Wase 16

Nodra Susugi Cake na Gone ena Rarama kei na Dina

“Na imatai ni itavi ni nodra vakavulici na gone ena Lotu e tiko mai vale.”

Na Bula nei Joseph Fielding Smith

E vakamacalataka o Peresitedi Joseph Fielding Smith baleti tamana o Peresitedi Joseph F. Smith, “ni dua au sa bau vakadinati koya sara ga mai na vo ni tamata kau sa bau kila tu e vuravura.¹ Nanuma lesu ni dau vakasoqoni ira vata na matavuvale o tamana, “ka vakavulici ira na luvena ena ivakavuvuli ni kosipeli. Era marautaka kece na gauna e dau tiko vata kina kei ira kei na vosa ni veivakasalataki kei na veituberi e dau solia vei ira. … Era sega vakadua ni guilecava na ka e a vakatavuvulitaka, ka sa kabi matua tu vei ira na mawena ka na tu vata kei ira ena veigauna kece sara.”² Kaya talega: “Sa tamata yaloyalo vinaka sara ga o tamaqu. … Mai na veika au nanuma rawa sa ikoya na veigauna au dau dabe kina e yasana ka veiwaseitaka na ivakavuvuli ni kosipeli, ka ciqoma na ivakasala ni o koya duadua ga ena rawa ni solia. E ke sara ga sa yavutaki kina na dina ni veika au sa kila, ka sa na rawa vei au meu kaya niu sa kila ni bula tiko na noqu Dauveivueti, ka o Josefa Simici e parofita dina ni Kalou mai liu, nikua ka na parofita tikotikoga.”³

E a vosa vinakataki tinana talega o Julina L. Smith o Joseph Fielding Smith, kei na nona ivakavuvuli. E kaya: “Au a vakavulici ena ruku ni yavai tinaqu meu lomana na Parofita o Josefa Simici kei na noqu lomana na noqu Dauveivueti. … Au vakavinavinaka ena vuku ni noqu tuberi kau sa tovolea sara meu muria na ivakasala e a sa solia vei au o tamaqu. Ia meu kakua ni vakalevulevui koya taudua. Au nanuma ni dua na kena iwase vinaka, se na kena iwase e vinaka cake, me na lako vei tinaqu, ka niu dau dabe e yasana me vaka niu a se gonelailai ka rogoca mai vua na kedra italanoa na painia. … Dau vakavulici au ka qai biuta ki ligaqu meu wilika na italanoa niu sa qasecake mai kei na veika sa rawa niu kila. E vakavulici au meu dau masu [ka] meu dinata ka vakabauta na noqu veiyalayalati kei na ka au sa yalataka, meu na dau qarava na noqu itavi vaka-dikoni kei na ivakavuvuli … tarava sara na bete. … Vinakata sara ga o tinaqu meu dau wilivola kau sa taleitaka sara ga na wilivola.”⁴

Ni sa yaco me tama ni gone o Joseph Fielding Smith, sa muri rau ga na nona itubutubu. Tukuna na luvena yalewa o Amelia:

“O tamaqu sa gonevuli ka qasenivuli vinaka sara ga, e dua sa veivakavulici ga mai na nona ivurevure ni vakasama vuku, ia e vakauqeti keitou ga me keitou vuli ga vakataki keitou. …

“Eratou dau vakamuria vata kei ira na luvena na ivakasala e tiko ena V&V 93:40: ‘Ia, au sa vakaroti kemudou mo dou vakavulici ira na luvemudou mera kila na rarama kei na dina.’

“E vakavulici keitou ena teveli ni katalau ka talanoa vei keitou mai na ivolanikalou, ka tiko vua na kila me talanoataka me vaka ga e se qai rogoci vakadua, dina ga ni sa dau rogoci wasoma. Na vakariseyate ni ka au veinanuyaka de ra na raica na sotia nei Fero na bilo koula ena taga sila nei Penijamini se ka dina tikoga nikua. Keitou vulica na nona kunea o Josefa Simici na peleti koula kei na nona rairai mai na Tamada kei na Luvena. Kevaka me vo na gauna nei tamaqu me taubale kei keitou ki koronivuli me tomani kina na italanoa. Keitou lako sivia na Valetabu e [Salt Lake] ena ilakolako ki koronivuli ka qai talanoataki Agilosi Moronai vei keitou. Keitou vulica ni valetabu sa dua na vale duatani toka, ni dodonu mo sa buladodonu tu qai rawa ni ko curu kina, ni sa ka tawamudu na vakamau e caka kina. E vakavulici keitou ena ka e masulaka ena gauna ni masu ni matavuvale ena yasa ni teveli ni kana ni bera na katalau kei na vakayakavi. …

“Nikua sa veilaveti ka veitokoni sara na nona veivakavulici vei ira na nona kawa kei ira e lewe levu sara na lewe ni Lotu vakabauta. Sa dua na madigi vinaka ka veivakalougatataki me vaka niu luvena yalewa.”⁵

The prophet loved children. President Joseph Fielding Smith with his great-granddaughter Shauna McConkie at Christmas time — Peresitedi Joseph Fielding Smith kei na makubuna yalewa vakarua o Shanna McConkie

Na iVakavuvuli nei Joseph Fielding Smith

Mera na vorata rawa na veitemaki ni vu ni ca, sa dodonu mera vakavulici ira na luvedra na itubutubu ena rarama kei na dina.

Na bibi ni duavata ena matavuvale—ka dodonu me dau vakabibitaki ena loma ni matavuvale—sa ikoya na ka e dodonu me vakaliuci. Na duavata ni bula vaka-Yalo ni dua na matavuvale sa ikoya na yavu dei ni kena toso na Lotu kei na itikotiko. Na veika oqo e kila vinaka tu na vu ni ca, ka sa saga sara tikoga vakaukauwa ena gauna oqo na nona ivadi kece kei na kaukauwa me vakamalumalumutaka ka vakarusa na lalawa vakalou oqo. Na vakacaca oqo ena valuti rawa ga ena bulataki ni kosipeli i Jisu Karisito ena matavuvale.⁶

Levu sara na ka rerevaki eda na sotava, ia na kena ena tarai keda ka sega soti o ira tale e so, sa ikoya na kena ena yavalati ira na luveda na kena revurevu. Na vanua duadua ena rawa ni taqomaki ka valuti kina sa ikoya na loma ni matavuvale kei na kena ivakarau ni bula.⁷

Mera na vakavulici na luveda mera na vakatulewataka vakavuku na vinaka mai na ca, kevaka me sega era na sega ni kila na vuna era dau sega kina ni vakadonui mera vakaitavi ena so na ka era sa vakamatautaki kina na nodra neiba. Vakavo kevaka mera sa vakavulici ena ivakavuvuli ni Lotu, ena sega ni rawa vei ira, mera kila ni na vakatubuleqa na vakatasuasua ena Sigatabu, sara iyaloyalo ena Sigatabu, qito, se dua na ka vata vaka o ya, ia o ira na nodra itokani e sega sara ga ni dua tu na ka vei ira ni ra vakauqeti ka vakayarayarataki mera cakava ena nona siga ni vakacecegu na Turaga. Sa nodra itavi na itubutubu mera vakavulici na luvedra, [ka] ni ra na saumitaro na itubutubu vua na Turaga kevaka mera tubucake na gone ena taudaku ni veituberi ni kosipeli ni Turaga o Jisu Karisito.⁸

Sa vakaroti keda kece sara na Turaga meda tuberi ira cake na luveda ena rarama kei na dina. Na vanua e tiko kina na yalo oqo ena sega ni kune kina na veisei, na talaidredre, kei na vakaweleweletaki ni itavi bibi oqo.⁹

Sa nodra itavi bibi na itubutubu na nodra vakavulici na luvedra.

Ena sega ni vakasavuligataka na Tamada na nona itavi vua na luvena ka ra sa sucu mai e vuravura. O ira era na Luvena tikoga. Sa ra mai maroroi vei ira na nodra itubutubu vakayago, ka ra sa vakaroti mera na tuberi cake ena rarama kei na dina. Sa itavi bibi, ka vakaibalebale, sa tiko vei ira na itubutubu mera tuberi cake na gone ena rarama kei na dina.¹⁰

Na imatai ni itavi baleta na nodra vakavulici na gone ena Lotu sa tu ga mai vale. Sa nodra itavi na itubutubu mera vakavulici ira na luvedra ena rarama kei na dina, ka sa tukuna na Turaga ni kevaka me sega, era na saumitaro kina ena siga ni veilewai.¹¹

E a vakaraitaka kina na Turaga ki na Lotu ena dua na ivakatakila ena 1831:

“Raica ko ira na itubutubu mai Saioni, se ena dua na iteki sa tauyavutaki tu, me ra vakavulici ira na luvedra ena ivakavuvuli dina ni ra sa yabaki walu; io na ivakavuvuli ni veivutuni, na vakabauti Jisu Karisito na Luve ni Kalou Bula, na papitaiso kei na isolisoli ni Yalo Tabu e na veitabaki ni liga; ia kevaka e sega, era na cudruvi kina.

“Raica oqo na ivakaro vei ira na lewei Saioni, se ena dua ga na nona iteki sa tauyavutaki tu. [V&V 68:25–28.]

… Oqo na ka sa gadreva na Turaga vei keda.¹²

Era na saumitaro na itubutubu ena nodra ivalavala na luvedra, kevaka mera a sega ni vakavulici ira ena ivakaraitaki kei na ivakavuvuli.

Kevaka mera sa veivakavulici na itubutubu ena nodra tuberi na gone ena ivakaraitaki kei na ivakavuvuli ka ra qai duiseba na gone, era na sega ni saumitaro na itubutubu ia sa na tu ga na ivalavala ca vei ira na gone.¹³

Ena veivuke na Lotu vei ira na itubutubu ena nodra sasaga mera vakavulici ira na luvedra.

Na itavi levu ni kena qaravi [na] ka me rawa kina na veivakabulai, sa ka sara ga ni tamata yadua. Eda sa mai bula oqo e vuravura meda mai vakatovolei kina ena bula vakayago. Eda tiko eke me laurai se eda na talairawarawa ki na ivunau ka vakamalumalumutaki vuravura, ka sa dodonu meda na yalodina kina.

Tarava mai na qaravi ni noda vakabulai o ira na noda matavuvale. Era sa tu na itubutubu mera rarama ka veituberi vei ira na luvedra kara sa vakaroti mera susugi ira cake ena rarama kei na dina, vakavulici ira ena kosipeli ka ivakaraitaki vinaka vei ira. Sa namaki vei ira na gone mera talairawarawa vei ira na itubutubu, ia mera rokovi ka dokai ira.

Na Lotu e tiko kina na itini ni kena vukei na matavuvale, ka vukei ira na veimataisoqosoqo kei na lewe ni lotu yadua.¹⁴

A woman leading music in Primary. A girl is standing at her side holding a copy of the Book of Mormon. — “Na Lotu kei na kena itini sa virikotora na veivuke me vukei ira na matavuvale kei na lewe yadua.”

Au sa vakamasuti kemuni na taciqu kei na ganequ, kemuni na veiwatini, tama kei na tina, mo ni taura na gauna ga e rawa ka kauti ira na luvemuni mera laki vuli ena ituvatuva sa vakarautaka na Lotu ena ivakatakila ni Turaga : na Lalai, Wilivola ni Sigatabu, Na Muavata [Cauravou kei na Goneyalewa], kei na Kuoramu ni Matabete Lailai ena veiliutaki ni matabisopi. …

… Ena veivanua kece sara, ni sa rawa ga vua na Lotu, me na vakacokotaka na parokaramu ni semineri kei na inisitute. … Taciqu kei na ganequ, ni talai ira na luvemuni ki na kalasi ni semineri oqori. O ira era sa lako qo ki na koliji sa ra na qasecake, kevaka mera sa tuberi tiko mai ena gauna ni itabagone, mera sa lako sara ga ki na inisitute ni Lotu.¹⁵

Mera sa veivuke sara ga na itubutubu vei ira na luvedra mera kila na kosipeli i Jisu Karisito.

Na kaukauwa ni Lotu i Jisu Karisito ni Yalododonu Edaidai e tiko ena nodra ivakadinadina yadua. Na vanua vinaka duadua me tarai cake kina na ivakadinadina sa ikoya na loma ni matavuvale. … Na rawati kei na maroroi ni ivakadinadina me ka ni matavuvale. Kakua ni vakawalena e dua na ka ena rawa ni vukea na taraicake ni nona ivakadinadina e dua na lewe ni matavuvale.¹⁶

Meda sa maroroi ira na [gone] mai na ivalavala ca ni vuravura me rawa ni da na maroroi ira me kakua ni ra sikalutu laivi mai ena sala ni dina kei na bula dodonu.¹⁷

Vukei ira na luvemu ena kena gaunisala o na rawata me ra tubucake ena kila na kosipeli i Jisu Karisito. Vakavulici ira mera dau masu. Vakavulici ira mera muria na Vosa ni Vuku, mera talairawarawa ka yalomalua e matana na Turaga, baleta ni ra sa na qasecake mai, sa na rawa ni ra na vakavinavinakataka vei kemuni na veika o ni sa cakava ena nodra bula, ka ra na qai raica lesu ena nodra bula ena yalo vakavinavinaka, kei na loloma vei ira na itubutubu ena vuku ni nodra a veisusu voli mai ka vakavulici ira ena kosipeli i Jisu Karisito.¹⁸

Mo na ivakaraitaki ni yalododonu.

Keitou kerei kemuni na itubutubu mo ni ivakaraitaki ni buladodonu, ka dau vakasoqoni ira vata mai na luvemuni ka vakavulici ira ena kosipeli ena lotu ni matavuvale kei na veigauna tale e so.¹⁹

Mera tovolea na itubutubu mera na sasaga ena kena e tiko sara e cake, ena ka era na gadreva vei ira na luvedra mera na rawata. Ena sega ni rawa mo ivakaraitaki ni dua na ka o sega tiko ni cakava,²⁰

Mo sa na veivakavulici ena ivakaraitaki kei na ivakavuvuli. Mo na dau tekiduru vata kei ira na luvemu ena masu. Mo na dau vakavulici koya ena yalomalumalumu ena inaki ni noda iVakabula o Jisu Karisito Mo na dau vakaraitaka vei ira na sala, kei koya na tama ena vakaraitaka na sala ena sega ni kaya vei luvena: “Luvequ, lako ki na Wilivola ni Sigatabu, se lako ki na Muavata, se lako ki na soqoni ni matabete,”ia ena kaya: “Lako mai, me daru lako.” O koya ena veivakavulici ena ivakaraitaki.²¹

Tekivu vakavulici ira na gone ni ra se ka lalai.

Ena sega ni dua na tamata me na tekivu qarava na Turaga ni se gone. …O ira na gone era na vakamuria na nodra ivakavuvuli na nodra itubutubu. Na gone e vakavulici me buladodonu ni se gone ena rawa ni buladodonu tu ga ena veigauna. Na ivakarau vinaka ena rawarawa na kena cokonaki ka vakamuri.²²

Me na dau caka na masu, na vakabauta, na loloma kei na talairawarawa ena matavuvale. Sa itavi ni itubutubu na vakavulici ira na luvedra ena ivakavuvuli ni kosipeli i Jisu Karisito, me rawa ni ra kila na vuna mera na papitaiso kina, ka na rawa ni ra na vakauqeti kina e yalodra mera na talairawarawa ki na vakamuri na ivunau ni Kalou ni ra sa papitaiso oti, ka me na rawa ni ra na lesu ka laki bula vata kei koya. Kemuni na taciqu kei na ganequ, ko ni na vinakati ira na nomuni matavuvale, ira na luvemuni, ko ni na vinakata mo ni vauci vei ira na tamamuni kei ira na tinamuni, ko ni na vinakata me taucoko tu na nomuni matavuvale, ena gauna sa na vakadonui kina mo ni curu ki na matanitu ni Kalou? Kevaka kina, mo ni sa tekivu sara ga mai na gauna ni nodra sucu.²³

Vakavulici ira na gone mera dau masu

Ena vakacava na matavuvale kevaka me sega ni tiko kina na yalo ni masu? Ena sega ni matavuvale ni Yalododonu Edaidai. Meda dau masu, me kakua ni dua na mataka eda lako sivia me sega ni da tekiduru vakamatavuvale ka masu, me vakavinavinakataki Vua na Nona veivakalougatataki ka kerei na Nona veituberi. Me kakua ni da laiva na bogi me lako siviti keda kevaka e sega ni da vakasoqoni ira vata na noda matavuvale ka vakavinavinaka vua na Turaga ena Nona veitaqomaki ka kerea na Nona veituberi ena veisiga ni noda bula.²⁴

Au sa nuitaka ni ko ni sa vakavulici ira tiko na luvemuni mera dau masu mai vale. Au nuitaka ni ko ni sa masu tiko vakamatavuvale ena mataka kei na yakavi, ka ra sa tuberi tiko na luvemuni ena ivakaraitaki kei na ivakavuvuli mera makutu ena muri ni ivunau ka ra sa ka na rawa kina na noda vakabulai ena matanitu ni Kalou.²⁵

Vakamatautaki ira na gone mera wili ivolanikalou.

E sega ni dodonu me dua na vale ena dua ga na yasai vuravura me sega ni laurai kina e dua na iVola Tabu. E sega ni dodonu me sega ni laurai kina e dua na iVola i Momani. Au vosa tiko qo ki na veimatavuvale ni Yalododonu Edaidai. E sega ni dodonu me dua na vale me sega ni tiko kina na Vunau kei na Veiyalayalati kei na Mataniciva Talei. Kakua ni biuti ira tu ena vata se ena kovate, ia mera dola tu me rawa ni wiliki, me rawa talega ni ra raica vakarawarawa na lewe ni matavuvale ka ra na wilika kina ka vulica na ivakavuvuli ni kosipeli.²⁶

Qarava na lotu ni matavuvale

O ira na gone era tubucake ena matavuvale ka ra dau qarava na lotu ni matavuvale, na vanua e sinai kina na veilomani kei na duavata, ka tarai kina na yavu dei baleta na lewena ka vakaitavi ena Lotu. Ena sega tale ni dua na ivakananumi vinaka mera na biuta tu mai na itubutubu vei ira na luvedra me vaka na kalougata ni dua na matavuvale mamarau, duavata, ka veilomani.

Na ituvatuva ni lotu ni matavuvale e tuvalaki vakamatau sa na rawa ni ivurevure ni bula marau kei na bula-vakaivakarau. Na veiyakavi vakaoqo sa gauna ni qaravi-i-tavi, gauna ni vakavakarau, gauna ni veilomani, veiwaseitaki ni ivakadinadina, vulici ni ivakavuvuli ni kosipeli, gauna ni veimarautaki vakamatavuvale, vakakina na vakaduavatataki kei na vaqaqacotaki ni matavuvale.

O ira na tama kei na tina era vakayacora tiko na lotu ni matavuvale ena yalodina, ka cakava me duavata na bula ni matavuvale ena nodra sasaga, era sa vakayacora sara tikoga na itavi bibi —vakaitubutubu.²⁷

O ira na tama era sa na vakayacora tiko na itavi bibi ni tama ena matanitu ni Kalou ena nodra liutaka na lotu ni matavuvale. Ni sa sotavi na veika oqo ena loma ni matavuvale sa na tarai cake kina na kena rokovi ka sa na vakavuna mera dui sasaga yadua na lewe ni matavuvale mera buladodonu ka bula mamarau.²⁸

O ira na itubutubu era vakawaletaka na veivuke e solia tiko na parokaramu oqo, [lotu ni matavuvale] era sa veitaliataka sara tikoga na nodra veisiga ni mataka na luvedra.²⁹

Vakavulica na ivalavala dodonu, ivalavala savasava, kei na veimaliwai vinaka.

Mo na vakavulici ira na luvemu mera bula savasava, veimaliwai vinaka, ka mera tekivu vakavulici ena gauna era se gone kina. Me na tukuni vakamatata vei ira na veika rerevaki ka rawa ni rawai ira sa bini tu e vuravura ena gauna oqo.³⁰

Keitou sa vakasamataka sara tiko vakabibi na nodra bula vakayalo na itabagone ena veivanua kece sara. Na veimaliwai vinaka, bula savasava, tiko savasava kei na galala mai na ca—na veika oqo me sa yavu dei sara ga ni noda bula, kevaka me na yaga vei keda.

Keitou kerei kemuni na tama kei na tina mo ni vakavulica na bula savasava ena ivakaraitaki kei na ivakavuvuli ka vakasalataki ira na luvemuni ena veika kece oqori. …

Keitou sa vakanuinui vei ira na itabagone tubucake tiko mai ena Lotu, ka kerei kemuni mo ni kakua ni muria na ivakaraitaki vakavuravura, ni kakua ni vakatavi ena yalo ni veivorati, ni kakua ni biuta na sala ni dina kei na bula savasava. Keitou vakabauta na kena ivakavuvuli vinaka ka sa vakanuinui ni na yaco mera duru ni bula savasava ka tomana na cakacaka ni Lotu ena yalo vakabauta kei na yalodina.³¹

Vakarautaki ira na gone mera ivakadinadina ni dina ka lako ki na kaulotu

O ira na noda itabagone era wili tiko ena iwasewase ka ra dau taleitaki cake mai vei ira na luvena na Tamada. O ira na vakaitutu mai lomalagi, era sa kalasitaki ka ra sa itabagone digitaki ni sa vakalou na nodra icavacava. Sa ra maroroi tu vakawawa mera na qai lako mai ena gauna oqo ni sa tu e vuravura na kosipeli, kei na nona gadreva na Turaga na dauveiqaravi yalodina mera cakava na cakacaka bibi oqo.³²

Meda vakarautaki ira na [gone] mera ivakadinadina ni dina kei na vakalou ni itukutuku oqo, vakabibi o ira na luveda tagane meda raica ni ra sa bula dodonu ka ganita mera laki kaulotu tudei mera laki vunautaka na kosipeli vei ira tale e so na luvena na Tamada.³³

Vukei ira na gone mera vakarautaka me tawamudu nodra matavuvale

Ko sa vakavulici ira tiko li na [luvemu] me rawa ni sa gauna ni nodra vakawati era na vinakata na lako ki na vale ni Turaga? Ko sa vakavulici ira tiko li me rawa ni ra na vinakata na ciqoma na veivakalougatataki sa vakarautaka oti tu na Turaga me baleti ira? Ko sa vakabibitaka tiko li vei ira ni rawa mera na laki vauci vakaveiwatini ka ra na vakalougatataki ena isolisoli kecega ka vure tiko mai na matanitu silesitieli?³⁴

Meda sa … veituberi ka veiliutaki vei ira na [gone lalai] mera na digitaka na itokani vinaka ka laki vauci ki na vale ni Turaga me na nodra kina na kalougata cecere taucoko eda sa vakamacalataka tiko.³⁵

Meda sasaga me dei toka ga na noda matavuvale, mera na tuberi tikoga ena Yalotabu ni Turaga, mera vakavulici ena ivakavuvuli ni kosipeli me rawa ni ra tubucake ena dodonu kei na dina. … [O ira na gone] era soli mai vei keda meda mai tuberi ira ena veika ni bula, na bula tawamudu, me rawa ni ra na lesu tale ka laki bula vata kei na Kalou, na Tamadra.³⁶

Vakatutu ni Vuli kei na Veivakavulici

Taro

Mai “Na Bula nei Joseph Fielding Smith,” vakadikevi ira na itubutubu era vakaraitaka na nodra loloma vei ira na luvedra. Vakasamataka na veika o rawa ni vakamuria kina na ivakaraitaki oqo, se mani vakacava na nomu itavi ki na nomu matavuvale. Era na vakacokotaki ira vakacava na itubutubu mera na rawata na tiko vata vakawasoma kei ira na luvedra?
Vakaraitaka o Peresitedi Smith na vei dredre vakayalo e donumaki ira ena nona gauna (raica na iwasewase 1). Na veika rerevaki cava tale eso era sa tu edaidai? Era na vukei ira vakacava na gone na itubutubu kei ira na tubudra kei na budra mera na valuta rawa na veika oqori?
Vakasamataka na nona vakararavitaka na Tamada Vakalomalagi vei ira na itubutubu ena nona solia vei ira mera qaravi ira na gone oqori (raica na wase 2). Na veituberi kei na veivuke cava e solia o Koya?
Na cava soti e cakava na Lotu, “me veivuke kina matavuvale kei na tamata yadua”? (Raica na iwasewase 3.) Sa vukei iko vakacava kei na nomu matavuvale na Lotu? Na cava e rawa ni da cakava meda vukei ira na gone mera na vakaitavi mai?
iWasewase 4 e tiko kina e levu sara na ka me vukei ira na gone kei ira na itabagone mera bulataka na kosipeli. Ni ko sa railesuva tiko na ivakasala, vakasamataka tiko na taro oqo: Na cava soti o ni sa cakava tiko vakavinaka kei ira na nomuni matavuvale? Na sala cava soti o ni na vakavinakataka cake kina? Na cava o rawa ni cakava mo vukei ira kina na itabagone ena Lotu me vaqaqacotaki na nodra ivakadinadina?

iVolanikalou Veisemati

Nai Vakarua 6:1–7; Same 132:12; Mosaia 1:4; 4:14–15; V&V 68:25–28; 93:36–40; raica talega “Na Matavuvale: Ai Vakaro ki Vuravura Raraba”

Veivuke ni Veivakavulici

“Qarauna mo kakua ni tinia koso na veivosaki me rawa ni o vakavulica kece kina na lesoni o vakarautaka tu mai. Dina ni bibi na kena vakavulici kece na lesoni, e bibi talega na nodra vukei na lewenikalasi me ra vakila na kaukauwa ni Yalo Tabu, ka me sauma talega yani vei ira na nodra taro, vakalevutaka na nodra kila na kosipeli, ka vakatitobutaka talega na nodra gugumatua me ra talairawarawa ki na ivakaro.” Ia, ena ganita “ni bibi me vakaotivi na veitalanoa ena kena gauna donu. E dau levu na yalo tabu ni veitalanoa vinaka e dau yali ke dau balavu na gauna ni veivosaki. … Dau lewa vinaka na gauna ni veivosaki. Mo kila vinaka na gauna me dau tini kina na lesoni. Me dau tiko ga e dua na gauna lekaleka mo taleva lesu kina na lesoni ka solia talega kina na nomu ivakadinadina” (Veituberi: Me iLutua ni Noda Bula [1999], 73,74).