Wase 3

Na Yavu ni Veivakabulai

“Na Tamada Vakalomalagi a tauyavutaka e dua na yavu ni veivakabulai baleti ira na luvena vakayalo … me rawa ni ra toso ki liu ka gugumatua me yacova na gauna era sa rawata kina na bula tawamudu.”

Na Bula nei Joseph Fielding Smith

Ena ika 29 ni Epereli, 1901, a mate kina o Alice na ganei Joseph Fielding Smith gone yabaki 18 ni oti e dua na tauvimate balavu. E se qai vakacavara sara ga o Joseph na nona kaulotu tudei e Igiladi. Na ka e kauta mai vua na itukutuku ni mate nei Alice sai koya na vakaraitaki ni nona lomana na nona matavuvale kei na nona ivakadinadina ni yavu ni veivakabulai. “Sa dua dina na veivakatovolei vei keda taucoko,” a vola ena nona ivolaniveisiga. “Au sega ni kila na bibi ni nona tauvimate e dina ga niu kila ni a tauvimate tiko. A taucoko tu noqu namaka meu sotavi koya tale vata kei na vo ni matavuvale ena loma ni vica na macawa, ia au gadreva me yaco ga na lewa ni Kalou. Sa ikoya sara ga na gauna vakaoqo ni inuinui e solia vei keda na kosipeli me ra ciqomi. Eda na lai sota vata kece tale ena bula ka tarava meda rekitaka na marautaki kei na veivakalougatataki ni noda lai tiko vata, ka na sega tale vakadua ni cavuka na isema vakamatavuvale, ia na vanua eda na lai bula vata kece kina meda ciqoma na veivakalougatataki, ka sotava na yalo loloma nei Tamada mai lomalagi. Au nuitaka niu na muria na sala ni dina e veigauna, ka rokova na yaca au taukena, ni gauna au sota vata kina kei ira na wekaqu era sa yali yani e vaka vei au ni sa kamikamica vakaidina sara ga ka tawamudu, sa noqu masu ena yalomalua.”¹

Veiqaravi vaka i Apositolo ka qai Peresitedi ni Lotu, a vakadinadinataka vakawasoma o Peresitedi Joseph Fielding Smith ena inuinui e lako mai ena kilai ni kosipeli. A vakatavulica, “E tu vei keda na yavu ni veivakabulai; eda cakacakataka na kosipeli; kei na kosipeli sa ikoya na inuinui duadua ga ni vuravura, na sala duadua ga ka na kauta mai na vakacegu e vuravura ka vakadodonutaka na cala era tu ena veivanua kece sara.”²

iVakavuvuli nei Joseph Fielding Smith

Ena vuravura ni yalo taumada, eda rekitaka noda vulica na yavu ni veivakabulai nei Tamada Vakalomalagi.

Eda lewena kece na matavuvale nei Tamada mai Lomalagi. Eda a bula ka tiko vata kei Koya ni bera ni tuvalaki na kena tauyavutaki na vurvura oqo. Eda raica na Matana, vakila na Nona loloma, ka rogoca na Nona ivakavuvuli, kei na Nona tauyavutaka na lawa me rawa kina noda toso ki liu kei na gugumatua ka rawata na noda tabana ni matavuvale tawamudu vakai keda.³

“Eda bula ka vakaitikotiko vata kei [na Tamada Vakalomalagi] ni se bera ni tauyavutaki o vuravura.”

Na Tamada mai lomalagi a tauyavutaka e dua na yavu ni veivakabulai me baleti ira na luvena vakayalo. A nakiti na yavu oqo me rawa ki na nodra toso ki liu ka gugumatua me yacova na gauna era sa rawata kina nodra bula tawamudu, sa ikoya na yaca ni mataqali bula a bulataka na Tamada mai Lomalagi. Na yavu oqo sa ikoya me rawa kina vei ira na luve ni Kalou me ra yaco me ra vakataki koya ka rawata na kaukauwa kei na vuku kei na kila ka e taukena tu.⁴

Eda vulica mai na Mataniciva Talei, ni a vakayacori e dua na matabose mai lomalagi, ena nona a kaci na Turaga me ra soqoni yani Vua na yalodra na luvena ka me vakaraitaka vei ira e dua na yavu sa ikoya ni dodonu me ra lako sobu mai ki na vuravura oqo, mai sotava na bula vakavuravura kei na bula vakayago, lako sivita yani e dua na veivakatovolei ni bula vakavuravura oti qai lako ki na dua na bula cecere vakalou mai na tucaketale ka dodonu me kauta mai na veisorovaki ni Luvena E Duabau Ga, o Jisu Karisito [raica na Mosese 4:1–2; Eparama 3:22–28]. Na vakasama ni lako sivita mai na bula vakavuravura kei na sotavi ni veiveisau kece sega ni namaki ena bula vakavuravura ka na rawati na veika e sotavi mai na leqa, mosi, rarawa, veivakatovolei kei na vakalolomataki,vaka kina na marautaki ni bula ka tu ena vuravura oqo, oti qai, kevaka era na vakabauta tu ga, lako sivita yani na tucaketale ki na bula tawamudu ena matanitu ni Kalou,eda na tautauvata kaya [raica na 1 Joni 3:2], vakasinaiti ira ena yalo ni mamarau, ka ra “kaila ena reki.” [Raica na Jope 38:4–7.] Na veika e sotavi kei na kila ka e rawati ena bula vakavuravura oqo, era sega ni rawata mai na dua tale na kena sala, kei na kena ciqomi e dua na yago a yaga ki na nodra bula vakalou.⁵

Na Lutu nei Atama kei Ivi a tiki ni yavu nei Tamada Vakalomalagi.

Na yavu ni veivakabulai, se na vakaduri ni lawa, ka sa kilai tu me kosipeli i Jisu Karisito, a ciqomi ka vakayagataki mai lomalagi, ni bera ni tuvai na yavu kei vuravura. O Atama na tamada a lesi mai lomalagi ka dodonu me lako sobu mai ki na vuravura oqo ka tucake tu me ulu ni matavuvale vakatamata taucoko. Sa ikoya e dua na tiki ni yavu cecere oqo, ni dodonu me kania na vuanikau vakatabui ka lutu, ka kauta mai kina na leqa kei na mate ena vuravura, me baleta ga na nodra itinitini vinaka na luvena.⁶

Na Lutu sa ikoya e dua na tiki yaga ni vakatovolei vakayago ni tamata. … Ke rau a sega ni kania o Atama kei Ivi, ke a sega ni lako mai vei rau na isolisoli cecere ni bula vakavuravura. Vakalevu cake sara, ke a sega tale ga nodrau kawa, kei na ivakaro cecere a soli vei rau mai vua na Turaga a sega tale ga ni rawa me vakayacori.⁷

Na Lutu nei Atama kei Ivi “e kauta mai na mosi, e kauta mai na rarawa, e kauta mai na mate; ia … e kauta tale ga mai na veivakalougatataki.”

Na lutu nei Atama e kauta mai na veiveisau kece ni bula vakavuravura. A kauta mai na mosi, a kauta mai na rarawa, a kauta mai na mate; ia e sega ni dodonu meda vakayalia na dina ni kauta tale ga mai na veivakalougatataki. … E kauta mai na veivakalougatataki ni kila ka kei na kila kei na bula vakavuravura.⁸

A soli Koya o Jisu Karisito ena dua na solibula me vakabulai keda mai na Lutu kei na noda ivalavala ca.

Na talaidredre nei Atama a kauta mai kina e rua na mate oqo, vakayalo ka vakayago —e vakatalai tani na tamata mai na mata ni Kalou, ka yaco me vakayago ka rawa me yaco vua na tauvimate kece ni yago. Me rawa kina ni dodonu me kau lesu tale mai o koya, e dodonu me dua na kena isosomi na lawa voroki. Na lewa dodonu e gadrevi kina.⁹

Sa dau kena ivakarau uasivi ka dodonu ni o koya ga e caka cala e dodonu me sauma na kena isau— e dodonu me sorovaka nona caka cala. O koya gona, ena nona sa talaidredre ki na lawa o Atama, na lewa dodonu e gadrevi koya, ka sega tale ni dua, e dodonu me vakararawataki baleta na ivalavala ca ka sauma na itotogi ena nona bula. Ia o Atama, ena nona voroka na lawa, yaco kina me vakararawataki mai na cudruvi, kei na nona cudruvi e sega kina ni rawa me soro, se veisautaka na ka a cakava. E sega tale ga ni rawa vei ira na luvena, baleta ni ra a cudruvi tale ga, ka gadrevi kina e dua e sega ni okati ena cudruvi me sorovaka na i matai ni ivalavala ca. Me vakuria oqo, me vaka ni da cudruvi kece tu, e sega tale ga vei keda na kaukauwa meda sorovaka kina na noda dui ivalavala ca. O koya gona sa yaco kina me yaga vua na Tamana me tala mai na Luvena E Duabauga, ka galala tu mai na ivalavala ca, me sorovaka noda ivalavala ca vaka kina na talaidredre nei Atama, ka dodonu me caka na lewa dodonu e gadrevi kina A mani soli koya vakaikoya me dua na solibula baleta na ivalavala ca, kei na nona mai mate ena kauveilatai a taura vakai koya ruarua na talaidredre nei Atama kei na noda dui ivalavala ca vakayadudua, oqori gona e sa vakabulai keda mai na lutu, kei na noda ivalavala ca, kevaka eda veivutuni.¹⁰

Sa noda itavi meda vakavulica na ilesilesi i Jisu Karisito. Na cava na vu ni nona lako mai? Na cava e sa cakava baleti keda? E yaga vakacava vei keda? Na cava na kena isau vua nona vakayacora? Na cava na vuna e solia kina nona bula, io, e sivia cake mai na nona bula! Na cava e cakava mai na nona laivi ira eso tale me ra vakoti Koya ena kauveilatai? Na cava na vuna a lauvako kina e kea? A lauvako e kea o Koya me rawa ni drodro mai na nona dra ka vakabulai keda mai na itotogi rerevaki duadua e rawa me yaco mai, na itotogi sa biu vakatikitiki mai na mata ni Kalou. A mate ena kauveilatai o Koya me kauti keda lesu tale mai, me rau cokoti vata tale kina na yagoda kei na yaloda. A solia vei keda o Koya na madigi o ya. Kevaka wale ga meda na vakabauti koya ka taqomaka nona ivakaro, a mate ena vukuda me rawa ni da ciqoma na vakabokoci ni noda ivalavala ca ka da sega ni kacivi meda saumi itotogi. A sauma o Koya na kena isau. …

… E sega ni dua na tamata e rawa me cakava na ka a cakava vei keda o Koya. E sega ni dodonu me mate, a rawa me besetaka. A bolea sara tu ga. A cakava baleta na ivakaro mai vei Tamana. A kila tu na levu ni veivakararawataki ena yaco; ia, ena vuku ni nona lomani keda, sa tu vakarau kina me vakayacora. …

Nodra tukia tiko na tamata na ivako ki ligana kei na yavana na i Vakabula sa ikoya na tiki lailai ni nona vakararawataki. Eda sa yacova na ivakarau, au vakasamataka, noda vakila, se vakasamataka ni nona vakararawataki vakaitamera sa ikoya nona lauvako ki na kauveilatai ka biu me rube tu kina. Ia, sa ikoya oqori na gauna ena itukutuku makawa kei vuravura ena nodra vakararawataki ena ivakarau oqori e udolu na tamata. Ia na nona vakararawataki, me vaka oqori, e sega tale ni yaco ena nodra vakararawataki eso tale na tamata ka ra a lauvako ena kauveilatai. Na cava, a qai, nona vakararawataki levu duadua? Au nuitaka ni rawa meda vukei ira na lewenilotu yadua ni Lotu oqo me ra kila na dina oqo: Na nona vakararawataki vakaitamera a yaco ni bera nona lako ki na kauveilatai. Sa ikoya ena loma ni Were o Kecisemani, me vaka e tukuna vei keda na ivolanikalou, ka sa bunotaka kina na dra; kei na yaluma vakaitamera a vakararawataki kina o Koya, a tagi kivei Tamana. Na vakararawataki vakaitamera e sega ni ivako a vakoti ki na ligana kei na yavana. Ena gauna oqo kakua ni tarogi au se a caka vakacava o ya baleta au sega ni kila. E sega ni dua e kila. Na ka ga eda kila sa ikoya ni ena so na sala, a taura kina vakai koya na itotogi uasivi sara. A taura vaka ikoya noda talaidredre, ka sauma na kena isau, na isau ni yaluma.

Vakasamataka na i Vakabula nona colata voli na kumuni vata ni icolacola ni veitamata yadua—ena vakatotogani—ena so na sala au kaya, au sega ni kila rawa; au sa ciqoma ga—ka vakavuna nona vakararawataki ena yaluma ni mosi, vakatauvatani mai na lailai sara ni kena vakoti na ligana kei na yavana. A tagi o Koya ena Nona rarawa bibi, kivei Tamana, “Kevaka e sega ni rawa me takali tani vei au na bilo oqo!” qai sega ni takali tani [raica na Maciu 26:42; Marika 14:36; Luke 22:42]. Meu wilika mada vei kemuni e dua na tiki ni ivolanikalou lekaleka eke ena veika e kaya na Turaga me baleta oqori:

“Raica koi au na Kalou, au sa vosota oti na veika oqo, me ra bula kina ko ira era sa veivutuni;

“Ia kevaka era sa sega ni veivutuni era na vakararawataki me vakataki au;

“Raica koi au na Kalou sa Kaukauwa sara; au a sa sautaninini ena mosi ni veivakararawataki ko ya, au a bunotaka na dra ka sa yaluma sara kina na yagoqu kei na yaloqu —io au sa kerea me kau tani vei au na bilo ni cudru—

“Ia me vakarokorokotaki ga ko Tamaqu, raica au a gunuva na bilo ko ya, ka vakacavara na noqu itavi ena vukudra na luve ni tamata”[V&V 19:16–19.]

Ena noqu wilika oqori e vakayalomalumalumutaki au. Nona loloma baleta na tamata, baleta na vuravura , sa rui cecere ka sa tu vakarau kina me colata e dua na icolacola ka sega ni rawa vua e dua na tamata vakayago me colata, ka sauma na isau rerevaki e sega ni rawa vua e dua tale na tamata me sauma, me rawa ni da drotaka.¹¹

“Na noda i Vakabula o Jisu Karisito sa ikoya ka bibi duadua ena yavu cecere ni gugumatua kei na veivakabulai.”

Na Luve ni Kalou [e kaya]:”Au na lako sobu ka sauma na kena isau. O au na Dauveivueti kau na vueti ira na tamata mai na talaidredre nei Atama. Au na taura vakai au na ivalavala ca ni vuravura ka vueta se vakabula na yalo vakayadua mai na nona ivalavala ca vaka ikoya kevaka era na veivutuni.”¹²

Au na vakarautaka e dua na ivakaraitaki: E dua na tamata a lako voli e gaunisala ka qai lutu ena dua na qara titobu ka butobuto ka sega ni rawa me kaba cake mai ka rawata nona galala. E rawa vakacava me vakabulai koya mai na nona ituvaki dredre? E sega ni rawa me cakava mai na levu ni nona tovolea vakaukauwa mai na nona yasana, baleta ni sega na sala me vukea nona dro tani mai kina. E kaciva na veivuke, ka so na tamata yalo loloma, era rogoca nona kaci ni veivuke, ka ra vakatotolo sara ki na nona vukei ka biuta sobu e dua na ikabakaba, solia vua na ivakarau me rawa ni kabata lesu mai ki na dela ni vuravura. E macala vinaka sara tu ga oqo na ituvaki a biuti koya kina e loma o Atama kei na nona kawa era muri mai, ena nona kania na vuanikau vakatabui. Ena nodra sa tiko vata kece na tamata ena loma ni qara, e sega ni dua e rawa me lesu tale icake ka vakabulai ira eso tale. Na qara sa ivakatakilakila ni vakatalai tani mai na mata ni Turaga kei na mate vakayago, na ivakataotioti ni yago. Ka me vaka ni tamata taucoko ena vakararawataki ki na mate, e sega ni rawa ni dua me vakarautaka na sala ni dro bula.¹³

Sa lako mai na iVakabula, sega ni baleta na qara o ya, ka vakalolovirataka na ikabakaba. E lako sobu mai ena loma ni qara ka vakarautaka vei keda na sala meda vakayagataka na ikabakaba meda dro bula.¹⁴

Ena nona loloma tawa yalani, a rogoca na Tamada nodra tagi na luvena ka tala yani na Luvena E Duabauga, ka sega ni gadreva me sotava na mate se ivalavala ca, me vakarautaka na sala ni dro bula. Na ka oqo a vakayacora mai na nona veisorovaki sega ni vakaiyalayala kei na kosipeli tawa yalani.¹⁵

Na vakamuduo ni lomada e dodonu me vakilai na kena levu e rawa ena loloma kei na talairawarawa me baleta [na iVakabula] ena cecere kei na malumu ni nona loloma veivueti. Ena vuku ni ka oqori sa dodonu meda kakua ni guce ni cakava na veika e namaka vei keda o Koya. A voli keda o koya ena dua na isau, na isau vakaitamera ni nona vakararawataki kei na liviraki ni nona dra ni solibula ena kauveilatai.¹⁶

Ena tarai cake ni yavu ni Veisorovaki i Jisu Karisito, eda cakacakataka noda vakabulai ena gauna ni bula vakavuravura.

Na noda i Vakabula o Jisu Karisito sa ikoya na tamata bibi duadua ena yavu cecere ni noda kakavaki kei na vakabulai.¹⁷

Tarai cake ena yavu ni veisorovaki, na yavu ni veivakabulai e lewena na veika oqo:

iMatai, e dodonu meda vakabauta na Turaga o Jisu Karisito; e dodonu meda ciqomi koya ni Luve ni Kalou; e dodonu meda veidinadinati kei Koya, vakararavi ena nona vosa, ka gadreva meda rawata na veivakalougatataki era lako mai ena talairawarawa ki na nona lawa.

iKarua, e dodonu meda veivutunitaka noda ivalavala ca; e dodonu meda vakanadakuya na ka kece ga; e dodonu meda vakadeitaka mai lomada, kakua ni lomalomarua, ni da na bulataka na bula vakalou ka bula dodonu.

iKatolu, e dodonu meda papitaiso ena wai, mai vua e dua e tu vua na lewa, na mana ena ka kece ga ko sa vauca e vuravura, ena vauci mai lomalagi; e dodonu, mai na cakacaka vakalotu vakamareqeti oqo, cakava e dua na veiyalayalati mo qarava na Turaga ka talairawarawa ki na nona ivunau.

iKava, e dodonu meda ciqoma na isolisoli ni Yalo Tabu; e dodonu meda sucu vou; eda sa ivalavala ca ka caka ca ka me vakamai tani mai yaloda me vaka e vakamai ena bukawaqa; e dodonu meda sa buli vou mai na kaukauwa ni Yalo Tabu.

iKalima, e dodonu meda vosota me yacova na ivakataotioti; e dodonu meda muria na ivunau ni oti na papitaiso; e dodonu meda cakacakataka noda vakabulai ka lako vua na Turaga ena rere kei na sautaninini; e dodonu meda bulataka na ivakarau ni bula meda rawata kina na ivakaraitaki ni bula vakalou ka yaco meda mataqali tamata e rawa meda rekitaka na lagilagi kei na veivakurabuitaki ni matanitu vakasilesitieli.¹⁸

Au vakadinadinataka ena gauna oqo ni veilawa oqo e dodonu me ra muria na tamata me ra rawata kina na veivakabulai, ka ra tiki taucoko ni kosipeli i Jisu Karisito, ka ra vakatakilai ena gauna oqo kivei ira na parofita kei na iapositolo, ena gauna oqo era sa veiqaravi mai na nona lotu, ka sa tauyavutaka tale e vuravura.¹⁹

Oi keda, taucoko sara eda tiko eke ena vuravura vakayago, ena bula vakatovolei. Na vuna levu duadua eda vakau mai kina eke ka mai tiko na [yagoda] me baleta na yaloda tawamudu; ikarua, vakadinadinataki ena noda vakatovolei, sotavi ni rarawa vaka kina na reki vakaitamera kei na mamarau e rawa me rawati mai na dua na veiyalayalati vakamareqeti ni talairawarawa ki na ivakavuvuli tawamudu ni kosipeli. Na bula vakayago, me vaka a kaya o Liai vei ira na luvena, sa ikoya e dua na “ituvaki ni vakatovolei.” (2 Nifai 2:21.) Eke na vanua eda sotava kina na veivakatovolei ka vakatarogi me laurai kevaka da na, kautani mai na mata i Tamada Tawamudu ka vakavulici tikoga ena ivakarau ni bula tawamudu, eda na lomana ka vakarokorokotaki koya ka da yalodina vua na Luvena Lomani, o Jisu Karisito.²⁰

Eda lako mai eke meda mai vakatovolei ka vakadinadinataki ena sotavi ni ivalavala ca vaka kina na vinaka. … Na Tamada e sa vakatarai Setani kei ira nona bobula me ra temaki keda, ia mai na veidusimaki ni Yalo ni Turaga kei na ivunau a soli mai na ivakatakila, eda sa vakavakarau meda cakava noda digidigi. Kevaka eda ivalavala ca, sa yalataki vei keda ni da na totogitaki; kevaka eda caka vinaka, eda na ciqoma na icocovi ni bula savasava.²¹

Na vakatovolei ni bula vakayago qo [sa ikoya] e dua na gauna vakacaca, e dua ga na gauna lekaleka ni semati vata na gauna tawamudu sa oti yani vata kei na gauna tawamdu e se bera mai. Ia sa [ikoya] e dua na gauna bibi vakaitamera sara. … Na bula oqo sa ikoya e dua na gauna bibi ena noda bula tawamudu.²²

Na tamata kece era na ciqoma na veivakalougatataki ni tucaketale mai na Veisorovaki i Jisu Karisito.

Eda a lako mai ena vuravura oqo meda mate. Eda sa kila taucoko tu oqori ni bera noda lako mai ke. Sa ikoya e dua na tiki ni yavu, era sa veivosakitaki kece ka vakarautaki ena dua na gauna balavu ni bera nodra lako mai na tamata ki vuravura. … Keimami sa vakarau tu ka yalogu me yaco na ilakolako o ya mai na itikotiko ni Kalou ena vuravura vakayalo ki na vuravura vakayago, lako mai ka me sotavi na veika kece sara me baleta na bula oqo, na kena marautaki kei na kena rarawataki, kei na mate; na mate e dua wale ga na ka yaga sara me vaka na sucu.²³

Na mate vakayago, se na mate ni dua na tamata e vuravura, e sega ni dua na veitawasei tudei ni yalo kei na yago vakalewe, dina ga ni yago ena mate ka lesu tale ki na veika a buli mai kina, ia e dua wale ga na veitawasei sega ni dei ka sa na mudu ena siga ni tucaketale ni sa na kacivi na yago mai na kuvu ni soso me bula tale ka vakatulewa na yalo. Na veivakalougatataki oqo e lako mai kivei ira kece na tamata mai na veisorovaki i Karisito, se vakacava na nodra itagede ni caka vinaka se caka ca ena gauna ni bula vakayago. Kaya o Paula ni dodonu me dua na tucaketale vei ira na yalododonu kei ira na sega ni yalododonu (Cakacaka 24:15), kei na i Vakabula a kaya ni o ira kece era tiko ena nodra ibulubulu e dodonu me ra rogoca na domona ka dodonu me ra lako mai kina “ko ira sa ivalavala vinaka, era na tucaketale me ra bula; ia ko ira sa ivalavala ca, era na tucaketale me ra cudruvi” (Joni 5:29).²⁴

Na veitiki yadudua ni yago yadua ena vakalesuitale ki na kena vanua dodonu tale ena gauna ni tucaketale, veitalia ga se cava a yaco ki na yago ni oti na mate. Kevaka mada ga e kama ena bukawaqa, kania na qio, veitalia se cava. Na veitiki yadudua ni yago vakayadua ena vakalesuitale ki na kena vanua dodonu.²⁵

E sega ni rawa me vakataucokotaki na yalo ke sega na yago vakalewe kei na sui. Na yago oqo kei na kena yalo a caka me tawa mate rawa ka rawata na kena veivakalougatataki ni vakabulai ena tucaketale. Ni oti na tucaketale sa na sega tale ni rawa na veitawasei, ia ni rau sa cokovata na yago kei na yalo sa kunei kina na marau sa uasivi sara. E sega tale ni dua na kena sala, mai na sucu ena bula oqo kei na tucaketale, e rawa ni yaco na yalo me tautauvata kei na Tamada tawamudu.²⁶

O ira na tamata yalodina era na taukena na bula tawamudu vata kei na nodra matavuvale ena iserau nei Tamada Vakalomalagi.

Eso era taukena na iyau mai na nodra cakacaka na tamadra. Eso na tamata era taukena na itutu ni tui vakavuravura, ka taukena na kaukauwa, kei na itutu, ena kedra maliwa eso tale mai na nodra iyau soli mai vei ira nodra qase. Eso na tamata era vakasaqara me ra rawata na kila ka vakavuravura kei na irogorogo mai na vakayagataki ni nodra dui sasaga kei na gugumatua; ia e dua tiko na rawa ka levu cake sara na kena yaga mai vei ira kece, sa ikoya na rawata na bula vakalagilagi tawamudu.

E kaya na iVolanikalou ni bula tawamudu—sa ikoya na bula ka tu vei rau na Tamada Tawamudu kei na Luvena, o Jisu Karisito,—oqori na isolisoli cecere duadua ni Kalou [raica na V&V 14:7]. O ira wale ga na tamata era sa vakasavasavataki mai na ivalavala ca kece ga era na ciqoma. Sa yalataki kivei ira “ko ira sa rawa na ka kece ga ena vakabauta, ka ra sa vakataudeitaki ena Yalo Tabu sa yalataki tu, ka sa sovaraka ko Tamada vei ira kece ga sa dina ka dodonu. Raica sai ira oqo na lewe ni nona lotu na Ulumatua. Io sai ira oqo sa solia ki ligadra ko Tamada na ka kece ga” [V&V 76:53–55; raica tale ga na tikina e 52.]²⁷

Na yavu ni veivakabulai oqo e sa vakatabakidua ki na matavuvale. … [E] sa tuvalaki me rawa kina vei keda meda bulia na tabana ni matavuvale vaka ikeda.²⁸

O ira era na ciqoma na bula vakalagilagi ena matanitu vakasilesitieli ena “tubu tiko ga na nodrau kawa me tawamudu.” Era na bula ena veiwekani vakamatavuvale.²⁹

Eda a vakavulici ena kosipeli i Jisu Karisio ni isoqosoqo ni matavuvale, me vaka na ivakarau ni bula vakalagilagi vakasilesitieli, e dua ka taucoko tu, na isoqosoqo semati vata mai vei tama kei tina kei ira na lalai ni dua na kawa tamata ki na dua na tama kei na tina kei ira na lalai ni dua tale na kawa tamata ka tarava, ka vakatetei sobu yani ki na icavacava ni gauna.³⁰

Na veivakalougatataki lagilagi oqo ni isolisoli taukeni tawamudu … ena lako wale ga mai ena yalogu ni kena taqomaki na ivunau vakakina ena vakararawataki tale ga vata kei Karisito ke gadrevi vakakina. Dua tale na kena itukutukuni, o ira era gadreva na bula tawamudu— na isolisoli cecere duadua ni Kalou— era namaki me ra yalogu ena solibula ki na veika kece sara era taukena, ke gadrevi, vakakina, kevaka mada ga era cakava kece oqori, ka gadrevi talega me ra solia nodra bula ena vukuna, era na sega ni rawa vakadua me ra saumi koya ena veivakalougatataki vakaitamera e sa ciqomi ka yalataki ka yavutaki ena talairawarawa ki na nona lawa kei na ivunau.³¹

Ena noda sa lako mai na taudaku kei vuravura ka ciqoma na taucoko ni kosipeli, eda sa mata vakaturi ni silesitieli lagilagi; e sega, eda sivia sara mai na mata vakaturi, kevaka eda sa yalodina tiko, baleta ni Turaga e solia vei keda na veivakadeitaki me baleta na noda vakabauta, eda na yacova na matanitu vakasilesitieli. …

… Meda bula me rawa ni da na vakadeitaki ena veika eda taukena, ka da sa na kila kina, mai na bula eda bulataka, ni da na tu e Matana ka tiko vata kei Koya, ciqoma na taucoko ni veivakalougatataki era a yalataki. O cei ena kedra maliwa na Yalododonu Edaidai ena lewena eso na ka e yali mai na taucoko ni veivakabulai ka sa yalataki vei keda? … E sa yaga sara vei keda, ena noda yaloraramusumusu, vata kei na veivutuni, meda tomana tiko ga; ena taqomaki ni ivunau me yacova na ivakataotioti, me baleta noda inuinui kei na noda inaki sa ikoya na bula tawamudu, ka sa ikoya oqori na bula ena mata i Tamana kei na Luvena; “Ia sa ikoya oqo na bula tawamudu,” kaya na Turaga, “me ra kilai kemuni na Kalou dina duaduaga, kei Jisu Karisito ko koya ko ni a tala mai.” [Joni 17:3.]³²

Au tucake tu oqo, ena vanua au vakasamataka me veiyabaki ni noqu bula sa bera mai, vata na kena vakilai ni dua na gauna lekaleka ga oqo au sa na kacivi kina meu solia na noqu itukutuku ni veiqaravi vakavuravura. …

Au vakadeitaka ni o keda kece eda lomana na Turaga. Au kila ni bula tiko, kau sa vakanamata tu ki na siga meu na raica kina na matana, kau nuitaka niu na rogoca na domona me kaya vei au:”Ni lako mai, koi kemuni sa vakalougatataki vei Tamaqu, mo ni rawata na matanitu sa vakarautaki me nomuni mai na ivakatekivu kei vuravura.” (Maciu 25:34.)

Ka sa noqu masu ni sa ikoya beka oqo na marau eda sotava o ikeda kece, ena noda dui gauna vakayadua ga.³³

Vakatutu ni Vuli kei na Veivakavulici

Taro

Ena nomu wilika na ivola ni veisiga ena “Na Bula nei Joseph Fielding Smith,”vakasamataka na gauna ena nomu kunea na vakacegu ena nomu ivakadinadina ni yavu ni veivakabulai. E rawa vakacava mo vukea e dua na lewe ni matavuvale se itokani me ciqoma na vakacegu vakaoqori?
E rawa vakacava me vukei keda na ivakavuvuli nei Peresitedi Smith me baleta na matabose mai lomalagi ena noda sotava na veivakatovolei? (Raica na iwasewase e 1.)
A vakavulica o Peresitedi Smith ni “ dodonu meda kakua ni vakayalia na dina ni [Lutu nei Atama kei Ivi] e kauta mai na veivakalougatataki”(iwasewase e 2). Na cava na vuna o vakasamataka kina ni sa rui bibi meda nanuma na dina oqo? Na veivakalougatataki cava soti o sa bau ciqoma ena vuku ni Lutu?
Ena iwasewase e 3, e semati vakacava ki na noda bula na ivakaraitaki nei Peresitedi Smith ni dua na tamata a lutu ena dua na loma ni qara? Raitayaloyalotaka nona vakabulai iko vakacava na iVakabula mai na Nona Veisorovaki?
Na cava e vakatututaka o Peresitedi Smith ena nona vosa ena iwasewase e 4 me baleta na inaki ni noda bula e vuravura? Na cava e solia vei keda na Turaga me vukea noda taqomaki ena noda lako sivita mai na gauna ni veivakatovolei oqo?
E rawa vakacava mo na vukea e dua tale me kila na itukutuku nei Peresitedi Smith ena iwasewase e 5 ni “mate e ka yaga me vaka ga na sucu”? Sa bau vakayarayarataka vakacava nomu bula na ivunau ni tucaketale?
Na veisala cava e duidui kina na vutuniyau vakavuravura mai na “iyau soli taukeni tawamudu” ka rawa meda ciqoma mai na yavu ni veivakabulai? (Raica na iwasewase e 6.) E rawa vakacava na kena kilai na duidui oqo me vukea noda vakavakarau me baleta na bula tawamudu?

iVolanikalou Veisemati

Jope 38:4–7; 2 Nifai 2:15–29; 9:5–27; Alama 12:20–35; V&V 19:16–19; Mosese 5:10–12

Veivuke ni Veivakavulici

“Me vukei keda ena noda veivakavulici tiko mai na ivolanikalou kei na nodra vosa na parofita edaidai, sa vakarautaka tu na Lotu na iyaragi kece ni veivakavulici kei na ivola vakarau. Ena sega soti ni yaga vakalevu na ivola ni soli vakasama se na iyaragi tale eso” (Veituberi, Me iLutua Ni Noda Bula: iYaragi Vakavuli ni Veituberi Vakosipeli [1999], 59).