Wase 21

Vunautaki ni Kosipeli ki Vuravura

“ Eda sa mai tovolea na vua ni kosipeli ka da kila ni sa kana vinaka, ka da gadreva mera ciqoma vakakina na veivakalougatataki vata ga oqo kei na yalotabu vata ga ka sa sovaraki mai vakalevu kivei keda.”

Na Bula nei Joseph Fielding Smith

Rau a sega ni kurabui o Joseph Fielding Smith kei watina, o Louie, ena gauna rau a taura kina e dua na ivola, ka saini toka mai kina o Peresitedi Lorenzo Snow, ka kacivi kina o Joseph me laki kaulotu tudei. Ena gauna o ya ni se qai tubu cake tiko na Lotu, era dau laki kaulotu vakayawa mai vale o ira na tagane vakawati. Ia ni sa yaco mai na ivola o ya ena ika 17 ni Maji, 1899, ni vo toka e dua na vula me marautaki kina na yabaki dua ni nodrau vakamau, rau sa ciqoma ga o Joseph kei Louie na madigi oqo ena vakabauta kei na yaloqaqa, ka waki vata kei na rarawa kei na vakasama ni veitawasei me rua na yabaki.

A laki kaulotu o Elder Smith e Igiladi, voleka ni 4,700 na maile (voleka ni 7,600 na kilomita) na kena yawa mai vale. Rau sa qai mai veivolavolai toka yani kei Louie—na ivola era umani tu kina na vakaraitaki ni loloma kei na ivakadinadina. Ena dua vei ira na imatai ni ivola nei Elder Smith vei Louie, a vola kina: “Au kila ni cakacaka au sa kacivi kina meu cakava sa cakacaka ni Kalou se au sega ni vinakata meu tiko eke me dua tale na miniti, sega, au na sega beka ni biubiu mai vale. Ia au kila ni nodaru bula marau sa na vakatau tiko ki na noqu yalodina tiko ena gauna au tiko kina eke. E dodonu meu tuvakarau meu cakava oqo ena vuku ni nodra lomani na kawatamata ni a mai vakararawataki na noda iVakabula ena Nona vakayacora ena vukuda. … Au sa tu oqo ena veimaroroi ni Tamada Vakalomalagi ka na wanonovi au matua ka taqomaki au tiko kevaka au cakava na nona lewa. Ka na tiko talega kei iko niu tu vakayawa oqo ka na wanonovi iko tiko o koya ka taqomaki iko mai na veika kecega.” ¹

E a italai yalodina ni Turaga o Elder Smith kei ira na nona itokani daukaulotu. Ena dua na nona ivola vei Louie, a tukuna kina ni veivula yadua, ni a veisoliyaka kei ira tale eso na daukaulotu e rauta ni 10, 000 na ivolalalai, se tikidua, ka sikova rawa e volekata ni 4, 000 na itikotiko. Ia, a talemuria na ripote oqo ena vakadidike bibi: “Au sega ni vakabauta me a wiliki e dua, se sivia e dua na tikidua oqo ena veiyadrau.” ² Ena gauna a tiko kina mai Igiladi o Elder Smith, e vica ga na tamata era a ciqoma na itukutuku ni kosipeli vakalesuimai. Ena loma ni rua na yabaki ni veiqaravi oqo, “ a sega mada ga ni cakava e dua me saumaki mai, se me vakayacora mada ga e dua na papitaiso, e dina ga ni a vakadeitaka rawa e dua a saumaki mai.”³ A sega ni raica rawa me vakavotukana na nona cakacaka, ia a kune vakacegu ga ni kila ni sa cakava tiko na lewa ni Turaga ka sa veivuke tiko ena nodra vakarautaki na tamata era rawa ni ciqoma vakamalua na kosipeli ena nodra bula e muri.

Ena rua na macawa ni nona kaulotu, a laki curu tu e valenibula o Elder Smith kei na va tale na daukaulotu. E ratou a tauvi bubuta ni yago na lima na daukaulotu oqo, e ratou sa mani vakadikevi vakavuniwai me tarovi na mate oqo me kua ni tete. E dina ga ni a vakatoka o Elder Smith na vakadidike oqo me “veivesu,” e ratou a marautaka sara vakaitokani na gauna oqo. E ratou a mani wasea talega na kosipeli vei ira na cakacaka e valenibula. Ni oti na nodratou vakadikevi, a vola na itukutuku oqo o Elder Smith ena nona ivolaniveisiga: “Keitou sa mai veikilai sara kei ira na nasi kei ira tale eso era a sikovi keitou yani ena neitou tiko vakavesu. E vuqa na gauna keitou a veivosakitaka kei ira na veika ni kosipeli; ka solia talega vei ira na ivola eso mera wilika. Ni keitou sa biuta mai na valenibula keitou a lagata e dua se rua na sere, ka veivakauqeti oqo mai na veika tale eso vei ira era a vakarorogo tu, ka tuturu na wai ni matadra ni keitou sa biuti ira. Au kila ni keitou a ivakaraitaki vinaka e valenibula ena vuku ni veika vinaka, vakabibi vei ira na nasi, ka ra tusanaka ni keitou sega ni mataqali tamata era a nanuma taumada me o keitou [ka ra] sa na totaki keitou ena veigauna kece.” ⁴

A vakacavara o Elder Smith na nona kaulotu ena June ni 1901. Ni oti e vitusagavulu na yabaki, a lesu tale ki Igiladi ena nona itutu ni Peresitedi ni Lotu me laki dabe vakatulewa ena dua na koniferedi ni iwasewase e kea. Me yacova na gauna o ya, sa buroro ka tubu sara na sorenikau a tea kei ira eso tale. A marautaka nona raici ira e vuqa sara na Yalododonu kai Peritania ni ra gole mai ki na soqoni. ⁵ A kaya kina, “Sa mai vica toka oqo na iteki kei Saioni, sa vakatabui e dua na valetabu vua na Turaga, sa vica vata na tabanalevu kei na vale ni iteki, ka vica toka na cakacaka gugumatua ni kaulotu— sa mai ivakadinadina tiko ni sa matua sara na Lotu e Peritania. A kaya talega ni tubucake oqo e Peritania sa tukuna tiko na veika e rawa ni yaco e vuravura taucoko. A kaya ni kosipeli oqo sa nodra na tamata kecega ka “sa na tauyavutaki na Lotu ena veivanua kecega, ena veimatanitu kecega, me yacova yani na iyalayala kei vuravura, ni bera na ikarua ni nona lako mai na Luve ni Tamata.” ⁶

"Smith, Joseph Fielding, 1876-1972." — O Elder Joseph Fielding Smith ena 1910, ni se qai oti toka ga na nona tabaki me iApositolo

iVakavuvuli nei Joseph Fielding Smith

Sai keda duadua ga e tiko vei keda na taucoko ni kosipeli vakalesuimai, ka sa noda gagadre mera ciqoma na veivakalougatataki oqo na tamata kecega.

Mai na nona vuku tawayalani, ka me vakayacori na veiyalayalati kei na yalayala a vakayacori vei ira na parofita ni gauna makawa, sa vakalesua mai kina na Turaga ena iotioti ni gauna na taucoko ni nona kosipeli tawayalani. Na kosipeli sa ituvatuva ni veivakabulai. A tabaki ka tauyavutaki ena matabose ni veigauna tawamudu ni bera mada ni vakadavori na yavu ni vuravura oqo, ka sa mai vatakilaitaki vou ena noda gauna oqo me baleta na nodra vakabulai ka vakalougatataki na luvei Tamada kece sara ena veivanua. …

Volekata toka ni ono na drau na yabaki ni bera na Karisito— o ya, na nona yaco mai — a kaya kina na parofita cecere o Nifai kivei ira na nona tamata: “… ni sa dua ga na Kalou ka sa duabau ga na iVakatawa ni vuravura taucoko.

“Ia ena yaco na gauna ena vakaraitaki Koya kina vei ira na veimatanitu kecega. …” (1 Nif. 13:41–42.)

Sa cadra mai oqo na siga a yalataki o ya. Sai koya oqo na gauna lokuci ni kena vunautaki yani na kosipeli ki vuravura taucoko kei na kena tara cake na matanitu ni Turaga ena veimatanitu kecega. Era tiko na tamata vinaka ka dodonu ena veimatanitu kecega era na vakarorogo ki na dina oqo; era na gole mai ki na Lotu; ka ra na yaco mera rarama ka dusimaki ira na wekadra. …

… Na kosipeli sa baleta na tamata kecega, ka sa na namaka na Turaga vei ira era na ciqoma mera bulataka na kena dina ka solia yani vei ira era sa matanitu vata ka ivosavosa vata.

Ia oqo, ena yalo ni loloma kei na veitacini, eda sa sureti ira kina na tamata kecega ena veivanua kecega mera rogoca mada na vosa ni bula tawamudu sa vakatakilai mai ena gauna oqo vua na Parofita Josefa Simici kei ira na nona ilawalawa.

Eda sa sureti ira kina na luve ni Kalou tale eso mera “lako vei Karisito, mo dou vinaka kina,” ka mera biuta tani na “ivalavala sa sega ni vakalotu.” (Moro. 10:32.)

Eda sa sureti ira mera vakabauti Karisito kei na nona kosipeli, mera gole mai ki na nona lotu, ka mera sa duabau kei ira na nona yalododonu.

Eda sa mai tovolea na vua ni kosipeli ka da kila ni sa kana vinaka, ka da gadreva mera ciqoma vakakina na veivakalougatataki vata ga oqo kei na yalotabu vata ga ka sa sovaraki mai vakalevu kivei keda.⁷

Au kila deivaki ni ra tiko na tamata vinaka ka yalodina ena kedra maliwa na ilawalawa, isoqosoqo, kei na veimatalotu eso, era na vakalougatataki ka saumi ena veika kece e vinaka era cakava. Ia na dina e tiko ni sa tiko duadua ga vei keda na taucoko ni lawa oqori kei na kena cakacaka vakalotu ena vakarautaki ira na tamata ki na taucoko ni kedra isau ena itikotiko cecere mai cake. Eda sa qai kaya kina vei ira na tamata vinaka ka dokai, vei ira sa dodonu ka yalodina ena veivanua kecega: Ni maroroya tikoga na nomuni vinaka kece oqori; ququmi matua tiko ki na ivakavuvuli dina yadudua sa nomuni tiko oqo; ia mo ni gole mai ka votai ena ikuri ni rarama kei na kila-ka sa sovaraki tale mai kivei ira na nona tamata ni Kalou sa ikoyakoya tikoga e nanoa, e nikua, ka tawamudu.⁸

Sa noqu masu mena maqusataki ka vakacavari yani na inaki ni Turaga ena vuravura oqo, ena loma kei na taudaku ni Lotu, me na vakalougatataki ira kina na nona Yalododonu yalodina; ka me tudonu ena mata ni Turaga na yalodra o ira na tamata kecega era sa vakasaqara tiko na dina kei na yalodra o ira sa dodonu mera sa na itaukei vata kei keda ena taucoko ni veivakalougatataki ni kosipeli vakalesuimai.⁹

Sa tiko e dua na nodra itavi na lewe ni Lotu taucoko mera vakayagataka na nodra gugumatua, kaukauwa, ivurevure, kei na veivakauqeti mera vunautaka na kosipeli.

Eda sa rogoca oti ni da sa daukaulotu kece sara. … Eda sa tabaki taucoko, sega ena veitabaki ni liga; e se bera ni dua noda veikacivi cecere; eda se sega ni digitaki vakatabakidua meda kaulotu, ia me vaka ni da sa lewe ni Lotu, ka da sa soli keda ki na kena vakatetei yani na kosipeli i Jisu Karisito eda sa qai daukaulotu kina. Sai koya qori na tiki ni itavi ni lewe ni Lotu yadua.¹⁰

Ena yalo sa sinai kina na yalo ni lomani ira na tamata kecega, au sa kerei ira na lewe ni Lotu mera vulica ka bulataka na kosipeli ka mera vakayagataka na nodra gugumatua, kaukauwa, kei na ivurevure ena kena vunautaki yani ki vuravura. Eda sa ciqoma e dua na ilesilesi mai vua na Turaga. Sa solia vei keda o koya e dua na ivakaro vakalou. Sa vakaroti keda meda gole yani ena vuku sega ni guce ka solia yani kivei ira na luvena tale eso na dina veivakabulai sa vakatakilai mai vei Parofita Josefa Simici.¹¹

Sa qai noda ilesilesi, meu kaya, ni sa tiko vei keda na kena kaukauwa, meda veivakabulai yani, ka muataki ira mera veivutuni, me vaka ga e vuqa vei ira na luvena na Tamada mai lomalagi ni sa rawa vei keda meda cakava. … Oqori na noda ilesilesi sa tuvanaka na Turaga ena Lotu, ka vakabibi vei ira na kuoramu ni matabete ena Lotu, ka sa nona talega na tamata yadua na ilesilesi oqo.¹²

E vuqa vei ira na tamata yalodina cecere era tiko ena keda maliwa era se bera ni ciqoma mada na madigi, se mera bau gu yani mera vakasaqara, me rawa ni ra kunea na dina lagilagi oqo ka sa vakatakilai mai vua na Turaga. Era sega ni bau vakanananu ki na veika oqo, o ira era bula vata tiko kei keda, ka da veimaliwai tiko kei ira ka da veiraici tiko ena veisiga. Era nanuma tiko ni da tamata vinaka, ia e duatani toka na noda vakabauta vakalotu, ka sega kina ni ra kauwai mai ki na noda vakabauta, sa mai yaco kina na cakacaka cecere oqo ni kaulotu sa vakayacori tiko ena iteki kei Saioni mera sa vakasokomuni tiko ena tatamusuki ni tamata era sa savasava ka yalodina, ena kedra maliwa era se bera mada ni taura na madigi oqo, au kaya, ni sa nodra vakakina, mera rogoca na kosipeli.¹³

Two native elder missionaries walking down a dirt road. — “ Na tamata yadua era sa ciqoma na rarama ni kosipeli era sa yaco mera dua na rarama ka idusidusi kivei ira kece ena vakavulica rawa o koya.”

Vei keda eda sa ciqoma na dina ni kosipeli tawayalani meda kakua ni kanamoce tiko ena dua na ka se bera ni kena e uasivi sara, ni sa uasivi sara na taucoko ni matanitu nei Tamada; ena inuinui oqori sa noqu masu kina meda bula ka ivakaraitaki ni ivalavala dodonu kivei ira na tamata kecega me kakua ni dua e tarabe koso, me kakua ni dua e bale, me kakua ni dua e gole tani mai na salatu ni ivalavala dodonu, e vakavuna e dua na ka eda rawa ni cakava se cavuta.¹⁴

E tiko e dua na veivakauqeti e sega ni dau cila duadua ga mai vua na tamata ia mai na Lotu talega. Au vakabauta ni noda rawa ka ena vuravura oqo e vakatau tiko vakalevu ki na nodra ivakarau na Yalododonu. Kevaka sa taucoko na noda duavata tiko, ena vakasama, ena cakavinaka, ena noda ivalavala; kevaka eda sa lomana na vosa ni dina, kevaka eda sa lako voli kina me vaka sa gadreva na Turaga meda cakava, sa na qai cila mai na itikotiko raraba oqo, mai vei ira na [ivavakoso] ni Yalododonu Edaidai ena veiitikotiko raraba kece oqo, ki vuravura taucoko, e dua na veivakauqeti veirawai dina. Era na saumaki mai e vuqa sara na tagane kei na yalewa dau dina, ni na liu tiko vei keda na yalo ni Turaga me vakarautaka tiko yani na kena salatu. … Kevaka, era na muria na tamata oqo, na vunau ni Turaga sa na yaco kina me dua na idre kei na kaukauwa kei na veivakauqeti ka na vakavurumemeataka na meca ka na vakarautaki ira na tamata mera ciqoma na rarama ni Kosipeli tawayalani; kei na gauna eda na sega kina ni cakava eda sa qai vakataqara tu ga vei keda e dua na itavi ena ca sara na kena revurevu.

Na cava beka ena yaco vei au, se vei iko, ni daru sa kacivi ki na idabedabe ni veilewai kevaka e dua me dusi au mai ka kaya “kevaka beka a sega ni cakava o koya oqo se ilawalawa oqo na ka o ya keu a ciqoma beka na dina, ia au a matavulotaki baleta ni ratou, a tukuna ni tiko vei iratou na rarama, ia ratou a sega ni bulataka tiko.” ¹⁵

E kaya na Turaga kevaka eda na cakacaka ena noda bula taucoko ka vakabula walega e dua, ena cecere sara na noda reki vata kei koya [raica na V&V 18:15]; ena dua tale na yasana ena levu sara na noda rarawa kei na noda ca kevaka eda na muataka laivi e dua mai na dina oqo ena noda ivalavala.¹⁶

O ira na Yalododonu Edaidai, ena vanua cava ga era tiko kina, era sa dodonu sara mera rarama kei vuravura. Na kosipeli sa dua na rarama e curu basikata yani na butobuto, ka ra na yaco na tamata yadua era ciqoma na rarama ni kosipeli mera dua na rarama ka idusidusi kivei ira kece era na vakavulica o koya.

Na nomu itavi … o ya mo ivakadinadina bula tiko ni dina kei na kena sa vakalou na cakacaka oqo. Keimami nuitaka ko ni na bulataka na kosipeli ka cakacakataka mo vakabulai, kei na nodra raica eso na nomu cakacaka vinaka ka rawa mo vakalagilagia kina na Tamada mai lomalagi [raica na Maciu 5:16].¹⁷

Sa gadreva tu na Lotu e vuqa sara na daukaulotu mera gole yani ena veitalai ni Turaga.

Eda gadrevi ira na daukaulotu. … Sa rabailevu na were; sa vakalewe na yabaki; ia sa le lailai ga na tamata cakacaka [raica na Luke 10:2]. Sa vakakina ni sa matua na were ka sa vakarau na tatamusuki [raica na V&V 4:4]. …

… Era sa gole yani na noda daukaulotu. E sega na kaukauwa me tarova na nodra cakacaka. Sa vakatovolei oti. A tekivutaki taumada ena sasaga cecere ena gauna se qai lewe vica ga na daukaulotu, ia na toso ni cakacaka oqo ena sega ni tarovi rawa. Ena sega ni tarovi rawa ena gauna oqo. Sa dodonu me toso tikoga yani me rawa ni yaco na madigi vei ira na lewe i vuravura mera veivutunitaka na nodra ivalavala ca ka gole mai ki na matanitu ni Kalou, ni bera ni yaco mai na iotioti ni veivakarusai vei ira na tamata ca, ni sa yalataki oti tu. …

Sa yaco kina vei ira na daukaulotu oqo, vakalevu o ira na cauravou, era sega ni vulica na veika ni vuravura, mera gole yani vata kei na itukutuku ni veivakabulai ka vakurabuitaki ira na tamata cecere ka kaukauwa, baleta ni tu vei ira na ka dina. Era sa vunautaka tiko na kosipeli oqo; ka ra sa rogoca o ira era dina ka dei ka ra sa veivutunitaka tiko na nodra ivalavala ca ena nodra gole mai ki na Lotu.¹⁸

Eda sa nuitaka tiko meda raica na siga ena yaco kina na madigi vei ira yadua na tagane Yalododonu Edaidai kilikili ka vakadonui mera gole yani mera italai ni Turaga ni vakadinadinataka na dina ki na veimatanitu e vuravura.

Era sa tu oqo vei keda e vuqa na veiwatini ituvaki vinaka ka matua meda vakayagataki ira vakavuqa ena inaki ni cakacaka cecere oqo, ka da sa nuitaka tiko vei ira era sa kilikili kaya ka vakadonui ni ra na vakatudonutaka na nodra cakacaka ka vakaio ki na veikacivi ni vunautaka na kosipeli ka vakayacora ena lomavinaka na nodra itavi.

Era sa tu talega e vuqa na noda goneyalewa ka da rawa ni vakayagataki ira ena cakacaka oqo, e dina ga ni sega ni vakatabakiduataki vei ira na nodra cakacaka oqo na turaga, ka me sa noda gagadre levu o ya mera curuma yani na goneyalewa na nodra vakamautaki vakadodonu ena valetabu ni Turaga.

Eda sa sureti ira na lewe ni Lotu mera veivuke mai vakailavo ena kena tokoni cake na inaki ni kaulotu ka cau mai ena galala ena veika sa tu vei ira me vakatetei kina na kosipeli.

Eda sa vakavinavinaka vei ira era sa veiqaravi vakayaloqaqa tiko ena inaki cecere ni kaulotu. E kaya kina o Josefa Simici: “Mai na veika kece sa tukuni, na itavi cecere ka bibi duadua o ya na kena vunautaki yani na kosipeli.”¹⁹

A senior missionary couple reading the scriptures. — “Eda sa vakavinavinaka kina vei ira sa veiqaravi tiko vakayaloqaqa ena inaki cecere oqo ni kaulotu.”

Meda sa vunautaka yani na ivakavuvuli ni kosipeli me vaka era sa toqai tu ena ivolanikalou ena kena rawarawa ka matata ena veidusimaki ni Yalotabu.

Ena itekitekivu ni itabagauna oqo, a kaya kina na Turaga vei ira a kacivi ki na nona cakacaka vakalotu, “mera vunau ko ira ena yaca ni Turaga na Kalou, na nodra iVakabula na kai vuravura; … Ia era na vunautaka yani na uto ni noqu ivakavuvuli dina ko ira sa malumalumu kei ira na tamata wale, io mera vunautaka yani ki vuravura taucoko, vei ira talega na tui kei na turaga.” (V&V 1:20, 23).

Kivei ira sa kacivi “mera laki vunautaka” na nona kosipeli vakakina vei ira na “italatala qase, na bete kei na ivakavuvuli” ni nona lotu, a kaya kina: Mera na “vunautaka yani na noqu itukutuku vinaka sa tabaki tu ena i Vola Tabu kei na iVola i Momani,” vata kei na ivolanikalou tale eso, “me vaka sa uqeti ira na Yalo Tabu mera kitaka.” (Raica naV&V 42:11–13.)

Me vaka ni da sa matataka tiko na Turaga eda sa sega kina ni kacivi se vakadonui meda vakavulica na ivakavuvuli kei vuravura se veivakasama tawakilai ni noda gauna ni vakadidike oqo. Sa noda ilesilesi ga meda vunautaka na ivakavuvuli ni veivakabulai ena kena rawarawa ka matata me vaka era sa vakatakilai ka volai tu ena ivolanikalou.

Ni sa mai dusimaki keda meda vakavulica yani na ivakavuvuli ni kosipeli era sa tiko ena ivolayavu ni lotu, ena veidusimaki ni Yalotabu, sa qai cavuta kina na Turaga na ivakaro ka kovuti taucoko kina na kena vakavulici na nona kosipeli mai vua e dua ena loma ni Lotu: “Raica ena soli vei kemudou na Yalotabu ni dou sa kerea ena vakabauta; ia mo dou vunau walega ena veivakauqeti ni Yalotabu.” (V&V 42:14.)²⁰

Sa inuinui duadua ga kei vuravura na kosipeli, na sala duadua ga ena kauta mai na vakacegu e vuravura.

O kila beka na kaukauwa cecere duadua, na cakacaka veivakauqeti bibi duadua, me tauyavutaki tudei kina na vakacegu ena vuravura oqo? Au na sauma ga na ka au sa taroga, meu bau vakaraitaka kina na noqu nanuma me baleta na ka oqo— ka sega ni tukuna na veika tale eso vakavuravura. Na cakacaka cecere duadua e vuravura taucoko sai koya na kaukauwa ni Matabete Vakalou, ka sa nodra tu oqo na Yalododonu Edaidai. Mai na kena itekitekivu sara a talai ira na italatala qase na Turaga ki vuravura, ka vakaroti ira mera kacivi ira na tamata, ka kaya, ni Veivutuni, ka lako mai ki Saioni. Vakadinata na noqu kosipeli ko na qai kune vakacegu.

Ena yaco mai na vakacegu, ia, ena ivalavala dodonu, ena lewa vakadodonu, ena loloma veivueti ni Kalou, ena kaukauwa sa solia mai vei keda o koya ka na tarai kina na yaloda ka da na veilomani kina vakaikeda. Sa noda itavi oqo meda vunautaka yani na veika oqo ena kedra maliwa na tamata kecega, kacivi ira mera gole mai ki Saioni sa tu kina na kena ivakatagedegede— na ivakatagedegede ni vakacegu —ka ciqoma na veivakalougatataki ni vale ni Turaga kei na veivakauqeti ni nona Yalotabu Savasava ka sa yaco tiko eke. Kau gadreva meu tukuna vei kemuni ni oi keda vakai keda, kevaka meda na qarava na Turaga, ka na tu vei keda na kaukauwa totoka me baleta na kena tauyavutaki na vakacegu ena vuravura oqo.

Sa qai lomada kina me toso tikoga na veika tale eso ena salatu oqo. Eda sa duabau ki na veika kece ena kauta mai na vakacegu ki na vuravura oqo; ia meda kakua ni guilecava, au raica ni kevaka meda vau vata na Yalododonu Edaidai, ka duavata ena qarava na Turaga ka kauta yani na vosa ni bula tawamudu ki na veimatanitu kecega, ena tu vei keda na kaukauwa cecere, me tauyavutaki na vakacegu ena vuravura oqo ka sega ni rawa ena dua tale na kaukauwa. Au duavata sara ena vakasama sa mai vakaraitaki tiko ni sa vakayagataka tiko na Turaga e vuqa na mata-cakacaka; na nona cakacaka e sega ni baleti ira walega na Yalododonu Edaidai, ni sa kaciva o koya e vuqa ki na nona cakacaka ena taudaku ni Lotu ka sa vakaedaumenitaki ira ena kaukauwa, ka ra sa vakauqeti kina mera vakayacora na nona cakacaka. … Ia, kemuni na taciqu kei na ganequ, meda sa kakua ni guilecava na dina oqo ni da sa dua na kaukauwa ena vuravura oqo me baleta na caka vinaka kei na kena vakatetei na dina kei na kena tauyavutaki na vakacegu ena kedra maliwa na veimatanitu, duikaikai, duivosavosa kei na tamata. … Sa noda ilesilesi mai liu kei na gauna oqo na, “Dou veivutuni, raica sa voleka mai na matanitu vakalomalagi.” [Raica naV&V 33:10.]

Meda tomana tikoga me yacova ni ra sa vakasokomuni taucoko na tamata ivalavala dodonu, me yacova ni ra sa vakaroti na tamata kecega, me yacova ni ra sa vakarorogo o ira era na vakarorogo, kei ira era sega ni via rogoca mera rogoca talega, ni sa tukuna oti na Turaga ni na sega ni dua me na sega ni rogoca rawa, ka sega ni dua na yalo me sega ni laubasikati rawa [raica na V&V 1:2], ni na vakarogoi yani na nona vosa, mai na gusudra na nona italatala qase se dua tale na sala, sa tautauvata ga, ia ena nona gauna ga ena vakalekalekataka kina na nona cakacaka ena ivalavala dodonu; ka na tauyavutaka na nona dina ka na yaco mai o koya me mai veiliutaki e vuravura.²¹

Eda sa rokovi ira na luvei Tamada ena vakabauta, ilawalawa, kei na matalotu tale eso, ka sa noda gagadre ga meda raica mera na ciqoma na ikuri ni rarama kei na kila-ka sa yaco mai vei keda mai na ivakatakila, ka yaco mera taukena vakataki keda na veivakalougatataki cecere ni vakalesuimai ni kosipeli.

Ia sa tu vei keda na yavu ni veivakabulai; eda sa qarava tiko na cakacaka ni kosipeli; ka sa inuinui duadua ga kei vuravura na kosipeli, na sala duadua ga ena kauta mai na vakacegu ena vuravura oqo ka vakadodonutaki na tamata cala era tiko ena veimatanitu kecega.²²

Eda sa kila tu ni kevaka era sa vakabauti Karisito na tamata, veivutunitaka na nodra ivalavala ca, veiyalayalatitaka ena wai ni papitaiso mera maroroya tiko na nona ivakaro, ka qai ciqoma na Yalo Tabu ena veitabaki ni ligadra era sa kacivi ka tabaki ena kaukauwa oqo— kevaka mera na qai maroroya na ivakaro—era na kune vakacegu ena bula oqo kei na bula tawamudu ena vuravura sa roro tiko mai [raica na V&V 59:23].²³

E sega ni tiko e dua na iwali ni ca sa tu e vuravura vakavo duadua ga na kosipeli i Jisu Karisito. Na noda inuinui ni vakacegu, na rawa ka vakayago kei na vakayalo, kei na vakaitaukeitaki ena matanitu ni Kalou sa kune duadua ga ena kosipeli vakalesuimai. E sega na cakacaka me vakaitavitaki koya kina e dua vei keda e bibi cake me vakataka na nomu vunautaka yani na kosipeli kei na nomu tara cake na matanitu ni Kalou e vuravura.²⁴

Vakatutu ni Vuli kei na Veivakavulici

Taro

Vakasamataka mada na sala a cakacaka kina o Joseph Fielding Smith ni a bolei me laki daukaulotu tudei (raica na Bula nei Joseph Fielding Smith”). E veivakauqeti vakacava na nona ivakaraitaki ki na nomu veiqaravi ena Lotu?
Vakasamataka vakatitobu na veivakalougatataki ni tovolea na “vua ni kosipeli” (iwasewase e 1). Vakasamataki ira eso o na rawa ni laki wasea vei ira na “vuanikau” oqo.
Ena vukei keda vakacava na vosa nei Peresitedi Smith ena iwasewase e 2 meda wasea yani na kosipeli vei ira na tamata?
E kaya o Peresitedi Smith ni sa gadreva tiko na Lotu me levu cake na daukaulotu tudei, oka kina o ira na “veiwatini matua” (iwasewase e 3). Na cava e rawa ni da cakava mera vukei na cauravou mera vakavakarau ki na kaulotu? Na cava o rawa ni cakava mo vakaraitaki iko mo laki kaulotu?
Ena sala cava ena vakadewataka kina na noda vosa kei na ivalavala ni sa rawarawa ka matata sara na kosipeli? (Raica na iwasewase e 4.) Na gauna cava beka o a vakila kina na nomu a dusimaki ena Yalo Tabu ena sasaga oqo?
Na ivakavuvuli cava ena iwasewase e 5 e veivakauqeti vakabibi sara vei iko? Na cava o bau vakila ni ko sa nanuma mo wasea “na inuinui duadua ga kei vuravura, na sala duadua ga ena kauta mai na vakacegu ena vuravura oqo?

iVolanikalou Veisemati

Maciu 24:14; Marika 16:15; 1 Nifai 13:37; 2 Nifai 2:6–8; 3 Nifai 12:13–16; V&V 1:17–24; 4; 50:13–14; 88:81; 133:57–58

Veivuke ni Veivakavulici

Ni wilika tiko e dua e vakaitavi tiko na ivakavuvuli nei Peresitedi Smith, sureti ira na vo ni vakaitavi mera “vakarorogo ka vakasaqara e so na ivakavuvuli uasivi se vakasama. Ke tiko eso na vosa tani se dredre, me vakamacalataki ni bera ni wiliki. Ke tiko na leqa se na dredre ni wilivola vua e dua na lewe ni nomu kalasi, kerea tale e dua me wilika” (Veituberi, Me iLutua ni Noda Bula[1999], 64).