Wase 8

Na Lotu kei na Matanitu ni Kalou

“Mera kila vakaidina na tamata taucoko ni oqo na Lotu ni Turaga ka sa vakatulewataka tiko o koya na kena cicivaki. Sa noda vakaidina na dodonu meda lewena e dua na isoqosoqo vakatabui vakaoqo!”

Na Bula nei Joseph Fielding Smith

Na ilesilesi nei Joseph Fielding Smith vaka-Peresitedi ni Lotu, mai na ika 23 ni Janueri, 1970, ki na ika 2 ni Julai, 1972, e sa icavacava ni qaravi tavi cecere ni bula taucoko ka vagolei ki na matanitu ni Turaga. A veiwalitaka o koya ni imatai ni nona ilesilesi vaka-Lotu a lako mai ni se gonedramidrami. Ni a se vula ciwa voli, rau a tomani Peresitedi Brigham Young o koya kei tamana o Peresitedi Joseph F. Smith, ki St. George, Utah, me tiko ena vakatabui ni Valetabu e St. George.¹

A veiqaravi vaka-daukaulotu tudei o Joseph Fielding Smith ni a se cauravou, ka qai kacivi e muri me peresitedi ena dua na kuoramu ni matabete ka lewe talega ni matabose raraba na Young Men’s Mutual Improvement Association (na yacana taumada ki na isoqosoqo ni Cauravou ka sa kilai tu edai). A cakacaka talega o koya vakavunivola ena valenivolavola ni Dauniitukutuku Makawa ni Lotu, ka vukei tamana vagagalu vaka-sekeriteri sega ni vakadeitaki ni sa Peresitedi ni Lotu o tamana. Mai na madigi ni veiqaravi oqo, a mai taleitaka kina o Joseph Fielding Smith na isoqosoqo veivakauqeti ni Lotu kei na kena itavi ena liutaki ni tamata yadua kei na matavuvale ki na bula tawamudu.

A tabaki me iApositolo ni Turaga Jisu Karisito o Joseph Fielding Smith ena ika 7 ni Epereli, 1910. A veiqaravi voli okoya vaka lewe ni Kuoramu ni iApositolo Lewe Tinikarua ni volekata e 60 na yabaki, oka kina ni volekata na 20 na yabaki vaka Peresitedi ni Kuoramu oya. A veivuke okoya ena kena vakatulewataki na Lotu e vuravura raraba ena nona itutu vaka-iApositolo. A vakaitavi okoya ena vuqa na ilesilesi vaka-Lotu, veiqaravi vaka Dauniitukutuku Makawa ni Lotu, peresitedi ni Valetabu e Salt Lake, peresitedi ni Soqosoqo ni Tuvakawa e Utah, kei na Daunivakasala ki na Mataveiliutaki Taumada.

Joseph Fielding Smith holding open scriptures. — O Peresitedi Joseph Fielding Smith, e dua na italai mamakutu ena matanitu ni Turaga

O Joseph Fielding Smith e a dua na turaga rawarawa ka yalomalumalumu, ka sega ni qa-qa na veitutu oqo. Ia na gauna e kacivi koya kina na Turaga me veiqaravi, a vakadonuya vakarawarawa okoya ena yalomarau. A vakaraitaka vagagalu okoya na gugumatua oqo ena dua na siga ni, ena yabaki 89, a lako kina ki na dua na bose. Ni lako tiko mai nona vale, e a sisi ka lutu sobu ena vica na ikabakaba. Dina ga ni a mavoa na yavana, a taubaletaka okoya ni rauta e dua na ikava ni maile—“ka kiso tiko me vaka e dua na kenaturaga,” a tukuna o koya—me rawa ga ni vakayacora vinaka na nona itavi. Ni oti na bose, a taubale lesu tale ivale okoya, ka qai mani vakatara e dua na vuniwai me dikevi koya. A kunea na vuniwai ni a kamusu toka vakavica na yavai Peresitedi Smith. A qai tukuna emuri o Peresitedi Smith na veika a sotavi oqo. “Na bose a balavu vakalailai,” a kaya. “Ia mai vei, e vuqa na bose e dau vakakina.”²

Ena dua na itukutuku vei ira na itabagone Yalododonu Edaidai, a wasea kina o Peresitedi Smith na nona inaki ni sasaga vagumatua ki na cakacaka ni Lotu:

“Au kila ni bula tiko na Kalou. Au kila ni o Jisu Karisito na Luvena Duabauga sa Vakatuburi ena yago i Tamada. E tu vei au na vakabauta vinaka sara ena ilesilesi nei Parofita Josefa Simici kei ira era sa sosomitaki koya.

“Au kila ni tiko vei keda na dina ni kosipeli tawamudu i Jisu Karisito, me vaka ga au kila niu bula tiko. Kevaka au a sega ni kila, au na sega ni vinakata meu tiko eke se vakaitavitaki au ena cakacaka oqo. Ia au kila mai na veimalamala kece ni yagoqu. Esa vakatakila vei au na Kalou.”³

iVakavuvuli nei Joseph Fielding Smith

Ni oti na senituri ni butobuto vakayalo kei na vukitani, a vakalesuya mai na Turaga na Nona kosipeli ka tauyavutaka na Nona Lotu ena vuravura.

Na Turaga [esa] vakalesuya mai na kosipeli ka tauyavutaka tale na nona Lotu ena vuravura. Na inaki ni isoqosoqo kei na veivakalesuimai vakaoqo sa baleta ni veisenituri sa oti a ologi koto na vuravura ena butobuto vakayalo, ka ni sega na dodonu ni lewa, ka qai sega na kila ka deivaki; era sa sega ni kila na sala cava mera qarava kina na Kalou bula. …

Na veiyalayalati tawamudu esa mai voroki; na kila-ka deivaki dodonu ni ivakavuvuli ni kosipeli a sa yali mai na vukitani; na dodonu ni veiliutaki ena cakacaka vakalotu ni kosipeli esa sega vei ira na tamata. Sa nanumi ni sa dodonu kina me na vakalesuimai na veika kece oqo, ka mena tubu cake na vakabauta vei ira na tamata ena tadolavi ni lomalagi kei na vakalesuimai ni kosipeli.

A mani talai ira na nona italai na Turaga mai na nona itikotiko, vata kei na taucoko ni kosipeli, kei na kaukauwa, kei na dodonu ni vakatulewa ni matabete me na vakatikori vei ira na turaga, ka solia vei ira na ivakaro … baleta ni sa kila tu na Turaga na ka rerevaki ena basika mai ki vuravura, ka ni sa nona lewa me na dua na ivakasala matau, kei na madigi ni ciqomi ni kosipeli mena soli kivei ira na tamata me rawa ni ra veivutuni ka vuki tani mai na nodra sala ca ka qarava na Turaga [raica na V&V 1:17–23].⁴

Keitou kacivaka ni Lotu i Jisu Karisito ni Yalododonu Edaidai esa matanitu ni Kalou e vuravura, na vanua duadua ga e rawa ni ra lako mai kina na tamata mera vulica na ivunau dina ni veivakabulai ka kunea na dodonu ni lewa ni matabete tabu.⁵

Oi kemuni na taciqu kei na ganequ lomani: na noqu vakavinavinaka e sega ni tukuni rawa me baleta na veivakalougatataki esa sa solia vei au na Turaga, ka vakakina vei ira na lewe ni lotu yalodina ena veiyasai vuravura, kei ira talega na luvena taucoko ena vanua cava ga.

Au vakavinavinakataki koya ena veisiga taucoko ni noqu bula ni sa vakalesuya mai na nona kosipeli tawamudu ena iotioti ni siga oqo me rawa kina na veivakabulai vei ira kece era vakabauta ka talairawarawa ki na kena lawa.⁶

Na Turaga Vakatakikoya e vakatulewataka na cakacaka ni Lotu, ka sa noda na dodonu meda na lewena.

Na Lotu i Jisu Karisito ni Yalododonu Edaidai ena kena vakatakilai vakaidina sa matanitu ni Kalou e vuravura.⁷

Au gadreva meu tukuna ni sega ni dua na tamata vakatakikoya e rawa ni liutaka na lotu oqo. Esa Lotu ni Turaga o Jisu Karisito; o koya sa liutaka tiko. Na lotu e taura na yacana, e tiko kina na nona matabete, vakatulewataka na nona kosipeli, vunautaka na nona ivakavuvuli, ka cakava na nona cakacaka.

E digitaki ira na tamata o koya ka kacivi ira mera iyaya ni cakacaka ni ligana ena vakavotukanataki ni nona inaki, ka tuberi ka dusimaki ira o koya ena nodra cakacaka. Ia o ira na tamata era sa iyaya ni cakacaka duadua ga ena liga ni Turaga, kei na dokai kei na lagilagi ni veika kece era vakavotukanataka na nona italai sa dodonu me vakacerecerei ga kina o koya ka tawamudu.

Kevaka e cakacaka ni tamata oqo, ena vakadrukai, ia esa cakacaka ni Turaga, ka sega ni dau druka o koya. Ka sa vakadeitaki vei keda ni kevaka eda na muria na ivakaro ka doudou ena ivakadinadina i Jisu Karisito ka sa dina ki na vakanuinui kece, na Turaga ena tuberi ka dusimaki keda kei na nona lotu ena salatu ni bula dodonu, ena vakavotukanataki taucoko ni nona inaki.⁸

Kivei ira na lewe ni lotu kece e vuravura raraba au vinakata meu tukuna ni lotu oqo e dua tiko na kena ilesilesi tabu lavaki ni qaravi tavi ena ruku ni veidusimaki kei na veiliutaki i Jisu Karisito, na noda iVakabula, ka na sega ni dua na ka me na tarova na nona ituvatuva ni veika oqo. Ena vakataucokotaka na tuva-ka ni Tamada mai lomalagi. Au nuitaka ni o ira kece na Yalododonu e vuravura raraba era sa vakavinavinakataka tiko na Turaga ena veisiga ena nodra lewena tiko na nona lotu kei na ilesilesi nei Josefa Simici ena vakalesuimai ni kosipeli me baleta na noda reki kei na marau.⁹

Keitou kaya vei ira na yalodina ena veimatanitu: Na Turaga e lomani kemuni. E vinakati kemuni o koya mo ni ciqoma na taucoko ni veivakalougatataki ni kosipeli. Esa sureti kemuni tiko oqo o koya mo ni vakabauta na iVola i Momani, mo ni vakadonui Josefa Simici me dua na parofita, ka mo ni lako mai ki na nona matanitu e vuravura me rawa ni ko ni taukeni bula tawamudu ena nona matanitu vakalomalagi.¹⁰

A sega mada ni dua na gauna mai na kena tauyavutaki na Lotu me a liutaka na tamata na Lotu. A sega ni vakakina ena gauna nei Josefa Simici se Brigham Young; E sega ni vakakina me yacova mai oqo. Esa cakacaka ni Turaga, ka mo ni kua ni guilecava ni sa ikoya na Qaqa ka na qarava na cakacaka oqo, ka sega ni tamata.¹¹

Au kila ni Lotu i Jisu Karisito ni Yalododonu Edaidai e sa matanitu ni Kalou e vuravura, ka me vaka ni sa vakavulewataki ka vakaitututaki esa tiko kina na veivakadonui ni Turaga ka sa toso tiko ena kosi ka dusimaki koto.

Mera kila taucoko vakaidina na tamata ni oqo na Lotu ni Turaga ka sa dusimaka tiko o koya na kena vakatulewa. Sa ka taleitaki dina ni noda na dodonu meda lewena e dua na isoqosoqo tabu vakaoqo!¹²

Na Lotu esa tauyavutaki me vukei ira na lewena mera kune marau kei na reki ena bula oqo kei na bula tawamudu ena bula sa bera mai.

E sa tauyavutaka na Turaga na ka kecega ena kena ituvaki donu ka sa solia vei keda e dua na kena ivakarau vinaka sara. Era na sega ni vakavinakataki ira mai kina na turaga. E sa tauyavutaka na Turaga na ka kecega ena kena ituvaki donu ka sa solia vei keda e dua na kena icakacaka vinaka sara. Era na sega ni vakavinakataki ira mai kina na turaga. Kevaka eda na cakava na veika esa vakatakila na Turaga, me vaka sa vakatakila o koya, ia sa na qai vinaka sara na veika kecega, ni isoqosoqo esa isoqosoqo vinaka sara; na kena vakasama—na kena ituvatuva—e sega ni vakacalai kina e dua na ka.¹³

Na Turaga esa tauyavutaka e dua na isoqosoqo ni matabete ena nona lotu ka liutaki mai vei ira na iapositolo kei na parofita. Ka sa solia talega o koya vei ira na isoqosoqo tale eso mera vukea ka tokona na matabete.

E dau tu na veigagadre vakamareqeti me dau sotavi ena veitabagauna vakosipeli, so na leqa mera vakameautaki, kei na veivuke ka dodonu mena soli me tokona ka vukea na lewe ni lotu ena cakacakataki ni nodra vakabulai “ena rere kei na sautaninini” ena mata ni Turaga. (Raica na Filipai. 2:12.) Sa vakakina na kena tiko na veimataisoqosoqo [Soqosoqo ni Veivukei, Cauravou, Goneyalewa, Lalai, kei na Matawilivola ni Sigatabu] me vukea ka tokona na matabete. Sa ra tauyavutaki mera sotava na gagadre ni tamata ena ituvaki ni bula cava ga ka na rawa ni yaco. Oqo era sa tiki ni matanitu ni Kalou ka sa vakaturi cake me vukea na lewe ni lotu mera vakavinakataka cake na nodra bula ka cakava na veika ka na vakadeitaka kivei ira na reki kei na marau ena bula oqo kei na bula tawamudu ena bula ka na lako mai.

Na noda veiqaravi ena Lotu e vakaraitaka na loloma vei ira tale eso kei na vakavinavinaka ki na veiqaravi sega ni vakaiyalayala ni Turaga. O ira na dauveituberi vakavuvale, iliuliu ni matabete, kei na bisopi era sa lesi mera liutaki ira era veiqaravi kaya ki na bula tawamudu ena matanitu i Tamada, ka ra sa lesi na veimataisoqosoqo mera veivuke ka veitokoni ki na cakacaka levu oqo ni veivakabulai.

Eda na sega ni vakadreta vakabibi cake na gagadre levu ni kena cicivaki na veiparokaramu kece oqo me vukea ka vakalougatataki ira kece na luve i Tamada. …

Kevaka eda cakava na veika kece e gadrevi vei keda ena kena tosoi eliu na parokaramu ni lotu, ena vakalougatataki keda na Turaga ka vakavuai keda vakalevu meda na rawa-ka kina mai na noda cakacaka, ka na vure mai kina me noda na vakacegu kei na reki eke kei na lagilagi tawamudu ena bula sa bera mai.¹⁴

Na noda veiqaravi ena Lotu e vakaraitaka na loloma vei ira tale eso kei na vakavinavinaka ki na veiqaravi sega ni vakaiyalayala ni Turaga.

Sa tiko ena Lotu na Turaga. Esa tuberi keda tiko o Koya. Na yalona esa vakacegui ira tiko na tamata oqo. Na ka e gadreva vei keda o koya oya meda qaravi koya ena yalomalumalumu kei na duavata ni yalo kei na yago.¹⁵

A lako mai ki vuravura na noda iVakabula me vakatavulici keda meda lomani ira vakayadua na tamata, ia ena kena sa mai vakatakilai na lesoni levu oya mai na veivakararawataki levu a yaco vua kei na mate me rawa ni da bula kina, e sega li ni dodonu meda vakaraitaka na noda loloma kivei ira na noda itokani ena veiqaravi e caka ena vukudra? E sega li ni dodonu meda vakaraitaka na noda vakavinavinaka ki na veiqaravi tawayalani a cakava vei keda o koya, ena qaravi tavi ena vukuna?

Na tamata e dau cakava na veika me baleti koya ga ena Lotu ena sega ni yacova na bula vakalagilagi. Me vakaoqo, na tamata esa lomana tiko me masu, ka sauma na nona ikatini kei na veisolisoli tale eso, ka qarava na itavi lavaki eso ka vakatabakidua ki na nona bula saraga vakatakikoya, ka sega tale ni dua na ka, ena sega ni yacova na inaki ni taucoko ni bula.¹⁶

Kakua ni cata mo veiqaravi. Dau ciqoma ena yalomarau kevaka e dua na iliuliu vakalotu e kerea na nomu veivuke ka solia na nomu vinaka taucoko ki na itavi me qaravi. E namaka na veika oqo vei keda na Turaga, ka da sa tiki ni veiyalayalati ni cakava vakakina. Na vuli oqo e kauta mai na reki kei na vakacegu, ka qai gauna vata talega ena ciqoma kina na veivakalougatataki e levu sara o ira era dau veiqaravi. E rawa ka vakalevu cake na qasenivuli mai vei koya e vakatavulici; na veivakalougatataki ka vakalesuimai kivei keda ena noda vakadonuya e dua na veikacivi ni cakacaka ena Lotu esa levu cake sara mai na veivakalougatataki e rawa ni da wasea vei ira tale eso. O koya e cata me qarava e dua na itavi se vakawalena na ilesilesi ni soli vua ena Lotu esa tu ena dua na vanua rerevaki me vakayalia kina na veituberi ni Yalotabu. Sa na kena itinitini me na veilecayaki ka veivakaduiduitaki ki na itavi kecega, ka, vaka na itei ka sega ni vakabulabulataki se vakasuasuataki, esa na malai o koya ka mate me vaka na mate vakayalo.¹⁷

Na nomu qaravi tavi gugumatua ena sega ni vakawalena na Kalou o koya o qarava kei na nona cakacaka o sa vakaitavitaki iko kina.¹⁸

A young man and his mother working in a flower garden as an elderly woman looks on. — “Na nomu qaravi tavi gugumatua ena sega ni vakawalena na Kalou o koya o qarava kei na nona cakacaka o sa vakaitavitaki iko kina.”

Sa noqu masu ni o keda kece sara, ka cakacaka vata tiko vaka veitacini dina ena matanitu ni Turaga, ni da na cakacaka sara meda rawata na cakacaka levu ka tiko mai liu.¹⁹

Ena tete yani ki vuravura taucoko ena itabagauna oqo na matanitu ni Kalou kei na cakacaka ni Turaga.

E dua na itabagauna va-Kosipeli e vakatokai me isolisoli kivei ira na italai digitaki vakatabui, ena vakatulewa ni Kalou ni kaukauwa kei na dodonu me vakatetei kina na vosa ni Kalou, ka vakayacora na veicakacaka tabu vakalotu e veiganiti kaya. …

E a tu eso na gauna ka a kautani kina na Kosipeli mai vei ira na tamata baleta na nodra cakacala. A vakakina ena gauna nei Noa. A vukitani o Isireli mai vua na Turaga ka vakatawani tu ena butobuto me vica na itabatamata ni bera na nona lako mai o Jisu Karisito, ia a vakalesuya tale mai na taucoko ni Kosipeli ena gauna a lako voli kina kei ira na tamata. A talai ira na nona tisaipeli o koya mera vunautaka na nona itukutuku ki vuravura taucoko, ia a sega ni sivi taumada e vica na senituri ni bera ni ra baci vakacalai tale na tamata ka vakayalia na dodonu mera vakayagataka kina na yaca ni Turaga. Oqo a vakavuna kina me tadolavi na lomalagi ka vakatakilai mai e dua na itabagauna vou me vakarautaka na lesu vakarua mai ni noda Turaga ena o kei lomalagi me mai vakatulewa e vuravura me dua na udolu na yabaki, na soqo ka na yaco oqo esa voleka, ka sa toka ena noda matanikatuba.²⁰

Na kosipeli vakatakikoya esa dua tu ga ena veitabagauna; na yavu ni veivakabulai esa dua tu ga vei ira kece na yabaki ni bula ni luve ni Tamada. Ena so na gauna esa dau yali mai na vukitani, ia ena veigauna kece e vakatikora kina na tamata e vuravura na Turaga, esa dau soli vei ira na lawa vata ga kei na dina ni veivakabulai ka a sa vakatakila vei keda o koya.

Ia e dua tiko na ilutua levu eda sa ciqoma ena gauna oqo ka a sega mada ni taukeni mai liu. Esa vakatulewataka na Turaga ena itabagauna oqo ni na sega tale ni vagolei vakatani na Lotu; sa na tiko vakadua eke na kosipeli ena gauna oqo. Na dina ka vakatakilai sa sagai tiko me vakarautaka ena gauna oqo e dua na matatamata me baleta na ikarua ni lako mai ni Luve ni Tamata, ka na tauyavutaki na Lotu ena veiyasana kece e vuravura ena gauna ka na lako mai kina na Turaga me tadolavi kina na gauna ni yabaki udolu ni vakacegu kei na buladodonu.²¹

Eda sa lewe ni dua na lotu e vuravura, e dua na lotu ka taukena na yavu ni bula kei na veivakabulai, e dua na lotu ka virikotora taumada na Turaga ena iotioti ni gauna oqo me kauta na nona itukutuku ni veivakabulai kivei ira kece na luvena e vuravura taucoko. …

Eda sa rawata na ituvaki kei na kaukauwa ka sa vakavurea tiko meda vakayacora taucoko na ilesilesi ka solia vei keda na Turaga mai vua na Parofita o Josefa Simici ka meda na kauta na itukutuku marautaki ni veivakalesuimai ki na veimatanitu taucoko kei na tamata kecega.

Eda na sega walega ni vunautaka na kosipeli ki na veimatanitu kecega ni se bera ni lako vakarua mai na Luve ni Tamata, ia eda na rawata eso na curuvou ka tauyavutaka na isoqosoqo ni Yalododonu ena kedra maliwa.²²

Na matanitu ni Kalou kei na cakacaka ni Turaga ena tete tikoga yani vagumatua; ena vakayacolomana sara vakatotolo e vuravura ena veisiga ni mataka mai na kena ka dau yaco tiko eliu. A sa tukuna vakakina na Turaga, ka sa tugana na kena ivolatukutuku na Yalotabu; kau sa wasea na noqu ivakadinadina ki na veika oqo, ka niu kila ni sa dina. Na matanitu ni Kalou esa tiko oqo me vakatuburi, me vakatetei ki vanua tani, mena vakawakana e vuravura, ka mena tikora dei toka na vanua e teivaka kina na Turaga mai na nona kaukauwa kei na nona vosa vakaikoya, mena sega tale ni qai vakarusai, ia me tomani tikoga me yacova ni sa vakacavari taucoko na inaki i Koya sa Cecere sara—na veivakavuvuli kece sara ka ra vosataka na parofita mai na gauna a tauyavutaki kina na vuravura. Esa cakacaka ni Kalou, ka o koya vakaikoya, mai na nona vuku ka sega mai na vuku ni tamata, a vakalesuya tale mai ki na vuravura ena gauna emuri.²³

Na kosipeli esa baleti ira na tamata taucoko, ka na tauyavutaki na Lotu ena veivanua kecega, ki na veimatanitu, ka vakakina ki na iyalayala kei vuravura, ni bera na lesu vakarua mai ni Luve ni Tamata.²⁴

Au kila ka vakadinadinataka ni na yaco vakakina e vuravura na inaki ni Turaga. Esa vakadeitaki koya eke na Lotu i Jisu Karisito ni Yalododonu Edaidai. Ena qaqa na cakacaka ni Turaga. E sega na kaukauwa e vuravura mena tarova na vakatetei ni dina kei na vunautaki ni kosipeli ki na veimatanitu.²⁵

Au sa biuta mai na noqu veivakalougatataki vei kemuni kei na noqu veivakadeitaki ni Kalou esa tiko vata kei ira na nona tamata, ka na qaqa na cakacaka eda sa vakaitavitaki keda kina ka ni na qiqi yani me yacova ni sa vakacavari taucoko na inaki tawamudu ni Turaga.²⁶

Vakatutu ni Vuli kei na Veivakavulici

Taro

Ena rawa vakacava ni da vakamuria na ivakaraitaki nei Peresitedi Smith ena noda veiqaravi vakalotu? (See “Na Bula nei Joseph Fielding Smith.”)
Vakasamataka vagumatua na ivakavuvuli nei Peresitedi Smith me baleta na Veivakalesuimai ni kosipeli (raica na iwasewase e 1). Na cava na nomu nanuma ena nomu vakasamataka tiko na nomu bula donuya na gauna e vakalesui tale mai kina ki vuravura na Lotu ni Turaga?
A vakadinadinataka o Peresitedi Smith ni o Jisu Karisito esa tiko ena ulu ni Lotu (raica na iwasewase e 2). O na rawa ni wasea vakacava na nomu ivakadinadina vua e dua ka sega ni lewe ni Lotu na dina oqo?
Esa vukei iko vakacava na veisoqosoqo kei na veiparokaramu ni Lotu mo ciqoma kina na veivakalougatataki ka tukuni tiko ena iwasewase e 3? Era sa vukea vakacava na nomu matavuvale?
A tukuna o Peresitedi Smith, “A lako mai ki vuravura na noda iVakabula me vakatavulici keda meda veilomani vakaikeda” (iwasewase e 4). Ena sala cava e rawa ni da vakamuria kina na ivakaraitaki ni loloma ni iVakabula ni da veiqaravi tiko vaka-dauveituberi vakavuvale se dauveisiko?
Ni ko raicalesu na iwasewase e 5, siqema na cava e duidui kina na itabagauna oqo mai na kena tale eso. Ena rawa ni vakayarayarataka vakacava na noda veiqaravi ena Lotu na kilai deivaki ni veika oqo? Na cava na nomu nanuma ni o vakasamataka tiko na vakarautaki ni vuravura me baleta na Lesu Vakarua mai ni iVakabula?

iVolanikalou Veisemati

Mosaia 18:17–29; V&V 1:30; 65:1–6; 115:4; 128:19–22

Veivuke ni Veivakavulici

“Ni o vakayagataka e vica na itaviqaravi vakavuli duidui, era na kila vakavinaka cake na vuli tiko na ivakavuvuli ni kosipeli ka ra na tugana e levu cake. Na iwalewale digitaki vakamatau e rawa ni matata cake kina, taleitaki, ka guiguilecavi dredre kina e dua na ivakavuvuli” (Veituberi, Me iLutua ni Noda Bula [1999], 106--107).