពពោរពេញដោយអំណរ គឺថាតើជីវិតមនុស្សម្នាក់ក្លាយដូចជាលោកគ្រូ គឺព្រះយេស៊ូវគ្រីស្ទ បានច្រើនប៉ុណ្ណា ។ ទ្រង់គឺជាមាគ៌ាដ៏ត្រឹមត្រូវ ជាសេចក្ដីពិតដ៏ពេញលេញ និងជាជីវិតដ៏បរិបូរ » ( «Jesus Christ—Gifts and Expectations» Ensign ខែ ធ្នូ ឆ្នាំ ១៩៨៨ ទំព័រ ២ ) ។
-
យោងតាមប្រធាន ប៊ែនសឹន តើអ្វីកើតឡើង ពេលយើងជ្រើសរើសយកព្រះយេស៊ូវគ្រីស្ទជាគំរូសម្រាប់ជីវិតយើង ?
សូមរំឭកសិស្សថា ពេលព្រះអង្គសង្គ្រោះដែលមានព្រះជន្មរស់ឡើងវិញ បានយាងមកឯប្រជាជនទ្រង់នៅឯព្រះវិហារបរិសុទ្ធនៅក្នុងដែនដីបរិបូរ ទ្រង់បានប្រទានទេសនកថាមួយ ដែលស្រដៀងទៅនឹងទេសនកថារបស់ទ្រង់នៅលើភ្នំនៅក្នុងព្រះគម្ពីរប៊ីបដែរ ។ គោលការណ៍ដ៏ពិសិដ្ឋទាំងឡាយ ដែលព្រះអង្គសង្គ្រោះបានបង្រៀននៅក្នុងទេសនកថានៅលើភ្នំ និងនៅឯព្រះវិហារបរិសុទ្ធនៅក្នុងដែនដីបរិបូរ ត្រូវបានរៀបចំឡើងដើម្បីជួយយើងឲ្យក្លាយដូចជាទ្រង់ ។
សូមអានសេចក្ដីថ្លែងការណ៍ខាងក្រោមដោយប្រធាន ហារ៉ូល ប៊ី លី ( ឆ្នាំ ១៨៩៩-១៩៧៣ ) ៖ បើចាំបាច់ សូមពន្យល់ថា ពាក្យ ប្លង់ សំដៅដល់ផែនការទាំងឡាយដែលត្រូវបានប្រើប្រាស់ ដើម្បីសាងសង់អគារមួយ ។
« នៅក្នុងទេសនកថានៅលើភ្នំរបស់ទ្រង់ លោកគ្រូបានប្រទានដល់យើងនូវអ្វីដែលជាវិវរណៈនៃចរិតលក្ខណៈរបស់ទ្រង់ផ្ទាល់ ដែលល្អឥតខ្ចោះ … ហើយដោយការធ្វើដូច្នោះ បានផ្ដល់ដល់យើងនូវប្លង់សម្រាប់ជីវិតយើងផ្ទាល់ » ( Teachings of Presidents of the Church: Harold B. Lee [ ឆ្នាំ ២០០០ ] ទំព័រ ២០០ ) ។
សូមសរសេរបទគម្ពីរយោងខាងក្រោមនេះនៅលើក្ដារខៀន ៖
សូមចាត់ឲ្យសិស្សម្នាក់ៗអានមួយវគ្គបទគម្ពីរ ហើយរកមើលគោលការណ៍មួយ ដែលអាចជួយពួកគេឲ្យក្លាយដូចជាព្រះយេស៊ូវគ្រីស្ទ ។ អ្នកអាចលើកទឹកចិត្តសិស្សឲ្យគូសចំណាំ ឬគូសពណ៌ចំណាំគោលការណ៍ទាំងនេះ នៅក្នុងព្រះគម្ពីររបស់ពួកគេ ។ សូមអញ្ជើញសិស្សឲ្យគិតពិចារណា ថាតើពួកគេមានស្គាល់នរណាម្នាក់ ដែលធ្វើជាគំរូអំពីគោលការណ៍ដែលពួកគេរកឃើញនោះដែរឬទេ ។
បន្ទាប់ពីទុកពេលគ្រប់គ្រាន់ហើយ សូមអញ្ជើញសិស្សឲ្យចែកចាយអ្វីដែលពួកគេបានរកឃើញ។ បើចាំបាច់ ហើយបើមានការបំផុសពីព្រះវិញ្ញាណ អ្នកអាចសួរសំណួរបន្ថែមទៀតដូចខាងក្រោមនេះ ៖
-
តើការរស់នៅតាមគោលការណ៍នេះដោយខ្ជាប់ខ្ជួន អាចជួយអ្នកឲ្យក្លាយកាន់តែដូចព្រះគ្រីស្ទយ៉ាងដូចម្ដេចដែរ ?
-
តើអ្នកធ្លាប់មានបទពិសោធន៍អ្វីខ្លះ ដែលបង្ហាញពីសារៈសំខាន់នៃគោលការណ៍ដែលអ្នកបានរកឃើញនេះ ?
សូមអញ្ជើញសិស្សឲ្យដាក់គោលដៅមួយ ដើម្បីក្លាយឲ្យកាន់តែដូចជាព្រះអង្គសង្គ្រោះ ដោយការបញ្ចូលគោលការណ៍ទាំងនេះតែមួយ ឬច្រើនជាងនោះនៅក្នុងជីវិតរបស់ពួកគេ ។
យ៉ូហាន ១៧:៩–១១, ២០–២៣, នីហ្វៃទី៣ ១៩:១៩–២៣, ២៨–២៩
ការក្លាយតែមួយជាមួយនឹងព្រះវរបិតា និងព្រះរាជបុត្រា
សូមពន្យល់ថា អំឡុងពេលនៃការយាងរបស់ទ្រង់មកជួបនឹងពួកសាសន៍នីហ្វៃ ព្រះយេស៊ូវគ្រីស្ទបានអធិស្ឋានសម្រាប់ពួកសិស្សទាំងដប់ពីរនាក់ ដែលទ្រង់បានជ្រើសរើស និងសម្រាប់អ្នកទាំងអស់ណាដែលជឿលើពាក្យសម្ដីរបស់ពួកលោក ។ សូមអញ្ជើញសិស្សពីរបីនាក់ឲ្យអានចេញពី នីហ្វៃទី៣ ១៩:១៩-២៣, ២៨-២៩ ឮៗ ។ សូមឲ្យសិស្សរកមើលពរជ័យទាំងឡាយ ដែលព្រះយេស៊ូវបានអធិស្ឋានសូម ដែលនឹងត្រូវប្រទានដល់ពួកអ្នកទាំងឡាយណាដែលជឿលើទ្រង់ ។
-
តើគោលការណ៍ណាមួយ ដែលយើងអាចរៀនចេញពីការអធិស្ឋានរបស់ព្រះអង្គសង្គ្រោះសម្រាប់យើង ដើម្បីក្លាយតែមួយជាមួយនឹងព្រះវរបិតា និងព្រះរាជបុត្រា ? ( សិស្សគួរតែរកឃើញគោលការណ៍ដូចតទៅនេះ ៖ តាមរយៈសេចក្ដីជំនឿ យើងអាចបានបរិសុទ្ធ ហើយក្លាយតែមួយជាមួយនឹងព្រះយេស៊ូវគ្រីស្ទ ដូចជាទ្រង់គឺតែមួយជាមួយនឹងព្រះវរបិតាដែរ ) ។
ដើម្បីជួយសិស្សឲ្យយល់បន្ថែមទៀតពីគោលការណ៍នេះ សូមពន្យល់ថា ការអធិស្ឋានស្រដៀងគ្នាទៅនឹងការអធិស្ឋានមួយដែលព្រះគ្រីស្ទបានអធិស្ឋាន នៅឯព្រះវិហារបរិសុទ្ធ ក្នុងដែនដីបរិបូរ គឺត្រូវបានកត់ត្រាទុកនៅក្នុងព្រះគម្ពីរសញ្ញាថ្មី ។ សូមឲ្យសិស្សធ្វើបទគម្ពីរយោងខគម្ពីរទាំងនេះ ជាមួយនឹង យ៉ូហាន ១៧:៩-១១, ២០-២៣ ។ សូមអញ្ជើញពួកគេអានខគម្ពីរដោយស្ងៀមស្ងាត់ ហើយពិចារណាពីរបៀបដែលវាត្រូវនឹងយើង ។
-
តើវាជះឥទ្ធិពលយ៉ាងណាចំពោះអ្នក ដែលដឹងថា ព្រះយេស៊ូវគ្រីស្ទបានអធិស្ឋានទៅព្រះវរបិតាដើម្បីអ្នក ?
-
តើនៅក្នុងរបៀបណាខ្លះ ដែលយើងអាចដកពិសោធន៍នូវការរួបរួមដែលមានរវាងព្រះវរបិតា និងព្រះរាជបុត្រា ?
សូមឲ្យសិស្សម្នាក់អានឮៗនូវសេចក្ដីថ្លែងការណ៍ខាងក្រោមដោយអែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់ ។ សូមអញ្ជើញសិស្សឲ្យរកមើល អ្វីដែលយើងត្រូវតែធ្វើ ដើម្បីក្លាយជាតែមួយជាមួយនឹងព្រះយេស៊ូវគ្រីស្ទ និងព្រះវរបិតាសួគ៌ ។
« ព្រះយេស៊ូវបានសម្រេចនូវការរួបរួមយ៉ាងឥតខ្ចោះជាមួយនឹងព្រះវរបិតា ដោយការចុះចូលអង្គទ្រង់ ទាំងសាច់ឈាម និងវិញ្ញាណ ទៅតាមព្រះឆន្ទៈរបស់ព្រះវរបិតា ។ ការបម្រើរបស់ទ្រង់ តែងតែផ្ដោតព្រះទ័យទុកដាក់យ៉ាងច្បាស់ ពីព្រោះគ្មានគំនិត ឬបំណងប្រាថ្នាណា ដែលមិនស្របនឹងព្រះវរបិតា ដែលនឹងបណ្ដាលឲ្យរំខានដល់ទ្រង់ឡើយ ។ ព្រះយេស៊ូវបានមានព្រះបន្ទូលពីព្រះវរបិតារបស់ទ្រង់ថា ‹ ខ្ញុំចេះតែធ្វើការ ដែលគាប់ដល់ព្រះហឫទ័យទ្រង់ជាដរាប › ( យ៉ូហាន ៨:២៩ ) ។ …
« ប្រាកដណាស់ យើងនឹងមិនមែនតែមួយជាមួយព្រះ និងព្រះគ្រីស្ទទេ រហូតទាល់តែយើងធ្វើឲ្យព្រះឆន្ទៈ និងចំណាប់អារម្មណ៍របស់ទ្រង់ក្លាយជាបំណងប្រាថ្នាដ៏ខ្លាំងបំផុតរបស់យើងសិន ។ ការចុះចូលបែបនេះពុំអាចសម្រេចបានក្នុងពេលមួយថ្ងៃនោះឡើយ ប៉ុន្តែតាមរយៈព្រះវិញ្ញាណបរិសុទ្ធ និង ដំណើរការនៃពេលវេលា នោះព្រះអម្ចាស់នឹងណែនាំយើង រហូតទាល់តែអាចនិយាយបានយ៉ាងប្រាកដថា ទ្រង់គឺនៅក្នុងយើង ដូចជាព្រះវរបិតានៅក្នុងទ្រង់ដែរ » ( «That They May Be One in Us» Ensign ខែ វិច្ឆិកា ឆ្នាំ ២០០២ ទំព័រ ៧២–៧៣ ) ។
-
យោងតាមអែលឌើរ គ្រីស្តូហ្វឺសិន តើយើងត្រូវតែធ្វើអ្វី ដើម្បីបានក្លាយជាតែមួយជាមួយនឹងព្រះវរបិតា និងព្រះរាជបុត្រា ?
សូមសរសេរសំណួរដូចខាងក្រោមនៅលើក្ដារខៀន ហើយអញ្ជើញសិស្សឲ្យចំណាយពេលពីរបីនាទីសរសេរចម្លើយរបស់ខ្លួន ៖
តើនៅក្នុងរបៀបណាខ្លះ ដែលព្រះយេស៊ូវបានបង្ហាញថា ទ្រង់បានចុះចូលយ៉ាងល្អឥតខ្ចោះទៅនឹងព្រះឆន្ទៈរបស់ព្រះវរបិតាសួគ៌ ?
តើអ្នកអាចចុះចូលទៅនឹងព្រះឆន្ទៈរបស់ព្រះវរបិតាសួគ៌ឲ្យកាន់តែខ្លាំងឡើយ ដោយរបៀបណាខ្លះ ?
សូមបញ្ចប់មេរៀនដោយចែកចាយទីបន្ទាល់របស់អ្នកថា ការចុះចូលនឹងព្រះឆន្ទៈរបស់ព្រះវរបិតា ធ្វើឲ្យយើងអាចក្លាយកាន់តែដូចជាព្រះអង្គសង្គ្រោះរបស់យើង គឺព្រះយេស៊ូវគ្រីស្ទ ។
ការអានរបស់សិស្ស
-
យ៉ូហាន ១៧:៩–១១, ២០–២៣, នីហ្វៃទី៣ ១២:១–១៦, ៤៣–៤៥, ១៣:១, ៥–៧, ១៦–១៨, ២២–២៤, ៣៣, ១៤:១–៥, ២១–២៧, ១៩:១៩–២៣, ២៨–២៩, ២៧:២១–២២, ២៧ ។
-
ហិនរី ប៊ី អាវរិង «Our Perfect Example» Ensign ឬ Liahona ខែ វិច្ឆិកា ឆ្នាំ ២០០៩ ទំព័រ ៧០–៧៣ ។