iVakamacala Taumada

Eratou a tauyavutaka na isoqoni ni Nodra iVakavuvuli na Peresitedi ni Lotu Na Mataveiliutaki Taumada kei na Kuoramu ni iApositolo Le Tinikarua me vukei iko ena nomu toro voleka yani vua na Tamamu Vakalomalagi ka vakatitobutaka na nomu kila na veika me baleta na kosipeli vakalesuimai nei Jisu Karisito. Ni vakaikuritaka tiko na Lotu eso tale na voliumu ki na isoqoni oqo, o sa na taracake tiko e dua na ivakasokumuni ivoladusidusi ni kosipeli ena nomu vale. Era sa vakarautaki na ivoladusidusi ena isoqoni oqo mera vakayagataki ena vuli yadudua vakakina me idusidusi ni Sigatabu. Era rawa talega ni na vukei iko ena nomu vakarautaka na lesoni kei na vosa ka vakakina me sauma na taro vakaivunau ni Lotu.

Na ivola oqo e vakaraitaka na ivakavuvuli nei Peresitedi Joseph Fielding Smith, ka a veiqaravi me Peresitedi ni Lotu i Jisu Karisito ni Yalododonu Edaidai mai na ika 23 ni Janueri, 1970, ki na ika 2 ni Julai, 1972.

Vuli Yadua

Masulaka na veivakauqeti ni Yalo Tabu, ni ko vulica tiko na ivakavuvuli nei Peresitedi Joseph Fielding Smith. Na taro e tiko ena mua ni iwase yadua ena vukei iko mo kila vakavinaka na ivakavuvuli nei Peresitedi Smith ka saga mo bulataka. Ni ko vulica na ivakavuvuli oqo, ko na rairai gadreva beka mo na wasea vei ira na lewe ni nomu matavuvale kei na itokani. Oqo me na vaqaqacotaka na nomu kila na veika o sa wilika.

iVakavuvuli mai na iVola Oqo

Sa vakarautaki nai vola oqo me vakayagataki mai vale vakakina e valenilotu. Ena ilawalawa ni bete levu, kuoramu ni italatala qase, kei na iSoqosoqo ni Veivukei, e rua na lesoni e veivula ena dau vakavulici tiko mai na veiwase ni ivola oqo. Me vaka ni tiko ena ivola oqo e levu cake na iwase ka rawa me tauri ena loma ni 12 na vula, sa rawa vei ira na iliuliu ni tabanalevu kei na iteki mera na kila se iwase cava ena sotava na nodra gagadre na lewenilotu era qaravi ira tiko.

Na idusidusi oqo me na vukei iko mo na veivakavulici mai na ivola oqo.

Vakavakarau mo Veivakavulici

Vakasaqara na Yalo Tabu ni ko sa vakarau mo veivakavulici. Masulaka na nomu vulica na wase e lesi me rawa ni o yalodei ena nomu kila vakavinaka na ivakavuvuli nei Peresitedi Smith. Ko na veivakavulici ena yalodina kei na kaukauwa ni sa vakayavalati iko na nona vosa (raica na V&V 11:21).

Kevaka mo vakavulica tiko e dua na lesoni ni Matabete i Melikiseteki se iSoqosoqo ni Veivukei, kakua ni biuta vakatikitiki na ivola oqo se vakarautaka na lesoni mai na dua tale na ivola. Digitaka mai na iwase ena masumasu na tikina ko vakila ni na veivuke vei ira ko na vakavulica. E so na iwase ena tiko kina e levu sara na ka ni vuli ka ko na sega ni rawa ni vakavulica kece ena gauna ni kalasi.

Vakauqeti ira na vakaitavi mera vulica na iwase ni bera na lesoni ka mera kauta vata tiko mai kei ira na nodra ivola. Ni ra vakayacora oqo, era na vakarautaki vakavinaka cake ki na veivosaki ka veivakavulici vakaiira.

Ena nomu vakavakarau ki na veivakavulici, solia vakatabakidua na nomu vakasama ki na “Vakatutu ni Vuli kei na Veivakavulici” ena mua ni iwase yadua. Ena ruku ni iulutaga oqo, o na kunea kina na taro, ivolanikalou veisemati, kei na veivuke ki na veivakavulici. Na taro kei na veiivolanikalou veisemati era cokotivata vakatabakidua kei na iwase era kunei kina. Na veivuke ki na veivakavulici era na rawa ni dusimaki iko ena nomu saga ena nomu igu taucoko na nomu vukei ira tale eso mera kunea na reki ena nodra vulica ka bulataka na kosipeli.

Vakamacalataka na iWase

Ni ko vakamacalataka na iwase kei na vo ni lesoni, sasagataka mo sureta yani na Yalotabu me rawa ni tara na nodra bula o ira ko na vakavulici ira tiko. Tekivutaka na lesoni, ena nomu vukei ira ko vakavulica mera vakanamata kina ivakavuvuli ni iwase. Taurivaka na veivakasama oqo:

Wilika ka veivosakitaka na iwasewase ka kena iulutaga “Na Bula nei Joseph Fielding Smith” mai na itekivu ni iwase.
Veivosakitaka e dua na iyaloyalo se ivolanikalou mai na iwase.
Lagata e dua na sere e salavata.
Wasea vakalekaleka na ka e sotavi yadudua me baleta na iulutaga.

Liutaka na Veivosakitaki ni iVakavuvuli nei Peresitedi Smith

Ni ko sa veivakavulici mai na ivola oqo, sureti ira e so mera wasea mai na nodra vakasama, taroga e so na taro ka veivakavulici vakai ira. Ni ra sa vakaitavi mai, era na qai vakarau mera na vulica ka ciqoma na ivakatakila baleti ira. Vakatara me toso na veiwasei e vakaibalebale ka kakua ni saga mo cakava ga vaka iko na veivakavulici. Me vakauqeta na veivosaki, vakayagataka na taro ena mua yadua ni wase. E rawa talega mo taroga e so na taro ko nanuma ni ganita, baleti ira ko vakavulica.

Na veidigidigi oqo e rawa me vakaikuritaka na nomuni vakasama:

Mo ni kerei ira na vakaitavi me ra wasea na veika era vulica mai na nodra vuli yadua ena iwase. E rawa ni veivuke vakalevu sara me ia na veitaratara ena loma ni macawa vata kei na lewe vica era vakaitavi ka kerei ira me ra vakavakarau ena nodra lako mai ka mai wasea na veika era sa vulica.
Lesi ira era vakaitavi tiko mera wilika na taro digitaki eso e tiko ena mua ni wase (vakayadudua se vakailawalawa lalai). Kerei ira mera raica mai na ivakavuvuli e tiko ena wase e sema tiko ki na taro. Ka qai sureti ira mera wasea na nodra vakasama kei na rai eloma kei ira na vo ni lewe ni ilawalawa.
Me ra wilika vata e dua na itukutuku digitaki nei Peresitedi Smith mai na iwase. Mo ni kerei ira na vakaitavi me ra wasea na ivakaraitaki mai na ivolanikalou kei na veika era sotava vakaiira ka vakaraitaka na veika a vakavulica o Peresitedi Smith.
Kerei ira na vakaitavi mera digitaka e dua na kena iwase ka wilika toka vakamalua. Sureti ira mera dabe yarua se yatolu, vakatau ena iwase ni ivola era wilika ka veiwaseitaka na veika era sa vulica.

Vakauqeta na Veiwasei kei na Bulataki

Na ivakavuvuli nei Peresitedi Smith ena vakaibalebale cake vei ira era vakaitavi tiko ka ra veiwaseitaka kei ira eso tale ka saga mera bulataka. Taurivaka na veivakasama oqo:

Taroga vei ira era vakaitavi se sala cava era rawa ni vakayacora kina na ivakavuvuli nei Peresitedi Smith ena nodra itavi e vale vakakina ena lotu. Me kena ivakaraitaki, sa rawa mo vukei ira mera vakasamataka vakatitobu ka veivosakitaka na sala era rawa ni vakayagataka kina na ivakavuvuli vaka tama, tina, itubutubu, cauravou, goneyalewa, dausiko vuvale, se dauveituberi.
Vakauqeti ira na vakaitavi mera wasea eso na ivakavuvuli nei Peresitedi Smith vei ira na matavuvale kei na itokani.
Sureti ira na vakaitavi tiko mera na mai wasea na veika era sa vulica tiko ka sotava ena itekivu ni kalasi e tarava.

Tinia na Veivosaki

Vakalekalekataka ga na veika e sa vulici se kerea e dua se rua na vakaitavi me rau cakava. Vakadinadinataka na veika o sa vakavulica. Ko na rairai gadreva mo sureta e so mera wasea na nodra ivakadinadina.

iTukutuku me baleta na iVurevure era Cavuti ena iVola Oqo

Qo era vosacavuti saraga mai ena ivunau, itukutuku, ivolanitalanoa, volavola, kei na ivolaniveisiga nei Peresitedi Joseph Fielding Smith. Na vosa cavuti mai na ivola sa tabaki, e maroroi tu kei na maka, na sipeli, na matanivola levu, parakaravu ena kena a volai taumada, vakavo kevaka sa veisautaki me matata na kena wiliki. Qo ena vakavuna na kena na via duidui toka ena so na gauna na ka era volai. Me kena ivakaraitaki, na vosa kosipeli ena matanivola lalai ena so na vosacavuti, kei na matanivola lelevu ena so tale.

Vakatalega kina, e dau vakayagataka vakalevu o Peresitedi Smith na vosa me vaka na ira na tagane, tamata, se kawa tamata me matataka na tamata kece, tagane kei na yalewa. Ka dau vakayagataka na pronauni koya, nona kei na ko ya me baleta ruarua na tagane kei na yalewa. E a dau vakatu kina na ivosavosa vakaoqo ena nona gauna. Dina ga ni duidui na vosa e vakayagataki ena duidui ni veigauna kei na kena e vakayagataki, na ivakavuvuli nei Peresitedi Smith e baleta ruarua na tagane kei na yalewa.