Wase 5

Vakabauta kei na Veivutuni

“Na ka eda gadreva ena loma ni Lotu, vakakina e tautuba, sai koya na veivutuni. E gadrevi me levu na noda vakabauta kei na gugumatua meda qarava na Turaga.”

Na Bula nei Joseph Fielding Smith

E vakavulica o Joseph Fielding Smith, “Na veivosoti ni ivalavala ca ena yaco mai ena vakabauta kei na veivutuni ena yalodina.”¹ A kaya o koya ni “sa dodonu sara, sega walega ni da sa vakadinata, ia ni da sa veivutuni,” ka sa vakavulica talega o koya ni gauna eda caka vinaka kina ena vakabauta ki na ivakataotioti, eda na “ciqoma kina na isau ni tamata yalodina ka vakaitikotiko ena matanitu Silesitieli ni Kalou.”² Ena kena gadrevi mera ciqoma kece na tamata na isau oqo, a vakadinadinataki Jisu Karisito kina ka vunautaka na veivutuni ena gauna taucoko ni nona cakacaka vakalotu.

Ni se qai tekivu na nona veiqaravi vaka-iApositolo, a kaya kina: Au sa raica ni sa noqu ilesilesi oqo, kau nanuma, niu sa vakauqeti sara ena Yalo ni Turaga ena noqu ilakolako ki na veiiteki kei Saioni, meu kaya vei ira na tamata ni oqo ga na siga ni veivutuni ka kacivi ira na Yalododonu Edaidai mera nanuma tiko na nodra veiyalayalati, na yalayala era a cakava vua na Turaga, mera maroroya na nona ivakaro, ka muria na nodra ivakavuvuli kei na ivakasala na italatala qase kei Isireli—o ira na parofita ni Kalou— me vaka era sa volai tu ena veiivolanikalou tabu oqo. Ena veika kecega meda bula voli ena yalomalua kei na yalomatua ena mata ni Turaga meda na vakalougatataki kina ka dusimaki mai vua na Yalo Tabu. Au vakabauta ni oqo na siga ni veivakaroti. Sa gauna tu mai ni veivakaroti vakatekivu mai na siga a ciqoma kina na parofita ena imatai ni gauna na ivakatakila mai lomalagi me na vakalesuimai na kosipeli.³

Ena soqoni ni sakaramede ena dua na Sigatabu, a kaya o Peresitedi Smith vei ira na ivavakoso na vuna e vosa kina ena domo ni veivakaroti. Na luvena o Josefa, ka a tiko talega ena soqoni o ya, a qai vola: “Au se nanuma tikoga vakavinaka oqo na veika eso a kaya [o tamaqu] ena soqoni o ya. ‘O cei e nomu itokani, se o cei e lomani iko vakalevu cake?’ a taroga vei ira na ivavakoso. ‘Na tamata e kaya vei iko sa vinaka tu o Saioni, ni sa tu mai liu na veika vinaka se o koya ena vakaroti iko ni na yaco mai na siga rarawa kei na veika dredre vakavo ga ke bulataki na ivakavuvuli ni kosipeli? Au gadreva mo ni kila niu lomani ira sara na lewe ni Lotu, kau sega ni vinakata me dua vei ira me dusi au ena gauna eda na lako sivita yani na ilati ni bula oqo ka kaya, “Kevaka mada ga mo a vakaroti au kau na sega ni mai tu kina ena ituvaki vakaoqo.” Au sa mai voqataka cake kina na domo ni veivakaroti ka nuitaka ni ra na vakavakarau na taciqu kei na ganequ ki na matanitu lagilagi.”⁴

President Joseph Fielding Smith sitting in his office, wearing a white shirt, a dark suit, a dotted tie, and glasses. — E wasea o Peresitedi Joseph Fielding Smith na vuna e kacivi ira kina na Yalododonu Edaidai mera veivutuni: Au lomani ira na lewe ni Lotu.”

Era raica o ira era cakacaka vakavoleka sara kei Peresitedi Smith ni tu ena daku ni nona veivakaroti kaukauwa oqo e dua na tamata e kauwaitaki ira sara na tamata era valuti tiko ena ivalavala ca. O Elder Francis M. Gibbons, ka a veiqaravi tu vaka-sekeriteri ni Mataveiliutaki Taumada, a dau tiko ena gauna e dau qarava kina o Peresitedi Smith na veivakadodonutaki vaka-Lotu. E nanuma lesu o Elder Gibbons: “E dau vakatulewa o koya ena lomavinaka kei na loloma ka dau rabailevu na nona loloma veivueti mena veiraurau kei na veika me vakatudonutaki. E sega ni ka vou vua me dau kaya ni sa kila na ituvaki ni dua na kisi dredre, ‘Na cava era sega ni vakaitovotaki ira kina na tamata?’ E sega ni cavuti oqo ena veibeitaki se sala ni veivakacacani ia ena yalorarawa kei na veivutuni.”⁵ A kaya vakaoqo o Peresitedi Spencer W. Kimball, ka a veiqaravi vata tu kei Peresitedi Smith vaka- lewe ni Kuoramu ni iApositolo Le Tinikarua, “E vakavuqa na neimami dau kaya me vaka ni Le Tinikarua era sa daunilewa kei Isireli, keimami na marau ke dua ena lewai mai vua, ni na vinaka na nona lewa, veivueti, dodonu, ka vakalou.”⁶ Ena gauna e dau tabaki ira kina na bisopi o Peresitedi Smith, e dau vakasalataka: “Mo nanuma tiko, ni tamata yadua e tiko na nona malumalumu, ka na dau rua tiko na yasani italanoa yadua. Kevaka o cala ena nomu vakatulewa, mo cala ga ena yasana ni loloma kei na loloma veivueti.”⁷

iVakavuvuli nei Joseph Fielding Smith

Na imatai ni ivakavuvuli ni kosipeli sai koya na vakabauta na Turaga o Jisu Karisito.

Sa iusutu ni noda vakabauta o ya na Turaga o Jisu Karisito, vakakina vua na Tamana ena vukuna. Eda sa vakabauta na Karisito, ciqomi koya ni sa Luve ni Kalou, ka da sa taura na yacana ena wai ni papitaiso.⁸

Meda sa daunanuma deivaki tiko, ena gauna oqo kei na veigauna kecega, ni o Jisu Karisito, na Luve ni Kalou sa bula tiko, a tadu mai ki vuravura me mai solia na nona bula meda rawa ni bula kina. Oqori na ka dina, ka sa rui ka bibi. Sa tarai cake na noda vakabauta ena ka oqo. Ena sega ni rawa ni vakarusai. E dodonu meda vakamuria na ivakavuvuli oqo se cava ga na ivakavuvuli e solia o vuravura, kei na nodra nanuma na tamata; ni sa ka cecere oqo, ka sa ka bibi ki na noda vakabulai. Sa mai vueti keda na Turaga ena nona dra, ka sa solia vei keda na veivakabulai, ka na vakatau oqo—ki na ilavaki oqo eda na sega ni guilecava— ni da na maroroya na nona ivakaro, ka dau nanumi koya tikoga. Kevaka eda na cakava oqo eda sa na qai vakabulai, ka na takali yani na nodra vakasama kei na lialia ni tamata mai na vuravura oqo.⁹

Eda gole vua na Kalou ena vakabauta. Kevaka eda sega ni vakadinata na Turaga o Jisu Karisito, kevaka eda sega ni vakabauti Koya se na Nona veisorovaki, eda na sega gadreva meda vakarorogo ki na Nona ivakaro. Ena vuku ga ni noda vakabauta oqo eda sa muataki vata ki na Nona dina oqo ka tiko na gagadre ni lomada meda na qaravi Koya. …

… Na imatai ni ivakavuvuli ni kosipeli sai koya na noda vakabauta na Turaga o Jisu Karisito; ka sa dina sara eda na sega ni na vakabauta na Turaga o Jisu Karisito kevaka eda sa sega ni vakabauta na Tamana. Kevaka meda sa qai vakabauta na Kalou na Tamana kei na Luvena ka da dusimaki kina, ni sa dodonu ga vakakina, mai vua na Yalo Tabu, eda sa qai vakabauti ira na italai ni Turaga mai vua sa tukuna tiko o Koya.¹⁰

Na ibalebale ni vakabauta o ya na cakacaka.

“Na vakabauta sa yaco kina na cakacaka kecega.” [Lectures on Faith, lecture 1.] Kevaka mo tu ka vakasamataka mada o ya, au vakabauta ni ko na vakadinata ni sa dina sara ena veika vakayago ka vakakina ena veika vakayalo. Sa dina oqo ki na noda ivakarau ni bula, ka sa vakakina ena ivakarau ni Kalou. …

“Sa mate vakakina na vakabauta ni sa takali na cakacaka” [Jemesa 2:26]—e kena ibalebale, e sega ni tiko. Au nanuma ni oqo e tukuna tiko o Jemesa, “Vakaraitaka mada vei au na nomu vakabauta e sega kina na cakacaka, ka sega na vatukana; ia au na vakaraitaka vei iko na noqu vakabauta kei na noqu cakacaka, ka na rawati e dua na ka.” [Raica na Jemesa 2:18.] Na ibalebale ni vakabauta na cakacaka. … O koya gona, na vakabauta, sa kaukauwa cake mai na vakadinata. …

Na vakabauta sa isolisoli ni Kalou. Na veika vinaka kece sa isolisoli ni Kalou. Oqori e dua na ivakavuvuli ni ivolanikalou e tiko ena wase 11 ni Iperiu— ka tukuni tiko vakamatata sara ena wase oqo na veika ni vakabauta —[ka] sa solia mai na Turaga na ivakatakila ena Vunau kei na Veiyalayalati, kei na ivolanikalou tale eso. Ena sega ni rawati na vakabauta ena tawa cakacaka se ena vakabauta ena veilaroi se tu vakadua. Na gagadre walega ni rawati na vakabauta ena sega ni kauta mai vakalevu cake na vakabauta mai na kena gadrevi mo kenadau ena ivakatagi se droini ni na kauta mai na maqosa ena veika oqo ke sega kina na cakacaka vakavuku. Oqori na vanua e lako tiko mai kina na leqa. Sa tiko na nona ivakadinadina ni Kosipeli, ka da sa vakadinati Josefa Simici, ka da vakadinati Jisu Karisito, eda vakadinata na ivakavuvuli ni Kosipeli, ia e kaukauwa vakacava sara na noda cakacakataka tiko?

… Kevaka eda vinakata e dua na vakabauta e bula, ka tudonu, e dodonu me bulabula sara ena noda itavi kecega vaka-lewe ni Lotu oqo. …

Isa, ke bau tu mada ga vei keda na vakabauta e tu vei Nifai! Wilika ena wase 17 ni 1 Nifai ena nodrau a saqati koya tiko na tacina ka vakalialiai koya baleta ni sa vakarau tara e dua na waqa, ka rau kaya:

“Sa lialia ko tacidatou, ni sa nanuma ni rawa me taya e dua na waqa; io e nanuma talega me kosova rawa na wasawasa levu oqo.” [1 Nifai 17:17.]

A kaya vei rau o Nifai:

“Sa rawa meu kitaka na ka kecega kevaka sa vakaroti au kina na Kalou. Kevaka sa vakaroti au meu kaya ki na wai oqo, mo vuki mo qele mamaca e na vuki me qele mamaca; ia kevaka au sa kaya vakakina, ena yaco vakaidina.” [1 Nifai 17:50.]

O ya na nona vakabauta.¹¹

Eda sa sega ni lako tiko ena veika sa rairai, me vaka eda a vakayacora taumada ni bera ni da tadu mai ki na vuravura oqo, ia sa namaka tiko na Turaga ni da na lako tu ena vakabauta [raica na 2 Korinica 5:7]; ni da sa lako tu ena vakabauta eda na ciqoma na isau ni valavala dodonu, kevaka eda vakamuria na ivakaro oqori sa soli mai meda vakabulai kina.¹²

Vakavo ga ke vakamuria na tamata na vunau ka lako tu ena vakabauta, ciqoma na dina ka talairawarawa ki na ivakaro ni ra sa soli mai, sa ka dredre sara vua me ciqoma na bula tawamudu, se cava sara na levu ni nona vakatusa tiko e gusuna ni sa Karisito ko Jisu, se vakadinata ni sa talai koya mai o Tamana ki vuravura mera vakabulai kina na tamata. Sa qai dina sara o Jemesa ena nona kaya ni ra sa “vakabauta ka sautaninini talega,” na tevoro ia era sa sega ni veivutuni [raica na Jemesa 2:19].¹³

Na veivutuni sa ikarua ni ivakavuvuli ni kosipeli ka sa ka bibi ki na noda vakabulai kei na bula vakalou.

Na veivutuni sa ikarua ni ivakavuvuli bibi ni kosipeli ka sa ivatuka ni vakabauta.¹⁴

Na ka eda gadreva tu ena Lotu, vakakina ena kena taudaku, sai koya na veivutuni. E gadrevi me levu cake na noda vakabauta ka levu cake na gugumatua meda qarava na Turaga.¹⁵

E dina beka ni so vei keda era nanuma tiko ni sega ni dua na ka keda ivalavala ca me kakua ga ni ivalavala ca levu sara, valavala ca butobuto, ni da na vakabulai ga ena matanitu ni Kalou? A raica o Nifai na noda siga nikua. A kaya ni ra na tukuna na tamata na veika [raica na 2 Nifai 28:7–9]. Ia au sa kaya vei kemuni, ena sega ni rawa meda gole tani mai na salatu ni dina kei na ivalavala dodonu meda qai dusimaki tikoga ena Yalo ni Turaga.¹⁶

E sega ni tiko mai Saioni na tikina nei koya e nakita me valavala ca. E tiko na tikina nei koya sa veivutunitaka na nona ca, vei koya e lako tani mai na valavala ca ka vakasaqara na bula tawamudu kei na rarama ni Kosipeli. Meda kakua ni raica na ivalavala ca ka vakadonuya e dua na tikina lailai, ni sa sega ni vakatara oqo na Turaga, ia mo lako tu vakadodonu ka vakasavasava ena mata ni Turaga.¹⁷

Mai na valavala dodonu walega ena rawa ni vakabulai kina na tamata ka laki bula vakalou ena matanitu ni Kalou; o koya gona, meda sa veivutunitaka na noda ivalavala ca ka lako tu ena rarama ni sa tiko na Karisito ena rarama [raica na 1 Joni 1:7], me rawa ni vakasavasavataki keda na nona dra mai na valavala ca kecega ka meda sa lomavata kei na Turaga ka ciqoma na nona lagilagi kei na bula vakalou.¹⁸

E gadrevi meda veivutuni, ka gadrevi me tukuni vei keda meda veivutuni.¹⁹

Mai na ivakavuvuli ni veivutuni, sa dau cakacaka kina na loloma veivueti nei Tamada Vakalomalagi kei Jisu Karisito.

Na veivutuni sa dua vei ira na ivakavuvuli e veivakacegui vakalevu ka lagilagi e vakavulici tiko ena kosipeli. Ena ivakavuvuli oqo sa vakatakilai beka mai kina vakaukauwa sara mai na dua tale na ivakavuvuli na loloma veivueti nei Tamada Vakalomalagi kei na Luvena Duabau sa Vakatubura, o Jisu Karisito. Sa qai dua dina na ka ca kevaka me sega na vosoti ni ivalavala ca ka sega ni bokoci na nodra ivalavala ca o ira sa veivutuni ena yalomalumalumu! Eda na rawa ni vakasamataka ga vakatikina na rere ena yacovi keda, kevaka meda na vosota na noda totogitaki me tawamudu ena vuku ni noda ivalavala ca ka sega na inuinui ni vakacegu mai kina. Mena rawati vakacava na veivakacegui oqo? Mena rawati mai vei cei?

E kaya na noda Turaga:

“Ni sa lomani ira na kai vuravura vakaoqo na Kalou, me solia kina na Luvena e duabauga sa vakatubura, me kakua ni rusa ko ira yadua era sa vakabauti koya me ra rawata ga na bula tawamudu.

“Ni sa sega ni tala mai na Luvena ki vuravura na Kalou me cudruvi ira na kai vuravura; me bula ga ko ira na kai vuravura e na vukuna.” [Joni 3:16–17; raica talega na tikina 18–21.]

Kevaka me a sega ni talai Jisu Karisito mai na Tamana ki vuravura, sa na qai sega ni yaco na vakabokoci ni valavala ca ka sega vakakina na vakacegu mai na ivalavala ca ena vuku ni veivutuni.²⁰

A young man kneeling in prayer at his bedside. — “Na veivutuni sa dua vei ira na ivakavuvuli veivakacegui ka lagilagi e vakavulici tiko ena kosipeli.”

Kevaka meda na kila vakavinaka ka vakila vakalailai ga, na loloma kei na gagadre ni loloma soli wale nei Jisu Karisito me mai vakararawataki ena vuku ni noda ivalavala ca sa qai lomada dina sara meda veivutunitaka na noda ivalavala ca taucoko ka qaravi koya.²¹

Na veivutuni e oka kina na rarawataka vakaidina na ivalavala ca ka saumaki taucoko mai na valavala ca.

E kaya na ivolanikalou:

“Mo vakacabora vua na Turaga na nomu Kalou na isoro e dodonu, io na yalo sa bibivoro ka raramusumusu.” [V&V 59:8.]

Oqo na veivutuni.

… E tukuni tiko ena dikiseniri, ni veivutuni, sai koya na rarawataka vakaidina na ivalavala ca sala vata kei na cudruvi koya vakai koya, kei na biuta tani vakadua na valavala ca. … E sega na veivutuni vakaidina ke sega ni rarawataki ka gadreva me vagalalataki mai na ivalavala ca.

E na vakatakilai ga na veivutuni ena yalo sa raramusumusu, se yalomalumalumu, baleta ga na ivalavala ca kei na kena kilai vakaidina na ca ni ivalavala ca vata kei na dina ni nona loloma veivueti kei na loloma soli wale ni Kalou sa soli vei koya sa veivutuni. … Ena vuku ni ka oqo sa kaya kina na Turaga, me vaka au sa kaya oti, ni dodonu meda na cabora e dua na isoro “ena ivalavala dodonu, io ena yalo sa raramusumusu kei na yalo sa bibivoro.” …

Na veivutuni sa isolisoli ni Kalou. … E sega ni rawarawa vei ira eso mera veivutuni, ia na isolisoli ni veivutuni kei na vakabauta ena soli vei ira yadua na tamata era na vakasaqara.²²

Au sa vulica mai na veika au sa sotava ni gauna o gadreva kina mo veisau, mo veisau dina sara ga, sa rawa mo cakava. Mai na lomada kei na ivolanikalou e tukuna meda na bula vakacava — ka tukuna vei keda na itovo cava meda veisautaka ena vuku ni noda bula kei na torocake tawamudu.²³

Oqo ga na gauna ni veivutuni.

Na Kalou ena sega ni vakabulai ira na tagane kei na yalewa yadua ena matanitu vaka-silesitieli. Kevaka o gadreva mo gole e kea, ka se tu na nomu malumalumu, kevaka o se valavala ca tikoga, kevaka o se voroka tiko na ivakaro ni Turaga ka o sa kila tiko, sa kena gauna vinaka oqo mo sa veivutuni ka veisau, ka mo kakua ni nanuma ni ka lailai wale sara na nona na vosoti iko na Turaga, ni na vica ga na kemu kuita, ka totogitaki ga vakalailai ka da sa na vosoti; ni ko na raica ni sa rawa mo biu tani vakadua, kevaka o gadreva ka guta tikoga na sala ca oqori.²⁴

Ni lokuyarataki, na kena vakayacori na ivakavuvuli ni kosipeli, sa daubutakoca na bula tawamudu, sai koya na bula vata kei na Tamana kei na Luvena. E vuqa ena keda maliwa, o ira vakakina na lewe ni Lotu, era nanuma ni sega soti ni gadrevi me maqusataki yani na kena vakamuri na ivakavuvuli ni kosipeli kei na maroroi na ivakaro. …

Meda kakua ni guilecava kina na vosa nei [Amuleki]: “Raica, me vakarautaki koya na tamata e na bula oqo me na lesu tale vua na Kalou; io, oqo na bula me kitaka kina na tamata na nona cakacaka kecega.

“Raica, au sa tukuna oti vei kemudou na ka oqo, dou sa rogoca oti e vuqa na kena ivakadinadina, kau sa vakaroti kemudou mo dou kakua ni lokuyarataka na gauna mo dou veivutuni kina; raica sa soli vei keda na bula oqo me da vakarautaki keda kina ki na bula tawamudu, ia kevaka eda sa sega ni vakarautaki keda rawa ena bula oqo, sa sega ni rawa meda qai vakarautaki keda ni sa yaco mai na butobuto.

“Ia ni sa yaco mai na gauna rerevaki ko ya, sa sega ni yaga mo qai kaya tiko, au na veivutuni ka lesu vua na noqu Kalou. Ia , sa sega ni yaga na nomu vosa vakaoqori; raica na yalo ga ko a soli iko kina e na nomu bula oqo, ena laki lewai iko tale ena bula sa bera mai.” [Alama 34:32–34.]²⁵

Sa noda ilesilesi ki na vuravura oqo meda veivakaroti ena domolevu.

Sa vinakata na Turaga me marau na tamata— ni oqori na nona inaki— ia era sa cata na tamata na marau oqo ka ra sa vakararawataki ira, baleta ni ra nanuma ni nodra sala sa vinaka cake mai na sala ni Kalou, ia ena vuku ni nanumi koya ga, kocokoco, kei na ca sa tiko e lomadra; ka sa veivakaleqai tiko vei keda oqo nikua.²⁶

Mai na vakadidike keimami a vakayacora mai na siko vanua ki na dua tale vata kei na ka keimami a wilika ena niusipepa, keimami sa uabaleti me keimami tinia ni veivutuni mai na ivalavala ca sa ka bibi dina sara nikua e vuravura taucoko.²⁷

Kakua ni nanuma ni da sa yacova oqo e dua na ituvaki ena sega ni ca vakalevu kina na ka. Kevaka era sega ni veivutuni era na ca vakalevu sara. Au sa mai kacivaka kina na veivutuni vei ira na tamata oqo, kivei ira na Yalododonu Edaidai, … vakakina vei ira na veimatanitu ena veiyasai vuravura.²⁸

Sa noda ilesilesi oqo ki vuravura, meda laveta cake na domoda ni veivakaroti, vakabibi vei ira na lewe ni Lotu [raica na V&V 88:81].²⁹

Sa noda itavi meda veirairaici tiko, meda veitaqomaki vakai keda, meda veivakaroti ena vuku ni veika rerevaki, me da veivakavulici vakaikeda ena ivakavuvuli ni Kosipeli ni Matanitu, ka tucake vata tu ena duavata ka valuti na ivalavala ca kei vuravura.³⁰

Au sega ni kila e dua na ka me bibi cake se yaga ena gauna oqo me vakataka na noda kacivaka na veivutuni, kivei ira na Yalododonu Edaidai, kau sa kacivi ira ka vakakina o ira era sega ni lewe ni Lotu, mera vakarorogo ki na vosa nei noda Dauveivueti. Ia oqo sa mai kaya kina vakadodonu ni na sega ni curu rawa e dua na ka dukadukali ena nona iserau. O ira ga era vakadinadinataka ni ra sa yalodina tiko ka sa vakasavasavataka na nodra isulu ena nona dra mai na nodra vakabauta kei na nodra sa veivutuni a nodra— ka sa sega tale ni dua ena kunea na matanitu ni Kalou.³¹

“Ia era na bula vata kei Koya na Yalosavasava ni Isireli ko ira na veimatanitu, veimataqali, duivosavosa kei ira na tamata kevaka era na veivutuni.” [1 Nifai 22:28.] Ka sa noqu masu ni ra na veivutuni. Au vinakata me ra tiko taqomaki. Au vinakata mera vakabauti Koya na Yalosavasava ni Isireli, a lako mai ki vuravura ka mai sorovaka na noda ivalavala ca, na nodra ivalavala ca na kawatamata kecega, a solia vei keda na veivueti mai na mate, ka sa yalataka vei keda meda vakabulai kei na vakabokoci ni noda ivalavala ca kevaka eda sa veivutuni.

Isa, au diva mada ga mera vakabauti koya na kawatamata kecega, mera sokalou vua kei na Tamana, ka mera qarava na Turaga na noda Kalou ena yaca ni Luvena, ka na qai yaco mai na tiko vakacegu, ka na yaco na bula dodonu, me qai vakatorocaketaka na Turaga na nona matanitu ena vuravura oqo.³²

Au vakamamasu ki vuravura taucoko mo ni veivutuni ka vakadinata na dina, me cila yani na rarama i Karisito ki na nodra bula, ka mera tudei tiko ena nodra ivakavuvuli yadua sa vinaka ka dina, ka me semati ena veika oqo na ikuri ni rarama kei na kila-ka era yaco mai ena ivakatakila ni siga nikua. Au sa vakamasuti ira mera mai lewena na Lotu i Jisu Karisito ni Yalododonu Edaidai ka tamusuka na veivakalougatataki ni kosipeli.

Au sa vakamasuti ira na lewe ni Lotu mera cakava ga na ivalavala dodonu, mera maroroya tiko na ivakaro, mera vakasaqara na yalotabu, lomana na Turaga, ka mera vakaliuca ena nodra bula na veika ni matanitu ni Kalou, ka cakacakataka yani na nodra vakabulai ena rere kei na sautaninini ena mata ni Turaga [raica na Filipai 2:12].³³

Vakatutu ni Vuli kei na Veivakavulici

Taro

Mai na “Bula nei Joseph Fielding Smith,” raicalesu na ivakamacala nei Peresitedi Smith na vuna e vinakata kina me “kacivaka na veivakaroti ena domolevu.” E rawa vakacava me ivakaraitaki ni loloma na kaci ni veivutuni?
Na cava na kena ibalebale vei iko me iusutu ni nomu vakabauta na Tamada Vakalomalagi kei Jisu Karisito? (Raica na iwasewase e 1.)
Na cava e dau laki cakacakataki tikoga kina na vakabauta dina? (Me baleta na ivakaraitaki eso, raica na iwasewase e 2.) Na cava eso na sala eda rawa ni vakaraitaka kina na noda vakabauta ena noda cakacakataka?
E yaco vakacava na veivutuni me “vatuka ni vakabauta”? (Raica na iwasewase e 3.)
Mo vakananuma lesu mada na gauna o ya veivutuni kina ka vakila na loloma veivueti kei na loloma nei Tamada Vakalomalagi kei Jisu Karisito (raica na iwasewase e 4). Na cava o rawa ni wasea me baleta na nomu vakavinavinakataka na Veisorovaki ni iVakabula?
Na cava e dredre kina na veivutuni “ke sega na rarawa kei na gagadre me vagalalataki mai na ivalavala ca”? (Raica na iwasewase e 5.) Ena soli inuinui vakacava na iotioti ni rua na parakaravu ena iwasewase e 5 vua e dua e rarawa ena vuku ni ivalavala ca?
Ena sala cava e “butakoca kina na bula tawamudu” na lokuyara”? (Raica na iwasewase e 6.) Na cava so na veika rerevaki ni da lokuyarataka na noda veivutuni?
Ni ko raicalesu na iwasewase e 7, mo raica na cava na ibalebale ni “kacivaka na veivakaroti ena domolevu.” Na sala cava eda na rawa ni yalovinaka ka dauloloma ni da saga mera vakaroti na tamata?

iVolanikalou Veisemati

Iperiu 11:1–6; Mosaia 4:1–3; Alama 34:17; Ica 12:4; Moronai 7:33–34; V&V 18:10–16; Yavu ni Vakabauta 1:4

Veivuke ni Veivakavulici

“O ira na lewenikalasi e dodonu me ra vakauqeti. Na gauna sa tekivu vakaraitaki koya kina o qasenivuli, sa vinakata me qoroi, sa vosa tu ga o koya, ka lewa kecega na itaviqaravi, sa macala vakasigalevu ni sa vakataotaka tiko na nodra vuli na lewe ni kalasi” (Asahel D. Woodruff, Teaching the Gospel [1962], 37; ena Virginia H. Pearce, “The Ordinary Classroom—A Powerful Place for Steady and Continued Growth,” Ensign, Nov. 1996, 12).