Wase 26

Vakavakarau ki na Lako Mai ni Noda Turaga

“Dou caramaka na sala ni Turaga ka cakava me dodonu na nona salatu, raica sa voleka na gauna me lako mai kina ko Koya” (V&V 133:17).

Na Bula nei Joseph Fielding Smith

Ena dua na gauna e a kaya o Peresitedi Joseph Fielding Smith vei ira eso na ilawalawa Yalododonu Edaidai ni sa “masulaka tiko na itinitini kei vuravura.” Tukuna o koya, “Kevaka me yaco mai ni mataka, au marautaka.” Me isau ni vosa o ya, qai kaya vaka oqo e dua na yalewa e tu e kea mera rogoca na kena vo. “Isa, au nuitaka ni na sega,” e a kaya.

Ni wasea na ka oqo ena dua na gauna e muri, qai kaya vakaoqo o, Peresitedi Smith:

“O ni sega li ni vinakata me yaco mai na itinitini kei vuravura?

“E levu na tamata era nanuma cala tiko baleta na itinitini kei vuravura. …

“… Ni sa lesu mai o Karisito sa na mai tini kina o vuravura. … Sa na sega kina na ivalu, veilecayaki, veilomacataki, veilasutaki; sa na sega na ivalavala ca. Sa na vulica kina na tamata me lomana na Turaga ka muria na Nona ivakaro, kevaka me sega era na sega ni mai tiko e ke. O ya na itinitini kei vuravura, o ya na ka e a masulaka na iVakabula ni ra sa lako mai Vua na Nona tisaipeli ka kaya, ‘Vakavulici keitou ena masu.’ Na cava e qai cakava? Qai vakavulici ira, ‘Tamai keimani mai Lomalagi, me vakarokorokotaki na yacamuni, Me yaco mai na nomuni matanitu, me caka e vuravura na ka sa caka tiko mai lomalagi.’ [Raica na Luke 11:1–2.]

“O ya na ka au masulaka tiko. Na Turaga e a masulaka tiko na itinitini kei vuravura, vakakina o au.”¹

Ena ivunau kei na volavola, o Peresitedi Smith sa dau cavuta wasoma na veitiki ni ivolanikalou ka parofisaitaki tu kina na itinitini kei vuravura, na itavi nei Parofita Josefa Simici ena vakarautaki ni nona sala na Turaga ni sa lesu mai ena lagilagi. E a vakaraitaka o koya ena yalololoma, na veika me baleta na parofisai oqo ena kena a vakatabui na Valetabu mai Ogden Utah:

“Ko ni sa kila, na neimami Kalou, keimami sa bula tu oqo ena iotioti ni gauna ni sa vakatakilai tiko mai na vakatakilakila; ena nomuni sa vakusakusataka na nomuni cakacaka ena kena gauna; kei na neimami sa rogoca na domo ni dua sa kacikaci ena loma ni vanua: Cakava me dodonu na nona salatu [raica na Maciu 3:3]. …

Oi kemuni na Tamai keimami, keimami sa vakanamata ki na siga ni nona yaco mai na Tui ni Sautu, ni sa na vakacegu o vuravura ka sa na kune na ivalavala dodonu ena veivanua; ka sa neimami masu, mai na boto ni yaloi keimami, ni keimami sa na vakarautaka na siga me keimami na mai bula vata kei koya ni ko ni sa talai koya mai me mai nodra Tui na tui ka nodra Turaga na turaga, ka sa na nona na lagilagi, na vakarokoroko, kei na kaukauwa me tawamudu.” ²

“Eda sa vakanamata tu ki na siga ena tadu mai kina na Tui ni Sautu.”

iVakavuvuli nei Joseph Fielding Smith

Sa voleka ni lako mai na Turaga.

Eda sa voleka sara tiko yani ki na nona siga na Turaga, na gauna ni “veivakavoui,” ni na lako mai ena dela ni o mai lagi me ravuti ira na tawa vakabauta ka vakarautaka na vuravura me baleta na gauna ni bulavakacegu vei ira kece era na vinakata mera talairawarawa ki na nona ivakaro [raica na Cakacaka 3:19–20].³

Levu na ka sa yaco … me yavalati ira na lewe ni Lotu yalodina mera vakarau ni sa voleka mai na Turaga. Sa vakalesuimai na kosipeli. Sa tauyavutaki na taucoko ni Lotu. Sa vakatikori na matabete kivei ira na tagane. Sa vakatakilai na veitabagauna mai na ivakatekivu kei na kedra idola kei na dodonu sa soli kina Lotu. Sa vakasoqoni vata tiko oqo o Isireli ki Saioni. Era sa lesu tiko oqo na Jiu ki Jerusalemi. Sa vunautaki oqo ki vuravura na kosipeli me kena ivakadinadina. Sa tara na valetabu, kei na cakacaka vakalotu baleti ira na mate kei ira na bula, sa vakayacori tiko kina. Sa vagolei na yalodra na gone vei ira na qase, ka ra sa vakasaqarai ira na wekadra sa mate na gone. Na veiyalayalati ka a yalataka na Turaga ni na cakava vei ira na Isireli ena siga mai muri, sa vakatakilai mai, ka sa udolu vaka udolu na Isireli era sa curu oti kina. Sa toso tiko na cakacaka ni Turaga, ka sa vakatakila tiko ni sa voleka sara mai na nona sa na lesu mai kina na Turaga. …

Sa vakavotukana tiko vakamaqusa na nodra vosa na parofita, ia e sa vakayacori tiko ena kena ivakavuvuli ka vakavuna me da sega ni kila kina na kena sa yaco tiko.

E a parofisaitaka o Joeli, ni Turaga ena sovaraka mai na yalona vei ira na tamata: era na parofisai na luvena tagane kei na yalewa, era na tatadra na nodra qase, ka ra na raica na raivotu ko ira na nodra cauravou [raica na Joeli 2:28–29]. …

E dua na ivakatakilakila ni iotioti ni gauna na kena na tosocake na sasaga ni vuli-ka. E a vakaroti o Taniela me “… maroroya na vosa ka dregata na ivola [ni nona parofisai], me yacova na kena itinitini: [ia ena siga o ya] era na veiciciyaki na lewe vuqa,” e a kaya “ ka na vakalevutaki talega na vuku.” (Tani. 12:4.) Era sega li ni “veiciciyaki vaka ka vaka” na tamata, nikua me vaka e se bera vakadua ni yaco ena dua na gauna e vuravura? …

… Sega li na sa vakalevutaki na vuku? Sega li ni se bau dua na gauna kei vuravura me sovaraki kina vakalevu sara na vuku vei ira na tamata? Ia, e ka ni rarawa ni vosa i Paula e sa dina sara—ni o ira na tamata “era sa dau vakatavulici tiko, ka sega ni rawata mera kila na ka dina.” (2 Timoci 3:7.) …

Eda sega beka ni se sotava e levu na irogorogo ni ivalu? [Raica na V&V 45:26.] Eda se bera beka ni sotava na ivalu me vaka e se bera ni sotava o vuravura? Era sega beka ni veicacati na veimatanitu nikua, era sega li ni vakalomaleqataki kina o ira na kena iliuliu? Era sega beka ni vakatoboicu na veimatanitu ka basika na veisau ena veivanua vakaoqori? Sa veilecayaki sara ga mai o vuravura. Sa uneune ga ena veivanua ena veisiga [raica na V&V 45:33]. …

Ia, o vuravura e se saga tikoga na nona bisinisi ena veisiga ka sega ni galeleta na veika sa tukuna oti na Turaga me baleta na ivakatakilakila sa soli oti tu. Era na lomaqa na tamata ka kaya, “… ni na vakabera na nona yaco mai na Karisito me yacova ni sa rusa na vuravura.” (V&V 45:26.)⁴

Au a tarogi ena taro se gauna cava ena yaco mai kina na Turaga. Au kaya kina, :”Io,” ka sauma : “Io” qo sara ga. Au kila na gauna ena lako mai kina. Ena lako mai o koya ni mataka. Sa tiko qo vei keda na ka e kaya kina. Meu wilika mada yani:

“Raica sa vakatokai na gauna oqo me yacova ni sa lesu tale mai na Luve ni Tamata, io, me gauna ni nodra vakacabora na nodra isoro ka solia na nodra ikatini ko ira na noqu tamata; raica ko koya sa solia na nona ikatini ena sega ni vakarusai ena siga sa lako mai kina ko Koya.”

Oqo, na ivakavuvuli ni ivunau ni ikatini.

“Ni sa oti na siga edaidai sa na yaco mai na siga ni veivakarusai—ni oqo na ka sa tukuna na Turaga— ia au sa kaya vakaidina ena siga ko ya, ko ira kece sa viavialevu kei ira kece era sa cakaca era na vaka na vu ni sila, raica au na vakamai ira koi au na Turaga ni Lewe Vuqa kau na sega ni laiva e dua me vo mai Papiloni.” [V&V 64:23–24.]

Sa lako mai na Turaga, au kaya, ni mataka. Meda sa vakarau yani kina.⁵

“Eda sa voleka sara yani ki na siga e levu ni Turaga, na gauna ni “veivakavoui” ni na lako mai ena dela ni o mai lagi.”

Ena yaco e dua na veilewai ni sa yaco mai na Karisito.

Na vosa vakatautauvata ka cavuta na Turaga baleta na Sila vinaka kei na Sila ca e baleta tiko na itinitini ni gauna. Na italanoa e baleta e dua na daukakaburaki e tea e so na sore ni kau vinaka ena nona iteitei, ia ni sa moce era qai lako mai na meca ka kaburaka na sore ni kau ca ena iteitei. Ni sa tekivu tubu mai, era sa vinakata na tamata cakacaka mera cavuta laivi na sila ca, ia sa qai tarovi ira na Turaga me ra laiva na sila vinaka kei na sila ca me rau tubucake vata, me yacova na gauna ni tatamusuki, de ra na cavuta laivi na sila ca qai vakacacana na sila vinaka. Ni sa na cava na tatamusuki, mera na lako yani ka soqona vata mai na sila vinaka ka vesuka vata na sila ca me kau yani me laki kama. Ena ivakamacala ni vosa vakatautauvata oqo, e a kaya vaka oqo na Turaga vei ira na nona tisaipeli, “Na tatamusuki sa ikoya na itinitini kei vuravura; kei ira na tatamusuki sai ira na agilosi.” [Raica na Maciu 13:24–30, 36–43; V&V 86.]⁶

Na sila ca kei na sila vinaka erau a tubu vata voli ga ena loma ni dua na iteitei ena vica na yabaki sa oti, ia sa voleka mai na gauna me na tamusuki na sila vinaka ka maroroi, ka vesu vata na sila ca ka vakamai, ka sa na qai yaco na veitawasei, o ira na ivalavala dodonu mai vei ira na ivalavala ca, ka sa na kena gauna vei keda meda na talairawarawa ki na ivunau ni Turaga, meda veivutuni, meda sa yalododonu, kevaka me gadrevi na veivutuni e yaloda.⁷

Tara cake ka vaqaqacotaki ira na lewe ni Lotu ena vakabauta na Kalou; ni oqo na ka eda vinakata kece sara. Levu sara na idre sa tu oqo ka na tawasei keda, vei ira sara ga na lewe ni Lotu ka na lako tikoga mai, ena vica ga na gauna mai oqo na tawasei ni sila vinaka mai na sila ca, ni o keda eda na vaka ga na sila vinaka se sila ca. Eda na tu ena yasana oqo se yasana o ya.⁸

Ena yaco mai na siga ni sa na sega kina vei keda na vuravura qo. Ni sa na veisau. Ena dua tale vei keda na vuravura e vinaka cake. Ena dua vei keda e yalododonu, baleta ni sa lako mai o Karisito ena vakasavasavataka na vuravura.

Wilika na ka e volai tu ena noda ivolanikalou. Wilika na ka sa tukuna tu o koya. Ni sa na lako mai, sa na mai vakasavasavataka na vuravura qo mai na ivalavala ca, ni da vosa tiko baleta na Lotu, sa tukuna tu o Koya ni na tala mai na nona agilosi ka ra na vakasoqoni ira vata mai na nona matanitu sa ikoya na Lotu, mai na veika kece e dau veivakacacani. [raica na Maciu 13:41].⁹

[Na] siga e levu ka rerevaki ena sega tale ni dua na kena gauna, ia sa siga ga ena basika kina o Jisu Karisito, me mai tauyavutaka na nona matanitu ena kaukauwa, vei ira na yalododonu e vuravura ka vakasavasavataki vuravura mai na ivalavala ca kecega. Ena sega ni dua na siga ni rere me vakavuna na taqaya vei ira na yalododonu, ia ena dua na siga ni rere ka vakadomobula vei ira sa sega ni vakalou. Qo na veika eda sa vulica mai vua na iVakabula ni a vakavulici ira tiko na nona tisaipeli [raica na Maciu 24; Joseph Smith—Maciu 1].¹⁰

Ena yaco e dua na veilewai ni sa yaco mai o Karisito. Sa tukuni tu vei keda ni na dola na ivola, era sa na qai lewai na mate ena veika sa volai tu kina, ka na tiko kina na ivola ni bula [raica na iVakatakila 20:12]. Eda na raica na kena draunipepa yadua. Eda na raici keda vinaka sara ga, ka da na kila vinaka talega ni vakatulewa sa soli mai me baleti keda yadua sa ganita vakavinaka, se eda na lako mai ki na Matanitu ni Kalou, … meda na mai vakalougatataki kina se meda na vakatalai laivi.¹¹

Au vakamasuti ira na Yalododonu Edaidai me ra tudei ka yalodina ena veiqaravi, ena muri ni ivunau ni Turaga, rokova na matabete, meda na tucake rawa kina e matana na Turaga ni sa lako mai—ni da bula tiko se mate, sega ni dua na ka,—ka me noda na kena lagilagi.¹²

Meda vakavakarau ki na lako mai ni Turaga, meda vakatawa ka masu ka tuva vinaka na noda matavuvale.

Sa levu na ka sa yaco tu e vuravura nikua ka vakaraitaka tiko ni sa voleka mai na nona basika na Dauveivueti me vakarewataka na nona matanitu ka namaki yani na yabaki udolu ni tiko sautu. Ni oqo sa itavi ni lewe ni Lotu me vaqara na vuku ka vakarautaki ira ena vuli kei na vakabauta me baleta na kena sa roro tiko mai na siga e levu ka lagilagi o ya.¹³

Meda kakua ni leqataka tiko na gauna se na draki ni nona na yaco mai na Karisito, ia sa ganita meda sa vakatawa ka masulaka ka vakarau kina.¹⁴

Au dau cudru ena so na gauna baleti ira na noda qase ni ra dau vosa, ka kaya ni Turaga ena qai yaco mai ni da sa na yalododonu tiko me rawa ni da na ciqomi koya. Na Turaga ena sega ni waraka na gauna meda na qai yalododonu kina. Ni sa vakarau me lako mai sa na lako ga mai—ni sa sinai na bilo ni ivalavala ca—ka da se bera tikoga ni ivalavala dodonu, sa na qai ca sara vakalevu vei keda, ni da na wili vata kei ira e ra sega ni vakalou, ka da na vaka na kau sa na samaki laivi e delai vuravura, ni sa kaya na Turaga ni ivalavala ca ena sega ni qai kune tale.¹⁵

Sa na vakaevei beka meda sa na moce tu ga ka kua ni kauwai ena veika sa veivakasalataki tiko mai kina na Turaga? Au kaya vei kemuni, “O koya mo dou qai vakatawa ni dou sa sega ni kila na tikinisiga sa lako mai kina na nomudou Turaga.

‘Ia, dou kila ga oqo, kevaka e kila na itaukei ni vale na tiki ni bogi e lako mai kina na daubutako, sa vakatawa ga ka sega ni biuta na nona vale me ravabasuki.

“… O koya mo dou qai vakarau tu: koi kemudou talega: ni sa lako mai na Luve ni Tamata ena tikinisiga dou sa sega ni nanuma kina.” (Maciu. 24:42–44.)

Meda qarauna na ivakaro sa solia mai na Turaga ka vakarautaka na noda matavuvale me baleta na nona lako mai na Turaga.¹⁶

O ira na Yalododonu Edaidai sa na rawa mera liga ni veiqaravi vua na Kalou mera vakarautaki na tamata me baleta na lako mai ni Turaga.

Ena sega beka li ni manata kevaka me sa na lako mai oqo na Turaga me mai tekivutaka na nona veiliutaki ena vakacegu, vakarusai ira na dau vakadrecike, vakasavasavataki vuravura mai na ivalavala ca, ka qai sega ni vakauta mada mai liu na nona italai me mai vakarautaka na nona sala ni bera ni yaco mai? Meda na namaka li na Turaga me lako mai, me mai lewai vuravura, ka sega mada ni vakauta mai na ivakasala ka me vakarautaki na sala ni idrodro vei ira era na veivutuni?

E a talai mai o Noa ki vuravura me veivakasalataki baleta na waluvu. Kevaka mera a vakamuria, o ira era a vakabulai. Vakatalai o Mosese me laki liutaki ira na Isireli ki na vanua yalataki, me vakavatukanataki na yalayala e a soli vei Eparama. E a talai o Joni na Dauveipapitaisotaki me laki vakarautaka na nona lako mai na Karisito. Ena veivanua kece oqori e a lako mai na veikacivi ena kena tadola o lomalagi. O Aisea, Jeremaia, kei na so tale na parofita, era a talai mera laki vakaroti Isireli kei Juta ni bera na nodra veiseyaki kei na nodra vakabobulataki. Kevaka mera a vakamuria, ke sa duatani na itukutuku e a volai. E a nodra madigi mera rogoca, era a vakasalataki ka tiko vei ira na madigi mera drovaki bula ka ra qai beca.

Sa vakasalataka tu na Turaga ni na tautauvata sara ga vaka o ya na itukutuku ni ka ena yaco ki na tamata ena kena namaki tiko na nona lesu mai vakarua.¹⁷

E a talai o Josefa Simici me vakarautaka na sala ni nona lesumai vakarua, ena kena vunautaki na taucoko ni Kosipeli, kei na kena soli ki na tamata yadua me drovaki bula kina mai na ivalavala ca.¹⁸

Ena gauna e sikovi Josefa Simici kina na agilosi o Moronai, e a parofisaitaka na Lakomai Vakarua ni iVakabula (raica na Joseph Smith—History 1:36–41).

O Joni mai Patemo e a raica ena iotioti ni gauna oqo e dua na “agilosi ni a vuka ena maliwa kei lomalagi kei vuravura, a sa taura na itukutuku vinaka e sega ni oti rawa me vunautaka vei ira era sa tiko e vuravura, vei ira kece talega na veimatanitu kei na veimataqali kei na duivosavosa kei ira na tamata.” [iVakatakila 14:6.]

Ena kena sa vakavatukana na yalayala oqo, e a kaya kina o Josefa Simici ni o Moronai e dua na parofita makawa ena vanua oqo, ka sa tucaketale ena gauna oqo, e vakavulica vua na kosipeli, ka sa vakavulici koya sara ga ena ka me baleta na veivakalesui mai ni veika kece sara ni bera ni lesu mai na Karisito. Sa qai kaya na Turaga: “ Raica sa tala yani na agilosi na Turaga na Kalou a sa vuka voli ena maliwa kei lomalagi ka kaya, Dou caramaka na sala ni Turaga, ka cakava me dodonu na nona salatu raica sa voleka na gauna me lako mai kina ko koya.” [V&V133:17.]

Ni ra sa ciqoma oqo ni ka dina, era sa vakabauta na Yalododonu Edaidai ni sa dolavi tale na veitaratara kei lomalagi ena gauna oqo, ia oqo na “Kosipeli ni Matanitu” sa soli yani me ivakadinadina ki na veivanua ni bera ni lako mai na Karisito [raica na Maciu 24:14].¹⁹

Sa vaka e nanumi tu ni o ira na Yalododonu Edaidai era sa vaka e matalia se lasa tu ni ra sa vakabauta ni sa nodra ilesilesi mera na vakavatukanataka na tiki ni ivolanikalou oqo [Maciu 24:14], ia era sa vakadeitaka ni sa vosa na Turaga mera sa vakauti ira na daukaulotu ki na veiyasai vuravura. Ia, ni ra sa rogoca na veimatanitu na itukutuku oqo me vaka sa vakatakilai ena iotioti ni gauna oqo, sa na qai dodonu meda vakanamata ki na nona lesu mai na Turaga o Jisu Karisito, ni ena siga o ya era sa na rogoca kece na veivanua na itukutuku mai vei ira na daukaulotu ka ra sa vakau yani vei ira me vaka na yalayala ni Turaga.²⁰

Na kosipeli e baleta kece na tamata, ka na tauyavu na Lotu ena veivanua, veimatanitu, ki na iyalayala kei vuravura, ni bera na nona lesumai vakarua na Luve ni Tamata. …

… Sa vakotora o koya na ligana ena ikarua ni gauna me vakasoqoni ira na Isireli ki na Lotu ia ena gauna oqo sa na vakaduria cake kina na nona isoqosoqo lewe ni lotu ni yalododonu ena veivanua kece sara.²¹

Mai na masu ni kena vakatabui na Valetabu mai Ogden Utah:

Tamai keimami, ni vakalougatataki keimami ena ivalavala dodonu, mera dolava na iliuliu ni veimatanitu na iyalayala ni nodra vanua me vunautaki kina na kosipeli, me na dolavi raraba kina na katuba ni veivakabulai vei ira sa yalodina ka ra sa yalododonu tiko.

Keimami masulaka na vakatetei ni dina, keimami masulaka na veivakalotutaki, keimami vakasaqara na kaukauwa kei na iwiliwili me na vunautaki yani ki na na dina tawamudu vei ira na luvemuni ena veimatanitu, veimatatamata, kei na duivosavosa. …

… Sa neimami gagadre me keimami isuwai ni nomuni cakacaka me vakarautaki kina eso me baleta na nona lesumai na Luvemuni.²²

Na Mileniumi me na dua na gauna ni sautu kei na qaravi ni cakacaka ni Turaga.

Era na reki na yalododonu ni sa na lako mai, baleta ni o ya na gauna sa na yaco na veisaututaki e vuravura, era na yalododonu na tamata, kei na yalo ni vakacegu kei na marau ka a tu ena vanua levu oqo me rua na drau na yabaki [raica na 4 Nifai 1:1–22] me na tauyavu tale ena lomadra na tamata, ka me na roboti vuravura, ka me na qai veiliutaki kina na Karisito me Turaga ni turaga ka Tui ni tui me dua na udolu na yabaki. Eda sa nanamaki sara tu ga oqo ki na gauna o ya.²³

Ena loma ni dua na udolu na yabaki ni tiko sautu, era na qai vakila na lewe ivuravura ka ra na qai vakauti lesu mai ki na loma ni Lotu.²⁴

Sa na qai toso cake ga na vunautaki ni kosipeli kei na kena kaukauwa ena gauna ni mileniumi me yacova ni ra sa ciqoma kece na tamata.²⁵

Ena sega ni gauna ni vakacegu mai na cakacaka, ia sa na gauna sara ga ni kena gumatuataki na veiqaravi na gauna ni Mileniumi. Na vakawelewele ena sega na nona tikina, ena vinaka cake na veiqaravi, ena sega soti ni levu na qaravi ni veika cacawale. Ia sa na gumatuataki ga na cakacakataki ni veika e baleta na Matanitu. Era na osooso sara na yalododonu mai valetabu ni sa na tara ena veivanua kecega. Sa na vaka e tawa tu ga na valetabu ena levu sara na gauna.²⁶

Na bula e vuravura ena gauna o ya sa na toso tu ga me dua na udolu na yabaki baleta na veiqaravi levu me baleta na nodra vakabulai na mate. Ena gauna ni yabaki e dua na udolu ni tiko sautu na cakacaka levu ga ni Turaga ena qaravi tiko mai valetabu, ka ra na tabili kina na tamata mera laki cakava na nodra cakacaka o ira era sa wawa tu mai, ka cakava na cakacaka vakalotu baleti ira me baleta na nodra vakabulai ni ra na mai bula tale vakayago e vuravura.²⁷

Sa noda itavi meda vakabulai ira sa mate ena cakacaka me na toso ena gauna ni Mileniumi me yacova sara ni ra sa ciqoma na nodra edaumeni ka vauci vata o ira sa ganita mera vakalougatataki kina.²⁸

O ira kece era a mate ena vukui Karisito era na tucake tale ena Nona sa na lesu mai, ka na bula e vuravura vata kei Karisito ka ra na tu e vuravura ena gauna ni Mileniumi. Era na sega ni tiko eke ena gauna taucoko ena loma ni yabaki udolu, ia era na veimaliwai kei ira na se bula vata tu kei na yagodra. O ira na Yalododonu oqo, kei na iVakabula era na lako mai mera veivakavulici ka veituberi; mera vakatakila vei keda na veika meda kila; mera na tukuna vei keda na itukutuku baleta na cakacaka ena valetabu ni Turaga, me rawa ni da na cakava na cakacaka ena ganita baleta na veivakabulai vei ira e ra sa buladodonu.²⁹

Sa tukuna oti na Turaga vei ira na nona italai, ni gauna ni Mileniumi ni o ira era sa toki yani ka ra sa rawata na tucaketale, era na vakatakila vakatamata vei ira era se bula tu na itukutuku kece ena ganita me taucoko kina na cakacaka baleti ira era sa biuta oti na bula oqo. Era sa na qai vakaraitaka na mate na veika era na gadreva kei na veika sa na ganita mera na ciqoma. Ni caka vakaoqo,ena sega sara ni dua ena guileca kei na cakacaka ni Turaga sa na qai vakataucokotaki.³⁰

Au masulaka e veisiga me vakatotolotaka mai na Turaga na Nona cakacaka. … Au masulaka tiko na itinitini kei vuravura, baleta niu vinakata e dua na vuravura e vinaka cake. Au vinakata na lesu mai i Karisito. Au vinakata na veiliutaki ni tiko sautu. Au vinakata na gauna me veisaututaki kina na tamata ena bula ni vakabauta yalomalua kei na masumasu.³¹

Vakatutu ni Vuli kei na Veivakavulici

Taro

E tara vakacava na nomu bula na veika e volai tu ena “Na Bula nei Joseph Fielding Smith” me baleta na itinitini kei vuravura?
Ena vukei keda vakacava na parofisai e volai tu ena iwasewase 1 me vakarautaki na nona lako mai na Turaga?
Ena iwasewase 2, railesuva na ivakavuvuli nei Peresitedi Smith baleta na vosavakatautauvata ni sila vinaka kei na sila ca. Na cava e rawa ni da cakava meda tiki ni “sila vinaka”? Na cava e rawa ni da cakava meda vukei ira kina na noda matavuvale kei ira na tani?
Ni da sa vakavakarau ki na lesu mai ni Turaga, na cava o nauma ni ibalebale ni ”vakatawa ka masu”? Na cava o nanuma ni ibalebale ni “vakacokotaka na nomu matavuval;e”? (Raica na iwasewase 3.)
Masulaka o Peresitedi Smith, “ Sa noda gagadre meda i yaragi ka vakarautaka e dua na iwase ni tamata mera vakarautaki ira na tamata me baleta na lako mai ni Luvemuni” (iwasewase 4). Na cava e rawa ni da cakava meda vukei ira na tamata mera vakavakarau ki na nona lako mai na Turaga?
(Raicalesu na iwasewase 5.) Ena sala cava so e rawa kina ni da na vinaka kina ena veika eda sa kila tu me baleta na Mileniumi?

iVolanikalou Veisemati

Same 102:16; Aisea 40:3–5; Jemesa 5:7–8; V&V 1:12; 39:20–21; 45:39, 56–59

Veivuke ni Veivakavulici

“Na kaukauwa cecere, ka dau veisautaka na yalo ni veivakavulici ni kosipeli e sa vakaraitaki ena gauna sa kaya kina na qasenivuli e na veivakauqeti, ‘Au sa kila mai na kaukauwa ni Yalo Tabu, kei na ivakaraitaki ni Yalo Tabu e lomaqu, ni ivakavuvuli kece au vakavulica e dina’” (Bruce R. McConkie, ena Veituberi, Me iLutua ni Noda Bula, 49).