Wase 20

Loloma kei na Kauwai Baleti Ira Taucoko na Luvena na Tamada

“A nanuma ke kila kece na tamata se o cei o ira, ka kidava tiko na ivurevure vakalou ga era basika mai kina, … era na vakila na veikauwaitaki kei na veiwekani ena kedra maliwa ka na veisautaka na ivakarau ni bula taucoko ka kauta mai na sautu ki vuravura.”

Na Bula nei Joseph Fielding Smith

Joseph Fielding Smith Jr. kei John J. Stewart erau raica, “ni mai na veika lalai eda dau vakananuma, e na qai laurai vinaka sara kina o Joseph Fielding Smith ena kenai rairai dina.” Erau sa qai wasea e tolu na ivakaraitaki ni “veika lalai e dau vakananumi” sa cakava oti:

“Dua na siga mai na koniferedi ni lotu ena Mormon Tabernacle ena Temple Square e sasaga yani vakamataka lailai e dua na cauravou lailai yabaki 12 me rawa ni laki dabe ena dua na idabedabe ka voleka sara e liu. … Ni bera toka ga ni tekivu na soqoni, ka sa sinai vutucoqa tu na lomanivale, sa qai mai kerei koya na gone lailai oqo e dua na dauveiqaravi me solia na nona idabedabe me dabe kina e dua na Seneti ni Matanitu o Amerika. Ena yalomalumalumu a vakadonuya na gonetagane lailai qo, sa qai laki tucake tu ena matatagitagi, madua, kei na yalo-ca. O Peresitedi Joseph Fielding Smith “e raica vinaka tu yani na cauravou lailai qori ka yalovi koya sara me lako cake yani ka laki dabe vata kei koya [mai cake]. Ni tukuna vua na cauravou na ka sa yaco, qai kaya yani o koya, “Sega ni dodonu me cakava vei iko na dauveiqaravi o ya na ka oqori. Lako mai ka mai dabe vata kei au eke,” ka rau sa qai dabe vata toka ena kedra maliwa na iapositolo ni Lotu.

“Ena dua na siga ni vakatarogi ira tiko e dua na ilawalawa cauravou ena nodra biubiu tiko ki kaulotu me rua na yabaki baleta na Lotu, [koya] raica sara e dua na gone mai na vanua ni iteitei ko a lesi ena tokalau kei Canada. ‘Cauravou, mai ke ya sa rui batabata. E tiko li e dua na nomu kote ni katakata vinaka?” ‘E sega saka, e sega ni tiko e dua.’ A kauti koya na cauravou ki na tai kadua ni gaunisala ki na [dua] na sitoa ni volitaki sulu ka volia vua e dua na nona kote ni katakata vinaka sara.

“Na siga e a tokoni kina ena koniferedi me peresitedi ni Lotu, e a sasaga yani ena kedra maliwa na lewelevu e dua na goneyalewa lailai me saga me rau lululu. Ni tarai koya na ka e yaco o ya, oti sa qai lolou sobu ka keveta cake na goneyalewa lailai. Qai kila ni yacana o Venus Hobbs, … ka sa voleka sara tiko ni yabaki va. Ena nona siganisucu, e a ciqoma kina o Venus e dua na talevoni e veivakurabuitaki: erau qiri sara tiko mai vakayawa o Joseph Fielding Smith kei watina me rau lagata vua na ‘Happy Birthday’.”¹

Na veika vivinaka qo e sega walega ni vagauna, ia sa ivakarau tu ni bula ni veiqaravi. O Peresitedi Smith e “dua na turaga dauloloma ka yalololoma. Sa dau vakawasoma sara ga na kena laurai na kena iyaloyalo ena vanua e kune kina na nodra vukei na vakaloloma, vakalomavinakataki o ira na rarawa, vakasalataki o ira na veilecayaki, kei na kena bulataki na loloma uasivi ni sa ikoya na ‘loloma dina va-Karisito.’ [Moronai 7:47.]”²

iVakavuvuli nei Joseph Fielding Smith

Na kila ni Kalou e Tamada kece sara, eda na gadreva meda vakalougatataki ira e so tani tale.

Au nanuma ni kevaka eda na kila taucoko se o cei o keda, ka kidava na vanua eda taka mai kina, kei na veika e tiko vei keda ka tiki ni veika eda na rawata, ena tiko dina vei ira na yalo ni veikauwataki vei ira na wekadra, ka na veisautaka sara ga na ivakarau ni nodra bula ka kauta mai na bula sautu e vuravura.

Eda vakabauta na kena rakorako ka vakalou na vanua eda tekivu mai kina. Na noda vakabauta e yavutaki ena dina ni Kalou e Tamada, kei keda eda luvena, vakakina ni tamata kece sara e veitacini ena dua na matavuvale tawamudu.

Me vaka ni da lewe ni nona matavuvale, eda a bula vata mai kei koya ni bera ni buli na yavu ni vuravura eda bula tiko kina, ka sa virikotora ka vakatabuya na yavu ni veivakabulai ka sa noda kina na madigi meda mai bula ka tubu kina eke me vaka na veika eda sa digidigi kina.

Na Kalou eda qarava tiko, e lagilagi na Nona iSerau ka tiko kece vua na kaukauwa kei na veika totoka, ka sa bulia na tamata me ucui koya ka itovo vata kei koya, na mataqali itovo kei na ivakarau ka tiko kece sara ga vua.

Ni sa vaka tu ko ya na noda vakabauta na ituvaki kei na icavacava ni tamata, ni sa tiki ni noda ivakavuvuli vakalotu kei na ivakarau ni bula. Sa yavu sara ga ni ivakavuvuli ni noda Turaga ni “imatai ka ivunau levu duadua” na: “Mo lomani Jiova na nomu Kalou ena lomamu taucoko, kei na yalomu taucoko, kei na nomu nanuma kecega”; kei na ikarua ni ivunau levu na: “Mo lomana na kai nomu me vaka ko sa lomani iko.” (Raica na Maciu. 22:37–39.)

Me vaka ni Kalou e Tamada, ena tiko vei keda na gagadre meda lomana ka qaravi koya ka lewe ni nona matavuvale buladodonu. Sa na tiko na noda gagadre meda cakava na ka ena gadreva vei keda o koya, meda talairawarawa ki na nona ivunau ka bulataka na ivakavuvuli ni nona kosipeli—ni ra sa tiki kecega ni veika bibi baleta na noda qarava na lotu.

Ni da sa veitacini ga, sa na noda gagadre meda veilomani ka veivakaukauwataki vei ira—ni oqo talega sa tiki ni noda qarava na lotu.

O ya na vuna eda cakava tiko ena Lotu na veika e vakanamata ki na lawa vakalou ni dodonu meda lomana ka qarava na Kalou ka qaravi ira na kainoda.

Sa na sega ni dua e kurabui kina ni ena lotu vakakina o keda na lewena, sa tu e yaloda na noda nanuma na nodra bula o ira kece sara na luvena na Tamada. Eda na sasagataka na nodra bula vakayago kei na bula vakayalo vakakina na noda bula oi keda. Eda masulaki ira ni da sa masulaki keda, ka da tovolea meda bula tiko me rawa ni ra raica na ka vinaka eda sa cakava tiko ka ra na tovolea mera vakalagilagia na Tamada sa tiko mai lomalagi. [Raica na Maciu 5:16.]³

One oil on canvas painting of Peter healing the lame man. Done predominantly in shades of brown and gold. Shows a crippled beggar at right being lifted by Peter. Others look on. Scene is in front of a large building. — “Sa qai kaya ko Pita, na siliva kei na koula sa sega vei au; ia na ka ga sa tu vei au, au sa na solia vei iko: Ena yaca i Jisu Karisito na kai Nasareci, tucake ka lako” (Cakacaka 3:6).

Ni da sa veilomani ka veitokoni ena Lotu, eda sa na ivurevure vinaka ni kaukauwa e vuravura.

“Kevaka dou sa lomani au, dou talairawarawa ki na noqu vunau” [Joni 14:15].

Oqo na veivosa e a cavuta na iVakavuvuli ni vo toka e vica na auwa me mate, ni sa vakasoqoni ira vata mera mai kania na kanavata ni lako sivia, ka mai solia vei ira na iotioti ni ivakasala ni bera ni qai vakararawataki me baleta na ivalavala ca ni kai vuravura. Ena gauna vata ga o ya, ka bera ga vakalailai ni cavuta o koya na vosa oqori, e a tukuna vakaoqo ko koya me baleta na ulutaga vata ga:

“Oi kemudou na gone, vakalailai mada na noqu tiko vata kei kemudou. Dou na vaqarai au; me vaka ga au a sa kaya vei ira na Jiu, Na vanua au sa lako kina dou na sega ni rawa ni lako kina; kau sa kaya vei kemudou. E dua na vunau vou kau sa solia vei kemudou, mo dou veilomani, me vaka kau sa lomani kemudou, mo dou veilomani talega vakakina.” [Joni 13:33–34.] …

… Eda sa sega walega ni veitokani, eda sa veitacini ga, eda luvena na Kalou, ka da sa lako mai me vaka au sa kaya, mai vuravura ka ia na veiyalayalati, meda maroroya na lawa ka talairawarawa ena veika kecega ka sa soli mai ena veivakauqeti. Eda sa vakaroti me da dau veilomalomani. “E dua na ivunau vou” sa kaya na Turaga, ia me vaka ga na ivunau tale eso sa na makawa ga me vaka sa tawamudu. E se sega mada ni dua na gauna me sega ni a tiko kina na ivunau oqori, ka sega ni manata na veivakabulai, ia sa vaka ga e ka vou. Ena sega ni qase mai, baleta ni dina.⁴

Au vakabauta ni sa noda itavi meda veilomani, meda veivakabauti, meda veiyaloni, meda kakua ni vakaraica na nodra malumalumu e so tale, ka kakua ni mata lailaitaki ira ena noda rai se na rai na lewe ivuravura. Me sa kakua na veilasutaki, na veiliumuritaki, na veivosacataki, ena loma ni Lotu i Jisu Karisito ni Yalododonu Edaidai. Meda sa na veidinadinati, ena veivakavuvuli kece sara ni lotu ka me sa kakua na veilomacataki. Meda kakua ni veivuvutaki, se dau veicudruvi, se me yaco mai e yaloda na vakasama ni na sega ni rawa ni da na vosota e dua ni caka cala. Sega ni dodonu me tiko ena yalo ni tamata ni Kalou na yalo e sega ni rawa ni veivosoti, veitalia sara madaga se o cei o koya. …

… Me kakua ni tiko vei keda na yalo ni cata e dua, ia meda na dau veiciqomi ka veivosoti me vaka na veitacini. Me nanuma na tamata vakayadua na nona malumalumu ka sasagataka me vakadodonutaka. Eda se bera ni yacova na itagede ni vinaka sara ka na sega ni rawa oqori ena bula oqo, ia ena veivuke ni Yalo Tabu sa na rawa kina ni da na duavata, veiraici tiko e matanavotu ka valuta tiko na ivalavala ca kei na malumalumu. Kevaka meda na cakava oqori, meda muria na ivakaro kece ni Turaga, eda na rawa ni vu ni kaukauwa e vuravura, eda na vakamalumalumutaki vunica, na veisaqasaqa ki na dina, ka yavutaka na buladodonu e delai vuravura. Ena tete yani na kosipeli ka ra na vakila na tamata ena veiyasai vuravura na veika ena kauta yani vei ira na lewe i Saioni, ka ra na qai vakayarayarataki mera veivutunitaka na nodra ivalavala ca ka ciqoma na dina.⁵

Eda vakaraitaka na noda loloma vei ira na wekada ena noda qaravi ira.

E lako mai ki vuravura na iVakabula me tuberi keda meda veilomani, kei na kena sa matanataki na loloma o ya ena nona mai vakararawataki ka mate sara kina me rawa ni da na bula, ena sega li ni dodonu me vakakina vei keda ena noda na veiqaravi ena vukudra? …

E dodonu meda na veiqaravi ena vukudra na tani. Meda dodoliga yani ka vukei ira na vakaleqai, vei ira era se bera ni rogoca na dina ka ra tu ena butobuto, vei ira na vakaloloma kei ira era vakararawataki. Ko sega tiko li ni rawata? Meda nanuma tiko na qaqani sere nei, Will L. Thompson. … Tekivu vakaoqo na serekali:

“Au cakavinaka beka li edai?
Sa dua li e bau vukei?
Au veivakayalo,
Qaqataki tu li?
Ke sega au sa druka.” [Serenilotu, naba 131.]6                        

A young adult woman helping an older woman in an electric cart do grocery shopping. — Ni da sa dodoliga ka vukei ira na tani eda sa vakaraitaka na noda lomani ira.

Sa noda ilesilesi ki vuravura taucoko— na bula sautu, na inuinui, kei na marau, kei na bula vakayago kei na nodra bula tawamudu na luvena na Tamada. … Na kaukauwa kece ni veivakauqeti e tu vei au, au sa vakamasuti ira na tamata oqo mera tomana na nodra dodoliga yani ka vakalougatataki ira na luvena na Tamada ena veivanua kece sara.⁷

Meda na vakavinavinakataki ira na tamata ena nodra bula.

Niu a se gonetagane lailai, dau dua tiko na neitou ose na yacana o Junie. Qo e dua na manumanu vuku sara au se qai bau raica vakadua. E vakasara ga e dua na tamata na ka e rawa ni cakava. Sega ni rawa meu lokataki koya ena vale ni manumanu baleta ni dau luvata laivi na beleti e vesuka tu na katuba ni nona imocemoce. Au dau vakacuruma na beleti ena isema ni katuba ki na imocemoce ena ulu ni duru ni katuba, e qai dau luvata laivi o koya ena nona vakayagataka na ucuna kei na batina. Sa qai dau curu yani ka laki tu e tuba.

Tiko e dua na paipo e tuba me dau tawa kina na vanua mera gunu kina na neitou manumanu. Ena qai dau dolava o Junie na paipo ena batina ka qai biuta me drodro tu na wai. Qai dau cudruvi au o tamaqu niu sega ni lokata vinaka na ose ena vale ni manumanu. Sega vakadua ni dro; ena dau dolava ga na wai ka qai mai taubale wavoki tu se lako yani ki veico me laki kana kina. Ena lomaloma ni bogi, au na dau rogoca na wai ni sa drodro tu, kau sa na qai dau duri ka laki sogota ka laki lokati Junie tale e vale ni manumanu.

Tukuna o tamaqu ni sa vaka e vuku cake na ose mai vei au. Dua na siga sa lomana me sa na lokataki koya me rawa ni kua tale ni curu mai tuba. Taura na beleti ka dau vesuka na katuba ki na duru ka viviga wavoki qai vakadreta matua sara ena dela ni duru qai laki vesuka ena ruku ni kena kau vakababa, sa qai mai kaya yani, “ Ra marama, laurai mada se o na dro laivi rawa mai keri!” Keirau biuta na vale ni manumanu ka lako yani ki vale, ia ni bera ni keirau yaco kina sa tu tale o Junie e yasai keirau. Lako ga o koya ka dolava sara na paipo ni wai.

Au kaya ga yani ni o koya sa bau matai sara ga ena ka e cakava me vakataki keirau ruarua. Sa sega sara ga ni rawa me keirau sogolati Junie tu ga ena nona imocemoce. O ya e sega ni kena ibalebale ni o koya e sa rui ca, baleta ni sega sara tikoga e sega ni via volitaki koya o tamaqu, baleta ni tiko e levu sara na ka vinaka e rawa ni cakava o koya.

Sa bau nuitaki sara toka ga na ose qo ni dau dreta na qiqi ni veitosoyaki mai vale, me vaka ga na nona dau drotaka mai na vale ni manumanu. Qo sa ka bibi sara, baleta ni o Tinaqu e vakalaiseni ni nasi vakasucugone. Ni dau kacivi mai me laki qarava e dua mai na bucabuca, vakabibi ena bogilevu, au dau lako ki na vale ni manumanu ka laki vakarautaki Junie me dreta yani na qiqi.

Au a se qai yabaki tini se tinikadua tiko ena gauna oqori; ia na ose qori sa dau yalomalua sara ka kaukauwa me rawa ni kauti keirau kei tinaqu ki na bucabuca ena veimataqali draki kecega. Dua na ka au sega ni kila rawa, se cava era dau qai sucu ga kina na gone ena bogi, ka lewe levu vei ira ena gauna ni batabata.

Au dau waraki tinaqu tu ga ena qiqi, kau taleitaka ni keirau tu vata ya kei Junie. Na veika e yaco tiko oqo e vinaka sara tiko vei au, baleta niu se tekivutaka gone mai na noqu taleitaki koya. E ose vinaka sara o koya ia e tiko vua e so na ka e sega soti sara ni vinaka. Era tautauvata vaka o ya na tamata. E sega ni dua vei keda e sa vinaka sara na nona bula, ia eda sasaga tiko yani kina, me vaka sara ga na Tamada Vakalomalagi. E dodonu meda vakavinavinakataka ka lomani ira na tamata ena ka era sa rawata.

De na rairai ganita mo nanuma tiko na ka oqo ena gauna ko na vakadikevi ira kina na nomu itubutubu se o ira na nomu qasenivuli se iliuliu ni tabanalevu se iteki se nomu itokani—se tacimu se ganemu. Na lesoni qo e se kasa dei tu ga vei au—meda raica ga na ka vinaka e tu ena nodra bula, dina ga ni da sasagataka tiko mera galala mai na ivakarau ca. …

Au a vulica niu se gone meu loloma ka kakua ni vakalewai ira na tani, ena noqu sasagataka tikoga meu galala mai na noqu cala.⁸

Ni da lomana na Turaga ena yaloda kei ira na wekada me vakataki keda, eda sa bula kaya tiko na lawa tabu cecere taucoko.

“Mo lomani Jiova na nomu Kalou ena lomamu taucoko, kei na yalomu taucoko, kei na nomu nanuma kecega.”

Ai matai ni vunau oqo ka levu.

“A sa tautauvata na kenai karua, Mo lomana na kai nomu me vaka ko lomani iko.

“Sa vu ni vunau taucoko kei ira na parofita na vunau e rua oqo. ” (Maciu 22:37–40.)

Dua tale na kena itukutukuni, ni veika taucoko sa vakatakilai mai me baleta na vakabulai ni tamata mai na ivakatekivu me yacova ni kua, sa semati vata tu ena rua na ivunau levu oqo. Kevaka meda lomana na Turaga ena yaloda taucoko, ena lomada taucoko, ena noda nanuma kecega, kei ira na wekada me vakataki keda, sa na sega tale ni dua na ka ena qai gadrevi. Eda sa na qai semati taucoko kei na isoqoni ni lawa taucoko. Kevaka meda sa vakadonuya meda bulataka na rua na ivunau lelevu oqo—ka sa dodonu me na vakakina e matana na Kalou—sa na qai vakawabokotaki kece na ivalavala ca me vaka na vuvu, kocokoco, kei na laba e vuravura. Sa na qai yaco mai na siga ni vakacegu kei na marau tawamudu. Qori sa na dua na siga lagilagi! Eda sa vakalougatataki ena ivunau meda kila, ni sa vaka tu oqori na ituvaki ni bula sa na qai yaco mai vua na tamata na ka e gadreva ka na qai tauyavutaki na Veitamani kei na Kalou kei na veitacini ni tagane.

… Ena rawa li ni da tukuna ni da lomana na Kalou ena lomada taucoko? Ena rawa li ni da tukuna ni da sa gadreva dina sara meda veivukei vei ira na wekada me vaka na noda vukei keda vakaikeda?⁹

Meda sa lomana na Turaga ni sa ikoya qo na yavu ni veika kece. Ni sa imatai ni vunau vakakina na ikarua ni vunau, meda lomani ira na wekada me vakataki keda, sa tautauvata kaya, ia ni da sa cakava o ya eda sa vakataucokotaka na lawa, baleta ni na sega tale ni dua na ka ena sega ni caka.¹⁰

Vakatutu ni Vuli kei na Veivakavulici

Taro

Vakananuma na “veika lalai e dau vakasamataka” me dau cakava o Peresitedi Joseph Fielding Smith vei ira na tamata (raica Na Bula nei Joseph Fielding Smith”). Na cava e rawa ni da tauyavutaka mena tautauvata na ivakarau ni yalovinaka ena noda dui bula?
Ena rawa vakacava ki na ivunau ena iwasewase 1 me vukei keda meda yalololoma vei ira eda bula veitikivi tiko?
Na cava e lauti iko ena ivakasala nei Peresitedi Smith ena iwasewase 2? Na cava o nanuma kina ni da na “vuni kaukauwa e vuravura baleta na vinaka” ni da vakamuria na ivakasala oqo?
Na cava sa cakava o Jisu Karisito me “vakavulici keda kina meda veilomani”? (Raica na iwasewase 3.) Eda na muria vakacava na Nona ivakaraitaki?
Railesuva na italanoa baleti Junie na ose (raica na iwasewase 4). Na cava o nanuma ni ka bibi, “meda lomani ira na tamata me vakataki ira”? Na cava e rawa ni da cakava meda na raica tikoga na vinaka ena nodra bula kevaka sara mada ga eda tovolea tiko mera kauta laivi na veika ca mai na nodra bula?
Na cava na kena ibalebale vei iko mo talairawarawa ki na ivunau ena Maciu 22:37–40? (Me kedra ivakaraitaki, raica na iwasewase 5.) Na cava eda “bula tiko kina ena loma ni lawa cecere” ni da talairawarawa ki na ivunau?

iVolanikalou Veisemati

Cakacaka 17:28–29; Roma 8:16–17; 1 Joni 4:18–21; Mosaia 2:17; 18:8–10; Moronai 7:45–48

Veivuke ni Veivakavulici

Vakasamataka mo sureti ira e so mera wilika na ulutaga lalai ena iwase ni ivola ka digitaka na kena e ibalebale vei ira se nodra matavuvale. Sureti ira mera vulica na ivakavuvuli nei Peresitedi Smith ena iwase o ya, wili kina na taro e veidonumaki ena mua ni kena iwase. Qai kerei ira me ra wasea na veika era sa vulica.